“Mdogo” Amekuwa “Elfu”

“Mdogo atakuwa elfu, na mnyonge atakuwa taifa hodari.” —ISAYA 60:22.

1, 2. (a) Kwa nini giza laifunika dunia leo? (b) Nuru ya Yehova imewaangaziaje watu wake hatua kwa hatua?

“GIZA litaifunika dunia, na giza kuu litazifunika kabila za watu; bali BWANA atakuzukia [“atakuangazia,” NW] wewe, na utukufu wake utaonekana juu yako.” (Isaya 60:2) Maneno hayo yaonyesha vizuri jinsi hali ilivyo duniani tangu mwaka wa 1919. Jumuiya ya Wakristo imekataa ishara ya kuwapo kwa kifalme kwa Yesu Kristo, aliye “nuru ya ulimwengu.” (Yohana 8:12; Mathayo 24:3) Kwa sababu ya “hasira kubwa” ya Shetani, mkuu wa “watawala wa ulimwengu wa giza hili,” karne ya 20 ilikuwa ndiyo wakati katika historia ya mwanadamu ulio mkatili na wenye uharibifu mkubwa zaidi. (Ufunuo 12:12; Waefeso 6:12) Watu wengi huishi katika giza la kiroho.

² Ingawa hivyo, nuru yang’aa leo. Yehova mwenyewe ‘huwaangazia’ watumishi wake, mabaki watiwa-mafuta, ambao ni wawakilishi wa duniani wa ‘mwanamke’ wake wa mbinguni. (Isaya 60:1, linganisha NW.) Hasa tangu waachiliwe kutoka utekwa wa Kibabiloni mwaka wa 1919, hao wamedhihirisha utukufu wa Mungu nao ‘wameacha nuru yao ing’ae mbele ya watu.’ (Mathayo 5:16) Toka mwaka wa 1919 hadi 1931, nuru ya Ufalme imezidi kung’aa huku mabaki hao wakiachilia mbali vipingamizi vilivyosalia vya mawazo ya Kibabiloni. Idadi yao iliongezeka kufikia makumi ya maelfu Yehova alipoendelea kutimiza ahadi yake: “Bila shaka nitawakusanya waliobaki wa Israeli; nitawaweka pamoja kama kondoo wa Bozra; kama kundi la kondoo kati ya malisho yao; watafanya mvumo kwa wingi wa watu.” (Mika 2:12) Mwaka wa 1931, utukufu wa Yehova juu ya watu wake ulikuwa wazi hata zaidi walipochukua jina Mashahidi wa Yehova.—Isaya 43:10, 12.

 3. Ilipataje kuwa wazi kwamba nuru ya Yehova ingeangazia wengine mbali na watiwa-mafuta?

³ Je, Yehova angewaangazia waliobaki wa “kundi dogo” peke yao? (Luka 12:32) La. Toleo la Mnara wa Mlinzi la Septemba 1, 1931, la Kiingereza, lilitaja kikundi kingine. Katika maelezo mazuri juu ya Ezekieli 9:1-11, lilionyesha kuwa mtu aliye na kidau cha wino cha mwandishi atajwaye katika mistari hiyo huwakilisha mabaki watiwa-mafuta. Ni nani wanaotiwa alama kwenye vipaji vya nyuso na “mtu” huyo? Ni “kondoo wengine,” walio na tumaini la kuishi milele katika dunia paradiso. (Yohana 10:16; Zaburi 37:29) Mwaka wa 1935, ilitambuliwa kuwa kikundi hicho cha “kondoo wengine” ni “umati mkubwa . . . kutoka katika mataifa yote” ambao mtume Yohana aliuona katika ono. (Ufunuo 7:9-14) Toka mwaka wa 1935 hadi sasa, mkazo mwingi umewekwa juu ya kukusanywa kwa huo umati mkubwa.

 4. Ni nani walio “wafalme” na “mataifa” wanaorejezewa katika Isaya 60:3?

⁴ Kazi hiyo ya kukusanya yagusiwa katika unabii wa Isaya usemapo: “Mataifa wataijilia nuru yako, na wafalme kuujia mwanga wa kuzuka kwako.” (Isaya 60:3) “Wafalme” wanaotajwa hapo ni kina nani? Ni waliobaki wa wale 144,000 ambao, pamoja na Yesu Kristo, ni warithi-washirika wa Ufalme wa mbinguni, nao wameongoza katika kazi ya kutoa ushahidi. (Waroma 8:17; Ufunuo 12:17; 14:1) Leo, maelfu machache ya waliobaki wa mabaki hao watiwa-mafuta wamepitwa kabisa na “mataifa,” wale walio na tumaini la uhai duniani wanaomjia Yehova ili kufundishwa na kuwaalika wengine wafanye vivyo hivyo.—Isaya 2:3.

Watumishi wa Yehova Wenye Bidii

 5. (a) Ni mambo gani yaonyeshayo kwamba bidii ya watu wa Yehova haikupungua? (b) Ni nchi gani zilizokuwa na ongezeko lenye kutokeza mwaka wa 1999? (Ona chati kwenye ukurasa wa 17-20.)

⁵ Watumishi wa kisasa wa Yehova walionyesha bidii iliyoje kwa muda wote wa karne ya 20! Na licha ya mibano inayoongezeka, bidii yao haikupungua mwaka wa 2000 ulipokuwa ukikaribia. Bado waliichukulia kwa uzito sana amri hii ya Yesu: “[Fanyeni] wanafunzi kutoka kwa watu wa mataifa yote.” (Mathayo 28:19, 20) Idadi ya wahubiri watendaji wa habari njema katika mwaka wa mwisho wa utumishi katika karne ya 20 ilifikia kilele kipya cha 5,912,492. Walitumia jumla yenye kutokeza ya saa 1,144,566,849 wakiongea na wengine juu ya Mungu na makusudi yake. Walifanya ziara za kurudia 420,047,796 kwa watu wanaopendezwa na wakaongoza mafunzo ya Biblia nyumbani yapatayo 4,433,884 bila malipo. Hiyo ni rekodi nzuri kama nini ya utumishi wenye bidii!

 6. Mapainia walifanyiwa mpango gani mpya, kukawa na itikio gani?

⁶ Mwezi wa Januari mwaka uliopita, Baraza Linaloongoza lilitangaza mabadiliko ya takwa la saa kwa mapainia. Wengi waliitumia nafasi hiyo kuanza utumishi wa painia wa kawaida au msaidizi. Kwa kielelezo, wakati wa miezi minne ya kwanza ya mwaka wa kalenda wa 1999, ofisi ya tawi ya Uholanzi ilipokea maombi ya upainia wa kawaida mara nne zaidi ya kipindi kilekile cha mwaka uliotangulia. Ghana yaripoti hivi: “Tangu takwa jipya la saa za painia lianze kutumika, idadi ya mapainia wetu wa kawaida imezidi kuongezeka.” Katika mwaka wa utumishi wa 1999, idadi ya mapainia ulimwenguni kote ilifikia 738,343—wonyesho wa ajabu wa “bidii kwa kazi zilizo bora.”—Tito 2:14.

 7. Yehova amebarikije utendaji wenye bidii wa watumishi wake?

⁷ Je, Yehova amebariki utendaji huo wenye bidii wa watumishi wake? Ndiyo. Kupitia Isaya yeye asema: “Inua macho yako, utazame pande zote; wote wanakusanyana; wanakujia wewe; wana wako watakuja kutoka mbali. Na binti zako watabebwa nyongani.” (Isaya 60:4) “Wana” na “binti” watiwa-mafuta ambao wamekusanywa bado wanamtumikia Mungu kwa bidii. Na sasa, kondoo wengine wa Yesu wanakusanywa upande wa “wana” na “binti” za Yehova watiwa-mafuta katika nchi na visiwa vya bahari 234.

“Kila Kazi Njema”

 8. Mashahidi wa Yehova ni watendaji katika ‘kazi gani njema’?

⁸ Wakristo wana wajibu wa kuhubiri habari njema ya Ufalme na kuwasaidia wanaopendezwa wawe wanafunzi. Lakini ‘wameandaliwa vifaa kwa ajili ya kila kazi njema.’ (2 Timotheo 3:17) Kwa hiyo, wao hutunza familia zao kwa upendo, huonyesha ukaribishaji-wageni, na kuwatembelea wagonjwa. (1 Timotheo 5:8; Waebrania 13:16) Na wajitoleaji wanashughulikia miradi kama vile ujenzi wa Majumba ya Ufalme—kazi inayotoa ushahidi pia. Huko Togo, baada ya ujenzi wa jumba moja, watu wenye madaraka katika kanisa moja walitaka kujua sababu iliyofanya Mashahidi wa Yehova wajenge majengo yao wenyewe ilhali ilibidi kanisa liajiri wajenzi! Togo yaripoti kwamba ujenzi wa Majumba ya Ufalme yaliyo bora una matokeo mazuri kwenye ujirani hivi kwamba watu fulani hujaribu kupangisha au kujenga nyumba katika maeneo ambamo majumba hayo yanuiwa kujengwa.

 9. Mashahidi wa Yehova wametendaje misiba inapotokea?

⁹ Nyakati nyingine, kunahitajika kazi njema ya aina nyingine. Katika mwaka wa utumishi uliopita, nchi nyingi zilikumbwa na misiba, na mara nyingi wa kwanza kufika mahali hapo kutoa misaada walikuwa Mashahidi wa Yehova. Kwa kielelezo, sehemu nyingi za Honduras ziliharibiwa kabisa na Kimbunga kiitwacho Mitch. Mara moja, ofisi ya tawi ikaanzisha halmashauri za dharura za kuratibu mipango ya kutoa misaada. Mashahidi nchini Honduras na katika nchi nyinginezo nyingi walitoa misaada ya mavazi, chakula, dawa, na bidhaa nyingine za lazima. Halmashauri za Ujenzi za Mkoa zilitumia stadi zao kwa minajili ya kujenga nyumba upya. Punde si punde, ndugu zetu walioathiriwa na msiba huo walikuwa wakisaidiwa kurudia utendaji wao wa kawaida. Nchini Ekuado, Mashahidi wa Yehova walikuja kuwasaidia ndugu zao mafuriko makubwa yalipoharibu nyumba kadhaa. Baada ya kuchunguza njia bora ambayo ndugu walishughulikia hali hiyo, ofisa mmoja wa serikali alisema: “Ikiwa ningeweza kutumia kikundi hiki, ningefanya maajabu! Sehemu zote ulimwenguni zapasa kuwa na watu kama nyinyi.” Kazi hiyo njema humletea Yehova Mungu sifa nayo ni uthibitisho wa “ujitoaji-kimungu [wetu ambao] ni wenye manufaa kwa mambo yote.”—1 Timotheo 4:8.

Wanakuja ‘Wakiruka Kama Wingu’

10. Licha ya idadi inayopungua ya watiwa-mafuta, kwa nini jina la Yehova linatangazwa kwa njia isiyo na kifani?

¹⁰ Yehova sasa auliza: “Ni nani hawa warukao kama wingu, na kama njiwa waendao madirishani kwao? Hakika yake visiwa vitaningojea, na merikebu za Tarshishi kwanza, ili kuleta wana wako kutoka mbali . . . Wageni watajenga kuta zako, na wafalme wao watakuhudumu.” (Isaya 60:8-10) “Wana” wa Yehova, yaani Wakristo watiwa-mafuta, ndio waliokuwa wa kwanza kuitikia ‘kuangaza’ kwa Yehova. Kisha wakaja “wageni,” umati mkubwa, wanaowahudumia ndugu zao watiwa-mafuta kwa uaminifu-mshikamanifu, wakifuata mwongozo wao katika kuhubiri habari njema. Hivyo basi, ijapokuwa idadi ya watiwa-mafuta inapungua, jina la Yehova linatangazwa duniani kote kwa njia isiyo na kifani.

11. (a) Ni nini ambacho bado chaendelea, na kulikuwa na matokeo gani mwaka wa 1999? (b) Ni nchi zipi ambazo zilikuwa na idadi zenye kutokeza za waliobatizwa mwaka wa 1999? (Ona chati kwenye ukurasa wa 17-20.)

¹¹ Matokeo ni kwamba mamilioni wanamiminika “kama njiwa waendao madirishani kwao” na kupata usalama katika kutaniko la Kikristo. Mamia ya maelfu huongezwa kila mwaka, na njia bado iko wazi kwa wengine zaidi. Isaya asema: “Malango yako nayo yatakuwa wazi daima; hayatafungwa mchana wala usiku; ili watu wapate kukuletea utajiri wa mataifa.” (Isaya 60:11) Mwaka uliopita watu 323,439 walibatizwa kwa kuonyesha wakfu wao kwa Yehova, naye bado hajafunga malango. “Vitu vyenye thamani vya mataifa yote,” washiriki wa umati mkubwa, vingali vyamiminika humo. (Hagai 2:7, NW) Yeyote anayetaka kuacha giza hafukuzwi kamwe. (Yohana 12:46) Watu wote wa aina hiyo wasiache kamwe kuthamini nuru!

Hawana Hofu Licha ya Upinzani

12. Wale wanaopenda giza wamejaribuje kuzima nuru?

¹² Wale wanaopenda giza huchukia nuru ya Yehova. (Yohana 3:19) Wengine hata hujaribu kuizima nuru hiyo. Hilo latarajiwa. Hata Yesu, aliye “nuru ya kweli ambayo humpa nuru mtu wa kila namna,” alidhihakiwa, akapingwa, na hatimaye akauawa na wananchi wenzake. (Yohana 1:9) Katika karne yote ya 20, Mashahidi wa Yehova pia wamedhihakiwa, wamefungwa jela, wamepigwa marufuku, hata kuuawa, walipokuwa wakiendelea kudhihirisha nuru ya Yehova kwa uaminifu. Katika miaka ya karibuni, wapinzani wametumia mbinu ya kusambaza uwongo katika vyombo vya habari kuhusu wale wanaodhihirisha nuru ya Mungu. Wengine hutaka kufanya watu waamini kuwa Mashahidi wa Yehova ni hatari na wanapaswa kuzuiwa au kupigwa marufuku. Je, wapinzani hao wamefaulu?

13. Kutoa ukweli wa mambo kwa busara kwenye vyombo vya habari kuhusu kazi yetu kumetokeza nini?

¹³ La. Mahali pafaapo, Mashahidi wa Yehova wameviendea vyombo vya habari ili kueleza ukweli wa mambo. Matokeo ni kwamba jina la Yehova limetangazwa kwa mapana na marefu katika magazeti na kwenye redio na televisheni. Hayo yamekuwa na matokeo mazuri kwa kazi ya kuhubiri. Kwa kielelezo, huko Denmark, programu moja kwenye televisheni ilishughulikia habari juu ya “Sababu inayofanya imani ya watu wa Denmark ififie.” Mashahidi wa Yehova, pamoja na wengine, walihojiwa. Baadaye, bibi mmoja aliyeona programu hiyo alisema hivi: “Wale waliokuwa na roho ya Mungu walijulikana wazi kabisa.” Mpango wa kujifunza naye ulianzishwa.

14. Wapinzani watalazimika kutambua nini kwa huzuni?

¹⁴ Mashahidi wa Yehova wanafahamu kwamba wengi katika ulimwengu huu watawapinga. (Yohana 17:14) Ingawa hivyo, unabii wa Isaya unawatia moyo: “Wana wa watu wale waliokutesa watakuja kwako na kukuinamia; nao wote waliokudharau watajiinamisha hata nyayo za miguu yako; nao watakuita, Mji wa BWANA, Sayuni wa Mtakatifu wa Israeli.” (Isaya 60:14) Wapinzani watapata huzuni hivi karibuni watakapolazimika kutambua kwamba kumbe wamekuwa wakipigana na Mungu mwenyewe. Ni nani awezaye kushinda pigano hilo?

15. Mashahidi wa Yehova ‘hunyonyaje maziwa ya mataifa,’ na hilo limedhihirikaje katika kazi yao ya kufundisha na kueneza evanjeli?

¹⁵ Na zaidi, Yehova aahidi hivi: “Nitakufanya kuwa fahari ya milele . . . Utanyonya maziwa ya mataifa, utanyonya matiti ya wafalme; nawe utajua ya kuwa mimi, BWANA [“Yehova,” NW], ni mwokozi wako.” (Isaya 60:15, 16) Naam, Yehova ndiye Mwokozi wa watu wake. Wakimtegemea, watadumu “milele.” Nao ‘watanyonya maziwa ya mataifa,’ kwa kutumia mali fulani zilizopo kuendeleza ibada ya kweli. Kwa kielelezo, utumizi wenye busara wa kompyuta na tekinolojia ya mawasiliano hufanya iwezekane kuchapisha sawia Mnara wa Mlinzi katika lugha 121 na Amkeni! katika lugha 62. Programu maalumu ya kompyuta imetayarishwa ili kusaidia kutafsiri Tafsiri ya Ulimwengu Mpya katika lugha mpya, na hilo huleta shangwe kubwa. Chapa ya Kikroatia ya Maandiko ya Kigiriki ya Kikristo ilipotolewa mwaka wa 1999, maelfu walitoa machozi ya shangwe. Ndugu mmoja mzee alisema hivi: “Nimeisubiri Biblia hii kwa muda mrefu sana. Sasa naweza kufa kwa amani!” Nakala za Tafsiri ya Ulimwengu Mpya ambazo zimeenezwa, ikiwa nzima au ikiwa sehemu, zimepita milioni 100 katika lugha 34.

Viwango vya Juu vya Maadili

16, 17. (a) Ingawa ni vigumu, sababu gani ni muhimu kudumisha viwango vya juu vya Yehova? (b) Ni jambo gani lililoonwa linaloonyesha kwamba vijana waweza kuepuka kuchafuliwa na ulimwengu?

¹⁶ Yesu alisema: “Yeye ambaye huzoea kufanya mambo maovu huchukia nuru.” (Yohana 3:20) Kwa upande mwingine, wale wanaobaki nuruni huvipenda viwango vya juu vya Yehova. Yehova asema hivi kupitia Isaya: “Watu wako nao watakuwa wenye haki wote.” (Isaya 60:21a) Yaweza kuwa vigumu kudumisha viwango vya uadilifu katika ulimwengu ambamo ukosefu wa adili katika ngono, kusema uwongo, pupa, na kiburi zimejaa sana. Kwa kielelezo, katika nchi fulani, uchumi unasitawi kwa haraka na ni rahisi kukengeushwa kwa kufuatilia sana mali. Hata hivyo, Paulo alionya hivi: “Wale waazimiao kuwa matajiri huanguka ndani ya kishawishi na mtego na tamaa nyingi zisizo za akili na zenye kuumiza, ambazo hutumbukiza watu ndani ya uharibifu na uangamizo.” (1 Timotheo 6:9) Ni huzuni kama nini mtu ajihusishapo sana na shughuli za biashara hivi kwamba adhabihu mambo muhimu kikweli, kama vile ushirika wa Kikristo, utumishi mtakatifu, kanuni za maadili, na majukumu ya familia!

¹⁷ Yaweza kuwa vigumu hasa kwa vijana kudumisha viwango vya uadilifu, kwa kuwa marika wao wengi sana wanajihusisha na matumizi mabaya ya dawa za kulevya na ukosefu wa adili. Huko Suriname, mvulana mmoja mwenye sura nzuri shuleni alimwomba msichana wa miaka 14 kwamba wafanye ngono pamoja. Msichana alikataa, akaeleza kuwa Biblia hukataza mambo hayo nje ya ndoa. Wasichana wenzake shuleni walimdhihaki na kujaribu kumkaza abadili nia yake, wakisema kwamba kila msichana alitaka kulala na mvulana huyo. Hata hivyo, msichana huyo mdogo alikataa katakata. Majuma machache baadaye, mvulana huyo alipimwa na ikapatikana kuwa ana virusi vya UKIMWI naye akawa mgonjwa sana. Msichana huyo alifurahi kwa sababu alikuwa ametii sheria ya Yehova ya ‘kujiepusha na uasherati.’ (Matendo 15:28, 29) Mashahidi wa Yehova wanaonea fahari sana wachanga miongoni mwao ambao wanasimama imara kufanya yaliyo mema. Imani yao, na ya wazazi wao, ‘hulitukuza’—huliletea heshima—jina la Yehova Mungu.—Isaya 60:21b.

Yehova Amesababisha Ongezeko

18. (a) Yehova amewafanyia watu wake jambo gani kubwa? (b) Kuna uthibitisho gani kwamba ongezeko litaendelea, na kuna matazamio gani matukufu kwa wale wanaodumu nuruni?

¹⁸ Naam, Yehova huwaangazia watu wake nuru, huwabariki, huwaongoza, na kuwatia nguvu. Katika karne ya 20, waliona utimizo wa maneno ya Isaya: “Mdogo atakuwa elfu, na mnyonge atakuwa taifa hodari; mimi, BWANA, nitayahimiza hayo wakati wake.” (Isaya 60:22) Kutokana na wale wachache mwaka wa 1919, “mdogo” amekuwa zaidi ya “elfu.” Na mwisho wa ongezeko hilo haujafika bado! Mwaka jana, 14,088,751 walihudhuria sherehe ya Ukumbusho wa kifo cha Yesu. Wengi wa watu hao hawakuwa Mashahidi watendaji. Twafurahi kwamba walihudhuria mwadhimisho huo muhimu, nasi twawaomba waendelee kuelekea nuru. Yehova angali anaangazia sana watu wake. Mlango unaoelekeza kwenye tengenezo lake ungali wazi. Basi, wote na waazimie kudumu katika nuru ya Yehova. Hiyo hutupa baraka zilizoje sasa! Nayo italeta shangwe iliyoje wakati ujao ambapo uumbaji wote utamsifu Yehova na kushangilia katika mng’ao wa utukufu wake!—Ufunuo 5:13, 14.

Waweza Kueleza?

• Ni nani ambao wamedhihirisha utukufu wa Yehova katika siku hizi za mwisho?

• Ni nini kionyeshacho kuwa bidii ya watu wa Yehova haikupungua?

• Mashahidi wa Yehova wanajishughulisha na baadhi ya kazi gani zilizo njema?

• Licha ya upinzani mkali, sisi tuna uhakika gani?

[Chati katika ukurasa wa 17-20]

RIPOTI YA MWAKA WA UTUMISHI WA 1999 YA MASHAHIDI WA YEHOVA ULIMWENGUNI POTE

(Ona buku lililojalidiwa)

[Picha katika ukurasa wa 15]

Watu wangali wamiminika kwenye tengenezo la Yehova

[Picha katika ukurasa wa 16]

Twafurahi kwa sababu Yehova ameuacha mlango ukiwa wazi kabisa kwa wale wanaopenda nuru