Unaalikwa kwa Uchangamfu

HUENDA umepita nje ya Jumba la Ufalme la Mashahidi wa Yehova katika eneo lenu na ukajiuliza ni nini kinachotendeka humo ndani. Je, ulijua kwamba mtu yeyote anakaribishwa kuhudhuria mikutano yao ya kila juma? Wageni wanakaribishwa kwa uchangamfu.

Hata hivyo, huenda ukawa na maswali fulani. Kwa nini Mashahidi wa Yehova wanakutanika pamoja? Ni nini kinachotendeka katika mikutano hiyo? Na wageni ambao si Mashahidi wa Yehova wanasema nini kuhusu mikutano hiyo?

“Wakutanishe Watu”

Tangu nyakati za kale, watu wamekusanyika pamoja kuabudu na kujifunza kumhusu Mungu. Karibu miaka 3,500 iliyopita, Waisraeli waliambiwa hivi: “Wakutanishe watu, wanaume na wanawake na watoto wadogo na mkaaji mgeni aliye ndani ya malango yako, ili wasikilize na ili wajifunze, kwa maana ni lazima wamwogope Yehova Mungu wenu na kuwa waangalifu kuyatimiza maneno yote ya sheria hii.” (Kumbukumbu la Torati 31:12) Hivyo, katika Israeli, vijana kwa wazee walifundishwa kumwabudu na kumtii Yehova Mungu.

Miaka mingi baadaye, kutaniko la Kikristo lilipoanzishwa, mikutano iliendelea kuwa sehemu muhimu ya ibada ya kweli. Mtume Paulo aliandika hivi: “Tujitahidi kushughulikiana kwa ajili ya kuongezeana bidii ya kupendana na kutenda mema. Tusiache ile desturi ya kukutana pamoja, kama vile wengine wanavyofanya. Bali tunapaswa kusaidiana.” (Waebrania 10:24, 25, Biblia Habari Njema) Kama tu uhusiano wa familia unavyoimarishwa familia inapotumia wakati pamoja, ndivyo vifungo vya upendo kati ya wale wanaotaka kumtumikia Mungu vinavyoimarika Wakristo wanapokutana pamoja kwa ajili ya ibada.

Kupatana na desturi hizo zinazoonyeshwa katika Maandiko, Mashahidi wa Yehova wanakutana katika Majumba yao ya Ufalme mara mbili kwa juma. Mikutano hiyo inawasaidia wahudhuriaji wathamini, waelewe, na kufuata kanuni za Biblia. Inapowezekana, ratiba ileile inafuatwa ulimwenguni pote, na kila mkutano una lengo fulani la kiroho. Kabla na baada ya mikutano, wahudhuriaji wanafurahia “ubadilishanaji wa kitia-moyo” kwa mazungumzo yenye kujenga. (Waroma 1:12) Ni mambo gani yanayotendeka katika mikutano hiyo?

Hotuba ya Biblia

Mkutano wa kwanza ambao watu wengi wanahudhuria ni hotuba inayotegemea Biblia iliyokusudiwa watu wote, ambayo kwa kawaida inatolewa mwisho wa juma. Mara nyingi Yesu Kristo alitoa hotuba za watu wote, na hotuba inayojulikana zaidi ni Mahubiri ya Mlimani. (Mathayo 5:1; 7:28, 29) Mtume Paulo aliwahutubia wanaume wa Athene. (Matendo 17:22-34) Kwa kufuata kielelezo hicho, mikutano ya Mashahidi wa Yehova inatia ndani hotuba iliyokusudiwa watu wote, baadhi yao wakiwa watu ambao wamehudhuria mkutano kwa mara ya kwanza.

Mkutano huo unaanza kwa wimbo kutoka katika kitabu Mwimbieni Yehova Sifa.a Wote ambao wanataka kusimama na kuimba wimbo huo wanakaribishwa kufanya hivyo. Baada ya sala fupi, msemaji anayestahili anatoa hotuba ya dakika 30. (Ona sanduku “Hotuba za Watu Wote Zinazohusu Mambo Halisi.”) Hotuba yake inategemea kabisa Biblia. Msemaji anawaomba mara nyingi wasikilizaji wafungue maandiko yanayopatana na kichwa cha hotuba na kufuatana naye anapoyasoma. Hivyo, unaweza kuja na Biblia yako mwenyewe, au umwombe mmoja wa Mashahidi wa Yehova akupe Biblia kabla ya mkutano.

Funzo la Mnara wa Mlinzi

Katika makutaniko mengi ya Mashahidi wa Yehova, hotuba ya watu wote inafuatwa na Funzo la Mnara wa Mlinzi ambalo ni mazungumzo ya saa moja ya maswali na majibu juu ya kichwa fulani cha Biblia. Mkutano huo unawatia moyo wote waliohudhuria wafuate mfano wa Waberoya walioishi katika siku za Paulo ambao “walilipokea neno kwa hamu kubwa zaidi ya akili, wakiyachunguza Maandiko kwa uangalifu.”—Matendo 17:11.

Funzo la Mnara wa Mlinzi linaanza kwa wimbo. Habari inayozungumziwa na maswali ambayo yanaulizwa na yule anayeongoza yanapatikana katika toleo la funzo la gazeti hili. Unaweza kupata nakala ya toleo la funzo kutoka kwa Shahidi wa Yehova. Vichwa ambavyo vimezungumziwa hivi karibuni vinatia ndani: “Wazazi—Wazoezeni Watoto Wenu Kwa Upendo,” “Msimlipe Yeyote Uovu Kwa Uovu,” na “Sababu Kwa Nini Mateso Yote Yatakwisha Karibuni.” Ingawa mkutano huo unaongozwa kwa maswali na majibu, wasikilizaji wanatoa maelezo kwa hiari na wale wanatoa maelezo huwa wamesoma na kufikiria kuhusu habari hiyo mapema na kusoma maandiko yaliyopo. Mkutano huo unaisha kwa wimbo na sala.—Mathayo 26:30; Waefeso 5:19.

Funzo la Biblia la Kutaniko

Jioni moja kila juma, Mashahidi wa Yehova wanakutana tena kwenye Jumba la Ufalme kwa ajili ya programu yenye sehemu tatu ambayo inachukua muda wa saa 1 na dakika 45. Sehemu ya kwanza ni Funzo la Biblia la Kutaniko ambalo ni la dakika 25. Sehemu hiyo inawasaidia wale waliohudhuria kuijua vizuri Biblia, kubadili kufikiri na mtazamo wao, na kuwa wanafunzi wazuri zaidi wa Kristo. (2 Timotheo 3:16, 17) Funzo hilo linaongozwa kwa maswali na majibu, kama tu Funzo la Mnara wa Mlinzi. Wale wanaotoa maelezo wanafanya hivyo kwa hiari. Kwa kawaida kichapo kinachotegemea Biblia kinachotumiwa ni kitabu au broshua iliyochapishwa na Mashahidi wa Yehova.

Kwa nini vichapo vinavyotegemea Biblia vinatumiwa katika mkutano huo? Katika nyakati za Biblia, haikutosha kusoma tu Neno la Mungu. ‘Walilifafanua, na kueleza maana yake; nao waliendelea kufafanua usomaji huo.’ (Nehemia 8:8) Katika miaka ya karibuni, vichapo vinavyozungumzia vitabu vya Isaya, Danieli, na Ufunuo vimewasaidia wale wanaohudhuria mkutano huo waelewe sehemu hizo za Biblia.

Shule ya Huduma ya Kitheokrasi

Shule ya Huduma ya Kitheokrasi inafanywa baada ya Funzo la Biblia la Kutaniko. Mkutano huo wa dakika 30 umekusudiwa kuwasaidia Wakristo wasitawishe “ufundi wa kufundisha.” (2 Timotheo 4:2) Kwa mfano, je, mtoto wako au rafiki amewahi kukuuliza swali kumhusu Mungu au Biblia na ikawa vigumu kwako kumjibu vizuri? Shule ya Huduma ya Kitheokrasi inaweza kukufundisha jinsi ya kujibu maswali magumu kwa njia yenye kutia-moyo, kutoka katika Biblia. Hivyo, tunaweza kusema kama nabii Isaya ambaye alisema hivi: “Bwana Mwenye Enzi Kuu Yehova amenipa ulimi wa waliofundishwa, ili nijue jinsi ya kumjibu neno yeye aliyechoka.”—Isaya 50:4.

Shule ya Huduma ya Kitheokrasi inaanza kwa hotuba inayotegemea sehemu ya Biblia ambayo wale waliohudhuria walitiwa moyo wasome juma lililotangulia. Baada ya hotuba hiyo, msemaji anawaomba wahudhuriaji watoe maelezo mafupi kuhusu mambo waliyofaidika nayo katika usomaji huo. Baada ya mazungumzo hayo, wanafunzi ambao wamejiandikisha katika shule hiyo wanatoa migawo waliyopewa.

Wanafunzi wanagawiwa kusoma sehemu fulani ya Biblia wakiwa jukwaani au waonyeshe jinsi ya kumfundisha mtu habari fulani ya Biblia. Baada ya kila hotuba, mshauri mwenye uzoefu anampongeza mwanafunzi kuhusu jambo alilofanya vizuri, akitoa maelezo yake kwenye kitabu Faidika na Elimu ya Shule ya Huduma ya Kitheokrasi. Baadaye, wakiwa faraghani, anaweza kumpa mwanafunzi mapendekezo ya kuboresha ufundishaji wake.

Sehemu hiyo yenye kusisimua imekusudiwa kuwasaidia wanafunzi na pia wote waliohudhuria wanaotaka kuwa wasomaji, wasemaji, na wafundishaji bora. Baada ya Shule hiyo ya Huduma ya Kitheokrasi kumalizika, wimbo unaotegemea andiko la Biblia unaanzisha Mkutano wa Utumishi.

Mkutano wa Utumishi

Sehemu ya mwisho ya mkutano huo ni Mkutano wa Utumishi. Kupitia hotuba, maonyesho, mahoji, na maelezo kutoka kwa wasikilizaji, wote waliohudhuria wanaweza kujifunza kufundisha vizuri kweli za Biblia. Kabla ya kuwatuma wanafunzi wake wakahubiri, Yesu aliwakusanya na kuwapa maagizo mengi. (Luka 10:1-16) Wakiwa tayari kabisa kuhubiri, walifurahia mambo mengi ya kupendeza waliyoona. Baadaye, wafuasi wa Yesu walimletea ripoti. (Luka 10:17) Mara nyingi wanafunzi walielezana mambo waliyoona.—Matendo 4:23; 15:4.

Ratiba ya dakika 35 kwa ajili ya Mkutano wa Utumishi huwa katika jarida la kila mwezi linaloitwa Huduma Yetu ya Ufalme. Baadhi ya vichwa ambavyo vimezungumziwa hivi karibuni ni: “Kumwabudu Yehova Tukiwa Familia,” “Sababu Inayotufanya Turudi Tena na Tena,” na “Mwige Kristo Katika Huduma Yako.” Programu hiyo inamalizika kwa wimbo na mshiriki wa kutaniko anaombwa atoe sala ya mwisho.

Mambo Ambayo Wageni Wamesema

Makutaniko hujitahidi kumfanya kila mtu ajihisi amekaribishwa. Kwa mfano, Andrew alikuwa amesikia mambo mengi mabaya kuhusu Mashahidi wa Yehova. Lakini alipohudhuria mkutano kwa mara ya kwanza, alishangazwa na jinsi alivyokaribishwa. “Ilipendeza sana kuwa hapo,” Andrew anasema. “Nilishangaa kuona jinsi watu walivyokuwa na urafiki na jinsi walivyopendezwa nami.” Ashel, kijana anayeishi huko Kanada, anakubaliana naye. Anasema: “Mikutano ilikuwa yenye kupendeza! Ilikuwa rahisi kuelewa.”

José, anayeishi Brazili, alijulikana kuwa mkatili. Hata hivyo, alialikwa ahudhurie mkutano kwenye Jumba la Ufalme karibu na mahali alipoishi. Anasema hivi, “Watu niliowapata kwenye Jumba la Ufalme walinikaribisha kwa uchangamfu, hata ingawa walijua tabia zangu.” Atsushi, anayeishi Japani anasema hivi: “Lazima nikubali kwamba nilipohudhuria mkutano wa Mashahidi wa Yehova kwa mara ya kwanza, nilihisi kuwa sifai kuwa hapo. Hata hivyo, nilikuja kutambua kwamba wao ni watu wa kawaida tu. Walijitahidi sana kunistarehesha.”

Unakaribishwa

Kama maelezo hayo yote yanavyoonyesha, unaweza kufaidika sana kwa kuhudhuria mikutano kwenye Jumba la Ufalme. Utajifunza kumhusu Mungu, na kupitia mafundisho yanayotegemea Biblia ambayo utapata huko, Yehova Mungu atakufundisha “ili ujifaidi mwenyewe.”—Isaya 48:17.

Mikutano ya Mashahidi wa Yehova inafanywa bila malipo, na hakuna sadaka zinazokusanywa. Je, ungependa kuhudhuria mkutano kwenye Jumba la Ufalme katika eneo lenu? Unaalikwa kwa uchangamfu.

[Maelezo ya chini]

[Sanduku katika ukurasa wa 21]

Hotuba za Watu Wote Zinazohusu Mambo Halisi

Kuna hotuba za Biblia zaidi ya 170 zinazotegemea vichwa mbalimbali kutoka katika Maandiko kama vile:

◼ Asili ya Wanadamu—Je, Ni Muhimu Kuchunguza Unaloamini?

◼ Maoni ya Kimungu Juu ya Ngono na Ndoa

◼ Kuangamiza Dunia Huleta Lipizo la Kimungu

◼ Kushughulika na Mahangaiko ya Maisha

◼ Je, Uhai Ndio Uu Huu Tu?

[Picha katika ukurasa wa 21]

Hotuba ya Biblia

[Picha katika ukurasa wa 21]

Funzo la “Mnara wa Mlinzi”

[Picha katika ukurasa wa 22]

Funzo la Biblia la Kutaniko

[Picha katika ukurasa wa 22]

Shule ya Huduma ya Kitheokrasi

[Picha katika ukurasa wa 23]

Mkutano wa Utumishi