Mungu Amefanya Mambo Gani?

Ikiwa unataka kumfahamu mtu fulani vizuri, inafaa ujue mambo ambayo ametimiza na changamoto ambazo amepitia. Vivyo hivyo, ukitaka kumjua Mungu vizuri, ni muhimu ujifunze mambo ambayo amefanya. Kadiri unavyoendelea kujifunza, utatambua kwamba mambo aliyofanya wakati uliopita yanatunufaisha sana sasa na kutupatia tumaini zuri la wakati ujao.

Yehova Mungu ndiye Muumba Mkuu, na “sifa zake zisizoonekana, zinaonekana waziwazi tangu kuumbwa kwa ulimwengu na kuendelea, kwa sababu zinaeleweka kupitia vitu vilivyoumbwa.” (Waroma 1:20) “Yeye ndiye Muumba wa dunia kwa nguvu zake, Yule aliyeiimarisha ardhi inayozaa kwa hekima yake na aliyezitandaza mbingu kwa uelewaji wake.” (Yeremia 10:12) Umaridadi wa uumbaji wa Mungu unafunua kwamba anatupenda.

Mungu alituumba “kwa mfano wake,” jambo linalofanya tuwe viumbe wa pekee. (Mwanzo 1:27) Hilo linamaanisha kwamba, ametupatia uwezo wa kuonyesha sifa zake kwa kiasi fulani. Ametuumba tukiwa na uwezo wa kufahamu mambo ya kiroho, yaani, uwezo wa kuelewa maoni na kanuni zake. Kadiri tunavyojitahidi kuishi kulingana na kanuni hizo, furaha yetu huongezeka na kusudi la maisha huwa dhahiri. Na hata zaidi, ametupatia fursa ya kusitawisha uhusiano wa karibu na yeye.

Vitu ambavyo Mungu ameumba duniani, hutufunulia jinsi anavyohisi kutuhusu. Mtume Paulo alisema kwamba Mungu “hakujiacha bila ushahidi kwa kuwa alitenda mema, [akitupa] . . . mvua kutoka mbinguni na majira ya mavuno, [akitushibisha] kwa chakula na kuijaza mioyo [yetu] furaha.” (Matendo 14:17) Mungu ametupatia vitu tunavyohitaji ili kubaki hai na pia vingine vya ziada. Aliumba vitu vingi na vya aina mbalimbali ili tufurahie maisha. Na hiki ni kionjo tu cha jinsi alivyokusudia tuishi.

Yehova aliumba dunia ili wanadamu waishi milele ndani yake. Biblia inasema: “Dunia amewapa wanadamu,” na “hakuiumba tu bila sababu, lakini aliiumba ili ikaliwe.” (Zaburi 115:16; Isaya 45:18) Alitaka ikaliwe na watu wa namna gani na kwa muda gani? “Waadilifu wataimiliki dunia, nao wataishi humo milele.”—Zaburi 37:29.

Kupatana na kusudi hilo, Yehova alimuumba mwanamume na mwanamke wa kwanza, yaani, Adamu na Hawa, na kuwaweka kwenye paradiso iliyokuwa duniani, ‘ili wailime na kuitunza.’ (Mwanzo 2:8, 15) Mungu aliwapatia majukumu mawili yenye kuvutia. Aliwaambia: “Zaeni, muwe wengi, muijaze dunia na kuitiisha.” (Mwanzo 1:28) Hivyo, Adamu na Hawa walikuwa na tumaini la kufurahia maisha yasiyo na kikomo hapa duniani. Kwa kusikitisha, waliamua kuvunja sheria ya Mungu, na hivyo wakapoteza tumaini la kuwa miongoni mwa “waadilifu” ambao “wataimiliki dunia.” Hata hivyo, kama tutakavyoona, kile walichofanya hakikubadili kusudi la Mungu kuelekea wanadamu au dunia. Lakini, acheni kwanza tuchunguze jambo lingine ambalo Mungu amefanya.

Biblia huitwa Neno la Mungu. Kwa nini Yehova alitupatia Biblia? Ili tujifunze kumhusu. Hiyo ndiyo sababu ya msingi. (Methali 2:1-5) Ni kweli kwamba Biblia haijibu kila swali ambalo huenda tukajiuliza kumhusu Mungu. Kihalisi, hakuna kitabu chochote kinachoweza. (Mhubiri 3:11) Hata hivyo, kila kitu kilichoandikwa kwenye Biblia hutusaidia kumjua Mungu. Tunamwelewa vizuri tunapochunguza jinsi anavyoshughulika na watu. Tunasoma kuhusu sifa za watu ambazo zinampendeza na zile zisizompendeza. (Zaburi 15:1-5) Tunajifunza maoni yake kuhusu ibada, maadili, na vitu vya kimwili. Na pia Biblia hutupatia picha halisi ya jinsi Yehova alivyo kupitia maneno na matendo ya Mwana wake, Yesu Kristo.—Yohana 14:9.

Sababu nyingine iliyomfanya Yehova atupatie Neno lake, Biblia, ni ili kutufundisha jinsi ya kuishi maisha yenye furaha na yaliyo na kusudi. Kupitia Biblia, Yehova anatueleza jinsi tunavyoweza kuridhika maishani, mambo tunayopaswa kufanya ili tuwe na familia yenye furaha, na jinsi ya kukabiliana na mahangaiko. Na kama makala inayofuata itakavyofafanua, Biblia pia hujibu maswali muhimu sana maishani kama vile: Kwa nini wanadamu wanateseka sana? Na, wakati ujao utakuwaje? Vilevile, inafafanua mambo ambayo Mungu amefanya ili kuhakikisha kwamba kusudi lake la awali linatimia.

Kuna mambo mengine mengi yanayothibitisha kwamba Biblia ni kitabu cha pekee sana na kilitungwa na Mungu. Ingawa Biblia iliandikwa na watu tofauti-tofauti wapatao 40 katika kipindi cha miaka 1,600, habari inayozungumziwa ni ileile kwa sababu Mtungaji wake hasa ni Mungu. (2 Timotheo 3:16) Maelfu ya vitabu vya kukunjwa vya kale yanathibitisha kwamba ujumbe wa Biblia umetunzwa kwa usahihi ingawa miaka mingi imepita tangu iandikwe, jambo lililo tofauti na vitabu vingine vya kale. Zaidi ya hilo, jitihada zote ambazo zimefanywa ili Biblia isitafsiriwe, isisambazwe, na kusomwa, zimegonga mwamba. Leo, Biblia ndicho kitabu ambacho kimetafsiriwa na kusambazwa kwa wingi zaidi. Biblia imedumu hadi sasa, na huo ni uthibitisho wa kwamba “neno la Mungu wetu linadumu milele.”—Isaya 40:8.

Kuna jambo la pekee ambalo Mungu amefanya ili kuhakikisha kwamba kusudi lake kutuelekea linatimia. Kama ilivyotajwa awali, Mungu alikusudia wanadamu waishi milele duniani. Hata hivyo, Adamu alipofanya dhambi kwa kukataa kumtii Mungu, alipoteza fursa ya kuishi milele, na hilo lingewaathiri wazao wake pia. “Kupitia mtu mmoja dhambi iliingia katika ulimwengu na kifo kupitia dhambi, basi kifo kikaenea kwa watu wote kwa sababu wote walikuwa wamefanya dhambi.” (Waroma 5:12) Hivyo, Adamu alipofanya dhambi, ilionekana kana kwamba kusudi la Mungu halitatimia. Yehova alitendaje?

Yehova alitenda kwa njia inayopatana na sifa zake. Kwa haki, aliwahukumu Adamu na Hawa kupatana na makosa yao. Lakini akichochewa na upendo, Yehova aliandaa mpango mwingine kwa ajili ya wazao wao. Hekima ya Yehova ilimwezesha kuamua jinsi ya kushughulikia tatizo hilo, na mara moja akatangaza suluhisho. (Mwanzo 3:15) Yesu Kristo, Mwana wa Mungu, angetumiwa kuondoa dhambi na kifo. Jinsi gani?

Ili kuwaokoa wanadamu kutokana na madhara ya uasi wa Adamu, Yehova alimtuma Yesu duniani awafundishe watu njia ya maisha inayoongoza kwenye uzima na “kutoa uhai wake uwe fidia badala ya wengi.”a (Mathayo 20:28; Yohana 14:6) Yesu alistahili kutoa fidia kwa sababu yeye alikuwa mkamilifu kama Adamu. Lakini tofauti na Adamu, Yesu alibaki mtiifu hadi kifo. Kwa kuwa hakustahili kufa, Yehova alimfufua ili arudi kuishi mbinguni. Yesu alifanikiwa kuwapa wanadamu watiifu tumaini la uzima wa milele, jambo ambalo Adamu alishindwa kufanya. “Kwa maana kama vile kupitia kutotii kwa mtu mmoja wengi walifanywa kuwa watenda dhambi, vivyo hivyo pia kupitia kutii kwa mtu mmoja wengi watafanywa kuwa waadilifu.” (Waroma 5:19) Kupitia dhabihu ya fidia ya Yesu, Mungu atatimiza ahadi yake ya kuwawezesha wanadamu kuishi milele duniani.

Tunajifunza mambo mengi kumhusu Yehova kwa kuchunguza jinsi alivyoshughulika na changamoto zilizotokezwa na dhambi ya Adamu. Kwanza, tunaona kwamba hakuna chochote kinachoweza kumzuia Yehova kutimiza kusudi lake; neno lake “hakika litafanikiwa.” (Isaya 55:11) Pia, kisa hicho kinafunua kina cha upendo wa Yehova kutuelekea. “Hivi ndivyo upendo wa Mungu ulivyofunuliwa kwetu, kwamba Mungu alimtuma Mwana wake mzaliwa-pekee ulimwenguni ili tupate uzima kupitia yeye. Hivi ndivyo upendo ulivyo, si kwamba sisi tumempenda Mungu, bali kwamba yeye alitupenda akamtuma Mwana wake kuwa dhabihu ya upatanisho kwa ajili ya dhambi zetu.”—1 Yohana 4:9, 10.

Kwa kuwa Mungu “hakusita kumtoa hata Mwana wake mwenyewe bali alimkabidhi kwa ajili yetu sote,” tuna uhakika ‘atatupatia kwa fadhili vitu vingine vyote’ alivyoahidi. (Waroma 8:32) Mungu ameahidi kutufanyia mambo gani? Soma makala inayofuata.