Je, Tunakesha—Tukiepuka Vikengeusha-Fikira?
1 Yesu alionya hivi: “Kesheni, . . . ili mpate kuokoka” misiba ambayo ilikuwa ije. (Luka 21:36) Tunaishi katika wakati wenye hatari kuliko wote katika historia ya kibinadamu. Msiba wawangojea wale wote wanaojiacha wasinzie kiroho. Hili latokeza hatari kwa kila mmoja wetu. Yesu alitaja kula, kunywa, na mahangaiko ya maisha ya kila siku. Kwa nini? Kwa sababu hata mambo haya yangeweza kutushughulisha sana, kuwa vikengeusha-fikira, na kuleta usinziaji wa kiroho ambao ni hatari.
2 Vikengeusha-Fikira vya Kawaida: Wengine wameshughulishwa na tafrija yenye kupita kiasi na yenye kutilika shaka, hata kuwa waraibu wa televisheni. Wengine wanajiingiza kupita kiasi katika sherehe za arusi na mipango ya mazishi. Bila shaka, kutafuta Ufalme kwanza hakumaanishi kwamba lazima tuepuke namna zote za mambo yaliyotajwa juu. Tunapaswa kutumia busara na kiasi katika maeneo hayo. (Linganisha 1 Timotheo 4:8.) Lakini kinakuwa kikengeusha-fikira ikiwa mambo hayo yanakuwa muhimu sana maishani mwetu, yakichukua wakati wetu mwingi, rasilimali zetu, au ushiriki wetu katika kazi ya kuhubiri Ufalme.
3 Kikengeusha-fikira kingine cha kawaida ambacho husababisha usinziaji wa kiroho ni tamaa ya vitu vya kimwili visivyo vya lazima. Hili huhitaji mtu atumie wakati zaidi kwenye kazi ya kimwili na husababisha ufuatiaji wa mambo ya kiroho usukumwe kando. Wengine wamepoteza mwono wa miradi ya kiroho kwa kujitia katika kutafuta vitu vya kimwili ili kupata njia ya maisha yenye starehe zaidi. Ingawa twahitaji “chakula na mavazi,” ni lazima tulinde dhidi ya kukuza upendo wa pesa, ambao waweza kutuongoza kando kutoka kwa imani. (1 Tim. 6:8-10) Kwa kukosa kukaza macho yetu kwenye masilahi ya Ufalme, tungeweza kuwa walegevu katika kushughulikia mahitaji ya kiroho ya familia yetu na kukosa kutimiza huduma yetu.—1 Tim. 5:8; 2 Tim. 4:5.
4 Na bado wengine huruhusu ‘mioyo yao ilemewe na mahangaiko ya maisha’ kufikia kiasi cha kulala kiroho. (Luka 21:34) Nyakati fulani, mtu anapatwa na hangaiko kwa sababu ya matatizo ya afya au hali zenye kuhuzunisha za familia. Lakini ni lazima masumbufu hayo ya kibinafsi yasiruhusiwe yapunguze utambuzi wetu wa mwisho wenye kukaribia kwa kasi wa mfumo huu wa mambo.—Mk. 13:33.
5 Hakuna kitu kingemfurahisha Ibilisi zaidi kama kufaulu kutuweka katika hali iliyo kama ndoto, kufuatia fantasia fulani ya kilimwengu. Ni lazima tujikakamue ili kuendelea kuwa macho kiroho. Twajua kwamba ‘siku ya Yehova yaja kama mwivi,’ na ni jambo la muhimu sana “tukeshe na kuwa na kiasi.” (1 The. 5:2, 6) Tukigundua dalili za kusinzia kwa upande wetu, ni jambo la uharaka kwamba “tuyavue matendo ya giza.”—Rum. 13:11-13.
6 Misaada ya Kutusaidia Kukesha: Ni ipi misaada hiyo? Sala ni ya lazima. Twapaswa kusali bila kukoma. (1 The. 5:17) Ukaribu na kutaniko la Kikristo ‘utatuhimiza katika upendo na kazi nzuri.’ (Ebr. 10:24) Kujichunguza kwa ukawaida na kwa moyo mweupe kwaweza kusaidia kutufanya tuangalie uhitaji wetu wa kushinda udhaifu. (2 Kor. 13:5) Mazoea mazuri ya funzo la kibinafsi ‘yatatulisha kwa maneno ya imani.’ (1 Tim. 4:6, NW) Tukiwa waangalifu, tutakuwa na uhakika kwamba tutaweza kuepuka vikengeusha-fikira, ‘tukeshe, na kusimama imara katika imani.’—1 Kor. 16:13.