Fanya Maendeleo Yako Yawe Dhahiri
1 Kumbuka wakati uliposikia ujumbe wa Ufalme kwa mara ya kwanza. Kweli sahili zilisisimua tamaa yako ya kupata ujuzi na uelewevu. Upesi uliweza kuona uhitaji wa kufanya marekebisho katika njia yako ya maisha kwa sababu njia za Yehova ziko juu zaidi sana kuliko njia zako. (Isa. 55:8, 9) Ulifanya maendeleo, ukaweka maisha yako wakfu, na kubatizwa.
2 Hata baada ya kufanya maendeleo ya kiroho, bado kulikuwa na udhaifu uliopaswa kushindwa. (Rum. 12:2) Labda ulikuwa na hofu ya mwanadamu, iliyokufanya usite kushiriki katika utumishi wa shambani. Au labda ulikuwa unapungukiwa katika kuonyesha matunda ya roho ya Mungu. Badala ya kujizuia kufanya maendeleo, uliazimia kuendelea kwa kujiwekea miradi ya kitheokrasi.
3 Huenda miaka kadhaa ikawa imepita sasa tangu ulipojiweka wakfu. Ukitazama nyuma, ni maendeleo gani unayoweza kuona kwako mwenyewe? Je, umefikia baadhi ya miradi yako? Je, una bidii ileile ‘uliyokuwa nayo mwanzoni’? (Ebr. 3:14, NW) Tayari Timotheo alikuwa Mkristo aliyekomaa mwenye miaka mingi ya uzoefu Paulo alipomsihi hivi: “Uyatafakari hayo; ukae katika hayo; ili kuendelea kwako kuwe dhahiri kwa watu wote.”—1 Tim. 4:15.
4 Uchunguzi wa Kibinafsi Wahitajiwa: Tunapotafakari juu ya mwendo wetu uliopita, je, twaona kwamba twaendelea kuwa na udhaifu tuliokuwa nao tulipoanza? Je, tumeshindwa kufikia miradi fulani tuliyoweka? Ikiwa ndivyo, kwa nini? Hata ingawa tulikuwa na madhumuni yanayofaa, huenda tuliahirisha mambo. Labda tumeruhusu mahangaiko ya maisha au misongo ya mfumo huu ituzuie.—Luka 17:28-30.
5 Kwa kuwa hatuwezi kufanya lolote kuhusu wakati uliopita, kwa hakika twaweza kufanya jambo kuhusu wakati ujao. Twaweza kujichunguza wenyewe kwa unyoofu, kupata kujua tunapopungukiwa, kisha tuweke jitihada nyingi za kufanya maendeleo. Huenda tukahitaji kufanya vema zaidi katika kuonyesha matunda ya roho ya Mungu, kama vile kujidhibiti, upole, au ustahimilivu. (Gal. 5:22, 23) Ikiwa tuna ugumu wa kupatana na wengine au kushirikiana na wazee, ni jambo la maana tusitawishe unyenyekevu na akili ya kujishusha.—Flp. 2:2, 3.
6 Je, twaweza kufanya maendeleo yetu yawe dhahiri kwa kufikia mapendeleo ya utumishi? Wakifanya bidii zaidi, ndugu waweza kustahili kuwa watumishi wa huduma au wazee. Wengine wetu twaweza kujiandikisha kuwa mapainia wa kawaida. Kwa wengi zaidi, upainia-msaidizi waweza kuwa mradi wa kufikiwa. Wengine huenda wakajitahidi kufanyia maendeleo mazoea yao ya kujifunza, wawe washiriki wenye kutenda zaidi katika mikutano ya kutaniko, au wawe wenye matokeo zaidi wakiwa wahubiri wa kutaniko.
7 Bila shaka, ni daraka la kila mmoja wetu kuamua sehemu anayohitaji kufanyia maendeleo. Twaweza kuwa na hakika kwamba jitihada yetu ya moyo mweupe ya “kusonga mbele kwenye ukomavu” itaongeza kwa wingi shangwe yetu na kutufanya tuwe washiriki wenye matokeo wa kutaniko.—Ebr. 6:1, NW.