Hubiri Habari Njema Kila Mahali

¹ Wakristo wa mapema walihubiri habari njema kila mahali. Walikuwa na bidii sana hivi kwamba katika muda wa miaka 30 baada ya ufufuo wa Yesu Kristo, ujumbe wa Ufalme ulikuwa ‘umehubiriwa katika viumbe vyote vilivyo chini ya mbingu.’—Kol. 1:23.

² Watumishi wa Yehova wenye bidii leo wana lengo hilohilo, yaani, kufikia kila mtu awezekanaye kwa habari njema za Ufalme. Ni nini kiwezacho kutusaidia kutimiza mradi huu? Watu wengi zaidi wanafanya kazi wakati wote na mara nyingi hawako nyumbani tunapozuru. Wanapokuwa hawafanyi kazi, huenda ikawa wanasafiri, wanafanya ununuzi, au kuwa katika namna fulani ya tafrija. Wenye kustahili miongoni mwao wanafikiwaje kwa ujumbe wa Ufalme?—Mt. 10:11.

³ Baadhi yao wanafikiwa mahali pao pa kuajiriwa. Hata miji midogo ina eneo layo la kibiashara ambapo watu wengi huwapo karibu siku yote. Katika majiji makubwa, watu wanaofanya kazi viwandani au katika ofisi za majengo marefu na wale wanaoishi kwenye nyumba zenye ulinzi mkali wanapata ushahidi—wengi kwa mara ya kwanza. Kwenye miisho-juma, wengine ambao wamefikiwa wanapopumzika kwenye bustani, mahali pa tafrija, kwenye wanja za kupigia kambi, au nyumba za kulikizia au wanapokuwa kwenye maegesho ya magari au masoko wamepatikana kuwa wenye kuitikia vizuri habari njema.

⁴ Idadi yenye kuongezeka ya watangazaji inafanya jitihada ya pekee kutoa ushahidi mahali pa umma, mahali popote ambapo watu wanaweza kupatikana. Mara ya kwanza Mashahidi hawa walisitasita na walikuwa wenye wasiwasi kidogo kwa sababu ya kuzoea kuhubiri katika mazingira ya kawaida zaidi, kama vile nyumba hadi nyumba. Sasa wanahisije?

⁵ “Kumehuisha huduma yangu!” akaeleza kwa uchangamfu ndugu mmoja mwenye uzoefu. Mwingine aongezea: “Hunifanya niwe mwenye kukaza fikira mahali pamoja.” Painia wa muda mrefu alisema: “Kumekuwa kwenye kutia nguvu kiakili, kimwili, na kiroho, . . . na bado naendelea kukua.” Mtangazaji mmoja aona kwamba sasa anafikia watu wengi ambao hawajapata kamwe kuongea na Mashahidi wa Yehova mbeleni. Pia vijana wanashiriki kazi hii yenye kufurahisha kwa idili. Kijana mmoja ajieleza mwenyewe kwa njia hii: “Inafurahisha kwa sababu unapata kuongea na watu wengi sana.” Mwingine asema: “Naangusha fasihi nyingi sana kuliko wakati mwingine wowote!” Yote hayo yanatendeka katika eneo linalohubiriwa mara nyingi.

⁶ Waangalizi Wasafirio Wanaongoza: Sosaiti ikitambua kwamba “mambo ya ulimwengu huu yanapita,” hivi majuzi ilidokeza kwamba waangalizi wasafirio warekebishe ratiba yao ya utumishi wa shambani juma kwa juma ili kwamba watu wengi iwezekanavyo wafikiwe kwa habari njema. (1 Kor. 7:31) Kwa miaka mingi, waangalizi wa mzunguko walitenga asubuhi za siku za katikati ya juma ili kushiriki katika mahubiri ya nyumba hadi nyumba, hali saa za alasiri zilikuwa za kufanya ziara za kurudia na kuongoza mafunzo ya Biblia nyumbani. Katika maeneo fulani, ratiba hiyo huenda ikatumika. Katika mengine, si mengi yanayoweza kutimizwa kwa kuhubiri nyumba hadi nyumba wakati wa asubuhi fulani za katikati ya juma. Katika visa hivyo, mwangalizi asafiriye huenda akaamua kwamba mwanzoni mwa siku ingekuwa vizuri kushiriki katika mahubiri ya duka kwa duka au kutoa ushahidi wa barabarani. Au huenda akapanga vikundi vidogo-vidogo vitoe ushahidi katika ofisi za majengo marefu, maeneo ya kufanyia ununuzi, maegesho ya magari, au mahali pengine pa umma. Watangazaji wakitumia ifaavyo zaidi wakati upatikanao wa utumishi wa shambani, watu wengi zaidi watafikiwa.

⁷ Ripoti zaonyesha kwamba rekebisho hili limekubaliwa vizuri na waangalizi wasafirio na watangazaji vilevile. Idadi ya mabaraza ya wazee imealika mwangalizi wa mzunguko azoeze watangazaji kadhaa katika pande za kazi inayohitaji uangalifu kwao. Limekuwa jambo lenye msaada kwa watangazaji hawa kuandamana na mwangalizi asafiriye anaposhiriki mojapo utendaji huu mbalimbali. Wao nao wameweza kuzoeza wengine. (2 Tim. 2:2) Tokeo limekuwa kwamba, watu wengi sasa wanafikiwa kwa habari njema.

⁸ Bila shaka, si lazima ungoje mwangalizi wa mzunguko azuru ili ujaribu njia hizi nyingine za kuhubiri. Hapa pana mawazo tofauti-tofauti unayoweza kuona kuwa yafaa katika eneo lenu:

⁹ Kutoa Ushahidi wa Barabarani: ‘Watu wote wameenda wapi?’ ndivyo tunavyojiuliza wakati mwingine tunapotembelea eneo la makazi lisilokuwa na watu asubuhi ya siku ya katikati ya juma. Huenda wengine wakapatikana wakifanyia wengine shughuli au ununuzi. Je, umejaribu kuwafikia kupitia kuwatolea ushahidi wa barabarani? Sehemu hii ya utumishi ifanywapo vizuri, yaweza kuwa yenye matokeo zaidi. Badala ya kusimama mahali pamoja ukiwa na magazeti, inafaa kufikia watu na kuanzisha mazungumzo ya kirafiki. Si lazima kumtolea ushahidi kila mpita-njia. Ongea na wale wasio na haraka, kama vile wale wanaoangalia vitu madirishani, walio ndani ya magari yaliyoegeshwa, au watu wanaongojea magari ya kusafiria umma. Mwanzoni, labda utatoa salamu ya kirafiki kisha ungoje itikio. Ikiwa mtu huyo yuko tayari kuongea, muulize maoni yake kuhusu habari unayohisi huenda ikampendeza.

¹⁰ Mwangalizi mmoja wa mzunguko alialika watangazaji sita wajiunge pamoja naye na mke wake katika kutoa ushahidi wa barabarani. Kukiwa na matokeo gani? “Tulikuwa na asubuhi nzuri ajabu!” yeye aripoti. “Kulikuwa na watu. Magazeti 80 na trakti nyingi ziliangushwa. Tulikuwa na mazungumzo kadhaa yenye kuchochea. Mtangazaji mmoja, aliyekuwa akishiriki mahubiri ya barabarani kwa mara ya kwanza, alisema kwa uchangamfu hivi: ‘Nimekuwa katika kweli kwa miaka na sikutambua jambo nililokuwa nikikosa!’ Mwishoni mwa hilo juma, magazeti yaliyokuwa yamejaa kutanikoni yalimalizwa.”

¹¹ Alipokuwa akitumikia kutaniko lililofuata, mwangalizi asafiriye huyohuyo alipata kujua kwamba watangazaji kadhaa walikuwa wameshiriki kutoa ushahidi wa barabarani mapema asubuhi hiyo lakini hawakuwa na mafanikio sana. Dada mmoja alikuwa ameongea na watu wawili tu wakati wa kipindi chote cha kutoa ushahidi, kwa kuwa kila mtu aliyekutana naye alikuwa na haraka ya kwenda kazini. Mwangalizi asafiriye alidokeza kwamba wote warudi kwenye barabara ileile baadaye saa za asubuhi. Walifanya hivyo, na walishinda hadi adhuhuri. Yule dada aliyekuwa ameongea na watu wawili tu mapema asubuhi hiyo alifanya vema zaidi aliporudi. Aliangusha magazeti 31 na broshua 15, akaandika majina na anwani za watu saba, na kuanzisha mafunzo mawili ya Biblia nyumbani! Wengine katika hicho kikundi walikuwa na matokeo yenye kutia moyo kama hayo.

¹² Unapopata mtu anayeonyesha kupendezwa, jaribu kuandika jina, anwani na namba ya simu ya mtu huyo. Badala ya kuuliza habari hiyo moja kwa moja, unaweza kusema “Nimefurahia mazungumzo haya. Je, kuna njia nyingineyo tunayoweza kuyaendeleza wakati mwingine?” Au uliza: “Je, kuna njia yoyote niwezayo kukufikia nyumbani?” Wengi wanaofikiwa kwa njia hii hukubali ziara ya kurudia. Hakikisha una ugavi wa kutosha wa vikaratasi vya kukaribisha uvitumie katika kualika wale ambao wangependa kuhudhuria mikutano.

¹³ Ukiongea na mtu anayependezwa anayeishi katika eneo lililogawiwa kutaniko jingine, unapaswa kupitisha habari hiyo ili ndugu wa huko waweze kufuatia kupendezwa. Je, kutoa ushahidi wa barabarani kungekuwa njia yenye matokeo ya kueneza habari njema katika eneo lenu? Ikiwa ndivyo, pitia makala “Kuwapata Wenye Kupendezwa Kupitia Kutoa Ushahidi wa Barabarani Wenye Matokeo” katika toleo la Huduma ya Ufalme Yetu la Julai 1994. Kisha panga kushiriki kutoa ushahidi wa barabarani kwa wakati ufaao wa siku utakaokuwezesha kufikia watu wengi iwezekanavyo.

¹⁴ Kutoa Ushahidi Kwenye Gari la Kusafiria Umma: Asubuhi moja mapainia kadhaa waliamua kutolea ushahidi watu ambao walikuwa wakingojea bas karibu na chuo cha mahali pao. Ijapokuwa walikuwa na mazungumzo yenye kupendeza, kulikuwa na tatizo fulani. Kufikia wakati mazungumzo yalipokuwa yakiendelea, bas likaja, likikomesha mazungumzo kwa ghafula. Mapainia hao walitatua tatizo hilo kwa kuingia bas hilo na kuendelea kutolea ushahidi abiria walipokuwa wakisafiri mjini. Bas lilipofika mwisho wa mwendo walo, mapainia walirudi kwa bas hilo, wakitoa ushahidi walipokuwa wakienda. Baada ya safari kadhaa za kwenda na kurudi, walijumlisha matokeo ya jitihada zao: Zaidi ya magazeti 200 yaliangushwa na mafunzo sita ya Biblia yalianzishwa. Abiria fulani walitoa anwani na namba za simu zao kwa kupenda ili waweze kutembelewa nyumbani kwao. Juma lililofuata, mapainia walirudi kwenye kituo cha bas na kufuata njia hiyohiyo kama mbeleni. Waliangusha magazeti 164 na wakaanzisha funzo moja zaidi la Biblia. Katika kituo kimoja abiria aliingia bas hilo na kuketi kwenye kiti kimoja tu kilichokuwa wazi—karibu na painia. Akamwangalia ndugu huyo na kusema kwa tabasamu: “Najua, una Mnara wa Mlinzi la kunipatia.”

¹⁵ Watangazaji wengi hutoa ushahidi wenye matokeo wanaposafiri kwa bas, gari moshi, au ndege. Unaweza kuanzaje mazungumzo na abiria anayeketi karibu nawe? Mtangazaji mmoja mwenye umri wa miaka 12 alianza tu kusoma nakala ya Amkeni! kwenye bas, akitumaini kuamsha udadisi wa msichana tineja aliyekuwa ameketi karibu naye. Kufanya hivyo kulikuwa na matokeo. Msichana huyo akamuuliza alichokuwa akisoma, naye kijana huyo akajibu kwamba alikuwa akisoma juu ya suluhisho la matatizo ambayo vijana hulazimika kukabili. Aliongezea kwamba alikuwa amenufaika sana na makala hiyo na kwamba ingemsaidia msichana huyo pia. Aliyapokea magazeti hayo kwa furaha. Mazungumzo yao yalisikiwa na vijana wengine wawili ambao waliomba nakala za magazeti hayo. Kwa sababu hiyo, dereva akaegesha gari kando ya barabara na kuuliza kwa nini kulikuwa na upendezi mwingi sana katika magazeti hayo. Alipopata kujua, yeye pia alipokea nakala kadhaa. Bila shaka, hili halingaliwezekana ikiwa mtangazaji huyo mchanga hangalikuwa na magazeti ya kutosha kushiriki na kila mtu aliyeonyesha kupendezwa!

¹⁶ Kutoa Ushahidi Katika Bustani na Maegesho ya Magari: Kutoa ushahidi katika bustani na maegesho ya magari ni njia bora ya kufikia watu. Je, umejaribu kutoa ushahidi katika sehemu ya kuegeshea magari ya mahali pa ununuzi? Sikuzote chukua dakika chache uchunguze mazingira yako. Tafuta mtu asiye na haraka au anayengoja ndani ya gari lililoegeshwa ujaribu kuanzisha mazungumzo ya kirafiki. Mazungumzo yakiendelea, ingiza ujumbe wa Ufalme. Jaribu kuhubiri peke yako lakini ukiwa na mhubiri mwingine karibu na mahali hapo. Epuka kubeba mkoba mkubwa sana au kujaribu kuvuta uangalifu kwa njia nyingine kuelekea kazi yako. Uwe mwenye busara. Huenda ikawa vizuri kutumia tu wakati mfupi katika sehemu moja ya kuegeshea magari kisha usonge uiendee nyingine. Ikiwa mtu hataki kuzungumza nawe, nenda zako kiungwana utafute mtu mwingine umfikie. Kwa kutumia njia hizi, ndugu mmoja aliangusha magazeti 90 kwa mwezi mmoja alipokuwa akitoa ushahidi katika maegesho ya magari.

¹⁷ Mwangalizi mmoja wa mzunguko alitia moyo akina ndugu wahubiri kwenye maegesho ya “matatu” wakati wa saa zisizo zenye shughuli nyingi kati ya saa 3:30 asubuhi na saa 6:00 mchana. Akina ndugu walipata madereva na wasaidizi wao wakipumzika kidogo na wakakubali mazungumzo. Wengi walikubali fasihi na kuonyesha uthamini wakisema kwamba mara nyingi hawapatikani nyumbani kwa sababu ya aina ya kazi yao.

¹⁸ Watu fulani huenda kwenye bustani kustarehe; wengine huenda huko kucheza mchezo au washinde pamoja na watoto wao. Bila kuingilia utendaji wao isivyofaa, angalia fursa ya kutoa ushahidi. Ndugu mmoja alianzisha mazungumzo pamoja na mtunzaji wa bustani na akaona kwamba alihangaishwa na dawa za kulevya na wakati ujao wa watoto wake. Funzo la Biblia nyumbani lilianzishwa na likaongozwa kwa ukawaida katika bustani.

¹⁹ Kutoa Ushahidi wa Vivi Hivi Katika Majengo Yenye Maduka Mbalimbali: Ingawa sikuzote haiwezekani kuhubiri kirasmi duka hadi duka katika majengo yenye maduka mbalimbali kwa sababu ya vizuizi vya mahali kuhusu utendaji wa aina hiyo, watangazaji fulani hutafuta fursa za kutoa ushahidi huko kivivi hivi. Wao huketi kwenye benchi na kuanzisha mazungumzo ya kirafiki na wale wanaotua ili wapumzike. Kupendezwa kunapoonyeshwa, wao hutoa trakti kwa busara au gazeti na kujitahidi kufanya mipango ya ziara ya kurudia. Baada ya kutumia dakika chache kutoa ushahidi katika sehemu moja ya majengo yenye maduka mbalimbali, wao huenda kwenye ile nyingine na kuanza mazungumzo na mtu mwingine. Bila shaka lazima kuwe na tahadhari ili uangalifu usiofaa usikaziwe tunapotoa ushahidi kwa njia hii.

²⁰ Unaposalimu mtu, anzisha mazungumzo kwa msemo wa kirafiki. Msikilizaji wako akiitikia, muulize swali, kisha usikilize kwa makini anapojieleza. Pendezwa kibinafsi na analosema. Onyesha kwamba wathamini maoni yake. Inapowezekana kubaliana naye.

²¹ Dada mmoja alikuwa na mazungumzo yenye kupendeza na mwanamke mzee-mzee kwa kutaja jinsi maisha yamekuwa yenye gharama ya juu sana. Mwanamke huyo alikubali mara moja, na mazungumzo yenye uchangamfu yakatokea. Dada huyo aliweza kuandika jina na anwani ya mwanamke huyo, na ziara ya kurudia ikafanywa juma hilohilo.

²² Kuhubiri Duka Hadi Duka: Makutaniko fulani yana maeneo ya kibiashara ambayo ni sehemu ya eneo lao walilogawiwa. Ndugu anayeshughulikia hilo eneo anaweza kutayarisha kadi za ramani ya pekee za sehemu hizi za kibiashara zilizo kubwa. Kadi zozote za eneo la makazi zinazohusiana nazo zapaswa kuonyesha wazi kwamba zile sehemu za kibiashara hazipaswi kuhubiriwa zikiwa sehemu ya eneo hilo. Katika maeneo mengine, mahali pa biashara paweza kuhubiriwa pamoja na yale maeneo ya makazi. Labda wazee wataalika watangazaji wenye kustahili wahubiri maeneo ya kibiashara kwa ukawaida ili mahubiri ya duka hadi duka yasipuuzwe.

²³ Ukialikwa kushiriki katika kazi hii na hujaifanya kamwe mbeleni, njia nzuri ya ‘kujipa ujasiri’ ni kuhubiri maduka machache yaliyo madogo zaidi kwanza; kisha, unapokuwa na uhakika zaidi, hubiri yale yaliyo makubwa. (1 The. 2:2, NW) Unapohubiri duka hadi duka, valia kama vile ungehudhuria mkutano kwenye Jumba la Ufalme. Ikiwezekana, ingia dukani wakati hakuna wateja wanaongojea kutumikiwa. Omba useme na meneja au msimamizi. Uwe mchangamfu, na zaidi ya yote sema kifupi. Hakuna haja ya kuomba radhi. Biashara nyingi zashughulika na wateja na hutarajia kukatizwa-katizwa.

²⁴ Baada ya kumsalimu mwenye duka, unaweza kusema hivi: “Wafanyabiashara huwa na ratiba zenye shughuli hivi kwamba mara nyingi hatuwapati nyumbani kwao, kwa hiyo tunakutembelea hapa kwenye biashara yako tukuachie nakala ya kusoma yenye kuvuta fikira sana.” Toa elezo moja au mawili juu ya gazeti linalotolewa.

²⁵ Au unaweza kujaribu njia hii unapomfikia meneja: “Tumeona kwamba wafanyabiashara hujitahidi kuona kwamba wamearifiwa ujuzi vilivyo. Toleo la karibuni la Mnara wa Mlinzi (au Amkeni!) lakazia makala inayotuathiri sote kibinafsi.” Eleza jambo hilo, na umalizie kwa kusema: “Tuna uhakika utafurahia kulisoma.”

²⁶ Ikiwa kuna waajiriwa, na yaonekana ikifaa, unaweza kuongeza hivi: “Je, ni sawa kwako nikifanya utoaji mfupi kwa waajiriwa wako?” Ruhusa ikitolewa, kumbuka umeahidi kusema kifupi, na meneja atatazamia utende kulingana na neno lako. Waajiriwa wowote wakitaka kujiingiza katika mazungumzo marefu, ingekuwa vizuri kuwatembelea nyumbani kwao.

²⁷ Hivi majuzi, watangazaji wachache katika mji mdogo walijiunga na mwangalizi wa mzunguko katika mahubiri ya duka hadi duka. Baadhi ya watangazaji waliogopa mwanzoni, kwa kuwa hawakuwa wamefanya mahubiri hayo mbeleni; lakini upesi wakastarehe na kuanza kuyafurahia. Katika muda usiozidi saa nzima, walisema na watu 37 na kuangusha magazeti 24 na broshua 4. Ndugu mmoja aliona kwamba kwa kawaida hawangeweza kufikia watu wengi katika mwezi wa mahubiri ya nyumba hadi nyumba kama walivyofanya wakihubiri duka hadi duka kwa muda mfupi hivyo.

²⁸ Kutokeza Fursa za Kuhubiri: Yesu hakufanya mahubiri yake ya kutoa ushahidi kwa njia rasmi tu. Alieneza habari njema katika kila pindi iliyofaa. (Mt. 9:9; Luka 19:1-10; Yn. 4:6-15) Hebu ona jinsi watangazaji wengine wanavyotafuta fursa za kuhubiri.

²⁹ Wengine hufanya zoea la kutolea ushahidi wazazi wanaongojea watoto wao karibu na mwingilio wa shule. Kwa kuwa wazazi wengi hufika dakika 20 mapema, kuna wakati wa kuwa na mazungumzo yenye kusisimua ya habari ya Kimaandiko.

³⁰ Mapainia wengi huhangaikia kufikia watu ambao huenda wakaonyesha kupendezwa kipekee katika habari hususa ambayo yashughulikiwa katika magazeti yetu. Kwa kielelezo, dada mmoja alipata maitikio mazuri alipotembelea shule sita katika eneo la kutaniko lake akiwa na ule mfululizo wa “Shule Matatani,” ambao ulitokea katika Amkeni! la Desemba 22, 1995. Pia alitembelea maajenti wa serikali washughulikiao mambo ya familia akiwa na magazeti kuhusu maisha ya familia na kutendwa vibaya kwa watoto naye akaalikwa kurudi akiwa na matoleo mapya yanayoshughulikia habari hizohizo. Itikio alilopokea kwenye ofisi isaidiayo watu wasioajiriwa kuhusu Amkeni! la Machi 8, 1996, kuhusu ukosefu wa kazi ya kuajiriwa lilifafanuliwa kuwa “lenye kutokeza.”

³¹ Mwangalizi wa wilaya aripoti kwamba yeye na mke wake kwa ukawaida hutoa ushahidi kivivi hivi wanapofanya ununuzi wao wa chakula. Wao hufanya ununuzi siku ambayo soko halina msongamano wa watu, na watu wanatembea kwenye safu za bidhaa kwa mwendo wa taratibu. Wao huripoti mazungumzo mengi mazuri.

³² Mahali fulani, watangazaji walioteuliwa wana ruhusa ya kuhubiri kwenye wanja za ndege. Wakati mwingine, wamepata shangwe ya kutolea ushahidi wasafiri wa kimataifa wanaoishi katika nchi ambazo watu wa Yehova ni wachache. Kupendezwa kukipatikana, wametoa trakti au magazeti.

³³ Ikiwa hawaruhusiwi kuhubiria wapangaji wa nyumba zenye ulinzi mkali katika eneo la kutaniko lao, wengine wamezoea kutoa ushahidi kwa busara kwa walinzi walio kazini au kwa mameneja walio katika ofisi za kukodiwa. Njia hiyohiyo yatumika kuhusu maeneo ya kibinafsi yasiyoruhusiwa kufikiwa na umma. Mwangalizi wa mzunguko na watangazaji wachache walitembelea majengo saba yenye vyumba vya kupangishwa kwa njia hii. Katika kila kisa, walimwambia meneja kwamba ingawa hawaruhusiwi kutembelea hayo majengo kwa njia ya kawaida, hawakutaka yeye akose habari iliyo kwenye majarida ya karibuni. Mameneja katika majengo yote saba walipokea magazeti na wakaomba matoleo yafuatayo pia! Ndipo wakazi wa majengo kama hayo hufikiwa kwa simu au kwa ushahidi wa barabarani karibu na hilo jengo. Utapata habari yenye kutumika kuhusu kutoa ushahidi kwa kutumia simu katika nyongeza “Kutoa Ushahidi kwa Simu—Njia ya Kufikia Wengi” katika Huduma ya Ufalme Yetu ya Agosti 1993.

³⁴ Jitahidi Kuhubiri Kila Mahali: Kuishi kupatana na wakfu wetu hutia ndani kuhisi uharaka juu ya mgawo wetu wa kuhubiri ujumbe wa Ufalme. Ili kufikia watu wakati unaowafaa, twahitaji kuweka kando mapendezi yetu ya kibinafsi ili ‘kwa njia zote tupate kuokoa watu.’ Watumishi wote wa Yehova waliojiweka wakfu wanataka kusema, kama alivyosema mtume Paulo: “Nafanya mambo yote kwa ajili ya habari njema, ili nipate kuwa mshiriki wayo pamoja na wengine.”—1 Kor. 9:22, 23, NW.

³⁵ Paulo aliandika zaidi: “Basi nitajisifia udhaifu wangu kwa furaha nyingi, ili uweza wa Kristo ukae juu yangu. . . . Maana niwapo dhaifu ndipo nilipo na nguvu.” (2 Kor. 12:9, 10) Yaani, hakuna mmoja wetu angaliweza kutimiza kazi hii kwa nguvu zetu wenyewe. Twahitaji kusali kwa Yehova tupate roho yake takatifu. Tukimwomba Mungu nguvu, twaweza kuwa na uhakika kwamba yeye atajibu sala zetu. Ndipo upendo wetu kwa watu utatuchochea tutafute fursa za kuwahubiria habari njema, popote wapatikanapo. Wakati wa juma lijalo, kwa nini usijaribu madokezo yaliyotolewa katika nyongeza hii?