Kupainia—Matumizi Yenye Hekima ya Wakati Wetu!

¹ ‘Mimi nina mengi ya kufanya tayari! Je, lingekuwa jambo la hekima kwa kweli kupainia wakati huu?’ Ndivyo alivyofikiri dada mmoja alipomsikiliza mzee painia akitoa hotuba ya kusanyiko la mzunguko yenye kichwa “Kusonga Mbele na Huduma ya Painia.” Ndugu kijana akiwa miongoni mwa wasikilizaji haohao aliwaza hivi, ‘Anawezaje kupainia? Mimi si mzee, lakini tayari maisha yangu yamejaa shughuli tele!’

² Mzee huyo alipokuwa akiendelea kuzungumzia baraka za kupainia, aliwahoji mapainia kadhaa kutoka katika mzunguko huo ambao walisema juu ya marekebisho ambayo wamefanya ili wapainie na jinsi ambavyo Yehova amebariki jitihada zao kwelikweli. Mmoja alikuwa asiyejiweza, mwingine alikuwa na mwenzi asiyeamini, na mwingine alikuwa ameacha kufuatia kazi-maisha ya kimwili lakini aliweza kuishi kulingana na uwezo wake. Waliposikia jinsi mapainia hao walivyokuwa wakifaulu kwa msaada wa Yehova, ndugu na dada hao waliokuwa wakisikiliza walianza kuchunguza upya kufikiri kwao wenyewe na hali zao. Twakuomba ufanye hivyo pia, hasa kwa kuwa saa zilizopunguzwa za mapainia zaweza kutimizwa na wahubiri wengi zaidi wa habari njema.

³ Twajua kwamba Yehova ni Muumba na Mwenye Enzi Kuu ya Ulimwengu Mzima na kwamba anatuwia uhai wetu. (Dan. 4:17; Mdo. 17:28) Twajua wazi kwamba Yehova anatumia tengenezo moja tu. Tumependelewa kutumikia kwa uaminifu-mshikamanifu pamoja nalo, tukitegemeza “mtumwa mwaminifu na mwenye busara” katika kutoa ushahidi wa Ufalme kabla ya mwisho kuja. (Mt. 24:45; 25:40; 1 Pet. 2:9) Tukiwa tunaishi kabisa katika “siku za mwisho,” tunatambua kwamba wakati wa kuhubiri unapungua. (2 Tim. 3:1) Wakati uleule, twahitaji kutegemeza familia zetu kimwili. (1 Tim. 5:8) Mapato ya mtu hayatimizi mengi kama ilivyokuwa hapo awali. Labda afya yetu haiko kama ilivyokuwa zamani. Na kusema kweli, twataka kuwa na wakati mchache na raslimali kadhaa za kutumia sisi wenyewe. (Mhu. 3:12, 13) Kwa hiyo, huenda tukajiuliza kama kwa kweli kukubali utumishi wa painia ni jambo lenye hekima.

⁴ Ni daraka la kila mmoja wetu kuchunguza kwa uangalifu hali zetu wenyewe na kuamua kama twaweza kupainia. (Rom. 14:12; Gal. 6:5) Ni jambo lenye kutia moyo kuona idadi zenye kuongezeka za wale wanaoitikia mwito wa painia. Kujapokuwa misongo na matatizo ya siku hizi za mwisho, ripoti ya utumishi iliyochapishwa katika kichapo 1999 Yearbook yaonyesha kwamba watu wa Yehova karibu 700,000 ulimwenguni pote wanasonga mbele katika huduma ya painia. Wawe wanatumikia katika hali ngumu za kiuchumi, wakikosa usafiri, wakipatwa na matatizo ya kiafya, au wakikabili matatizo mengineyo magumu, ndugu na dada hawa hawachoki kufanya yaliyo sawa, na hilo lastahili pongezi. (Gal. 6:9) Wamekubali mwaliko wa Yehova wa kumjaribu. (Mal. 3:10) Wanahisi kwamba kupainia ni njia yenye hekima ya kutumia wakati na raslimali chache walizo nazo na kwamba Yehova amewabariki kwelikweli kwa kufanya marekebisho yanayohitajiwa ili kuingia na kudumu katika kazi ya painia.

⁵ Mapainia Wabarikiwa: Dada mmoja katika Kamerun aliye na binti mchanga kabisa aeleza: “Tangu kuzaliwa kwake, binti yangu ameandamana nami sikuzote katika huduma. Hata kabla ya kujifunza kutembea, nilimbeba mgongoni, nikimfunga sawasawa kwa leso. Asubuhi moja nikiwa katika huduma, nilisimama kwenye kibanda kilichokuwa kandokando ya barabara. Mtoto wangu aliniacha, akichukua magazeti kadhaa mkobani mwangu. Alienda kwenye kibanda kilichofuata. Ijapokuwa hangeweza kusema mengi, alimvutia mwanamke mmoja na kumpa gazeti. Mwanamke huyo alishangaa kuona mtoto mchanga jinsi hiyo akishiriki katika utendaji huu. Alikubali gazeti hilo mara moja na pia funzo la Biblia nyumbani!”

⁶ Katika kuitikia mwito wa mapainia-wasaidizi zaidi, mzee na kichwa cha familia katika Zambia anayefanya kazi ya kuajiriwa ya wakati wote aliamua kufanya upainia-msaidizi licha ya ratiba yake iliyojaa mambo mengi. Alitaka kuweka kielelezo kwa kutaniko na familia yake. Katika pindi kadhaa, angeegesha gari lake kandokando ya barabara akiweka kaseti ya Siri ya Kupata Furaha ya Familia na kualika wapita-njia waje kusikiliza kilichokuwa kikisomwa kwa sauti. Katika njia hiyo, aliweza kuangusha vitabu 16 vya Furaha ya Familia, na vitabu 13 vya Ujuzi, na akaanzisha mafunzo mawili ya Biblia.

⁷ Roho nzuri ya upainia pia ilionekana katika nchi jirani ya Zimbabwe. Wakati wa Aprili 1998, kutaniko moja la wahubiri 117 liliripoti mapainia-wasaidizi 70 na mapainia wa kawaida 9. Kutaniko jingine la wahubiri 94 liliripoti mapainia-wasaidizi 58. Na hata jingine, la wahubiri 126, liliripoti kwamba 58 waliamua kufanya upainia-msaidizi pamoja na mapainia wa kawaida 4. Mwaka wa utumishi uliopita ulithibitika kuwa wenye kutokeza huko Zimbabwe. Hata ingawa akina ndugu huko walikuwa na shughuli nyingi na mambo ya familia, utendaji wa kutaniko, na ujenzi wa ofisi ya tawi, walikazia kutumia wakati kwa hekima katika huduma.

⁸ Mapainia wanatambua kwamba kuanza kazi ya upainia na kudumu katika hiyo hakutegemei nguvu zao wenyewe. Wao ni wa kwanza kukubali kwamba jambo lolote wanaloweza kufanya huwezekana kwa sababu wao ‘hutegemea nguvu ambazo Mungu hutoa.’ (1 Pet. 4:11) Imani yao huwawezesha watimize huduma yao siku kwa siku. Badala ya kutafuta mambo yao yanayofaa na starehe zao wenyewe, mapainia wenye mafanikio hutambua kwamba ili kusonga mbele, “kushindana sana” kwahitajiwa, lakini tokeo ni kwamba wanapokea baraka nyingi.—1 The. 2:2.

⁹ Kielelezo cha Paulo Ni cha Kuigwa: Biblia hurekodi mafanikio ya mtume Paulo katika huduma na msaada mzuri aliowapa watu wengi. Lakini, ikiwa kuna mtu aliyekuwa na mengi zaidi ya kufanya, alikuwa Paulo. Alivumilia mnyanyaso na magumu ya kimwili ili ahubiri habari njema na kuimarisha makutaniko. Pia ilimbidi avumilie tatizo baya sana la afya. (2 Kor. 11:21-29; 12:7-10) Alikuwa ameazimia kutumia wakati wake kwa hekima. Alikiri kwamba alifanya kazi yake yote kwa msaada wa Yehova. (Flp. 4:13) Hakuna mtu kati ya wale ambao Paulo alisaidia angeweza kukata kauli kwamba wakati na jitihada zake katika utumishi wa Yehova zilikuwa za bure au zingetumiwa vema zaidi kwa njia nyingine. Kwani, leo tungali twanufaika na utumiaji wenye hekima wa wakati wa Paulo! Twathamini kama nini shauri lake lililopuliziwa la kutusaidia tuchanganue mambo yetu ya kutangulizwa na kushikilia kweli katika nyakati hizi ngumu!

¹⁰ Sasa, kuliko wakati mwingine wowote, ‘wakati ubakio [wa kuhubiri habari njema] umepunguzwa.’ (1 Kor. 7:29; Mt. 24:14) Kwa hiyo, inafaa kujiuliza wenyewe, ‘Tuseme ningekufa kesho bila kutazamia, je, ningeweza kumwambia Yehova leo kwamba nimetumia wakati wangu kwa hekima?’ (Yak. 4:14) Kwa nini usizungumze na Yehova kwa sala sasa, ukimhakikishia tamaa yako ya kutumia wakati wako kwa hekima ukiwa mmoja wa Mashahidi wake? (Zab. 90:12) Sali kwa Yehova akusaidie ufanye maisha yako yawe sahili. Hata ingawa huenda uliamua kwamba huwezi kupainia hapo awali, je, yawezekana kwamba sasa unaona upainia waweza kufaa katika maisha yako?

¹¹ Tumia Hali Zako Zote kwa Mafaa: Ni jambo linaloeleweka kwamba, kwa sababu ya hali si wote wanaotamani wanaoweza kuratibu muda wa saa 70 kwa mwezi kutumikia wakiwa mapainia wa kawaida. Hata hivyo, wahubiri wengi hupanga kutoa muda wa saa 50 kwa mwezi katika huduma wakiwa mapainia-wasaidizi mara nyingi iwezekanavyo au kwa kuendelea. Ikiwa hali zako hazikuruhusu sasa kufanya upainia-msaidizi au wa kawaida, usife moyo. Endelea kusali hali zako zibadilike. Kwa wakati huu, ikiwa huwezi kufanya marekebisho, farijika kujua kwamba Yehova anapendezwa na chochote uwezacho kufanya kwa nafsi yote katika utumishi wake. (Mt. 13:23) Yeye anaona kwamba unasimama imara upande wake na kwamba unajitahidi kuwa mhubiri mwaminifu asiyeruhusu mwezi upite bila kutafuta fursa za kutoa ushahidi. Labda unaweza kufanya maendeleo ya kuboresha stadi zako za kutoa ushahidi, ukijitahidi kuwa mhubiri na mwalimu bora kabisa wa habari njema.—1 Tim. 4:16.

¹² “Siku ya BWANA iliyo kuu na itishayo” ikaribiapo, twahitaji kutumia wakati uliobaki kwa hekima ikiwa tutamaliza kazi tuliyoamriwa kufanya. (Yoe. 2:31) Shetani ajua kwamba ana wakati mchache, na kuliko wakati mwingine wowote, anajaribu kufanya kila kitu kwa uwezo wake kutatanisha maisha zetu na kufanya iwe vigumu kukazia uangalifu mambo yaliyo ya maana kwelikweli. (Flp. 1:10; Ufu. 12:12) Usidharau kamwe upendezi anaokuonyesha Mungu. Yehova anaweza kukusaidia ufanye maisha yako yawe sahili ili ujitahidi kabisa katika huduma. (Zab. 145:16) Kwa furaha, wengi wanapochunguza upya hali zao, wanaona kwamba wanaweza kujiunga na mapainia-wasaidizi au wa kawaida. Kwa kweli, mapainia hupata uradhi sana kwa kutumia wakati wao kwa hekima. Je, utakuwa mmoja wao?