Sitawisha Nguvu Zako za Ufahamu

¹ Watu wa Mungu kila mahali wamekumbwa na mikazo na majaribu mengi ya aina mbalimbali katika siku hizi za mwisho zenye taabu. (2 Tim. 3:1-5) Sote twahitaji kutiwa moyo ili kusimama imara katika imani. (1 Kor. 16:13) Twaweza kufanya hivyo kwa msaada wa Yehova tunapoendelea kujilisha Neno lake kwa ukawaida, kutegemea roho yake, na kushikamana sana na tengenezo lake.—Zab. 37:28; Rom. 8:38, 39; Ufu. 2:10.

² Kichwa “Iweni Watu Wazima Katika Nguvu za Kuelewa” kilifaa kabisa programu ya siku ya kusanyiko la pekee la mwaka jana. Kichwa hicho kilitegemea andiko la 1 Wakorintho 14:20, ambapo twasoma maneno haya ya mtume Paulo: “Akina ndugu, msiwe vitoto katika nguvu za kuelewa, lakini iweni watoto wachanga sana kuhusu ubaya; hata hivyo iweni watu wazima katika nguvu za kuelewa.” Uliionaje programu hiyo?

³ “Ilikuwa yenye kutia moyo kama nini!” “Tulihitaji programu hiyo kwelikweli!” Hayo ni maelezo mawili tu kati ya mengineyo. Hata mtu mmoja ambaye si Shahidi aliyekuja kushuhudia binti yake mwenye umri wa miaka 12 akibatizwa, alisema kwamba alivutiwa sana na programu hiyo na aliweza kuona jinsi ambavyo familia yake ingenufaika kutokana nayo. Je, unahisi hivyo? Sasa tutajikumbusha baadhi ya mambo makuu ya programu hiyo.

⁴ Ujuzi Sahihi Ni wa Lazima Ili Kusitawisha Nguvu za Ufahamu: Msemaji aliyetoa hotuba ya kwanza yenye kichwa “Sitawisha Nguvu Zako za Uelewevu Sasa,” alisema ni jambo gani linalohitajiwa ili kukabiliana na magumu ya leo? Hatuhitaji tu akili. Twapaswa kusitawisha na kuongeza uwezo wetu wa kuelewa Biblia ili tusishindwe na mambo mabaya tunayokabili. Uelewevu huo watokana na mwongozo wa Mungu. Kama mtunga-zaburi, twapaswa kumwomba Yehova atusaidie kuelewa sheria na vikumbusho vyake ili tuweze kumtumikia kwa moyo wote.—Zab. 119:1, 2, 34.

⁵ Katika sehemu iliyofuata, mwangalizi wa mzunguko alionyesha kwamba kupitia Neno lake na tengenezo lake, Yehova hutuandalia “Misaada ya Kutufanya Tuwe Watu Wazima Katika Uelewevu wa Biblia.” Uelewevu ulifafanuliwa kuwa “uwezo wa kuchunguza jambo na kupambanua muundo wake kwa kujua uhusiano kati ya sehemu zake mbalimbali na kati ya muundo wote mzima, hivyo kulielewa.” Ni nani anayeweza kutusaidia kusitawisha uwezo huo? Yehova ameandaa zawadi zikiwa wanadamu ili kutusaidia kufanya maendeleo ya kiroho. (Efe. 4:11, 12) Tengenezo lake la kidunia hutuhimiza tusome Neno la Mungu kila siku na kuhudhuria mikutano yote ya kutaniko kwa ukawaida. (Zab. 1:2) Tunafundishwa namna ya kutumia Biblia na vichapo vyetu vya Kikristo katika funzo la kibinafsi na la familia na vilevile tunapotayarisha mikutano na utumishi wa shambani. Je, umetumia kikamili maandalizi hayo yote? Je, unadumisha programu ya kawaida ya kusoma Biblia? Hilo ni muhimu ili tuepuke kufuata mielekeo, mitindo, falsafa, na vishawishi vyenye hila vya ulimwengu.—Kol. 2:6-8.

⁶ Nguvu Zetu za Ufahamu Zapasa Kuzoezwa: Katika hotuba yake ya kwanza yenye kichwa “Linda Hali ya Kiroho kwa Kuzoeza Nguvu Zako za Ufahamu,” msemaji aliyezuru alieleza kwamba watu wa ulimwengu hawawezi kutofautisha wema na uovu. (Isa. 5:20, 21) Hiyo ni kwa sababu wanakataa kukubali na kutii kanuni za Mungu za uadilifu. Tofauti na wao, sisi tuliozoezwa kiroho katika tengenezo la Yehova twatambua kanuni za Mungu, zinazoongoza utendaji na mwenendo wetu. Hivyo, twaweza kujithibitishia wenyewe yaliyo mema na yenye kukubalika machoni pa Yehova na mambo yanayopatana na mapenzi yake makamilifu.—Rom. 12:2.

⁷ Ili kuepuka mawazo yaliyopotoka ya ulimwengu na matokeo mabaya, twapaswa kuendelea kuzoeza nguvu zetu za ufahamu. Hilo hutimizwaje? Kama ilivyoandikwa kwenye Waebrania 5:12-14, mtume Paulo alikazia kwamba tunahitaji zaidi ya “maziwa” ya neno. Twahitaji chakula kigumu cha kiroho, kama kile tunachopata tunapojifunza unabii wa Isaya kwenye Funzo la Kitabu la Kutaniko. Kisha, twapaswa kuwa tayari kutenda mambo tunayojifunza maishani mwetu. Tunapofanya hivyo, tunasadikishwa kwamba kanuni na sheria za Yehova zinafaa. Hilo huzoeza nguvu zetu za ufahamu kutofautisha waziwazi lililo sawa na lililo kosa pia.

⁸ Kwa kusikitisha, wengine wameanguka kiroho. Kwa nini? Hawajakaza fikira kwenye mambo mema na yanayofaa machoni pa Yehova. Hivyo, wamedanganywa na vipindi vya mahojiano kwenye redio na televisheni ambavyo huzungumzia mambo yasiyopatana na Maandiko, muziki mchafu, au mashirika mabaya kwenye vituo vya kupiga gumzo vya kompyuta. Tukitenda kwa hekima, tutaepuka kushawishiwa na watu wasio safi kiadili, wapumbavu, au waovu.—Mit. 13:20; Gal. 5:7; 1 Tim. 6:20, 21.

⁹ Vijana Wapaswa Kuwa “Watoto Wachanga Sana Kuhusu Ubaya”: Programu ilikuwa na sehemu mbili hususa zilizowatia moyo vijana kusitawisha nguvu zao za ufahamu. Wasemaji walionyesha kwamba kuwa “wachanga sana kuhusu ubaya” humaanisha kukosa uzoefu, yaani, kuwa bila hatia kama watoto, kuhusu mambo yaliyo machafu machoni pa Yehova. (1 Kor. 14:20) Sote tulitiwa moyo kuangalia sana jinsi tunavyotumia wakati wetu ili tukinze kila namna ya ubaya na kuepuka kuambukizwa nao. (Efe. 5:15-17) Tulitiwa moyo kupiga hesabu muda tunaotumia kusoma habari ambazo haziongezi uelewevu wetu wa mambo ya kiroho. Je, ulifanya hivyo? Matokeo yalikuwa nini? Zaidi ya kusoma Biblia kila siku, azimia kusoma vichapo vyote ambavyo tengenezo huandaa. Kufanya hivyo, kutatusaidia sote, kutia ndani vijana, ‘tujipatie ufahamu [“uelewevu,” NW].’—Mit. 4:7-9.

¹⁰ “Nufaika kwa Kutumia Kanuni za Biblia kwa Uelewevu”: Hotuba ya kumalizia programu ya siku ya kusanyiko la pekee ilikuwa na kichwa hicho. Msemaji aliyezuru alieleza kwamba Yehova ndiye Chanzo cha uelewevu unaotupa uhai, ambao ni wa hali ya juu zaidi kuliko ule wa wanadamu wote. Hebu wazia kupata fursa tu ya kupokea uelewevu wa Yehova! Yeye huwapa uelewevu mwingi wale wanaoutafuta kwa moyo mnyoofu na kuuomba kwa imani. (Mit. 2:3-5, 9; 28:5) Je, unatumia uandalizi huo kikamili?

¹¹ Tulitiwa moyo kujifunza kutambua kanuni tunaposoma Biblia. (2 Tim. 3:16, 17) Jifunze kanuni hizo kwa makini ili upate uelewevu sahihi kuhusu mambo ambayo Yehova anasema. Chukua wakati ili utafakari kanuni hizo na uzikaze kabisa akilini na moyoni mwako. Hilo litazoeza nguvu zako za ufahamu ili ufanikiwe unapofanya maamuzi maishani. (Yos. 1:8) Sasa tutazungumzia hali kadhaa ambazo wengi hukabili na tuone jinsi kutumia kanuni za Biblia kunavyoweza kutusaidia kufanikiwa.

¹² ‘Je, nichague mtindo fulani wa mavazi na mapambo?’ Mara nyingi mitindo ya ulimwengu ya mavazi na mapambo hudhihirisha roho ya uasi. Roho hiyo huwachochea watu kuvaa shaghalabaghala au kwa njia inayovutia watu kingono. Ni kanuni zipi za Biblia zitakazotusaidia kukinza mielekeo hiyo? Tukiwa tumezoeza nguvu zetu za ufahamu, tutazingatia kanuni inayopatikana kwenye 1 Timotheo 2:9, 10, yaani, kuvalia kwa “kiasi na utimamu wa akili . . . , katika njia inayofaa [watu] wanaodai kumstahi Mungu.” Kanuni nyingine zinazotumika zatia ndani zile zilizotajwa kwenye 2 Wakorintho 6:3 na Wakolosai 3:18, 20.

¹³ ‘Nawezaje kudumisha uhusiano wa karibu katika familia?’ Mawasiliano mazuri kati ya washiriki wa familia ni muhimu. Yakobo 1:19 hutueleza hivi: “Kila mtu lazima awe mwepesi sana juu ya kusikia, wa polepole juu ya kusema, wa polepole juu ya hasira ya kisasi.” Licha ya kusikiliza, washiriki wa familia wapaswa pia kuzungumza pamoja kwa sababu mawasiliano ya familia yanahusisha pande mbili. Hata ikiwa yale tunayosema ni kweli, ikiwa tunayasema kwa ukatili, kiburi, au bila kujali hisia za wengine, yaelekea yataumiza badala ya kusaidia. Kwa hiyo, iwe sisi ni waume au wake, wazazi au watoto, twapaswa kufanya usemi wetu ‘uwe na upendezi sikuzote, wenye kukolezwa chumvi.’—Kol. 4:6.

¹⁴ ‘Je, ninaathiriwa na tamaa ya mali?’ Ulimwengu huchochea watu kutamani mali na tamaa hiyo hufanya maisha ya watu yawe magumu zaidi. Tamaa ya mali haimsaidii mtu kupata furaha. (Mhu. 5:10; Luka 12:15; 1 Tim. 6:9, 10) Ili kutusaidia tuepuke mtego wa kutamani mali, Yesu alitufundisha kanuni hii muhimu: Dumisha jicho sahili. Kuishi maisha yaliyosawazika, na yaliyo sahili kwatia ndani kukaza macho yetu kwenye masilahi ya Ufalme na kuyatanguliza mbele ya mambo mengine yote.—Mt. 6:22, 23, 33.

¹⁵ Twapaswa Kuwa na Lengo Gani?: Neno la Mungu lina kanuni adilifu za kutuongoza tunapofanya maamuzi. Twahitaji kujifunza kanuni hizo, kuzitafakari, na kuelewa jinsi tunavyoweza kuzitumia maishani mwetu. ‘Tukizoeza nguvu zetu za ufahamu kutofautisha lililo sahihi na lililo kosa,’ tutajinufaisha na kumheshimu Yehova.—Ebr. 5:14.