Itumie Biblia Vizuri
1 Hata iwe tunapanga kutoa kichapo gani katika huduma, ni muhimu kuchagua andiko lenye kuchochea fikira tunaloweza kusoma pamoja na wale walio tayari kusikiliza. (Ebr. 4:12) Kuchagua andiko lililo katika kichapo unachopanga kutoa kutakuwezesha kuunganisha vizuri kichapo hicho na mazungumzo yako. Katika maeneo fulani, wahubiri wameona kwamba kuna faida ya kuibeba Biblia mkononi mwao wanapomwendea mtu ili kuzungumza naye au wanapohubiri nyumba kwa nyumba.
2 Anza kwa Andiko: Wahubiri fulani huanza mazungumzo yao kwa kumuuliza mwenye nyumba swali rahisi la maoni kuhusu andiko fulani la Biblia, kisha wanalisoma. Hilo huelekeza fikira kwenye Neno la Mungu. Je, baadhi ya matangulizi haya yanaweza kuwa na matokeo katika eneo lenu?
◼ “Ikiwa ungekuwa na uwezo, je, ungeondoa mambo haya?” Someni Ufunuo 21:4.
◼ “Kwa nini tunaishi katika nyakati hatari?” Someni 2 Timotheo 3:1-5.
◼ “Je, unafikiri kwamba eneo letu lingekuwa mahali pazuri zaidi ikiwa kila mtu angefuata shauri hili?” Someni Mathayo 7:12.
◼ “Je, unafikiri kwamba watoto wako watapata kufurahia hali zinazotajwa hapa?” Someni Zaburi 37:10, 11.
◼ “Je, unafikiri kuna siku ambayo maneno haya yatatimia?” Someni Isaya 33:24.
◼ “Je, unaelewa maana ya mapinduzi ya serikali yanayotajwa hapa?” Someni Danieli 2:44.
◼ “Je, umewahi kutaka kumuuliza Mungu swali hili?” Someni Ayubu 21:7.
◼ “Je, inawezekana kuwaona tena wapendwa wetu waliokufa?” Someni Yohana 5:28, 29.
◼ “Je, wafu wanajua mambo ambayo walio hai wanafanya?” Someni Mhubiri 9:5.
3 Fafanua, Toa Mifano, Onyesha Matumizi: Mtu akiwa tayari kuzungumza, usiharakishe mazungumzo bali chukua wakati ufafanue, utoe mifano, na kuonyesha matumizi ya andiko mlilosoma ili mtu huyo alielewe. (Neh. 8:8) Watu wanapoelewa na kukubali mafundisho ya Neno la Mungu, wanaweza kufanya mabadiliko makubwa maishani mwao.—1 The. 2:13.
4 Endelea kuitumia Biblia vizuri na kuchochea upendezi wa watu. Unaweza kufanya vivyo hivyo unapofanya ziara za kurudia: (1) Chagua andiko linalofaa. (2) Uliza swali rahisi la maoni kuhusu andiko hilo. Kisha mlisome. (3) Fafanua, utoe mifano, na kuonyesha matumizi yake. Jitahidi kuongeza ujuzi wa mtu huyo kuhusu Neno la Mungu kila mara unapomtembelea. Huenda punde si punde utakuwa ukiongoza funzo la Biblia!
[Maswali ya Funzo]
1. Unaweza kufanya nini ili kuwa tayari kwa ajili ya huduma ya shambani?
2. (a) Tunawezaje kuanza mazungumzo yetu kwa Andiko? (b) Ni habari gani za Biblia zinazowapendeza watu wa eneo lenu?
3. Tunawezaje kuwasaidia watu waelewe maandiko ya Biblia tunayosoma pamoja nao?
4. Tunawezaje kuitumia vizuri Biblia tunapofanya ziara za kurudia?