Endelea Kusema Neno la Mungu kwa Ujasiri

¹ Sisi wahudumu Wakristo tunajua kwamba si wote tunaowahubiria watasikiliza. (Mt. 10:14) Hata hivyo, hatutaacha kuhubiri habari njema kwa sababu baadhi ya watu wanaikataa. (Met. 29:25) Ni nini kinachotusaidia kuendelea kusema neno la Mungu kwa ujasiri?

² Mtume Paulo alitambua “thamani bora zaidi ya kumjua Kristo Yesu.” Jambo hilo lilimchochea aseme kwa “usadikisho wenye nguvu.” (Flp. 3:8; 1 The. 1:5) Ijapokuwa wengine waliuona ujumbe aliohubiri kuwa dhaifu na wa upumbavu, alijua kwamba huo ulikuwa “nguvu za Mungu kwa ajili ya wokovu kwa kila mtu aliye na imani.” (Rom. 1:16) Kwa hiyo, hata alipokabili upinzani, aliendelea ‘kusema kwa ujasiri kwa mamlaka ya Yehova.’—Mdo. 14:1-7; 20:18-21, 24.

³ Chanzo cha Nguvu Zetu: Paulo hakutoa ushahidi kwa ujasiri kwa kutegemea nguvu yake mwenyewe. Aliandika hivi kujihusu na kumhusu Sila: “Baada ya sisi kuwa tumeteseka kwanza na kutendewa kwa dharau . . . katika Filipi, tulijipa ujasiri kwa njia ya Mungu wetu ili kuwaambia ninyi habari njema ya Mungu kwa kupambana sana.” (1 The. 2:2; Mdo. 16:12, 37) Isitoshe, alipokuwa amefungwa huko Roma, Paulo aliwasihi wengine wamwombee ili aendelee kuhubiri habari njema ‘kwa ujasiri kama alivyopaswa.’ (Efe. 6:18-20) Kwa kumtegemea Yehova badala ya kujitegemea, Paulo aliendelea kusema neno la Mungu kwa ujasiri.—2 Kor. 4:7; Flp. 4:13.

⁴ Ndivyo ilivyo leo. Ndugu mmoja aliyeona ni vigumu sana kuwaeleza wafanyakazi wenzake kwamba yeye ni Shahidi wa Yehova na kuwahubiria, alisali juu ya jambo hilo na kuanza kutoa ushahidi. Mwanzoni, mfanyakazi fulani alikataa kusikiliza, lakini aliposikia kuhusu tumaini la ufufuo mtu huyo alikubali kujifunza Biblia. Tangu wakati huo ndugu huyo hutumia kila fursa anayopata kutoa ushahidi. Mahali ambapo aliajiriwa kazi baadaye, aliwasaidia watu 34 kuwa Mashahidi katika kipindi cha miaka 14. Tunaweza kuwa na hakika kwamba Yehova atatutia nguvu pia ili ‘tuendelee kusema neno lake kwa ujasiri wote.’—Mdo. 4:29.