Endeleeni “Kujengana”

 1. Kulingana na 1 Wathesalonike 5:11, sote tunashiriki kufanya kazi gani?

JE, KUTANIKO lenu limewahi kujenga au kufanya marekebisho ya Jumba la Ufalme? Ikiwa ndivyo, bila shaka unakumbuka mkutano wa kwanza mliofanya katika jumba hilo jipya. Ulimshukuru sana Yehova. Kwa kweli, huenda ulikuwa na furaha sana hivi kwamba machozi yalikulenga-lenga mlipokuwa mkiimba wimbo wa kwanza. Majumba yetu ya Ufalme yaliyojengwa vizuri humletea Yehova sifa. Lakini tunamletea sifa hata zaidi tunaposhiriki katika kazi ya ujenzi wa aina nyingine. Kazi hiyo inahusisha jambo lenye thamani kuliko majengo halisi. Inahusisha kuwajenga watu wanaokuja kwenye majengo hayo ya ibada. Mtume Paulo alikuwa akifikiria ujenzi huo wa mfano alipoandika maneno ya andiko letu la msingi kwenye 1 Wathesalonike 5:11.​—Soma.

 2. Tutazungumzia nini katika makala hii?

² Mtume Paulo aliweka mfano mzuri sana wa mtu aliyejua jinsi ya kuwajenga waabudu wenzake. Alikuwa na hisia-mwenzi kuwaelekea. Katika makala hii, tutachunguza jinsi alivyowasaidia ndugu na dada zake (1) wavumilie majaribu, (2) wafanye amani na wengine, na (3) waimarishe imani yao katika Yehova. Acheni tuone jinsi tunavyoweza kumwiga leo na hivyo kuwajenga ndugu na dada zetu.​—1 Kor. 11:1.

 3. Paulo alikuwa na maoni gani yenye usawaziko?

³ Paulo aliwapenda sana ndugu zake. Yeye mwenyewe alikuwa amekabili hali ngumu, basi angeweza kuwaonyesha huruma na hisia-mwenzi waabudu wenzake walipokuwa wakikabiliana na majaribu. Pindi moja, Paulo aliishiwa na pesa na akalazimika kutafuta kazi ili ajitegemeze yeye mwenyewe na waandamani wake. (Mdo. 20:34) Alifanya kazi ya kutengeneza mahema. Alipowasili Korintho, kwanza alifanya kazi pamoja na Akila na Prisila ambao pia walitengeneza mahema. Lakini “kila sabato” alikuwa akiwahubiria Wayahudi na Wagiriki. Kisha Sila na Timotheo walipowasili, “Paulo akaanza kushughulika sana na lile neno.” (Mdo. 18:2-5) Paulo hakusahau kamwe kusudi lake kuu maishani, yaani, kumtumikia Yehova. Kwa kuwa Paulo alikuwa mwenye bidii, alikuwa na nafasi nzuri ya kuwatia moyo ndugu na dada zake. Aliwakumbusha kwamba wasiruhusu mkazo wa maisha na majukumu ya kuandalia familia yawafanye wapuuze “mambo muhimu zaidi,” yaani, mambo yote yanayohusika katika ibada ya Yehova.​—Flp. 1:10.

 4. Paulo na Timotheo waliwasaidiaje waabudu wenzao wakabiliane na mateso?

⁴ Muda mfupi baada ya kutaniko la Thesalonike kuanzishwa, waabudu hao wapya walikabili upinzani mkali. Umati wa wapinzani wenye hasira ulipokosa kumpata Paulo na Sila, waliwakokota “baadhi ya akina ndugu mpaka kwa watawala wa jiji,” wakipaza sauti hivi: “Watu [hawa] wanapinga maagizo ya Kaisari.” (Mdo. 17:6, 7) Je, unaweza kuwazia jinsi Wakristo hao wapya walivyoogopa walipotambua kwamba watu wa jiji hilo walikuwa wakiwashambulia? Wangeweza kupunguza bidii yao katika utumishi wa Yehova, lakini Paulo hakutaka iwe hivyo. Ingawa yeye na Sila walilazimika kuondoka, walihakikisha kwamba kutaniko hilo jipya lilitunzwa vizuri. Paulo aliwakumbusha Wathesalonike hivi: “[Tulimtuma] Timotheo, ndugu yetu . . . , ili awaimarishe na kuwafariji kuhusiana na imani yenu, ili yeyote asitikiswe na dhiki hizo.” (1 The. 3:2, 3) Inawezekana kwamba Timotheo alikuwa amekabili upinzani wa moja kwa moja katika mji wa nyumbani kwao wa Listra. Alikuwa amejionea jinsi Paulo alivyowaimarisha akina ndugu huko. Baada ya kuona jinsi Yehova alivyowasaidia, Timotheo angeweza kuwahakikishia ndugu na dada zake wapya kwamba Yehova angewasaidia wao pia.​—Mdo. 14:8, 19-22; Ebr. 12:2.

 5. Ndugu anayeitwa Bryant alinufaikaje na msaada aliopata kutoka kwa mzee wa kutaniko?

⁵ Paulo aliwaimarisha waabudu wenzake kwa njia gani nyingine? Walipotembelea tena Listra, Ikoniamu, na Antiokia, Paulo na Barnaba ‘waliwaweka rasmi wazee kwa ajili yao katika kila kutaniko.’ (Mdo. 14:21-23) Bila shaka, wanaume hao waliowekwa rasmi walithibitika kuwa chanzo cha faraja katika makutaniko, kama wazee walivyo leo. Ona jambo ambalo ndugu anayeitwa Bryant anasema: “Nilipokuwa na umri wa miaka 15, baba yangu alituacha, kisha mama yangu akatengwa na ushirika. Nilihisi niko peke yangu na kuvunjika moyo.” Ni nini kilichomsaidia Bryant kuvumilia kipindi hicho kigumu? Anasema: “Mzee wa kutaniko anayeitwa Tony, alizungumza nami kwenye mikutano na katika pindi nyingine. Aliniambia kuhusu wale ambao walikabili majaribu lakini bado walikuwa na furaha. Alinisomea andiko la Zaburi 27:10 na akazungumza mara nyingi kumhusu Hezekia, ambaye alitumikia kwa uaminifu ingawa baba yake hakuweka mfano mzuri.” Bryant alinufaikaje na msaada huo hususa? Bryant anasema hivi: “Kwa sababu ya kutiwa moyo na Tony, mwishowe nilianza kazi ya kuridhisha sana katika utumishi wa wakati wote.” Wazee, iweni macho ili kuwasaidia wale ambao kama Bryant, huenda wakahitaji “neno jema” la kuwatia moyo.​—Met. 12:25.

 6. Paulo alitumiaje masimulizi ya maisha kuwatia moyo ndugu na dada zake?

⁶ Paulo aliwakumbusha waabudu wenzake kwamba kupitia nguvu za Yehova, ‘wingu kubwa la mashahidi’ lilikuwa limefaulu kuvumilia hali ngumu. (Ebr. 12:1) Paulo alielewa jinsi ambavyo masimulizi ya watu hao ambao walikuwa wamefaulu kuvumilia hali nyingi ngumu yangewachochea ndugu na dada zake wawe na ujasiri na kuwasaidia kuendelea kukazia fikira “jiji la Mungu aliye hai.” (Ebr. 12:22) Hivyo ndivyo ilivyo leo. Bila shaka, sisi sote tumeimarishwa kwa kusoma jinsi Yehova alivyomsaidia Gideoni, Baraka, Daudi, Samweli, na wengine wengi. (Ebr. 11:32-35) Pia, tumetiwa moyo na mifano ya ndugu na dada waaminifu wa nyakati zetu. Katika makao yetu makuu, mara nyingi sisi hupokea barua kutoka kwa ndugu na dada ambao imani yao imeimarishwa baada ya kusoma simulizi la maisha la mmoja wa watumishi waaminifu wa Yehova katika nyakati zetu.

 7. Unajifunza nini kutokana na shauri la Paulo lililo kwenye Waroma 14:19-21?

⁷ Tunawajenga ndugu na dada zetu tunapochukua hatua ili kuendeleza amani kutanikoni. Haturuhusu maoni yetu tofauti yatugawanye. Tunakuwa tayari kubadili maoni yetu ikiwa hakuna kanuni ya Maandiko iliyovunjwa. Fikiria mfano mmoja. Kutaniko la Roma lilikuwa na Wakristo Wayahudi na wasio Wayahudi. Sheria ya Musa ilipoondolewa, vizuizi vyake vya kutokula aina fulani ya vyakula viliondolewa pia. (Marko 7:19) Tangu wakati huo na kuendelea, baadhi ya Wakristo Wayahudi walijihisi huru kula kila aina ya chakula. Hata hivyo, Wakristo wengine Wayahudi walihisi kwamba si sawa kufanya hivyo. Suala hilo lilisababisha mgawanyiko kutanikoni. Paulo alikazia umuhimu wa kuendelea kudumisha amani aliposema hivi: “Ni vema kutokula nyama au kunywa divai au kufanya jambo lolote ambalo litamkwaza ndugu yako.” (Soma Waroma 14:19-21.) Hivyo, Paulo aliwasaidia waabudu wenzake waone jinsi mizozo hiyo ilivyosababisha madhara kwa watu binafsi na kutaniko zima. Pia, alikuwa tayari kubadili mazoea yake ili aepuke kuwakwaza wengine. (1 Kor. 9:19-22) Vivyo hivyo, tunaweza kuwajenga wengine na kudumisha amani ikiwa tutaepuka kubishana kuhusu mambo ambayo ni mapendezi ya kibinafsi.

 8. Paulo alitendaje suala muhimu lilipotishia kuvuruga amani ya kutaniko?

⁸ Paulo aliweka mfano mzuri wa jinsi ya kudumisha amani pamoja na wengine, kulipokuwa na hali ya kutoelewana kuhusu mambo muhimu. Kwa mfano, baadhi ya akina ndugu katika kutaniko la karne ya kwanza walisisitiza kwamba Wakristo wasio Wayahudi wanapaswa kutahiriwa, labda ili wasishutumiwe na Wayahudi walio nje ya kutaniko. (Gal. 6:12) Paulo hakukubaliana kamwe na maoni hayo, lakini badala ya kusisitiza kwamba maoni yake yafuatwe, kwa unyenyekevu alitafuta ushauri kuhusu jambo hilo kutoka kwa mitume na wazee huko Yerusalemu. (Mdo. 15:1, 2) Matokeo ni kwamba kwa kufanya hivyo aliwasaidia Wakristo hao wadumishe shangwe na amani kutanikoni.​—Mdo. 15:30, 31.

 9. Tunawezaje kuiga mfano wa Paulo?

⁹ Kunapokuwa na hali kubwa ya kutoelewana, tunaendeleza amani kwa kutafuta mwongozo kutoka kwa wale ambao Yehova amewaweka rasmi watunze kutaniko. Mara nyingi, tunaweza kupata ushauri unaotegemea Biblia katika machapisho au miongozo inayoandaliwa na tengenezo. Ikiwa tutajitahidi kabisa kufuata maagizo hayo badala ya kuendeleza maoni yetu binafsi, tutachangia amani kutanikoni.

10. Paulo alifanya jambo gani lingine ili kuendeleza amani kutanikoni?

¹⁰ Paulo aliendeleza amani kwa kukazia fikira sifa nzuri za ndugu na dada zake, badala ya kukazia fikira udhaifu wao. Kwa mfano, mwishoni mwa barua yake kwa Waroma, Paulo aliwataja watu wengi kwa majina, na mara nyingi alitaja jambo fulani zuri au la kibinafsi kuwahusu. Tunaweza kumwiga Paulo kwa kuwa tayari sikuzote kutaja sifa nzuri za ndugu na dada zetu. Tunapofanya hivyo, tunawapatia ndugu na dada zetu sababu zaidi za kusitawisha uhusiano wa karibu kati yao, jambo ambalo linaimarisha upendo kutanikoni.

11. Tunawezaje kufanya amani hali ya kutoelewana inapotokea?

¹¹ Nyakati nyingine, huenda hata Wakristo wakomavu wasikubaliane au kubishana na wengine. Hivyo ndivyo ilivyotokea kati ya Paulo na Barnaba, rafiki yake wa karibu. Wanaume hao walibishana vikali kuhusu pendekezo la kwenda pamoja na Marko kwenye safari yao iliyofuata ya umishonari. ‘Waligombana kwa ukali,’ kisha wakaachana. (Mdo. 15:37-39) Lakini Paulo, Barnaba, na Marko walisuluhisha tofauti zao na kuonyesha kwamba walithamini sana amani na umoja katika kutaniko. Baadaye, Paulo alisema mambo mazuri kumhusu Barnaba na Marko. (1 Kor. 9:6; Kol. 4:10) Tunahitaji kusuluhisha tofauti zozote kati yetu na wengine kutanikoni, kisha tuendelee kukazia fikira sifa zao nzuri. Tukifanya hivyo, tutaendeleza amani na umoja.​—Efe. 4:3.

12. Ndugu na dada zetu wanakabili baadhi ya changamoto gani?

¹² Tunawajenga ndugu na dada zetu tunapoimarisha imani yao katika Yehova. Baadhi yao wanadhihakiwa na watu wa familia zao au wafanyakazi wenzao au wanafunzi wenzao. Wengine wanakabiliana na matatizo makubwa ya afya au wanapambana kushinda hisia za kuvunjika moyo. Wengine walibatizwa miaka mingi iliyopita na wamekuwa wakisubiri kwa muda mrefu mwisho wa mfumo huu wa mambo. Hali hizo zinaweza kujaribu imani ya Wakristo leo. Wakristo katika kutaniko la karne ya kwanza walikabili changamoto kama hizo. Paulo alifanya nini ili kuwaimarisha ndugu na dada zake?

13. Paulo aliwasaidiaje wale waliodhihakiwa kwa sababu ya imani yao?

¹³ Paulo alitumia Maandiko kujenga imani ya ndugu na dada zake. Kwa mfano, huenda Wakristo Wayahudi hawakujua jinsi ya kuwajibu watu wa familia zao waliodai kuwa dini ya Kiyahudi ilikuwa bora kuliko Ukristo. Bila shaka, barua ya Paulo kwa Waebrania iliwaimarisha sana Wakristo hao. (Ebr. 1:5, 6; 2:2, 3; 9:24, 25) Wangeweza kutumia hoja zake zenye nguvu kuwanyamazisha wapinzani wao. Leo, tunaweza kuwasaidia waabudu wenzetu wanaokabili dhihaka watumie machapisho yetu yanayotegemea Biblia kutetea imani yao. Na ikiwa vijana wetu wanadhihakiwa kwa sababu wanaamini uumbaji, tunaweza kuwasaidia wapate habari katika broshua Uhai​—Ulitokana na Muumba? na Maswali Matano Muhimu Kuhusu Chanzo cha Uhai ili kuonyesha kwa nini wanaamini kwamba uhai uliumbwa.

14. Ingawa Paulo alijishughulisha sana na kazi ya kuhubiri na kufundisha, alifanya jambo gani lingine?

¹⁴ Paulo aliwatia moyo ndugu na dada zake waonyeshe upendo kupitia “matendo mazuri.” (Ebr. 10:24) Aliwasaidia ndugu na dada zake si kupitia tu mambo aliyosema, bali pia kupitia matendo yake. Kwa mfano, waabudu wenzake huko Yudea walipokabili njaa, Paulo alisaidia kuwapelekea msaada. (Mdo. 11:27-30) Kwa kweli, ingawa Paulo alijishughulisha sana na kazi ya kuhubiri na kufundisha, sikuzote alitafuta njia za kuwasaidia wale waliohitaji msaada wa kimwili. (Gal. 2:10) Kwa kufanya hivyo, aliwasaidia waabudu wenzake waimarishe uhakika wao kwamba Yehova angewatunza. Leo, tunapojitolea kutumia wakati, jitihada, na ustadi wetu kufanya kazi ya kutoa msaada wakati wa majanga, sisi pia tunaimarisha imani ya ndugu na dada zetu. Inakuwa hivyo pia tunapotoa michango kwa ukawaida kwa ajili ya kazi ya ulimwenguni pote. Kupitia njia hizo na nyinginezo, tunawasaidia ndugu na dada zetu wawe na uhakika kwamba Yehova hatawaacha kamwe.

15-16. Tunapaswa kuwatendeaje wale ambao imani yao imedhoofika?

¹⁵ Paulo hakukata tamaa kuelekea wale ambao imani yao ilikuwa imedhoofika. Aliwatendea kwa huruma na kuzungumza nao kwa uchangamfu na kwa njia yenye kujenga. (Ebr. 6:9; 10:39.) Kwa mfano, katika barua yake kwa Waebrania alitumia maneno kama “tuyakazie” na “tusipeperushwe,” na hivyo kuonyesha kwamba yeye pia alihitaji kufuata ushauri aliotoa. (Ebr. 2:1, 3) Kama Paulo, hatukati tamaa kuelekea wale ambao imani yao imedhoofika. Badala yake, tunawajenga kwa kuwaonyesha kwamba tunapendezwa kikweli nao. Kwa kufanya hivyo, tunawathibitishia kwamba tunawapenda. Pia, tukizungumza kwa uchangamfu na upole, tunaweza kuwajenga wale wanaotusikiliza.

¹⁶ Paulo aliwahakikishia ndugu na dada zake kwamba Yehova aliona mambo mazuri waliyofanya. (Ebr. 10:32-34) Tunaweza kufanya hivyo pia tunapomsaidia Mkristo mwenzetu ambaye imani yake imedhoofika. Tunaweza kumwomba atueleze jinsi alivyojifunza kweli au kumtia moyo akumbuke pindi ambazo alijionea msaada wa Yehova. Tunaweza kutumia pindi hiyo kumhakikishia kwamba Yehova hajasahau matendo ya upendo aliyoonyesha zamani na kwamba hatamwacha wakati ujao. (Ebr. 6:10; 13:5, 6) Mazungumzo hayo yanaweza kuwachochea ndugu na dada hao wapendwa waendelee kumtumikia Yehova.

17. Tunaweza kuendelea kusitawisha ustadi gani mbalimbali?

¹⁷ Kama vile mjenzi anavyoboresha ustadi wake kadiri muda unavyopita, sisi pia tunaweza kuboresha uwezo wetu wa kuwajenga wengine. Tunaweza kuwasaidia wengine wapate nguvu za kuvumilia majaribu kwa kuwasimulia kuhusu mifano ya wale ambao walivumilia wakati uliopita. Tunaweza kuendeleza amani kwa kutaja sifa nzuri za wengine, kudumisha amani kunapokuwa na hali zinazoweza kuvuruga amani, na kufanya amani hali ya kutoelewana inapotokea. Na tunaweza kuendelea kujenga imani ya ndugu na dada zetu kwa kuzungumzia pamoja nao kweli muhimu za Biblia, kwa kutoa msaada hususa, na kuwaimarisha wale ambao hali yao ya kiroho imedhoofika.

18. Umeazimia kufanya nini?

¹⁸ Wale wanaoshiriki katika ujenzi wa majengo ya kitheokrasi wanakuwa na furaha na kuridhika. Tunaweza kuwa na furaha na kuridhika tunaposhiriki katika kazi ya kuwajenga kiroho ndugu na dada kutanikoni. Tofauti na majengo halisi ambayo mwishowe huharibika, matokeo ya kazi yetu yanaweza kudumu milele! Basi, acheni tuazimie ‘kuendelea kutiana moyo na kujengana.’​—1 The. 5:11.