Jinsi ya Kusitawisha “Moyo Mtiifu”

1. Kwa nini huenda watu wakawatii wale walio na mamlaka?

WATU huwatii wale walio na mamlaka kwa sababu tofauti-tofauti. Watu wengi hufanya hivyo ikiwa tu wanatazamwa au wanataka kuepuka adhabu. Inapohusu kumtii Mungu, baadhi ya watu huonyesha utii ili kusifiwa, kama viongozi wa dini katika siku za Yesu walivyofanya. (Mt. 23:5) Tofauti nao, sisi tunamtii Yehova kwa sababu tunaona faida za mwongozo wake. (Isa. 48:​17, 18) Hiyo ni sababu nzuri ya kuonyesha utii, lakini tuna sababu nyingine muhimu zaidi ya kumtii.

2. Ni sababu gani muhimu zaidi inayofanya tumtii Yehova?

² Sababu muhimu zaidi inayofanya tumtii Yehova ni kwamba tunampenda sana. (Mt. 22:​37, 38) Upendo wetu unatuchochea kuwa “watiifu kutoka moyoni.” (Rom. 6:17) Upendo kwa Yehova na “moyo mtiifu” hutuchochea kufanya yote tuwezayo kushika amri zake si tu wengine wanapotutazama, au tunapoona faida za papo hapo za kufanya hivyo, bali nyakati zote. Kwa kweli, moyo wetu ni wenye hila, hivyo nyakati nyingine inaweza kuwa changamoto kudumisha mtazamo unaofaa. Katika makala hii, tutachunguza masimulizi mawili ya Biblia yanayoweza kutusaidia kusitawisha moyo mtiifu. Kwanza, tutachunguza wakati Yehova alipowakomboa Waisraeli kutoka Misri. Kisha, tutachunguza mfano mzuri wa Mfalme Yehoshafati wa Yuda.

KWANZA WALITII KISHA WAKAASI

3. Amri ya Yehova ya kupaka damu katika miimo ya milango ilijaribu utii wa Waisraeli kwa njia gani? (Tazama pia picha.)

³ Kabla ya Yehova kuwakomboa Waisraeli kutoka Misri, aliwapa amri ambayo ilijaribu utii wao. Ili kuepuka pigo la mwisho la kumi, walihitaji kutoa dhabihu ya kondoo dume au mbuzi dume na kunyunyiza damu yake katika miimo ya milango ya nyumba zao. (Kut. 12:​5, 7) Yehova angepita juu ya nyumba zilizopakwa damu na kuwahifadhi hai wazaliwa wa kwanza wa wanadamu na wanyama katika kila nyumba. Hata hivyo, Waisraeli wangeweza kushawishiwa kutotii. Kwa nini? Huenda wangeogopa kushambuliwa na Wamisri ambao waliabudu kondoo dume. (Kut. 8:​25-27) Hata hivyo, Waisraeli waliona umuhimu wa kutii haraka na ‘kufanya kama Yehova alivyoamuru.’ (Kut. 12:28) Yehova aliwabariki kwa kuwahifadhi hai wazaliwa wao wa kwanza.

4. Yehova aliwapa Waisraeli maagizo gani yenye kushangaza walipokuwa wakiondoka Misri?

⁴ Usiku huohuo, Waisraeli waliondoka Misri. Kwanza, Yehova aliwaongoza kuelekea upande wa kaskazini wa Bahari Nyekundu, kisha akawapa maagizo ambayo kwa maoni ya wanadamu hayakupatana na akili. Aliwaambia wageuke na kuelekea kusini na kupiga kambi katikati ya bahari na milima. Katika kambi hiyo, ilionekana kana kwamba wamenaswa katikati ya Bahari Nyekundu na majeshi ya Farao ambayo yalikuwa yakiwafuatilia. Hata hivyo, kwa mara nyingine tena Waisraeli walifanya kama Yehova alivyokuwa amewaamuru kupitia Musa, mtumishi wake. (Kut. 14:​1-4) Lakini walipoona Wamisri wakikaribia, “wakaogopa sana” na hata kumlaumu Musa kwamba alikuwa amewaongoza huko ili wauawe! (Kut. 14:​5-11) Kwa nini walianza kujutia uamuzi wao wa kutii? Na Yehova alionaje mtazamo wao?

5. Waisraeli walishindwa kufanya nini katika Bahari Nyekundu? (Zaburi 106:7 na maelezo ya chini)

⁵ Biblia inasema kwamba walipokuwa karibu na Bahari Nyekundu, Waisraeli “hawakuthamini [kazi za Yehova] zinazostaajabisha” walizoona Misri au ‘kukumbuka’ upendo wake mshikamanifu. (Soma Zaburi 106:7 na maelezo ya chini.) Walikuwa wameona jinsi Yehova alivyowalinda wazaliwa wao wa kwanza wakati wa pigo la kumi. Lakini hawakuelewa kikamili jinsi Yehova alivyowapenda na hawakuwa na uhakika kwamba angewaokoa tena. Akitambua hali ya mioyo yao, Yehova alisema kwamba watu hao “waliasi . . . kando ya Bahari Nyekundu.” Ijapokuwa walimfuata Musa katikati ya Bahari Nyekundu, kamwe hawakurekebisha mtazamo wao. Hatimaye, Yehova alikikataa kizazi chote cha Waisraeli na hakuwaruhusu waingie katika Nchi ya Ahadi. (Zab. 106:​21, 24-26) Tunajifunza nini kutokana na mfano wao?

JIFUNZE KUTOKANA NA MFANO WENYE KUONYA WA WAISRAELI

6. Moyo mtiifu utatusaidia kufanya nini? (Yeremia 23:4)

⁶ Simulizi la kitabu cha Kutoka linaonyesha kwamba tunahitaji kuchunguza sababu zinazotufanya tumtii Yehova na wale ambao amewapa mgawo wa kuwaongoza watu wake. Je, sisi hutii wakati tu tunapofikiri kwamba tutapata faida papo hapo? Inawezekana kwamba baadhi ya Waisraeli walinyunyiza damu ya kondoo dume kwenye miimo ya milango ili tu kuwaokoa wazaliwa wao wa kwanza. Je, utii wetu unategemea mambo ambayo wengine wanafanya? Usiku wa Pasaka, Yehova alifanya Waisraeli wapate “kibali machoni pa Wamisri.” (Kut. 12:36) Lakini Wamisri walipowafuatia ili kuwaua, Waisraeli waliacha kumtumaini Yehova na kuasi. (Kut. 14:​10-12) Tofauti na mtazamo wao, tunapokuwa na moyo mtiifu tutachochewa kumtumaini Yehova na pia wale aliowaweka ili kuongoza mambo. (Soma Yeremia 23:4.) Tutafuata mwongozo tunaopokea hata ikiwa hatuelewi vizuri sababu zote za kutolewa kwa mwongozo huo, au hata ikiwa kufanya hivyo kunawakasirisha wale wanaomchukia Yehova. Tunaweza kuepukaje makosa ambayo Waisraeli walifanya na kusitawisha moyo mtiifu?

7. Kuimarisha upendo wetu kwa Yehova kutatusaidiaje kumtii?

⁷ Imarisha upendo wako kwa Yehova. Utii wetu unaweza kujaribiwa wakati ambapo hatuoni faida za papo hapo za kufuata mwongozo wa kitheokrasi au tunapokabili changamoto kwa sababu ya utii wetu. Ikiwa hilo litatokea, tunahitaji kukumbuka kwamba sababu kuu ya kumtii Yehova ni kwamba tunampenda na tunamtumaini. (1 Yoh. 5:3) Upendo wetu unatusaidia kumngojea kwa subira na kukubali kwamba huenda tukahitaji muda zaidi ili kuona matokeo mazuri ya utii wetu.—Mhu. 7:8; Mika 7:7.

8. Mashahidi wawili walionyeshaje azimio lao la kuwa watiifu?

⁸ Katika nyakati zetu, watu wa Mungu wameweka mfano mzuri wa kuwa watiifu hata wakati ambapo hawakuona faida za papo hapo. Kwa mfano, wakati wa mlipuko wa ugonjwa wa COVID-19, makutaniko yalipewa mwongozo wa kufanya mikutano kupitia video mtandaoni. Mzee wa kutaniko nchini Peru anakumbuka hivi: “Mwanzoni, nilidhani kwamba mwongozo huo usingetufaa katika eneo letu.” Licha ya kuwa na shaka, aliazimia kumtii na kumtumaini Mungu. (Met. 3:​5, 6) Matokeo yalikuwaje? Anasema hivi: “Niliona jinsi Yehova anavyowathawabisha wale wanaomtii. Kutaniko letu liliimarishwa zaidi na kuwa na umoja zaidi.” Fikiria mfano mwingine. Mwaka wa 2020, tengenezo lilibadili miongozo kuhusu makutaniko na vikundi vya lugha za kigeni. Dada nchini Japani alipojua kwamba kikundi alichokuwa akitumikia kingefungwa, alisema hivi: “Ninataka kutii badiliko hili na kutozungumza isivyofaa kulihusu. Ninasubiri kwa hamu kuona faida za badiliko hilo.”

9. Tunaweza kujitayarishaje kuwa watiifu licha ya upinzani? (Tazama pia picha.)

⁹ Jitayarishe kwa ajili ya upinzani. Ni muhimu kujitayarisha kwa ajili ya upinzani hasa inapohusu kazi yetu ya kuhubiri kuhusu Ufalme. Katika maeneo mengi ulimwenguni, bado tunafurahia uhuru wa ibada. Hata hivyo, kazi yetu ya kuhubiri habari njema ya Ufalme wa Mungu inatia ndani kuwaambia wengine kwamba hivi karibuni mfumo huu mwovu utaharibiwa. Tutaendelea kuhubiri ujumbe huo hadi kabla tu ya mwisho wa mfumo huu katika vita vya Har–​Magedoni. (Mt. 24:14) Kwa kuongezea, wakati wa dhiki kuu, ujumbe tutakaohubiri huenda ukawa mzito zaidi na wa moja kwa moja, na kuwafanya watu waamue ikiwa wataukubali Ufalme au la. Kwa wale wanaomchukia Yehova, huenda ujumbe wetu ukaonekana kuwa pigo “kubwa mno.”a (Ufu. 16:21) Bila shaka, watakasirika, kama alivyokasirika Farao katika Bahari Nyekundu. Tunaweza kujitayarisha kwa ajili ya upinzani wa wakati ujao kwa kutii sasa amri ya kuhubiri licha ya maoni ya watu kutuhusu.

IGA UTII WA MFALME YEHOSHAFATI

10. Mfalme Yehoshafati alihisije alipotishiwa na mataifa yaliyotaka kumvamia?

¹⁰ Biblia pia ina mifano mizuri ya watu waliokuwa watiifu. Kwa mfano, Mfalme Yehoshafati alikabili majeshi ya mataifa matatu yaliyoungana ili kupigana vita dhidi ya Yuda. Inaeleweka kwamba Yehoshafati na watu wake waliogopa. (2 Nya. 20:​1-3) Lakini mfalme huyo hakushindwa kutenda kwa sababu ya woga; alichukua hatua. Kuiga jambo ambalo Yehoshafati aliamua kufanya kunaweza kutusaidia kusitawisha moyo mtiifu.

11. Yehoshafati alifanya nini alipoanza kuogopa? (2 Mambo ya Nyakati 20:​5, 6, 10-12)

¹¹ Azimia kumtafuta Yehova na kumtii. Yehoshafati alipoanza kuogopa, ‘aliazimia kumtafuta Yehova.’ (2 Nya. 20:3) Tayari Yehoshafati alikuwa na kawaida ya kutafuta mwongozo wa Yehova. (2 Nya. 19:3) Lakini katika hali hiyo ngumu, ‘aliazimia’ kumtafuta Yehova na kutii mwongozo wowote aliotoa. Kisha, Yehoshafati akatoa sala ya kutoka moyoni. (Soma 2 Mambo ya Nyakati 20:​5, 6, 10-12.) Acheni tufuate mfano wake tunapokuwa na mkazo. Tunaweza kuazimia kumtii Yehova, kutafuta mwongozo wake kwa kusali na kujifunza, na kuwa na uhakika kwamba atatusaidia.—Zab. 119:112.

12. Tunaweza kuimarishaje azimio letu la kumtii Yehova?

¹² Endelea kuongeza ujuzi wako wa Biblia. Sala ya Yehoshafati ilifunua kina cha ujuzi wake. Alielewa jinsi taifa la Israeli lilivyorithi nchi yao kupitia ahadi ya Mungu kwa Abrahamu. (Mwa. 12:7) Maneno ya Yehoshafati yalifanana na maneno ya Sulemani aliposali wakati hekalu lilipozinduliwa. (2 Nya. 6:​28-30; 20:​5-9) Ujuzi aliokuwa nao Yehoshafati ulimsaidia kumtumaini zaidi Yehova na kuimarisha azimio lake la kumtii. Ili kuimarisha azimio letu, tunahitaji kuendelea kuongeza “hazina” yetu kwa kuweka humo kweli mpya zaidi ya zile ambazo tayari tunazijua. (Mt. 13:52) Kwa kufanya hivyo, tutaimarisha azimio letu la kumtii Yehova hata tunapokabili changamoto.

13. Sifa ya unyenyekevu inaweza kutusaidiaje kuwa watiifu?

¹³ Sitawisha sifa ya unyenyekevu. Sala ya Yehoshafati ilionyesha pia kwamba alikuwa mnyenyekevu. Akiwa mfalme, angeweza kushawishika kutegemea nguvu na uwezo wake ili kumshughulikia adui. Badala yake, katika sala aliyotoa hadharani, kwa unyenyekevu alikiri kwamba Yuda lilihitaji msaada wa Mungu. (2 Nya. 20:12) Mtazamo wa unyenyekevu wa mfalme huyo ulifanya iwe rahisi zaidi kwake kukubali mwongozo wa Mungu. Sifa ya unyenyekevu itatusaidia pia kudumisha moyo mtiifu katika hali yoyote.—Flp. 2:​5, 8.

14. Yehoshafati alitendaje baada ya kupewa maagizo na Mungu?

¹⁴ Fikiria jinsi matendo yako yanavyowaathiri wengine. Yehova alijibu sala ya Yehoshafati kwa kumpatia maagizo yaliyo wazi kupitia nabii Yahazieli aliyewaambia watu kwamba hawangehitaji kupigana. Badala yake, aliwaagiza hivi: “Simameni mahali penu, simameni tuli, muuone wokovu wa Yehova kwa ajili yenu.” Biblia inasema kwamba Yehoshafati “akainama chini kifudifudi.” Na watu wote “wakaanguka chini . . . ili kumwabudu Yehova.” Siku iliyofuata walipokuwa wakienda, mfalme aliwahimiza watu wawe “na imani katika Yehova” na “katika manabii wake.”—2 Nya. 20:​14-20.

15. Yehoshafati alionyeshaje kina cha imani yake?

¹⁵ Akionyesha kina cha imani yake, Yehoshafati aliwaweka wanaume ili waimbe nyimbo za sifa “huku wakiwatangulia wanaume wenye silaha.” (2 Nya. 20:21) Yehoshafati alichukua hatua hiyo ‘baada tu ya kushauriana na watu.’ Kwa kweli, aliweka mfano mzuri wa kuwachochea raia wake wamtumaini na kumtii Yehova! Yehova aliwathawabisha kwa kusababisha maadui wao waangamizane wenyewe kwa wenyewe.—2 Nya. 20:​22-24.

16. Wale walio na mamlaka wanaweza kujifunza nini kutoka kwa Yehoshafati? (1 Wafalme 3:9) (Tazama pia picha.)

¹⁶ Wazee wa kutaniko, wazazi, na wengine wenye mamlaka wanaweza kujifunza kutoka kwa Yehoshafati. Utii wake wa kutoka moyoni uliwachochea vizuri wale waliokuwa chini ya uangalizi wake. Kwa njia hiyo alikuwa kama Mfalme Sulemani, ambaye alipokuwa mwaminifu, alimwomba Mungu ampe moyo mtiifu. Sulemani alitoa ombi hilo si kwa faida yake, bali kwa faida ya watu. Alitaka kuwahukumu kulingana na njia ya Yehova. (Soma 1 Wafalme 3:9.) Yehoshafati alimsikiliza nabii wa Mungu kwa unyenyekevu, alitafuta ushauri wa watu kabla ya kufanya uamuzi muhimu, na kuwatia moyo watii mwongozo wa Yehova. Wazee wa kutaniko wenye hekima wanafuata mfano wake. Kwa unyenyekevu wanatafuta mwongozo kutoka katika Neno la Mungu, machapisho yetu, na wazee wengine kabla ya kufanya maamuzi yatakayoliathiri kutaniko. (Met. 15:22) Na kupitia maneno na matendo yao, wanawachochea watu wa Mungu wawe watiifu kutoka moyoni. Vivyo hivyo, wazazi wanatambua kwamba watoto wao wanaona wanapotii au wasipotii, na kwamba wataiga mfano wao.—Met. 1:8; 14:1.

17. Kwa nini tunapaswa kuendelea kuwa na moyo mtiifu?

¹⁷ Hata iwe tutakabili changamoto gani, tunapokuwa na moyo mtiifu, tunaweza kuwa na uhakika kwamba Yehova atatutunza na kutuongoza. Kama tu ilivyokuwa katika nyakati za Biblia, bila shaka Yehova atatoa mwongozo kupitia wawakilishi wake duniani. Na ikiwa miongozo yake itaonekana kuwa yenye kushangaza, hatupaswi kushtuka. Njia na uwezo wa Yehova ni wa juu zaidi kuliko wetu. (Isa. 55:9) Hivyo, acheni tuendelee kusitawisha moyo mtiifu.