Matukio Muhimu ya Mwaka Uliopita

LICHA ya hali zenye kutia wasiwasi ulimwenguni, Mashahidi wa Yehova wamefurahia mwaka mwingine wenye matokeo katika utumishi wao mtakatifu. Kwa msaada wa Mungu, kweli ya habari njema ‘inazaa matunda na kuongezeka katika ulimwengu wote.’ (Kol. 1:5, 6) Tuna hakika kwamba ripoti ya mwaka huu itakutia moyo na kuimarisha imani yako.

MPANGO MPYA WA KUFANYA UPAINIA MSAIDIZI

Kulikuwa na msisimuko mkubwa ilipotangazwa kuwa mapainia wasaidizi wanaweza kutimiza takwa la saa 30 au 50 katika mwezi wa Aprili. Wengi ambao kwa kawaida hawangeweza kushiriki utumishi huo walifurahi sana kupata fursa hiyo. Maelfu ya wahubiri walichukua upainia msaidizi kwa mara ya kwanza, na wengi ambao walikuwa mapainia hapo awali walifurahi kufanya hivyo tena. Isitoshe, wahubiri wengi ambao hawakuweza kufanya upainia msaidizi walijitahidi sana kuongeza utumishi wao. Kulikuwa na matokeo gani?

Ofisi nyingi za tawi ziliripoti ongezeko lililozidi vilele vya hapo awali. Ulimwenguni, wahubiri 2,657,377 walichukua upainia msaidizi na idadi hiyo ni mara tano zaidi ya kilele cha mapainia wasaidizi cha mwaka uliotangulia! Asilimia 80 ya Wanabetheli wote duniani, yaani 16,292 kati ya Wanabetheli 20,290, walishiriki katika pendeleo hilo la utumishi. Je, haipendezi kujua kwamba watumishi wa Yehova walifanya mengi zaidi katika kazi ya kuhubiri mwezi wa Aprili kuliko mwezi mwingine wowote katika historia?

Zaidi ya mwaka mmoja tu baada ya tetemeko kubwa la nchi lililosababisha vifo vya watu 300,000 hivi, mwezi wa Aprili nchi ya Haiti iliripoti vilele vipya katika historia ya kazi ya kuhubiri nchini humo. Wahubiri 6,185 kati ya 17,009, walikuwa mapainia wasaidizi. Kampeni ya pekee ya kusambaza broshua Mtu Fulani Umpendaye Anapokufa, ambayo karibuni imetolewa katika Kikrioli cha Haiti, iliwafariji sana na kuwapa tumaini watu waliokuwa wanaomboleza.

Mwezi wa Aprili, ndugu na dada zetu nchini Nigeria walikabili hali ngumu isiyo ya kawaida. Katika siku nne zilizotengwa kwa ajili ya uchaguzi (tatu zikiwa za Jumamosi), serikali iliwakataza watu kutembea nje kati ya saa moja asubuhi na saa kumi na moja jioni isipokuwa kwa sababu ya kupiga kura. Hata hivyo, wahubiri hawakukata tamaa. Kutaniko moja lilisema: “Tunawaandikia tukiwa na shangwe nyingi na mioyo iliyojaa uthamini kwa sababu ya wakati mzuri ambao tumefurahia mwezi huo.” Katika kutaniko lingine, 92 kati ya wahubiri 127 waliobatizwa walijiandikisha kuwa mapainia wasaidizi, kutia ndani wazee wote na watumishi wa huduma. Wanabetheli 555 kati ya washiriki wote 688 wa familia ya Betheli walifanya upainia msaidizi.

Walifaulu Licha ya Hali Ngumu. Jeannette, anayeishi katika eneo la vijijini lenye milima nchini Burundi, ametamani siku zote kuwa painia, lakini ana ugonjwa wa moyo unaomzuia kutembea mbali au kwenye maeneo yenye mwinuko sana. Jeannette alifurahi aliposikia kwamba takwa la saa kwa ajili ya mapainia wasaidizi katika mwezi wa Aprili limepunguzwa. Ili kumsaidia kutimiza tamaa yake ya kuwa painia, wazee walipanga ahubiri katika eneo lililo karibu na kwake. Zaidi ya hayo, mapainia na wahubiri waliongoza mafunzo yao ya Biblia nyumbani kwake. Kufikia mwisho wa mwezi, Jeannette alifurahi kwamba alikuwa ameanzisha mafunzo manne ya Biblia. “Ningependa kufanya upainia tena,” anasema, “na nina hakika kwamba Yehova atanisaidia.”

Katika kisiwa cha Grenada, dada mmoja kijana ambaye ni kiziwi alifanya upainia licha ya matatizo yanayofanya iwe vigumu kwake kutembea. Anasema, “Ilikuwa vigumu sana kutembea mbali hadi kwenye kituo cha basi ili kupata gari la kwenda kwenye mkutano wa utumishi.” Isitoshe, dada huyo hakuwa na kazi, na alimwomba Yehova kwa bidii amsaidie. Alitenda kulingana na sala zake na akawa akijiruzuku kwa kuuza vitu vilivyofumwa kwa kroshia na vito vinavyotengenezwa kwa mkono. Alisema hivi baadaye: “Nilishiriki kikamili kazi ya kuhubiri na ndugu walinitegemeza na kunitia moyo sana. Hilo liliniletea furaha ya kweli!”

Toshi, dada mwenye umri wa miaka 101 nchini Japani, alifurahi kujiandikisha kuwa painia msaidizi mwezi wa Aprili. Kwa kuwa hawezi kwenda nje ya makao anayoishi, yeye huhubiri kwa kuandika barua au kuwahubiria watu wanaofanya kazi hapo. Anaeleza: “Kwa kuwa nina tatizo la kusikia, mimi huzungumza kwa sauti ya juu. Kwa hiyo, hata watu walio katika ujirani wanaweza kunisikia.”

Felix, ndugu anayeishi Kosta Rika na ambaye amepooza mikono na miguu aliamua kuwa painia msaidizi. Angefanyaje hivyo? Aliwekewa meza ya vitabu nje ya nyumba yake ili awahubirie wapita-njia. Mwisho wa mwezi, Felix alikuwa amechoka lakini alihisi ameburudika kiroho na alifurahi kuanzisha mafunzo manne ya Biblia.

Wahubiri wengi wachanga walifurahia pia kushiriki katika utendaji wa pekee mwezi huo. Kwa mfano, huko Hispania, Sandra mwenye umri wa miaka 11 na kaka yake, Alejandro, mwenye umri wa miaka 7, walitaka kuongeza utumishi wao. Walichochewa na bidii ya ndugu wa kutaniko lao na mfano mzuri wa wazazi wao, na wakatamani kuwa mapainia wasaidizi. Wangefanyaje hivyo ilhali hawajabatizwa? Wote wawili walipanga ratiba ya kutumia wakati sawa na wa wazazi wao katika utumishi, na kujitayarisha kwa kuwa na vipindi vya mazoezi wakati wa jioni ya Ibada ya Familia. Wazazi wao walifikiri kwamba kadiri mwezi ulivyosonga, watoto hao wangechoka. Lakini watoto hao hawakuyumba-yumba. Kufikia Aprili 30, wote katika familia hiyo walikuwa wametimiza mradi wao wa saa 30 isipokuwa Alejandro, ambaye bado alihitaji saa tatu. Hivyo, akaenda kuhubiri na baba yake ili atimize lengo lake la mwezi huo. Walifurahi kama nini kuwa na wakati mzuri na kufanya mengi wakiwa familia iliyoungana!

“Nilisali kila siku,” asema Jean, “kwamba mimi na mume wangu, Philip, tuweze kuhubiri saa 30.” Hata hivyo, Philip, ambaye awali alikuwa mwangalizi wa wilaya hadi alipodhoofishwa na ugonjwa unaoathiri ubongo wake, alilazwa hospitalini nchini Hispania, akiwa hata hawezi kusema. Aliwasiliana tu kwa macho, akiyafumba na kufumbua mara moja ili kusema ndiyo na mara mbili ili kusema la.

“Nilipomwambia kuhusu upainia msaidizi,” Jean aendelea kusema, “alionyesha kwamba yeye pia angependa kuwa painia msaidizi.” Lakini angetimizaje mradi huo?

Miezi iliyokuwa imepita, Jean na Philip waliwahubiria wagonjwa, watu wa familia waliowatembelea, na wafanyakazi hospitalini. “Mwezi wa Aprili, tulipanga kuhubiri hapo hospitalini kwa saa moja hivi kwa siku Philip alipokuwa macho, na angeshiriki katika mazungumzo hayo kwa kufumba na kufumbua macho.”

Hata hivyo ilipofika Machi, Philip alipelekwa kwenye wadi ya wagonjwa wasiopaswa kuchangamana na wengine. Lakini, yeye na Jean waliweza kufuata ratiba yao kwa kuwahubiria wafanyakazi wa hospitali kwa dakika chache mara tofauti-tofauti kwa siku. Mmoja wa wauguzi aliyekubali kitabu Biblia Inafundisha Nini Hasa? alimtazama Philip machoni na kumwahidi kuwa angerudi kesho yake ili asome maandiko. Aliporudi, Jean alimwomba asome Yohana 17:3 na akamuuliza maoni yake kuhusu andiko hilo. Waliendelea kwa njia hiyo, naye Philip alionyesha kwa macho kama jibu la muuguzi huyo ni sahihi au la. Hata wakati ambapo hakufanya kazi katika wadi hiyo, muuguzi huyo wa kike alikuja kumhakikishia Philip kwamba alikuwa akimwomba Yehova ili awe na uhusiano wa karibu pamoja Naye.

Watumishi wa Yehova wanaona utendaji huo ulioongezeka kuwa njia ya kuonyesha upendo wao kwa jirani zao, kuonyesha shukrani kwa dhabihu ya Yesu Kristo, na kuonyesha kwamba wanajitoa kwa Baba yao wa mbinguni. Wanatazamia kwa hamu mwezi wa Machi 2012, ambapo watapata fursa nyingine ya kutimiza takwa la saa 30 au 50 katika kazi ya kuhubiri.

SHULE ZINAZOFUNDISHA NJIA ZA YEHOVA

Tengenezo la Yehova limechukua kwa uzito sana unabii uliorekodiwa katika Isaya 2:3: “Twendeni juu kwenye mlima wa Yehova, kwa nyumba ya Mungu wa Yakobo; naye atatufundisha njia zake.” Kwa mfano, Vita vya Pili vya Ulimwengu vilipokuwa vimepamba moto, jamii ya mtumwa mwaminifu na mwenye busara ilitambua kwamba watu kutoka katika mataifa yote bado walihitaji kufundishwa na Yehova kabla ya mwisho wa mfumo wa mambo wa Shetani. Kwa hiyo, wakafanya mipango ya kuanzisha shule kama vile Shule ya Gileadi na Shule ya Huduma ya Kitheokrasi. Hivi karibuni, Baraza Linaloongoza limefanya mabadiliko zaidi kwa shule mbalimbali zinazotoa mazoezi ya pekee.

Mnamo Oktoba 2010, Shule ya Mazoezi ya Kihuduma ilibadilishwa jina na kuitwa Shule ya Biblia ya Ndugu Waseja. Ndugu waseja wanaotumika wakiwa wazee au watumishi wa huduma wataendelea kuandikishwa katika shule hii miezi miwili. Kufikia sasa, ndugu 37,445 wamefaidika kutokana na masomo hayo yanayofanywa ulimwenguni pote, huku wengi wakitumika kama mapainia, waangalizi wanaosafiri, wamishonari, na Wanabetheli.

Shule ya Biblia ya Wenzi wa Ndoa Wakristo ni shule mpya ya miezi miwili iliyoanzishwa mnamo Julai 2011 na kwa sasa inafanywa huko Patterson, Marekani. Wenzi wa ndoa wanaruhusiwa kujiandikisha ikiwa wana umri wa kati ya miaka 25 na 50, wana afya nzuri, wameoana kwa angalau miaka miwili, wamekuwa katika utumishi wa wakati wote kwa angalau miaka miwili mfululizo, na iwapo mume ametumika akiwa mzee au mtumishi wa huduma kwa miaka miwili mfululizo. Kuanzia mwaka wa 2012, madarasa ya Shule ya Biblia ya Wenzi wa Ndoa Wakristo yatafanywa katika vituo vinavyotumiwa sasa kwa ajili ya Shule ya Biblia ya Ndugu Waseja.

Shule ya Biblia ya Wenzi wa Ndoa Wakristo imekusudiwa kutoa mazoezi ya pekee kwa wenzi wa ndoa ili waweze kutumiwa kwa ukamili zaidi na Yehova na tengenezo lake. Wahitimu wengi watatumika wakiwa mapainia wa kawaida katika eneo lenye uhitaji mkubwa zaidi nchini mwao. Hata hivyo, wahitimu kadhaa watapata migawo ya kuwa mapainia wa pekee wa muda na hata wengine watazoezwa kufanya kazi ya kuyazungukia makutaniko. Huenda wachache wakapokea mgawo katika nchi nyingine iwapo wako tayari na wanastahili.

Wale wanaojaza ombi la kujiunga na shule hii wanapaswa kuwa wamekomaa kiroho na wawe na roho ya kujidhabihu. Walimu walewale wanaofundisha Shule ya Biblia ya Ndugu Waseja watafundisha shule hii mpya, na watafuata mpangilio uleule wa masomo. Akina ndugu watafundishwa vizio vichache wakiwa peke yao huku wake zao wakishiriki utumishi wa shambani. Maelezo zaidi na matakwa kwa wale ambao wangependa kujiunga na shule hiyo yatazungumziwa kwenye mikutano itakayofanywa katika makusanyiko ya wilaya.

Baraza Linaloongoza limefanya marekebisho kuhusiana na Shule ya Gileadi. Kuanzia darasa la 132, lililoanza Oktoba 24, 2011, ni wale tu walio katika utumishi wa pekee wa wakati wote watakaozoezwa. Watatia ndani wamishonari ambao bado hawajahudhuria Shule ya Gileadi, mapainia wa pekee, waangalizi wanaosafiri, na Wanabetheli. Iwapo wenzi wa ndoa wanaandika na kuzungumza Kiingereza kwa ufasaha, Halmashauri ya Tawi inaweza kupendekeza wahudhurie.

Wahitimu wa Gileadi watapewa migawo ambayo itaimarisha na kutegemeza utumishi na ofisi ya tawi na watatumika wakiwa wamishonari, waangalizi wanaosafiri, au Wanabetheli. Watakaopata mgawo wa kutumika katika huduma ya shambani watatumwa kwenye maeneo yenye watu wengi ambapo watasaidia sana katika kazi ya kuhubiri na utendaji mbalimbali wa kutaniko. Halmashauri za Tawi zinaweza kuendelea kuomba wahitimu wa Shule ya Gileadi watumwe katika eneo lao iwapo kuna uhitaji hususa. Wanaweza pia kupendekeza watumishi wa pekee wa wakati wote wanaostahili kabisa kutoka katika eneo lao la ofisi ya tawi wahudhurie shule hiyo. Katika visa fulani, Halmashauri za Tawi zinaweza kuomba wahitimu warudi baada ya kuhitimu.

Shule ya Washiriki wa Halmashauri ya Tawi na Wake Zao itafanywa mara mbili kwa mwaka katika lugha ya Kiingereza huko Patterson. Katika visa vichache, washiriki wa Halmashauri za Nchi wataalikwa pia. Washiriki wa Halmashauri za Tawi ambao tayari wamehudhuria shule hiyo wataalikwa kwa mara ya pili pamoja na ndugu wanaohudhuria shule hiyo kwa mara ya kwanza. Wake wa Washiriki wa Halmashauri ya Tawi watahudhuria vipindi vingi vya masomo hayo pamoja na waume zao. Hata hivyo, ni akina ndugu pekee watakaofundishwa vizio vinavyohusu mambo ya kitengenezo, huku wake zao wakishughulikia migawo mbalimbali ya Betheli.

Kwa kuongezea, madarasa mawili ya Shule ya Waangalizi Wanaosafiri na Wake Zao yatafanywa huko Patterson kila mwaka. Madarasa yanayofanywa nchini Marekani, yanatia ndani akina ndugu ambao tayari wamehudhuria; wakifanyiza karibu nusu ya kila darasa. Wake za waangalizi wanaosafiri wataalikwa kuhudhuria vipindi vingi vya masomo.

Watu wa Mungu wanafurahi kama nini kufaidika na elimu inayoandaliwa na Yehova! Yesu mwenyewe alisema: “Imeandikwa katika Manabii, ‘Na wote watafundishwa na Yehova.’” (Yoh. 6:45; Isa. 54:13) Tuna hakika kuwa mabadiliko haya yatatuchochea kufanya mengi zaidi katika kazi muhimu ya kuhubiri habari njema katika dunia yote inayokaliwa kabla ya ule mwisho kuja.

TETEMEKO KUBWA LA NCHI HUKO JAPANI

Habari kutoka sehemu mbalimbali za ulimwengu zimeripoti kuhusu misiba mingi ya asili, kutia ndani matetemeko ya nchi, tsunami, vimbunga, tufani, mafuriko, mioto, na milipuko ya volkano. Hatuwezi kuandika kuhusu misiba yote ya hivi karibuni. Hata hivyo, waabudu wenzetu nchini Japani ni mfano mzuri sana wa jinsi Mashahidi wa Yehova hukabili matatizo kama hayo kwa ujasiri.

Mnamo Ijumaa, Machi 11, 2011, saa 8:46 alasiri, tetemeko la nchi lenye kipimo cha 9.0 liliikumba nchi ya Japani. Tsunami zilizotokea baada ya hapo ziliharibu miji na vijiji vingi katika pwani ya Bahari ya Pasifiki. Watu 20,000 hivi walikufa au hawajawahi kupatikana. Katika maeneo yaliyoathiriwa, Majumba manne ya Ufalme yaliharibiwa na mengine manne hayangeweza kutumiwa. Nyumba 235 za ndugu zetu zilifagiliwa na maji au kuharibiwa sana, na nyingine zaidi ya elfu moja zilihitaji kurekebishwa.

Tetemeko hilo na tsunami hizo ziliharibu mtambo fulani wa nguvu za nyuklia vibaya sana hivi kwamba ulitoa hewani chembe zenye mnururisho. Serikali ilitoa amri ya kuwahamisha wakaaji wa maeneo ya karibu na hivyo majiji mengi yaliachwa ukiwa baada ya usiku mmoja tu. Ndugu walioishi katika maeneo hayo walilazimika kuhama pia, na makutaniko mawili “yakatoweka.”

Kati ya Mashahidi wa Yehova zaidi ya 14,000 wanaoishi katika maeneo yaliyoathiriwa, 12 walikufa, na 5 walijeruhiwa vibaya; 2 bado hawajulikani walipo. Wengi waliookoka tukio hilo lenye kutisha walipoteza makao yao, mali zao, na katika visa vingi, waliwapoteza wapendwa wao.

“Nilifanikiwa kumpandisha mama yangu aliye mlemavu ndani ya gari na nikaanza kuliendesha hadi kwenye makao tuliyoagizwa twende,” asema Kiyoko kutoka Ofunato. “Kulikuwa na harufu ya moshi. Nilipotoka nje ya gari, niliona wimbi kubwa la maji likiisomba nyumba yetu. Wimbi hilo lilikuwa linatukaribia kwa kasi! Nikamsaidia mama kupanda juu ya mwinuko fulani kwenye njia ya gari moshi. Gari letu lilifagiliwa mbali huku tukitazama.”

Baada ya tetemeko hilo, ndugu mmoja kijana anayeitwa Koichi, alijaribu kwenda kwa wazazi wake wanaoishi Ishinomaki, kilomita 5 kutoka baharini. Alipokaribia huko, aliona kuwa eneo lote lilikuwa limezama ndani ya maji. “Singeenda zaidi ya hapo kwa sababu sikuwa na mashua.” Majuma matatu baada ya tetemeko, aliupata mwili wa baba yake katika chumba cha kuhifadhia maiti, na baada ya majuma mengine matatu, akaupata mwili wa mama yake hukohuko.

Tetemeko lilipokoma, Masaaki anayeishi Shichigahama aliegesha gari lake kwenye Jumba la Ufalme, kilomita moja kutoka ufuoni. Masaaki akumbuka: “Nilimwona dada mmoja ambaye pia alikimbilia huko. Nilidhani tsunami hazingefika hapo. Hata hivyo, baada ya muda mfupi maji meusi yaliifunika ardhi! Magari yetu yakaanza kuelea. Nilifungua dirisha, nikapanda juu ya gari langu, lakini gari la dada huyo lilisombwa na maji! Nilimwomba Yehova amsaidie.

“Kulikuwa na theluji, na nilikuwa nimelowa, na kutetemeka kwa sababu ya baridi. Baadaye theluji iliacha kuanguka lakini kulikuwa na baridi kali. Punde si punde, jua lilishuka na giza likaingia. Nyota zilikuwa nyangavu na maridadi. Nilisimama juu ya gari langu, lililokuwa kama kisiwa katika maji baridi kama barafu. Kulikuwa na wengine kama mimi waliokuwa juu ya vifusi au paa za majengo mbalimbali. Sikujua kama ningekuwa hai asubuhi iliyofuata. Ili kujifariji, nilikariri hotuba ambayo nilikuwa nimetoa majuma mawili tu kabla ya wakati huo. Ilikuwa na kichwa chenye kufaa: ‘Unaweza Kupata Wapi Msaada Nyakati za Taabu?’ Baadaye, nikaimba wimbo pekee niliojua kuimba bila kitabu: ‘Baba Yangu, Mungu Wangu, Rafiki Yangu.’ Niliuimba tena na tena. Nilipokuwa nikiimba, nilifikiria jinsi nilivyotumia maisha yangu katika utumishi wa Yehova, na kutokwa na machozi.

“Kisha mtu fulani kutoka nyumba iliyokuwa ule upande mwingine wa barabara akapaaza sauti na kuuliza, ‘Uko sawa? Nitakuja kukusaidia!’” Mwanamume huyo alikuwa ametengeneza chelezo kutokana na mbao zilizokuwa zinaelea juu ya maji na alikuwa akiwaokoa watu waliokuwa karibu. Mwanamume huyo alimsaidia Masaaki kuingia ndani ya nyumba ya mtu fulani katika ghorofa ya pili kupitia dirishani. Baadaye, Masaaki alifurahi kusikia kwamba dada aliyekuwa katika lile gari lingine aliokolewa pia.

Watu walisubiri kwa hamu nyingi arusi ya Kohei na Yuko, iliyopangwa kufanywa katika Jumba la Ufalme la Rikuzentakata siku ya Jumamosi, Machi 12. Baada ya hao wawili kusajili ndoa yao katika ukumbi wa jiji siku ya Ijumaa, tetemeko likatukia. Kohei alisikia tangazo la onyo la tsunami na akakimbilia eneo lililoinuka. Akumbuka, “Sikuamini nilipolitazama jiji. Hakuna chochote kilichobaki isipokuwa majengo machache makubwa. Hadi wakati huo, hangaiko langu kuu lilikuwa mipango ya arusi yetu, lakini nikatambua kwamba jambo kubwa zaidi lilikuwa limetukia.”

Kohei na Yuko walitumia Jumamosi hiyo wakiwasaidia ndugu na dada katika kutaniko. “Tulipokea misaada kutoka kwa makutaniko jirani,” asema Kohei. “Nilifurahi sana kumsikia mke wangu akisema jinsi alivyohisi vizuri kwa kutumia wakati na nguvu zake kuwasaidia akina ndugu. Nilimshukuru Yehova kwa kunipa mke mzuri hivyo. Tsunami ilifagilia mbali nyumba yetu mpya, gari letu, na vitu vyetu vyote. Lakini nathamini sana upendo ambao akina ndugu walituonyesha.”

Kuandaa Msaada wa Kimwili, Kiroho, na Kihisia. Mara moja, ofisi ya tawi ya Japani ilipanga Halmashauri tatu za Kutoa Misaada na wawakilishi wa ofisi ya tawi walitumwa tena na tena katika maeneo yaliyoathiriwa. Waangalizi wa eneo Geoffrey Jackson na Izak Marais kutoka makao makuu walipoitembelea nchi hiyo mwezi wa Mei, vilevile walikutana na ndugu na dada kutoka maeneo yaliyoathiriwa zaidi. Mkutano wa pekee kwa ajili ya makutaniko yaliyoathiriwa ulipangwa, Majumba ya Ufalme 21 yaliunganishwa kwa simu na hivyo ndugu wapatao 2,800 wakahakikishiwa kwamba ndugu zao ulimwenguni pote wanawapenda na wanawahangaikia.

Ndugu wa Halmashauri za Kutoa Misaada na wajitoleaji wengine wamefanya kazi kwa bidii. Vitu vilivyohitajiwa mara moja ni chakula, maji, na fueli. Halmashauri za misaada zilifanya pia mipango ya kutuma nguo za vipimo mbalimbali kwa makutaniko yaliyoathiriwa. Maeneo ya mikutano yalikuwa kama “maduka ya kuuzia nguo” ambapo ndugu wangepata mavazi waliyohitaji.

Ndugu na dada walioathiriwa walifurahi kama nini kuona jinsi Yehova alivyotosheleza mahitaji yao ya kimwili na kihisia! Walitiwa nguvu hasa walipohudhuria mikutano ya Kikristo. Dada mmoja kutoka eneo la msiba aliandika hivi, “Ninapata amani ya akili ninapohudhuria mikutano. Mikutano ndiyo uti wa mgongo wa maisha yangu ya Kikristo.”

Ujumbe wa Tumaini. Ndugu wa Japani hawakupoteza wakati kutumia Neno la Mungu kuwafariji majirani wao waliokuwa wamefadhaika. Kikundi cha wahubiri katika mji fulani ambao haukuathiriwa waliamua kuhubiri barabarani wakiwa na bango kubwa lenye maandishi, “Kwa Nini Msiba Huu Umetukia? Biblia ina jibu.” Watu wengi walipendezwa, na kwa siku moja na nusu tu, ndugu waliwapa watu nakala 177 za kitabu Biblia Inafundisha.

Katika maeneo yaliyoathiriwa, Mashahidi waliwatembelea kwanza wanafunzi wa Biblia, watu waliowarudia, na kisha majirani ili kuwafariji. Akiko asema: “Nilipomsomea mwenye nyumba fulani andiko la Mathayo 6:34, alianza kulia. Inaonekana kulikuwa na mambo mengi yaliyomhangaisha. Nilipomweleza jinsi Biblia inavyotusaidia kudumisha amani ya akili, alikubaliana nami na akanishukuru. Jambo hilo limefanya nithamini upya jinsi Maandiko yalivyo na nguvu za kufikia mioyo ya watu.”

Mwanamume mmoja alisema: “Kuna dini nyingi, lakini ni ninyi tu ambao mmetutembelea, hata katika nyakati hizi mbaya.” Mwingine akasema hivi kwa heshima, “Inashangaza kwamba mnaendelea na utendaji wenu hata wakati wa msiba huu.” Naye mzee mmoja wa kutaniko alisema: “Watu wengi walitukaribisha. Walisema, ‘Ninyi ndio watu wa kwanza kuja kwetu tangu tetemeko litukie. Tafadhali rudini tena.’”

TAFSIRI YA ULIMWENGU MPYA KATIKA LUGHA 106!

Ijumaa, Julai 15, 2011, ilikuwa siku ya kukumbukwa nchini Latvia na Lithuania, na siku muhimu sana katika historia ya watu wa Mungu huko. Kupitia hotuba iliyosikilizwa katika nchi zote mbili, Stephen Lett wa Baraza Linaloongoza alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Kilithuania na Kilatvia. Hizo zikiwa lugha ya 99 na ya 100 ambazo tafsiri hiyo inapatikana. Kwa miaka saba ambayo imepita, Baraza Linaloongoza limetilia maanani kazi ya kutafsiri Biblia. Kwa sababu hiyo, Tafsiri ya Ulimwengu mpya sasa inachapishwa zaidi ya mara mbili kuliko ilivyokuwa mwaka wa 2004, na watafsiri ulimwenguni pote wanaendelea kufanya kazi kwa bidii ili kuitafsiri Biblia hiyo katika lugha nyingi hata zaidi.

Akina ndugu hupokea Biblia katika lugha yao wenyewe kwa shauku nyingi. Ndugu mmoja kutoka Jamhuri ya Afrika ya Kati alisema: “Kuwa na Biblia ni jambo moja, lakini kuilewa katika lugha ya mama ni mojawapo ya mambo bora zaidi ulimwenguni. Tafsiri ya Ulimwengu Mpya katika Kisango huzungumza hadi ndani ya moyo. Ninaposoma vitabu vya Injili, sasa ninaweza kupiga picha akilini watu ninaosoma kuwahusu na kuelewa hisia zao.” Dada mchanga kutoka Ethiopia aliwakilisha maoni ya wengi aliposema: “Sijui niseme nini ili kuonyesha shukrani zangu. Nyakati zote nilimwomba Yehova tupate Tafsiri ya Ulimwengu mpya katika lugha yetu. Leo, amenipa!”

HABARI FUPI KUTOKA SEHEMU MBALIMBALI ULIMWENGUNI

Mwonevu Anyamazishwa Nchini Urusi. Kwa miaka kadhaa, Vera, dada mzee, alikabili matatizo kutoka kwa jirani yake ambaye hakupenda Mashahidi wa Yehova. Mtu huyo alimtisha na kumtukana mbele ya wajukuu wake waliomtembelea mara kwa mara. Akikumbuka maneno ya andiko la Waroma 12:18, sikuzote Vera alikuwa mtulivu na hakubishana naye. Mnamo Januari 2011, jirani huyo akawa mkatili hata zaidi. Akihofia maisha yake, Vera aliwasiliana na polisi wa eneo lao, ambaye aliwahi kumtembelea mnamo Machi 2010, akiwa ameambatana na ofisa fulani wa mji. Walikuwa wamemtembelea kuona ikiwa yeye na Mashahidi wengine waliokuwa wakikutana nyumbani kwake walijihusisha na aina fulani ya utendaji wenye msimamo mkali. Hata hivyo, wakati huu, polisi huyo alitambua tatizo hasa lilikuwa wapi. Alimkaripia jirani huyo na kumpiga faini ya rubi 3,000 (dola 100 hivi za Marekani) kwa kutoa vitisho. Baada ya hapo, Vera hakuwa na matatizo tena na jirani huyo. Vera aliiandikia idara ya polisi barua ya shukrani. Alishangaa kupata majibu kutoka kwa mkuu wa polisi. Alimshukuru Vera kwa maneno yake yenye fadhili kuhusu ofisa aliyemsaidia. Pia aliandika: “Maneno yako yenye kutia moyo yanaonyesha kuwa una imani na polisi, licha ya kwamba watu wengi kwa ujumla wana maoni mabaya kuwahusu.” Vera anasema kwamba siku hizi polisi huyo humpitia kwa ukawaida kuhakikisha kwamba kila kitu kiko sawa.

“Mkusanya Takataka” Nchini Uturuki. Watu wawili waliokuwa wameanza kujifunza Biblia karibuni, walihudhuria kusanyiko la wilaya. Waliandika: “Ilikuwa kama ndoto kwetu. Kila mtu alikuwa mpole, mwenye tabasamu na urafiki. Wakati wa mapumziko, tulitembea huku na huku bila kuhisi kama wageni. Kisha tukamwona ndugu aliyekuwa akitufunza Biblia akija. Alikuwa na mfuko wa takataka mkononi. Tulijaribu kumwepuka kwa sababu tulifikiri kwamba kazi yake ni kukusanya takataka, na hatukutaka kuonekana kuwa rafiki za mtu wa hali ya chini, yaani, mkusanya takataka. Hivyo tukageuka na kujaribu kujificha ndani ya umati. Tukaulizana, ‘Kwa nini tunajifunza Biblia na mkusanya takataka badala ya mtu anayetoa hotuba jukwaani?’

“Hata hivyo, tulipoendelea kujifunza, tulipata kujua kwamba ‘mkusanya takataka’ aliyetufundisha Biblia alikuwa mshiriki wa Halmashauri ya Tawi na alitumika katika ofisi ya tawi ya Mashahidi wa Yehova. Tulifanya maendeleo na kujiweka wakfu kwa Yehova, tukaelewa kwamba ndugu yetu alikuwa akijiendesha kwa unyenyekevu kama ‘aliye mdogo zaidi.’ (Luka 9:48) Tunathamini kama nini somo kubwa tulilojifunza katika mkutano mkubwa wa kwanza tuliohudhuria!”

Habari za Uwongo Zaenezwa Nchini Armenia. Baada ya kijana mmoja kuwaua wazazi wake katika mji wa Sevan, watu walianza kueneza habari za uwongo kuhusu Mashahidi wa Yehova wakidai eti kijana huyo alikuwa Shahidi. Taarifa ya kupinga dai hilo ilisambazwa mara moja kwa vyombo vya habari. Hata hivyo, kashfa hiyo iliendelea, na programu ya pekee ikaonyeshwa kwenye televisheni kusisitiza kwamba kijana huyo ni mmoja wa Mashahidi wa Yehova. Wakati wa programu hiyo ya televisheni, lugha yenye kuudhi na ya kuwavunjia heshima Mashahidi wa Yehova ilitumiwa, na maneno mafupi yaliyosomwa kwenye televisheni yalisema “Vikaragosi vya Yehova Vinavyoua Kikatili.” Programu hiyo hata iliwachochea watu wawashambulie Mashahidi wanapowatembelea. Kwa sababu hiyo, chuki kuelekea Mashahidi wa Yehova nchini iliongezeka. Mashahidi walienda mahakamani wakitaka stesheni hiyo ya televisheni ikanushe madai hayo ya uwongo, iombe msamaha, na kulipia madhara yaliyosababishwa kwa jina letu na sifa yetu nzuri. Kufikia wakati Kitabu cha Mwaka—2012 kilipopelekwa kwenye matbaa, stesheni hiyo haikuwa imekanusha madai hayo lakini mazungumzo ya kutatua jambo hilo yalikuwa yakiendelea.

Wahandisi wa Siku za Usoni Nchini Venezuela. Kila asubuhi kikundi cha watoto wa shule ya chekechea walipita karibu na Jumba la Ufalme lililokuwa likijengwa mjini San José de Guaribe. Sikuzote walisimama na kutazama kwa muda, na wakavutiwa na ujenzi uliokuwa unaendelea. Siku moja wakiwa darasani, mwalimu wao aliwauliza kile ambacho wangependa kufanya watakapokuwa watu wazima. Alishangaa kusikia watoto wengi wakisema kwamba wanataka kuwa “wahandisi kama Mashahidi wa Yehova”! Wakitaka kujua zaidi, mwalimu huyo na mwingine waliamua kupeleka darasa nzima kwenye eneo la ujenzi huo. Walipofika, wajenzi waliwatembeza kwenye eneo hilo. Watoto hao walifurahi sana, hasa kwa sababu waliruhusiwa kuvalia kofia ngumu zenye rangi mbalimbali. Walimu walikuwa na maswali mengi na ushahidi mzuri ukatolewa.

Uchapishaji wa Magazeti Washika Kasi Nchini Kanada. Ili kutumia vizuri rasilimali zilizowekwa wakfu, Baraza Linaloongoza liliiomba ofisi ya tawi ya Kanada ichapishe magazeti ya Mnara wa Mlinzi na Amkeni! kwa ajili ya makutaniko yote nchini Bermuda, Guyana, Kanada, Marekani, na visiwa vingi vya Karibea. Hivyo, mwanzoni mwa mwaka wa utumishi wa 2011, ofisi ya tawi ya Kanada ilianza kuchapisha magazeti mara 12 zaidi ya ilivyokuwa ikichapisha. Sasa, Kanada inachapisha magazeti katika lugha 30, karibu robo ya magazeti yote yanayochapishwa ulimwenguni pote.

Siku ya Wageni Nchini Finland. Baraza Linaloongoza liliidhinisha mipango ya kampeni ya pekee iliyokazia uangalifu Mashahidi wa Yehova na ujumbe ambao wametangaza nchini Finland kwa karne moja. Akina ndugu walisambaza gazeti la Amkeni! la Agosti 2010 lililokuwa na kichwa “Mashahidi wa Yehova—Wao Ni Nani?” Hilo lilitokeza mazungumzo mengi mazuri kuhusu kazi yetu. Kisha, mwishoni mwa Agosti, akina ndugu wakapanga siku ya wageni katika ofisi ya tawi. Wanabetheli wote walishiriki kueleza kazi inayofanywa Betheli. Walitayarisha maonyesho ya kuwaeleza wageni kuhusu kazi yetu. Wanabetheli wengine pia walivalia mavazi ya zamani kuonyesha jinsi mabango yenye maandishi pande mbili yalivyotumiwa kutangaza hotuba za watu wote zilizotolewa katika miaka ya 1940 na 1950. Idara mbalimbali zilitengeneza zawadi ndogo kwa ajili ya wageni. Wageni 1,500 hivi walitembelea ofisi hiyo ya tawi. Kufuatia hayo, magazeti, redio, na televisheni ziliripoti mambo mazuri kuhusu utendaji wetu.

Msukosuko Nchini Côte d’Ivoire. Mwaka wa utumishi wa 2011 ulianza kukiwa na matarajio mazuri na uwezekano wa ongezeko zaidi. Wahubiri 8,656 waliongoza mafunzo ya Biblia 23,019. Hata hivyo, kufikia mwishoni mwa Novemba 2010, matokeo ya uchaguzi yaliyopingwa yalitumbukiza nchi hiyo katika mchafuko na msukosuko. Kufikia mwezi wa Machi na mpaka Aprili 2011, vita vilikuwa vimefikia mji mkuu wa Abidjan na kuwafanya raia wengi wahame kutoka mjini na hata nchini. Akina ndugu pia walikimbia na kuacha makwao na vitu vyao.

Katika kipindi hicho chote chenye matatizo, msimamo wa ndugu zetu wa kutounga mkono upande wowote ulikuwa ulinzi. Pindi moja, askari waliingia shule moja ya msingi ambapo walimu na washauri walikuwa na semina. Wote waliamuriwa walale chini na kutoa kila kitu walichokuwa nacho. Ndugu alipowapa mkoba uliojaa machapisho yetu, mara moja askari hao wakatambua kuwa yeye ni Shahidi wa Yehova. Wakamrudishia mkoba pamoja na pesa na simu yake ya mkononi, wakisema: “Wewe si tisho kwetu.”

KUWEKWA WAKFU KWA OFISI ZA TAWI HUMTUKUZA MUNGU

Mnamo Desemba 18, 2006, ujenzi ulianza katika ofisi ya tawi ya Chile ili kuongeza jengo la ofisi lenye ghorofa mbili, jengo la makao la ghorofa tatu, na kuongeza nafasi ya bohari. Mnamo Oktoba 16, 2010, watu 5,501 walihudhuria programu ya kuweka wakfu, ambapo David Splane wa Baraza Linaloongoza alitoa hotuba kwa Kihispania.

Mnamo Februari 19, 2011, watu 210 walihudhuria programu ya kuweka wakfu ofisi iliyopanuliwa nchini Burkina Faso. Hotuba ya kuweka wakfu ilitolewa na John Kikot, kutoka makao makuu. Kazi ya kuhubiri nchini humo ilikuwa chini ya ofisi ya tawi ya Côte d’Ivoire hadi Mei 2011 wakati ofisi ya tawi ya Benin ilipochukua usimamizi wa kazi ya nchi ya Burkina Faso. Mwenendo mzuri wa ndugu zetu katika eneo la ujenzi ulimletea Yehova sifa nyingi. Mfanyakazi mmoja katika kampuni kubwa inayouza vifaa vya ujenzi alisema, “Hakukuwa na kelele. Hatujawahi kufanya kazi na watu watulivu na wenye furaha kama hawa.”

Kulikuwa na furaha nyingi wakati ofisi mpya nchini Hong Kong zilipowekwa wakfu mnamo Agosti 27, 2011. Ofisi hizo mpya zimo katika ghorofa ya 19 ya jengo lenye ghorofa 37 lililo karibu na Bandari ya Victoria. (Ona alama ya mshale chini.) Stephen Lett wa Baraza Linaloongoza alitoa hotuba ya kuweka wakfu iliyosikilizwa na watu 290 walioketi kwenye chumba cha kulia, ofisi, na eneo la upakizi wa machapisho. Ofisi hizo zinatumiwa na idara za Tafsiri, Utumishi, Kurekodi, Ununuzi, Hesabu, Upakizi na Usafirishaji.

RIPOTI YA MAMBO YA KISHERIA

Nabii mwaminifu Yeremia alikuwa na sababu nzuri ya kuamini kwamba Mungu Mweza-Yote hatamwacha kamwe. Yehova alimwambia: “Nao hakika watapigana nawe, lakini hawatakushinda. Kwa maana mimi niko pamoja nawe, ili kukuokoa na kukukomboa.” (Yer. 15:20) Kama ripoti zifuatazo zinavyoonyesha, watumishi wa Yehova leo wamejionea pia jinsi ambavyo amewasaidia na kuwategemeza wanapoendelea kuhubiri licha ya upinzani.—Mt. 24:9; 28:19, 20.

Armenia Vahan Bayatyan ni mmoja wa Mashahidi wa Yehova aliyehukumiwa kifungo cha miaka miwili na nusu kwa kukataa kujiunga na jeshi kwa sababu ya dhamiri. Baada ya kushindwa katika mahakama za Armenia, kesi yake ilifikishwa mbele ya Mahakama ya Ulaya ya Haki za Kibinadamu (ECHR). Mnamo Oktoba 27, 2009, mahakimu saba wa mahakama hiyo ilitoa hukumu dhidi ya Ndugu Bayatyan na ikaunga mkono Armenia. Hata hivyo, hakimu mmoja aliyekuwa na maoni tofauti aliuona uamuzi huo kuwa “haupatani na viwango vya Ulaya kuhusiana na kukataa kujiunga na jeshi kwa sababu ya dhamiri.” Kwa sababu ya umuhimu wa suala hilo, mahakama ya ECHR, ilikubali kesi hiyo ifikishwe mbele ya Baraza Kuu la mahakama hiyo lenye mahakimu 17.

Mnamo Julai 7, 2011, mahakimu 16 kati ya 17 waliamua kwamba nchi ya Armenia ilikuwa imekiuka haki ya Ndugu Bayatyan ya kufanya uamuzi unaotegemea dhamiri. Mahakama hiyo ilisema “haina sababu ya kutilia shaka kwamba uamuzi wa mlalamikaji wa kukataa kujiunga na utumishi wa jeshi ulichochewa na imani yake ya kidini, ambayo anashikilia kwa unyoofu na ambayo inapingana kabisa na takwa la kujiunga na utumishi wa jeshi.” Tunatumaini kwamba uamuzi huo mkubwa utasaidia wale ndugu 69 walio gerezani nchini Armenia kuachiliwa huru hatimaye, na vilevile ndugu zetu wanaokabili tatizo kama hilo nchini Azerbaijan na Uturuki.a

Bulgaria Mnamo Aprili 17, 2011, zaidi ya watu 100, kutia ndani wanawake, watoto, na watu wenye umri mkubwa, walikuwa wakiadhimisha kwa utulivu Ukumbusho wa kifo cha Kristo katika Jumba la Ufalme huko Burgas. Kikundi cha wanaume 60 hivi wenye hasira waliokuwa nje walianza kuwarushia mawe Mashahidi waliokuwa wamesimama mlangoni. Kisha, watu hao wakavamia Jumba la Ufalme, lakini ndugu wakawazuia wasiingie. Polisi wakaitwa mara moja, lakini hawakufika upesi. Mashahidi kadhaa walijeruhiwa katika shambulizi hilo, na watano wakapelekwa hospitali kwa ambulansi. Licha ya shambulizi hilo, kutaniko liliendelea na maadhimisho ya Ukumbusho. Shambulizi hilo halikutazamiwa hata kidogo kwa sababu Mashahidi wa Yehova kwa ujumla wamekuwa wakitendewa kwa heshima nchini Bulgaria, hata hivyo, limefanya wajulikane zaidi. Baraza Linaloongoza lilifanya mipango ili ofisi 13 za tawi zijulishe balozi za Bulgaria zilizo katika nchi zao kuhusu shambulizi hilo. Tangu wakati huo, serikali ya Bulgaria imekashifu shambulizi hilo, na wanane kati ya washambuliaji hao wameshtakiwa.

Korea Kusini Zaidi ya Mashahidi wa Yehova 800 bado wako gerezani nchini Korea Kusini kwa kukataa utumishi wa jeshi, kwa sababu ya imani yao. Tangu 1950, Mashahidi wa Yehova zaidi ya 16,000 wamehukumiwa kwa miaka zaidi ya 31,000 gerezani kwa sababu ya kukataa utumishi wa jeshi. Kwa nini vijana wengi wamechukua msimamo huo imara?

Kila kijana anayekataa utumishi wa jeshi hufanya uamuzi wa kibinafsi unaotegemea dhamiri yake. Kwa mfano Kim Ji-Gwan alieleza hivi wakati wa kesi yake: “Nilichochewa sana na mafundisho kama haya ya Biblia, ‘watu hawatajifunza vita tena’ na ‘mpende jirani yako kama wewe mwenyewe.’ Pia nilijifunza kwamba upendo unaoongozwa na kanuni unaweza kutuchochea tupende adui zetu. Kwa msingi wa maandiko hayo na mengine, na usadikisho wangu wa kibinafsi, niliamua kutojiunga na utumishi wa jeshi.”—Isa. 2:4; Mt. 5:43, 44; 22:36-39.

Kwa sasa, vijana nchini Korea Kusini hawana utumishi wa kiraia wanaoweza kufanya badala ya utumishi wa jeshi. Ili kutatua suala hilo, ndugu walikata rufaa za kesi kumi kwa Mahakama ya Kikatiba ya Korea. Mnamo Novemba 11, 2010, mahakama ilisikiliza mijadala ya kesi hizo, kutia ndani iwapo nchi ya Korea inakiuka haki za raia wa Korea kwa kutokuwa na mpango wa badala kwa ajili ya wale wanaokataa utumishi wa jeshi kwa sababu ya dhamiri.

Wakati huohuo, mnamo Machi 24, 2011, Kamati ya Haki za Kibinadamu ya Umoja wa Mataifa (UNHRC) iliamua kwamba Korea Kusini ilikiuka viwango vya haki za kibinadamu zinazotambuliwa na mataifa mengi duniani ilipowatia gerezani Mashahidi wa Yehova 100 ambao kwa sababu ya dhamiri walikataa kujiunga na utumishi wa jeshi. (Ndugu hao 100 walikuwa wamekata rufaa kwa UNHRC kwa sababu ya kufungwa gerezani.) Isitoshe, uamuzi mzuri uliofanywa na Baraza Kuu la ECHR katika kesi ya Ndugu Bayatyan (ona ripoti ya Armenia katika ukurasa wa 34-35) uliwasilishwa kwa Mahakama ya Kikatiba ya Korea ili kushughulikiwa pamoja na zile kesi kumi zinazongoja uamuzi. Hata hivyo, mnamo Agosti 30, 2011 Mahakama ya Kikatiba ilipuuzilia mbali maamuzi ya UNHRC, na hivyo ikaunga mkono Sheria ya Utumishi wa Jeshi na uamuzi wa kuwatia gerezani wanaokataa kujiunga na jeshi kwa sababu ya dhamiri. Kwa kuwa katiba inatambua uhuru wa dhamiri, mahakimu wawili kati ya wale tisa, baada ya kutambua kwamba Sheria ya Utumishi wa Jeshi na katiba zinapingana, walipinga uamuzi huo na kupendekeza kuwe na mfumo wa utumishi wa badala wa kiraia.

Uturuki Mnamo Julai 31, 2007, akina ndugu walifurahi kutambuliwa kisheria kuwa shirika la kidini. Ingawa bado kuna matatizo kuhusiana na suala la kutounga mkono upande wowote na matumizi ya Majumba ya Ufalme, utendaji mwingine wa kiroho unazidi kusonga mbele nchini humo. Mnamo Aprili 26, 2011, Wizara ya Elimu ya Taifa ya Jamhuri ya Uturuki ilituma mwongozo rasmi unaosema kwamba ‘Mashahidi wa Yehova wasilazimishwe kufanya somo la dini shuleni.’ Wizara hiyo ilieleza kwamba “ingawa Mashahidi wa Yehova hawakubali baadhi ya mafundisho ya kawaida ya Kikristo, wao ni Wakristo.” Uamuzi huo umepokelewa vizuri na ndugu na dada zetu vijana ambao kwa miaka mingi wamepata maksi za chini shuleni kwa sababu ya kukataa kushiriki masomo ya dini.

Marekani Mnamo Mei 2011, Mahakama ya Rufaa ya Kansas ilitoa uamuzi mzuri katika kesi ya Mary D. Stinemetz v. Kansas Health Policy Authority. Mahakama hiyo iliamua kwamba jimbo la Kansas lilikiuka haki za Dada Stinemetz kulingana na serikali na katiba ya jimbo hilo kwa kukataa kuidhinisha upasuaji usiohusisha damu nje ya jimbo la Kansas. Kwa kuwa aina ya upasuaji usiohusisha damu ambao dada huyo alihitaji haupatikani katika jimbo la Kansas, mahakama iliamuru jimbo hilo liidhinishe upasuaji huo katika jimbo lingine. Huo ni ushindi, si wa Dada Stinemetz pekee bali pia kwa wahubiri wengine nchini Marekani ambao hupata matibabu yanayodhaminiwa na serikali.

Mnamo Agosti 10, 2011, Mahakama Kuu iliunga mkono uamuzi wa kumpa Monica McGlory, ambaye ni Shahidi wa Yehova, mamlaka ya kumlea mwana wake. Baba ya mtoto huyo alitaka kupewa daraka la kumlea mwana wao kwa madai ya kwamba Dada McGlory hastahili kufanya hivyo kwa sababu (1) atakataa mtoto wao asitiwe damu mishipani, (2) alienda na mtoto huyo katika utumishi wa nyumba kwa nyumba, na (3) eti alimtenga na baba yake na familia yao kwa kumfundisha kuhusu Har–Magedoni.

Mahakama Kuu ya Kansas ilishikilia kanuni za kikatiba zilizowekwa mwaka wa 1957, iliposema: “Uhuru wa kidini, kama ilivyo katika katiba yetu, unapaswa kufuatwa kikamili, na kuwafundisha watoto mambo ya kidini hakupaswi kutumiwa kama msingi wa kudai haki za kumlea mtoto.” Kuhusu suala la kutiwa damu mishipani, mahakama ilisema: “Hatuwezi kuamua kesi zinazohusu haki ya kulea mtoto kwa msingi wa makisio ya wakati ujao ya aksidenti au magonjwa yanayoweza kuhitaji [kutiwa damu mishipani].”

Ufaransa Kulikuwa shangwe kubwa mnamo Juni 30, 2011, mahakama ya ECHR ilipotoa uamuzi wa kuunga mkono shirika la Association of Jehovah’s Witnesses of France. Hayo yalikuwa matokeo ya miaka 16 ya pambano la kisheria kwa sababu ya kodi kubwa na isiyo ya haki ya asilimia 60 iliyotozwa kwa ajili ya michango yote iliyopokewa na ofisi ya tawi. Kati ya dini zote kubwa, ni Mashahidi wa Yehova tu waliotozwa kodi hiyo. Kwa ujumla, serikali ya Ufaransa ilitaka Mashahidi wa Yehova walipe euro milioni 58, (zaidi ya dola 82,000,000 za Marekani) kiasi ambacho kinazidi kwa mbali mali za shirika hilo. Mahakama zote za Ufaransa zilipoamua kwamba lazima kodi hiyo ilipwe, shirika hilo lilikata rufaa kwa mahakama ya ECHR mnamo Februari 2005.

Mnano Juni 30, 2011, mahakimu saba wa mahakama ya ECHR walitoa uamuzi kwa kauli moja na kusema kwamba iwapo serikali ya Ufaransa ingeruhusiwa kutoza kodi hiyo, hilo lingewazuia Mashahidi wa Yehova wasifanye ibada yao kwa uhuru. Mahakama hiyo ilionyesha wazi kwamba Mashahidi wa Yehova pia wanapaswa kupata haki za kidini kama inavyoonyeshwa katika Mkataba wa Ulaya wa Haki za Kibinadamu. Uamuzi huo muhimu utatumiwa kutetea uhuru wa ibada katika nchi nyingine zilizo chini ya usimamizi wa mahakama ya ECHR kama vile Armenia, Bulgaria, Georgia, na Urusi. Jambo lingine lenye kutokeza ni kwamba kwa mara ya kwanza serikali ya Ufaransa imepatikana kuwa na hatia ya kuvunja kifungu cha Mkataba wa Ulaya kuhusu uhuru wa ibada. Serikali ya Ufaransa haikukata rufaa kuhusiana na uamuzi huo.

Urusi Mnamo Juni 10, 2010, mahakama ya ECHR iliwapa Mashahidi wa Yehova ushindi wa kihistoria dhidi ya serikali ya Urusi katika kesi ya Jehovah’s Witnesses of Moscow v. Russia. Ingawa serikali ya Urusi iliomba kesi hiyo ifikishwe mbele ya Baraza Kuu la mahakimu 17 wa Mahakama hiyo, mnamo Desemba 13, 2010, mahakimu wa Baraza Kuu walikataa ombi hilo, na hivyo kufanya uamuzi wa Juni 10 kuwa wa mwisho. Uamuzi huo ulisema kwamba serikali ya Urusi ina “daraka la kisheria  . . . la kukomesha mambo ambayo Mahakama hiyo iliona yanafanywa kinyume cha sheria na kurekebisha madhara yaliyosababishwa.” Hata hivyo, serikali haijafanya hivyo mpaka sasa. Badala yake, imetafuta njia mpya za kuwasumbua na kuwazuia Mashahidi wasitumie uhuru wao wa ibada.

Kwa mfano, asubuhi na mapema Agosti 25, 2011, polisi walivamia makao 19 ya ndugu zetu katika mji wa Taganrog na kuwanyang’anya vitabu, kompyuta, na rekodi za kutaniko. Inaonekana uvamizi huo ulitokana na uamuzi uliokuwa umefanywa mapema na Mahakama Kuu ya Shirikisho la Urusi kwamba shirika la Mashahidi wa Yehova la Taganrog lifutiliwe mbali na kwamba 34 kati ya machapisho yetu yanawachochea watu kuwa na msimamo mkali wa kidini. Kwa msingi wa maamuzi ya mahakama za Urusi, serikali imeweka machapisho yetu 63 katika Orodha ya Serikali ya Vitabu Vinavyowachochea Watu Kuwa na Msimamo Mkali wa Kidini.

Pamoja na hilo, ndugu na dada zetu wameathiriwa katika angalau mavamizi 950, mashambulizi, kukamatwa, na kuwekwa vizuizini. Wenye mamlaka wa Urusi wamefungua mashtaka 11 ya visa vya uhalifu dhidi ya ndugu zetu, na Majumba ya Ufalme mengi yameharibiwa. Wenye mamlaka hata waliweka kamera za kuwachunguza watu katika angalau nyumba ya familia moja, na kunasa simu na kuchunguza barua-pepe za wengine wengi ili kutafuta mashtaka ya uwongo dhidi yao chini ya sheria ya kupinga watu wenye msimamo mkali.

Mojawapo ya kesi za mashtaka ya uwongo inamhusu Aleksandr Kalistratov, mwenye umri wa miaka 35, mjini Gorno-Altaysk, aliyeshtakiwa kwa “kuchochea chuki au uadui wa kidini” kulingana na sheria ya kupinga watu wenye msimamo mkali, na ambayo imeshutumiwa sana na watu wanaotetea haki za kibinadamu. Katika kesi hiyo iliyoanza Oktoba 7, 2010, hadi Machi 18, 2011, hakuna yeyote kati ya mashahidi 71 waliohojiwa ambaye aliweza kuthibitisha tendo la uhalifu, au hata kwamba Aleksandr alikusudia kufanya uhalifu. Mahakama ilichunguza kwa makini machapisho na mafundisho ya Mashahidi wa Yehova, na mnamo Aprili 14, 2011, hakimu akatoa uamuzi kwamba Aleksandr hana hatia. Hata hivyo, kiongozi wa mashtaka alikata rufaa kuhusiana na uamuzi huo, na mnamo Mei 26, 2011, Mahakama Kuu ya Jamhuri ya Altay ikaamua kurudisha kesi hiyo kwa mahakama ya chini ili isikizwe tena na hakimu mwingine. Hivyo, baada ya Ndugu Kalistratov kuondolewa mashtaka kabisa, bado kesi yake itasikizwa upya, jambo linaloweza kufanya ahukumiwe kimakosa kuwa mtu mwenye msimamo mkali.

Ni wazi kwamba kesi ya aina hiyo inayohusu utendaji unaoonwa kuwa hatari umevutia uangalifu mwingi kwa kazi yetu katika mji mdogo wa Gorno-Altaysk. Mashahidi katika eneo hilo, ambao pia wako katika hatari ya kushtakiwa wanakabilije hali hizo?

Dada anayeitwa Inna anasema: “Biblia imekuwa yenye thamani sana wakati wa kipindi hiki kigumu. Ndugu na dada zangu wamekuwa kama familia yangu, nami nahisi nikiwa karibu sana na Yehova kuliko wakati mwingine wowote!” Ingawa baadhi ya machapisho yetu yamepigwa marufuku, mafunzo mengi yameanzishwa kwa kutumia Biblia tu. Idadi ya wahubiri katika Jamhuri ya Altay imeongezeka kwa asilimia 24. Mashahidi wametumia saa asilimia 33 zaidi katika utumishi wa shambani ikilinganishwa na mwaka uliopita. Wahudhuriaji wa Ukumbusho walikuwa asilimia 16 zaidi ya mwaka uliopita na mara mbili ya idadi ya wahubiri katika jamhuri nzima!

Kwa sasa, Mashahidi wa Yehova nchini Urusi wametuma maombi mapya 13 kwa mahakama ya ECHR dhidi ya serikali ya Urusi. Ombi moja linapinga uamuzi wa Mahakama Kuu uliofanywa Desemba 8, 2009, na lingine linapinga uamuzi wa Mahakama Kuu ya Jamhuri ya Altay uliotangaza machapisho yetu 18 kuwa yanawachochea watu kuwa na msimamo mkali.

[Maelezo ya Chini]

[Blabu katika ukurasa wa 14]

“Imeandikwa katika Manabii, ‘Na wote watafundishwa na Yehova’”

[Blabu katika ukurasa wa 25]

“Sijui niseme nini ili kuonyesha shukrani zangu”

[Sanduku katika ukurasa wa 12]

Mambo Waliyosema Kuhusu Upainia Msaidizi:

• “Ilikuwa mara ya kwanza maishani mwangu kufanya upainia msaidizi. Sijui niseme nini kuonyesha jinsi ninavyothamini pendeleo hili!”

• “Asanteni sana kwa mpango huu mpya. Umetuletea shangwe nyingi sana.”

• “Mpango huo ulikuwa wa pekee sana katika historia ya kutaniko letu.”

• “Kuwa na mapainia wasaidizi wengi sana kumechangia roho ya amani na umoja kutanikoni.”

• “Lazima Har–Magedoni iwe imekaribia sana!”—Mtu fulani ambaye si Shahidi aliyeona bidii yetu katika mwezi wa Aprili.

[Picha katika ukurasa wa 43]

‘PIGENI VIGELEGELE KWA SHANGWE’

OLE zinazoukumba ulimwengu huu ulio chini ya Shetani zinazidi kuongezeka. (Ufu. 12:12) Tofauti kabisa na hilo, watumishi wa Yehova ‘wanapiga vigelegele kwa shangwe kwa sababu ya hali nzuri ya moyo.’ (Isa. 65:13, 14) Bila kuacha, wanaendelea kuwaalika watu wengi iwezekanavyo kwenye ibada ya Mungu wa kweli, wakijua kwamba ‘wote wanaomkimbilia [Yehova] watashangilia; watapiga vigelegele vya shangwe mpaka wakati usio na kipimo.’—Zab. 5:11.

[Chati/Ramani katika ukurasa wa 26]

(Ona nakala iliyochapishwa)

INAPATIKANA KATIKA LUGHA 106

Biblia Nzima, Tafsiri Maandiko ya Kigiriki ya Ulimwengu Mpya: 62 ya Kikristo: 44

Cibemba Kiamhara

Kiafrikana Kiazerbaijani

Kialbania Kiazerbaijani (cha Kisirili)

Kiarabu Kichitonga

Kiarmenia Kiestonia

Kibulgaria Kiewe

Kicheki Kifiji

Kichichewa Kiguni

Kichina (cha Kitamaduni) Kihiligaynoni

Kichina (Sahili) Kihindi

Kidenishi Kihiri Motu

Kiefik Kikambodia

Kifaransa Kikanada

Kifini Kikaonde

Kigeorgia Kikazakh

Kigiriki Kikiribati

Kihispania Kikrioli Haiti

Kiholanzi Kilatvia

Kihosa Kilithuania

Kihungaria Kiluvale

Kiigbo Kimalayalam

Kiiloko Kimyanmar

Kiindonesia Kinepali

Kiingereza Kipangasini

Kiitaliano Kipapiamento cha (cha Kurasao)

Kijapani Kipunjabi

Kijerumani Kisango

Kikirghiz Kisilozi

Kikorea Kisranantongo

Kikroatia Kitamili

Kimakedonia Kithai

Kimalagasi Kitok Pisin

Kimalta Kitonga

Kinorway Kitumbuka

Kinyarwanda Kiukrainia

Kiosetia Kiuzbeki

Kipolishi Kivietnam

Kireno Luganda

Kirumania Lugha ya Ishara ya Brazili

Kirundi Lugha ya Ishara ya Italia

Kirusi Lugha ya Ishara ya Kolombia

Kisamoa Lugha ya Ishara ya Marekani

Kisebuano Lugha ya Ishara ya Mexico

Kisepedi Lugha ya Ishara ya Urusi

Kiserbia

Kiserbia (Kiroma)

Kishona

Kisinhala

Kislovaki

Kislovenia

Kisotho

Kiswahili

Kiswedi

Kitagalogi

Kitsonga

Kitswana

Kituruki

Kitwi (cha Akuapem)

Kitwi (cha Kiasante)

Kiyoruba

Kizulu

Lingala

[Grafu]

◀ 76% ◁ 24%

Kufikia mwaka wa 2011, angalau asilimia 76 ya idadi ya watu ulimwenguni walikuwa na “Tafsiri ya Ulimwengu Mpya” (kwa sehemu au ikiwa nzima) katika lugha yao

110

100

90

80

70

60

50

40

30

20

10

0

1950 1955 1960 1965 1970 1975 1980 1985 1990 1995 2000 2005 2010

[Grafu katika ukurasa wa 8]

(Ona nakala iliyochapishwa)

Ulimwenguni Pote, Wahubiri 2,657,377 Walifanya Upainia Msaidizi

2.5 (MILIONI)

2.0

1.5

1.0

0.5

0

2008 2009 2010 2011

[Ramani katika ukurasa wa 35]

(Ona mpangilio kamili katika nakala iliyochapishwa)

cMAREKANI

UFARANSA

BULGARIA

UTURUKI

ARMENIA

AZERBAIJAN

URUSI

KOREA KUSINI

[Picha katika ukurasa wa 6]

Juu: Mapainia na wahubiri waliongoza mafunzo yao ya Biblia nyumbani kwa Jeannette. (Ona ukurasa wa 8-9)

[Picha katika ukurasa wa 7]

Kikundi cha mapainia wa kawaida na wasaidizi wakienda utumishi huko Madrid, Hispania

[Picha katika ukurasa wa 10]

Toshi akimhubiria mfanyakazi katika makao ya kuwatunzia wazee

[Picha katika ukurasa wa 11]

Alejandro na baba yake katika siku ya mwisho ya mwezi katika eneo la Sant Celoni, Barcelona, Hispania

[Picha katika ukurasa wa 13]

Kituo cha Elimu cha Watchtower huko Patterson, New York, Marekani

[Picha katika ukurasa wa 18]

◀ Jumba la Ufalme mjini Rikuzentakata, Japani

[Picha katika ukurasa wa 22]

Juu: Wajitoleaji wakibeba vifusi kutoka nyumba ya ndugu fulani huko Shibata, Miyagi

[Picha katika ukurasa wa 22]

Kushoto: Mshiriki wa Halmashauri ya Tawi akitoa hotuba katika nyumba ya ndugu huko Rikuzentakata

[Picha katika ukurasa wa 22]

Chini: Wajitoleaji wakiwatayarishia wahudhuriaji chakula cha mchana wakati wa kusanyiko la pekee katika eneo lililoathiriwa

[Picha katika ukurasa wa 24]

Tafsiri za Kilithuania na Kilatvia

[Picha katika ukurasa wa 31]

Maandishi ya kumbukumbu kwenye sakafu ya Uwanja wa Yankee, New York, Marekani

[Picha katika ukurasa wa 32]

Ofisi ya Burkina Faso

[Picha katika ukurasa wa 32]

Ofisi ya tawi ya Chile

[Picha katika ukurasa wa 33]

Wajenzi katika eneo la ujenzi wa ofisi ya Burkina Faso

[Picha katika ukurasa wa 33]

Ofisi mpya nchini Hong Kong

[Picha katika ukurasa wa 34]

Mahakama ya Ulaya ya Haki za Kibinadamu, Strasbourg, Ufaransa

[Picha katika ukurasa wa 38]

Wanafunzi wakiwa na ripoti zao za shule. Wanafurahi kwa sababu waliruhusiwa kutoshiriki somo la dini shuleni

[Picha katika ukurasa wa 41]

Mashahidi wakihubiri Gorno-Altaysk, Jamhuri ya Altay