Dhiki Kuu Ni Nini?
Jibu la Biblia
Dhiki kuu ni kipindi chenye taabu zaidi kitakachowapata wanadamu. Kulingana na unabii wa Biblia, dhiki hiyo itatukia wakati wa “siku za mwisho,” au “wakati wa mwisho.” (2 Timotheo 3:1; Danieli 12:4) Itakuwa “dhiki ya namna ambayo haijatukia tangu mwanzo wa uumbaji ambao Mungu aliumba mpaka wakati huo, na haitatukia tena.”—Marko 13:19; Danieli 12:1; Mathayo 24:21, 22.
Matukio ya wakati wa ile dhiki kuu
Kuharibiwa kwa dini ya uwongo. Dini ya uwongo itaharibiwa kwa kasi sana. (Ufunuo 17:1, 5; 18:9, 10, 21) Kwa kufanya hivyo, mamlaka za kisiasa zinazowakilishwa na Umoja wa Mataifa zitakuwa zikitekeleza mapenzi ya Mungu.—Ufunuo 17:3, 15-18.a
Kushambuliwa kwa dini ya kweli. Muungano wa mataifa, unaotajwa katika maono ya Ezekieli kuwa “Gogu wa nchi ya Magogu,” utajaribu kuwaangamiza washiriki wa dini ya kweli. Hata hivyo, Mungu atawalinda waabudu wake wasiangamizwe.—Ezekieli 38:1, 2, 9-12, 18-23.
Kuhukumiwa kwa watu duniani. Yesu atawahukumu wanadamu “naye atawatenganisha watu, mmoja kutoka kwa mwenzake, kama vile mchungaji anavyotenganisha kondoo na mbuzi.” (Mathayo 25:31-33) Hukumu hiyo itategemea ikiwa mtu aliwaunga mkono, au hakuwaunga mkono “ndugu” za Yesu watakaotawala naye mbinguni.—Mathayo 25:34-46.
Kukusanywa kwa watawala wa Ufalme. Watu waaminifu ambao wamechaguliwa kutawala na Kristo watamaliza mwendo wao wa kidunia na kufufuliwa wakaishi mbinguni.—Mathayo 24:31; 1 Wakorintho 15:50-53; 1 Wathesalonike 4:15-17.
Har-Magedoni. “Vita vya ile siku kuu ya Mungu Mweza-Yote” vinaitwa pia “siku ya Yehova.” (Ufunuo 16:14, 16; Isaya 13:9; 2 Petro 3:12) Wote watakaohukumiwa na Kristo wataangamizwa. (Sefania 1:18; 2 Wathesalonike 1:6-10) Mfumo wa kisiasa wa ulimwenguni pote, unaofananishwa katika Biblia na mnyama-mwitu mwenye vichwa saba, utaangamizwa pia.—Ufunuo 19:19-21.
Matukio baada ya ile dhiki kuu
Kufungwa kwa Shetani na roho waovu. Biblia inaonyesha malaika atamtupa Shetani na roho waovu katika “abiso,” yaani, watakuwa katika hali ya kutotenda kama ya wafu. (Ufunuo 20:1-3) Hali ya Shetani akiwa ndani ya abiso inaweza kulinganishwa na kufungwa gerezani; hataweza kuathiri mambo yanayotendeka mahali pengine popote.—Ufunuo 20:7.
Kuanza kwa ile Miaka Elfu Moja. Ufalme wa Mungu utaanza utawala wake wa miaka 1,000, ambao utawaletea wanadamu baraka nyingi. (Ufunuo 5:9, 10; 20:4, 6) “Umati mkubwa” ambao hauwezi kuhesabiwa ‘utatoka katika ile dhiki kuu,’ ukiokoka na kuanza kuishi duniani wakati wa ile Miaka Elfu Moja.—Ufunuo 7:9, 14; Zaburi 37:9-11.
a Katika kitabu cha Ufunuo, dini ya uwongo inafananishwa na Babiloni Mkubwa, “yule kahaba mkubwa.” (Ufunuo 17:1, 5) Mnyama-mwitu mwenye rangi nyekundu, ambaye anamwangamiza Babiloni Mkubwa, anawakilisha shirika ambalo kusudi lake ni kuunganisha na kutenda kwa niaba ya mataifa ya ulimwengu. Mwanzoni lilikuwa Ushirika wa Mataifa na sasa ni Umoja wa Mataifa.