Tunapoendelea kuwa karibu na Yehova, Shetani hawezi kutusababishia madhara yoyote ya kudumu. (1 Yoh. 3:8) Katika ulimwengu mpya, Yehova ataendelea kuwalinda rafiki zake waaminifu kutokana na madhara ya kiroho, na pia kutokana na kifo. (Ufu. 21:4) Kwa kweli, ni pendeleo kubwa sana kuwa mgeni katika hema la Yehova, yaani, kufurahia uhusiano wa kibinafsi pamoja naye ambao unaweza kudumu milele. (Eze. 37:27) Tunapaswa kujiendeshaje ikiwa tungependa kuendelea kuwa wageni wake? Ikiwa mtu angekualika nyumbani kwake, ungependa kufanya mambo ambayo yangemfurahisha. Bila shaka, sisi pia tungependa kujua matakwa ya Yehova kwa wale wanaotaka kuendelea kuwa wageni. Upendo wetu kwa Yehova unatuchochea kufanya yote tunayoweza “ili kumpendeza kikamili.” (Kol. 1:10) Sikuzote tunapaswa kumwonyesha heshima kubwa, na kamwe tusisahau yeye ni nani. Staha ya aina hiyo itatusaidia kuepuka mwenendo ambao utamkasirisha. Bila shaka, tunatamani ‘kutembea kwa kiasi’ pamoja na Mungu wetu.—Mika 6:8. w24.06 4 ¶8-9

Yehova alimwomba Abrahamu amtoe dhabihu Isaka, mwana wake. Bila shaka jambo hilo lilimtaabisha sana Abrahamu. Hata hivyo, alijitayarisha ili kulitimiza. Lakini Abrahamu alipokaribia kumuua Isaka, Mungu alimzuia. Mfano huo unawafundisha ukweli muhimu watu wote wenye imani, yaani, Yehova angekuwa tayari kumtoa Mwana wake mpendwa kuwa dhabihu. Yehova anawapenda sana wanadamu. (Mwa. 22:​1-18) Karne nyingi baadaye, Yehova alipowapa Waisraeli Sheria, aliwaagiza watoe dhabihu za wanyama ili kufunika dhambi zao. (Law. 4:​27-29; 17:11) Dhabihu hizo zilionyesha kwamba Yehova angeandaa dhabihu kubwa zaidi, ambayo ingewakomboa kikamili wanadamu kutoka katika dhambi. Manabii wa Mungu waliongozwa na roho ili kufafanua kwamba uzao ulioahidiwa, ambaye alikuwa Mwana wa pekee wa Mungu, angeteseka na kuuawa ili kuwakomboa wanadamu—kutia ndani wewe—kutoka katika dhambi na kifo!—Isa. 53:​1-12. w24.08 4 ¶7-8

Unaposoma Biblia, jitahidi kutafuta njia za kutumia mambo unayosoma. Unaposoma sehemu fulani ya Neno la Mungu, jiulize hivi, ‘Ninawezaje kutumia habari hii sasa au wakati ujao?’ Kwa mfano, tuseme katika usomaji wako wa Biblia unasoma 1 Wathesalonike 5:​17, 18. Baada ya kusoma mistari hiyo miwili, unaweza kutua na kufikiria unasali mara ngapi, na sala zako ni zenye kina kadiri gani. Pia, unaweza kutafakari kuhusu mambo ya kumshukuru Yehova. Na huenda unaamua kwamba utamshukuru Yehova kwa mambo matatu hususa. Ukitumia hata dakika chache kukaza fikira kwa njia hiyo, kwa kadiri fulani utakuwa msikiaji na mtendaji wa Neno la Mungu. Fikiria jinsi utakavyonufaika kwa kurudia hatua hizo kila siku unaposoma sehemu nyingine za Biblia! Naam, utakuwa mtendaji mzuri zaidi wa Neno la Mungu. w24.09 4-5 ¶9-10