Wewe ni Mwenye Thamani Machoni pa Mungu!

“Nimekupenda kwa upendo wa milele, ndiyo maana nimekuvuta kwa fadhili zangu.”—YEREMIA 31:3.

1. Mtazamo wa Yesu kuelekea watu wa kawaida wa siku yake ulitofautianaje na ule wa Mafarisayo?

WALIWEZA kuiona machoni pake. Mtu huyu, Yesu, hakuwa hata kidogo kama viongozi wao wa kidini; yeye alijali. Yeye aliwahurumia watu hawa kwa sababu “walikuwa wamechoka na kutawanyika kama kondoo wasio na mchungaji.” (Mathayo 9:36) Viongozi wao wa kidini walitakiwa wawe wachungaji wenye upendo wakimwakilisha Mungu mwenye upendo, mwenye rehema. Badala ya hivyo, waliwadharau watu wa kawaida kuwa ovyo—na walaaniwa!a (Yohana 7:47-49; linganisha Ezekieli 34:4.) Kwa wazi, maoni hayo yaliyopotoka, yasiyo ya kimaandiko yalikuwa tofauti sana na maoni ya Yehova juu ya watu wake. Yeye alikuwa ameliambia taifa lake, Israeli: “Nimekupenda kwa upendo wa milele.”—Yeremia 31:3.

2. Waandamani watatu wa Ayubu walijaribuje kumsadikisha kwamba hakufaa kitu machoni pa Mungu?

² Lakini, Mafarisayo hawakuwa wa kwanza hata kidogo kujaribu kusadikisha kondoo wapendwa wa Yehova kwamba wao hawakufaa kitu. Fikiria kisa cha Ayubu. Kwa Yehova yeye alikuwa mwadilifu na asiye na hatia, lakini wale “wafariji” watatu walisingizia kwamba Ayubu alikuwa mwasi-imani mwovu, asiye na adili ambaye angekufa na kusahauliwa kabisa. Walisisitiza kwamba Mungu asingethamini uadilifu wowote kwa upande wa Ayubu, kwa kuwa Mungu hakutumaini hata malaika wake mwenyewe naye aliona mbingu yenyewe kuwa si safi!—Ayubu 1:8; 4:18; 15:15, 16; 18:17-19; 22:3.

3. Shetani hutumia njia gani leo kujaribu kusadikisha watu kwamba hawafai kitu na hawapendeki?

³ Leo, Shetani angali akitumia ‘tendo hili la ujanja’ la kujaribu kusadikisha watu kwamba hawapendwi na hawafai kitu. (Waefeso 6:11, kielezi-chini, NW) Ni kweli kwamba mara nyingi yeye hushawishi watu kwa kuvutia fahari yao na kiburi chao. (2 Wakorintho 11:3) Lakini yeye hufurahia pia kukandamiza hali ya kujistahi ya wale ambao ni rahisi kuwashawishi. Hilo ni kweli hasa katika “siku [hizi] za mwisho” zenye hatari. Wengi leo hukua katika familia ambazo hazina “shauku ya asili”; wengi wanalazimika kukabiliana kila siku na watu walio wakali, wenye ubinafsi, na wenye vichwa vigumu. (2 Timotheo 3:1-5, NW) Miaka mingi ya kutendwa vibaya, ya ubaguzi wa rangi, ya chuki, au ya kuumizwa huenda ikawa imesadikisha watu hao kwamba hawafai kitu na hawapendeki. Mwanamume mmoja aliandika hivi: “Mimi sihisi upendo kwa [yeyote] wala sihisi napendwa na yeyote. Naona ikiwa vigumu sana kuamini kwamba Mungu anijali kwa vyovyote.”

4, 5. (a) Kwa nini wazo la mtu kutofaa kitu kibinafsi ni kinyume cha Maandiko? (b) Ni nini tokeo moja la hatari ya kuamini kwetu kwamba jitihada zetu zote hazifai kitu?

⁴ Wazo la mtu kutofaa kitu kibinafsi huchoma kiini cha kweli ya Neno la Mungu, lile fundisho la fidia. (Yohana 3:16) Ikiwa Mungu angeweza kulipa bei iliyo juu sana—uhai wenye thamani wa Mwana wake mwenyewe—ili kutununulia fursa ya kuishi milele, kwa hakika ni lazima Yeye awe atupenda sisi; kwa hakika ni lazima tuwe tuna kiasi fulani cha thamani machoni Pake!

⁵ Zaidi ya hayo, lingekuwa jambo la kuvunja moyo kama nini kuhisi kwamba twamchukiza Mungu, kwamba jitihada zetu zote hazifai kitu! (Linganisha Mithali 24:10.) Tukiwa na maoni hayo yenye mtazamo mbaya, hata kitia-moyo chenye nia njema, kilichokusudiwa kutusaidia tuongeze utumishi wetu kwa Mungu inapowezekana, badala ya hivyo chaweza kusikika kwa wengine kuwa hukumu. Chaweza kuonekana kuthibitisha sadikisho letu wenyewe la ndani kwamba lolote lile tufanyalo halitoshi.

6. Ni nini dawa bora zaidi ya kuponya mawazo yenye mtazamo mbaya sana juu yetu wenyewe?

⁶ Ikiwa wahisi una hisia hizo zenye mtazamo mbaya ndani yako mwenyewe, usikate tamaa. Wengi wetu huwa wenye kujichambua sana isivyofaa mara kwa mara. Na kumbuka, Neno la Mungu limekusudiwa “kunyoosha mambo” na “kuangusha ngome.” (2 Timotheo 3:16, NW; 2 Wakorintho 10:4) Mtume Yohana aliandika hivi: “Katika hili tutafahamu ya kwamba tu wa kweli, nasi tutaituliza mioyo yetu mbele zake, ikiwa mioyo yetu inatuhukumu; kwa maana Mungu ni mkuu kuliko mioyo yetu naye anajua yote.” (1 Yohana 3:19, 20) Basi, na tuchunguze njia tatu ambazo katika hizo Biblia hutufundisha kwamba sisi ni wenye thamani kwa Yehova.

Yehova Akuthamini

7. Yesu alifundishaje Wakristo wote juu ya thamani yao machoni pa Mungu?

⁷ Kwanza, Biblia hutufundisha moja kwa moja kwamba kila mmoja wetu ana thamani machoni pa Mungu. Yesu alisema hivi: “Je! mashomoro watano hawauzwi kwa senti mbili? wala hasahauliwi hata mmojawapo mbele za Mungu. Lakini hata nywele za vichwa vyenu zimehesabiwa zote. Msiogope basi, bora ninyi kuliko mashomoro wengi.” (Luka 12:6, 7) Siku hizo shomoro alikuwa ndege wa bei ya chini zaidi aliyeuzwa kuwa chakula, hata hivyo hakuna hata mmojawapo aliyepuuzwa na Muumba wake. Hivyo msingi unawekewa utofautiano wa ajabu: Kwa habari ya wanadamu—walio na thamani, hata zaidi—Mungu ajua kila jambo. Ni kana kwamba nywele zenyewe za vichwa vyetu zimehesabiwa moja-moja!

8. Kwa nini ni jambo la kihalisi kufikiri kwamba Yehova angeweza kuhesabu nywele za vichwa vyetu?

⁸ Nywele kuhesabiwa? Ikiwa wadhani kwamba sehemu hii ya kielezi cha Yesu si ya kihalisi, fikiria hili: Mungu hukumbuka watumishi wake waaminifu kikamili sana hivi kwamba yeye anaweza kuwafufua—akiwaumba tena katika kila jambo dogo, kutia na misimbo jeni yao iliyo ngumu kufahamika na miaka yao yote ya kumbukumbu na maono. Kuhesabu nywele za vichwa vyetu (ambazo kichwa cha wastani hukuza karibu 100,000) lingekuwa jambo rahisi kwa kulinganisha!—Luka 20:37, 38.

Yehova Huthamini Nini Ndani Yetu?

9. (a) Ni nini baadhi ya sifa ambazo Yehova huthamini? (b) Kwa nini wahisi kwamba sifa hizo ni zenye thamani kwake?

⁹ Pili, Biblia hutufundisha lile ambalo Yehova huthamini ndani yetu. Kwa kusema kisahili, yeye hufurahia sifa zetu chanya na jitihada zetu. Mfalme Daudi alimwambia mwana wake Sulemani hivi: “BWANA hutafuta-tafuta mioyo yote, na kuyatambua mawazo yote ya fikira.” (1 Mambo ya Nyakati 28:9) Mungu atafuta-tafutapo mioyo ya mabilioni ya binadamu katika ulimwengu huu mjeuri, uliojaa chuki, ni lazima iwe yeye hufurahia kama nini apatapo moyo upendao amani, kweli, na uadilifu! (Linganisha Yohana 1:47; 1 Petro 3:4.) Ni nini hutendeka Mungu apatapo moyo unaofurika na upendo kwake, unaotafuta kujifunza juu yake na kushiriki ujuzi huo na wengine? Kwenye Malaki 3:16, Yehova atuambia kwamba yeye husikiliza wale wanaosema na wengine juu yake na hata ana “kitabu cha ukumbusho” kwa ajili ya wote ‘wanaomhofu Yehova, na kulitafakari jina lake.’ Sifa hizo ni zenye thamani kwake!

10, 11. (a) Huenda wengine wakaelekea kupingaje uthibitisho wa kwamba Yehova huthamini sifa zao nzuri? (b) Kielelezo cha Abiya chaonyeshaje kwamba Yehova huthamini sifa nzuri za kiasi chochote?

¹⁰ Hata hivyo, moyo wenye kujihukumu huenda ukakinza uthibitisho huo wa thamani yetu machoni pa Mungu. Huenda ukanong’ona hivi kwa kusisitiza, ‘Lakini kuna wengine wengi sana walio wenye kielelezo kizuri zaidi katika sifa hizo kuliko mimi. Lazima iwe Yehova atamauka kama nini anaponilinganisha nao!’ Yehova halinganishi watu, wala yeye si mwenye viwango vigumu sana, asiyekubali lolote lisilo kamilifu. (Wagalatia 6:4) Yeye husoma mioyo akiwa mwenye busara sana, naye huthamini sifa nzuri za kiasi chochote.

¹¹ Mathalani, Yehova alipoagiza kwamba nasaba yote yenye kuasi imani ya Mfalme Yeroboamu iuawe, iangamizwe kama vile “mavi,” Yeye aliamuru kwamba mmoja tu kati ya wana wa mfalme, Abiya, azikwe kwa heshima. Kwa nini? “Limeonekana ndani yake jambo lililo jema kwa BWANA, Mungu wa Israeli.” (1 Wafalme 14:10, 13) Je, hilo lilimaanisha kwamba Abiya alikuwa mwabudu mwaminifu wa Yehova? Sivyo hasa, kwa kuwa yeye alikufa, kama vile wale wengine wa nyumba yake ovu. (Kumbukumbu la Torati 24:16) Bado, Yehova alithamini “jambo lililo jema” aliloona moyoni mwa Abiya naye akatenda kulingana nalo. Matthew Henry’s Commentary on the Whole Bible chasema: “Palipo angalau jambo fulani lililo jema, litapatikana: Mungu analolitafuta, huliona, hata liwe ni dogo kama nini, naye hupendezwa nalo.” Na usisahau kwamba Mungu akipata hata kiasi kidogo cha sifa fulani nzuri ndani yako, yeye aweza kufanya ikue maadamu wewe wajitahidi kumtumikia kwa uaminifu.

12, 13. (a) Zaburi 139:3 laonyeshaje kwamba Yehova huthamini jitihada zetu? (b) Ni katika maana gani yaweza kusemwa kwamba Yehova huchuja utendaji wetu mbalimbali?

¹² Yehova huthamini jitihada zetu kwa njia iyo hiyo. Kwenye Zaburi 139:1-3, twasoma hivi: “Ee BWANA, umenichunguza na kunijua. Wewe wajua kuketi kwangu na kuondoka kwangu; umelifahamu wazo langu tokea mbali. Umepepeta [“umepima,” NW] kwenda kwangu na kulala kwangu, umeelewa na njia zangu zote.” Kwa hiyo Yehova ajua utendaji wetu wote. Lakini yeye ajua hata zaidi. Katika Kiebrania fungu la maneno “umeelewa na njia zangu zote” laweza pia kumaanisha “unahazini njia zangu zote” au “unathamini sana njia zangu zote.” (Linganisha Mathayo 6:19, 20.) Lakini, Yehova angeweza kuthaminije sana njia zetu hali sisi ni wasio wakamilifu sana na ni wenye dhambi?

¹³ Kwa kupendeza, kulingana na wasomi wengine, Daudi alipoandika kwamba Yehova alikuwa ‘amepima’ kwenda kwake na vipindi vyake vya kupumzika, Kiebrania kilimaanisha kihalisi “kuchuja” au “kupepeta.” Kitabu kimoja cha marejezo kilionelea hivi: “Hilo lamaanisha . . . kupepeta ili kuondoa makapi yote, na kuacha nafaka yote—kuweka kando yote yenye thamani. Kwa hiyo hapa lamaanisha, kwa kusema kitamathali, kwamba Mungu alimchuja. . . . Alitawanya makapi yote, au yote yasiyokuwa yenye thamani, akaona lile lililokuwako ambalo lilikuwa halisi na lenye maana.” Moyo wenye kujihukumu huenda ukapepeta utendaji wetu kwa njia iliyo kinyume, ukituhukumu bila rehema juu ya makosa ya wakati uliopita na kupuuza mambo ambayo tumetimiza kuwa si kitu. Lakini Yehova husamehe dhambi zetu tukitubu kwa moyo mweupe na kujitahidi kutorudia makosa yetu. (Zaburi 103:10-14; Matendo 3:19) Yeye huchunga na kukumbuka matendo yetu mema. Kwa kweli, yeye huyakumbuka milele maadamu sisi twaendelea kuwa waaminifu kwake. Yeye angeliona kuwa jambo lisilo la uadilifu kusahau hayo, naye hawi kamwe asiye mwadilifu!—Waebrania 6:10.

14. Ni nini lionyeshalo kwamba Yehova huthamini utendaji wetu katika huduma ya Kikristo?

¹⁴ Ni nini baadhi ya matendo mema ambayo Mungu huthamini? Karibu kila jambo tufanyalo kwa kumwiga Mwana wake, Yesu Kristo. (1 Petro 2:21) Kwa hakika basi, tendo moja lililo la maana sana ni kuenezwa kwa habari njema ya Ufalme wa Mungu. Kwenye Warumi 10:15, twasoma hivi: “Ni mizuri kama nini miguu yao wahubirio habari ya mema!” Ingawa huenda kwa kawaida tusione miguu yetu duni kuwa “mizuri,” neno ambalo Paulo alitumia hapa lilikuwa lilelile lililotumiwa katika tafsiri ya Greek Septuagint kufafanua Rebeka, Raheli, na Yusufu—ambao wote watatu walijulikana kwa urembo wao. (Mwanzo 26:7; 29:17; 39:6) Kwa hiyo kushiriki kwetu katika utumishi wa Mungu wetu, Yehova, ni jambo lililo zuri sana na lenye thamani machoni pake.—Mathayo 24:14; 28:19, 20.

15, 16. Kwa nini Yehova huthamini uvumilivu wetu, na maneno ya Mfalme Daudi kwenye Zaburi 56:8 hukaziaje jambo hilo la hakika?

¹⁵ Sifa nyingine ambayo Mungu huthamini ni uvumilivu wetu. (Mathayo 24:13) Kumbuka, Shetani ataka umgeuzie Yehova kisogo. Kila siku ambayo wewe waendelea kuwa mwaminifu-mshikamanifu kwa Yehova ni siku nyingine ambayo umesaidia kutolea jibu dhihaka za Shetani. (Mithali 27:11) Nyakati nyingine uvumilivu si jambo rahisi. Matatizo ya afya, misiba ya kifedha, misononeko ya kihisiamoyo, na vipingamizi vingine vyaweza kufanya kila siku inayopita iwe jaribu. Uvumilivu unapokabili majaribu hayo ni wenye thamani hasa kwa Yehova. Hiyo ndiyo sababu Mfalme Daudi alimwomba Yehova aweke machozi yake akiba katika “chupa ya ngozi” (NW) ya kitamathali, akiuliza hivi kwa uhakika, “Je! hayamo katika kitabu chako?” (Zaburi 56:8) Ndiyo, Yehova huhazini na kukumbuka machozi na kuteseka kote tunakovumilia katika kudumisha uaminifu mshikamanifu wetu kwake. Hayo pia ni yenye thamani machoni pake.

¹⁶ Kwa sababu ya sifa zetu nzuri zaidi na jitihada zetu, ni wazi kama nini kwamba Yehova hupata mengi ya kuthamini katika kila mmoja wetu! Iwe ni jinsi gani ulimwengu wa Shetani umetutenda, Yehova hutuona kuwa wenye thamani na kuwa sehemu ya “vitu vinavyotamanika vya mataifa yote.”—Hagai 2:7, NW.

Yale Ambayo Yehova Amefanya Kuonyesha Upendo Wake

17. Kwa nini dhabihu ya fidia ya Kristo itusadikishe kwamba Yehova na Yesu wanatupenda tukiwa mtu mmoja-mmoja?

¹⁷ Tatu, Yehova hufanya mengi kuthibitisha upendo wake kwetu. Kwa hakika, dhabihu ya fidia ya Kristo ndilo jibu lenye nguvu zaidi kwa uwongo wa kishetani kwamba sisi hatufai kitu au hatupendeki. Hatupaswi kusahau kamwe kwamba kifo chenye maumivu makali ambacho kilimpata Yesu juu ya mti wa mateso na yale maumivu yaliyo makali hata zaidi ambayo Yehova alivumilia katika kutazama kifo cha Mwana wake mpendwa ulikuwa uthibitisho wa upendo wao kwetu. Zaidi ya hayo, upendo huo hutumika kwetu binafsi. Hivyo ndivyo mtume Paulo alivyoona jambo hilo, kwani aliandika hivi: “Mwana wa Mungu . . . alinipenda akajitoa nafsi yake kwa ajili yangu.”—Wagalatia 2:20.

18. Ni katika maana gani Yehova hutuvuta kwa Kristo?

¹⁸ Yehova amethibitisha upendo wake kwetu kwa kutusaidia sisi mmoja-mmoja kutumia kwa faida yetu manufaa za dhabihu ya Kristo. Yesu alisema hivi kwenye Yohana 6:44: “Hakuna mtu awezaye kuja kwangu, asipovutwa na Baba aliyenipeleka.” Kupitia kazi ya kuhubiri, inayotufikia sisi mmoja-mmoja, na kupitia roho yake takatifu, ambayo Yehova hutumia kutusaidia tuelewe na kutumia kweli za kiroho kujapokuwa kupungukiwa na kutokamilika kwetu, Yehova hutuvuta sisi binafsi kuelekea Mwana wake na tumaini la uhai wa milele. Kwa hiyo Yehova aweza kusema juu yetu kama vile alivyosema juu ya Israeli: “Nimekupenda kwa upendo wa milele, ndiyo maana nimekuvuta kwa fadhili zangu.”—Yeremia 31:3.

19. Kwa nini pendeleo la sala litusadikishe juu ya upendo wa kibinafsi wa Yehova kwetu?

¹⁹ Lakini, labda ni kupitia pendeleo la sala kwamba twaona upendo wa Yehova kwa njia iliyo kamili zaidi. Yeye hualika kila mmoja wetu ‘kumwomba bila kukoma.’ (1 Wathesalonike 5:17) Yeye husikiliza! Hata anaitwa “Msikiaji wa sala.” (Zaburi 65:2, NW) Yeye hakukabidhi cheo hiki kwa yeyote mwingine, wala hata kwa Mwana wake mwenyewe. Ebu fikiria hili: Muumba wa ulimwengu wote mzima hutuhimiza tumkaribie katika sala, kwa uhuru wa usemi. Haja zako huenda hata zikamsukuma Yehova kufanya lile ambalo huenda asingalifanya kwa vyovyote.—Waebrania 4:16; Yakobo 5:16; ona Isaya 38:1-16.

20. Kwa nini upendo wa Mungu kwetu si udhuru wa kujihisi kuwa wenye umaana au wa kujisifu kwa upande wetu?

²⁰ Hakuna Mkristo mwenye usawaziko ambaye angechukua uthibitisho huo wa upendo na staha ya Mungu kuwa udhuru wa kujiona kuwa mwenye maana zaidi kuliko vile alivyo kikweli. Paulo aliandika hivi: “Kwa neema niliyopewa namwambia kila mtu aliyeko kwenu asinie makuu kupita ilivyompasa kunia; bali awe na nia ya kiasi, kama Mungu alivyomgawia kila mtu kiasi cha imani.” (Warumi 12:3) Hivyo huku tukijifurahisha tukiwa katika uchangamfu wa upendo wa Baba, na tuwe wenye akili timamu na kukumbuka kwamba upendo wa Mungu wenye fadhili haustahiliwi.—Linganisha Luka 17:10.

21. Ni uwongo upi wa kishetani ambao ni lazima tukinze sikuzote, na ni lazima tufikirie sana kweli gani ya kimungu?

²¹ Kila mmoja wetu na afanye yote awezayo kwa nguvu zake kukinza mawazo yote ambayo Shetani huendeleza katika ulimwengu huu wa kale unaokufa. Hilo latia ndani kukataa katakata wazo la kwamba sisi hatufai kitu au hatupendwi. Ikiwa maisha katika mfumo huu yamekufundisha ujione kuwa kipingamizi kikubwa mno hata kisiweze kushindwa na upendo mkubwa sana wa Mungu, au matendo yako mema kuwa duni sana hata yasiweze kuonwa na macho yake yenye kuona mambo yote, au dhambi zako kuwa kubwa mno hata zisiweze kufunikwa na kifo cha Mwana wake mwenye thamani, wewe umefundishwa uwongo. Kataa katakata uwongo huo mbalimbali kwa machukio yote ambayo uwongo huo wastahili! Na tukumbuke sikuzote maneno yaliyopuliziwa ya mtume Paulo kwenye Warumi 8:38, 39: “Nimekwisha kujua hakika ya kwamba, wala mauti, wala uzima, wala malaika, wala wenye mamlaka, wala yaliyopo, wala yatakayokuwapo, wala wenye uwezo, wala yaliyo juu, wala yaliyo chini, wala kiumbe kinginecho chote hakitaweza kututenga na upendo wa Mungu ulio katika Kristo Yesu Bwana wetu.”

[Maelezo ya Chini]

Wewe Wafikirije?

◻ Kwa nini Shetani hujaribu kutusadikisha kwamba sisi hatufai kitu na hatupendwi?

◻ Yesu alifundishaje kwamba Yehova huthamini kila mmoja wetu?

◻ Twajuaje kwamba Yehova hupenda sana sifa zetu nzuri?

◻ Twaweza kuwaje na hakika kwamba Yehova huhazini jitihada zetu?

◻ Yehova amethibitishaje upendo wake kwetu tukiwa watu mmoja-mmoja?

[Picha katika ukurasa wa 13]

Yehova huona na kukumbuka wote wale wanaolitafakari jina lake

Kuchochea Kwenye Upendo na Kazi Zilizo Bora—Jinsi Gani?

“Acheni tufikiriane ili kuchocheana kwenye upendo na kazi zilizo bora, . . . kutiana moyo, na zaidi sana hivyo kwa kadiri mtazamavyo ile siku ikikaribia.”—WAEBRANIA 10:24, 25, NW.

1, 2. (a) Kwa nini lilikuwa jambo la maana kwamba Wakristo wa mapema wapate faraja na kitia-moyo katika kukutanika kwao pamoja? (b) Ni shauri gani la Paulo lililotaja uhitaji wa kukutana pamoja?

WAO walikutana sirini, walisongamana pamoja katika nyumba iliyofungwa kufuli. Huko nje, kulikuwa na hatari kotekote. Kiongozi wao, Yesu, alikuwa ametoka tu kuuawa peupe, naye alikuwa ameonya wafuasi wake kwamba wao wangetendwa vivyo hivyo. (Yohana 15:20; 20:19) Lakini walipokuwa wakisema kwa sauti za chini juu ya Yesu mpendwa wao, ni lazima kuwa pamoja kuliwafanya angalau wahisi kuwa salama zaidi.

² Miaka ilipopita, Wakristo walikabili namna zote za majaribu na mnyanyaso. Kama vile wale wanafunzi wa kwanza, wao walipata faraja na kitia-moyo kutokana na kukutana pamoja.