Maswali Kutoka kwa Wasomaji
Wengi wa Mashahidi wa Yehova huadhimisha siku ya ukumbusho wa arusi yao. Siku ya kuzaliwa ni ukumbusho wa siku uliyozaliwa. Kwa hiyo kwa nini kusherehekea siku ya ukumbusho wa arusi na si siku za kuzaliwa?
Kusema wazi, hakuna haja ya Mkristo kusherehekea yoyote ya hizo. Hata hivyo, hiyo haimaanishi kwamba zote ni sawa katika umaana au kwamba Wakristo wapaswa kuona siku za ukumbusho wa arusi kama waionavyo miadhimisho ya siku ya kuzaliwa.
Kama ilivyoonwa, yaweza kusemwa kwamba zote ni siku za ukumbusho kwa sababu “siku ya ukumbusho” ni ‘kutokea tena kila mwaka kwa tarehe inayotia alama tukio fulani.’ Ingeweza kuwa siku ya ukumbusho wa tukio lolote—siku uliyopata aksidenti ya gari, ulipoona kupatwa kwa mwezi, na kadhalika. Kwa wazi, Wakristo hawafanyi kila siku ya “ukumbusho” iwe siku ya pekee au kuwa sherehe. Mtu ahitaji kufikiria pande mbalimbali za tukio na kuamua aonalo kuwa lafaa.
Kwa kielelezo, Mungu aliwaagiza kihususa Waisraeli washerehekee kila mwaka siku ambayo malaika wake alipita juu ya nyumba za Waisraeli katika Misri na kutoka kulikofuata kwa watu wake mwaka wa 1513 K.W.K. (Kutoka 12:14) Wayahudi, kutia na Yesu, walipoadhimisha siku ya ukumbusho wa tukio hilo, ilikuwa kwa sababu ya kutii mwelekezo wa Mungu, nao hawakufanya hivyo kwa karamu au zawadi. Wayahudi pia waliona kuwekwa wakfu upya kwa hekalu kuwa siku ya pekee ya ukumbusho. Ingawa kuadhimisha tukio hilo la kihistoria hakukuamriwa katika Biblia, andiko la Yohana 10:22, 23 ladokeza kwamba Yesu hakukosoa hilo. Hatimaye, Wakristo wana mkutano wa pekee siku ya ukumbusho wa kifo cha Yesu. Bila shaka, wanafanya hivyo kwa kutii shauri la wazi lipatikanalo katika Neno la Mungu.—Luka 22:19, 20.
Vipi siku za ukumbusho wa arusi? Katika nchi fulani ni kawaida kwa mume na mke kuadhimisha siku ya ukumbusho wa kuoana kwao, mpango ambao Mungu alianzisha. (Mwanzo 2:18-24; Mathayo 19:4-6) Kwa hakika, twajua kwamba Biblia haiioni ndoa kwa njia isiyopendeza. Yesu alihudhuria sherehe ya ndoa na kuchangia upendezi wa pindi hiyo.—Yohana 2:1-11.
Kwa sababu hiyo, haingekuwa ajabu kwamba mume na mke wanaweza kuchagua kutumia wakati katika siku ya ukumbusho wa arusi yao ili kujikumbusha shangwe ya hiyo pindi na kufanya upya azimio lao la kujitahidi kufanikiwa wakiwa mume na mke. Wawe wanaelekeza fikira kwenye tukio hilo lenye furaha faraghani, wakiwa mume na mke tu, au wawe na watu wachache wa ukoo au marafiki wa karibu pamoja nao ni juu yao kuamua. Pindi hiyo haipasi kuwa kisababu cha kuwa na kikusanyiko kikubwa cha kirafiki. Siku hiyo Wakristo wangependa kuongozwa na kanuni zinazotumika kila siku maishani mwao. Hivyo, iwe mtu ataadhimisha siku ya ukumbusho wa arusi au la ni jambo la kibinafsi.—Waroma 13:13, 14.
Ingawa hivyo, namna gani kuadhimisha kwa njia ya pekee siku ya kuzaliwa? Je, tuna mambo yoyote katika Biblia yenye kuonyesha kuwepo kwa siku ya ukumbusho kama huo?
Mapema katika karne hii, Wanafunzi wa Biblia, kama Mashahidi wa Yehova walivyojulikana wakati huo waliadhimisha siku za kuzaliwa. Wengi wao walikuwa na vijitabu vilivyoitwa Daily Heavenly Manna. Vilikuwa na andiko la Biblia la kila siku, na Wakristo wengi waliweka picha ndogo kwenye kurasa zinazolingana na siku za kuzaliwa za Wanafunzi wa Biblia wenzao. Pia, Mnara wa Mlinzi la Februari 15, 1909, lilitaarifu kwamba kwenye mkusanyiko katika Jacksonville, Florida, Marekani, Ndugu Russell msimamizi wa Sosaiti wa wakati huo, alialikwa jukwaani. Kwa nini? Alipewa zawadi ya bila kutazamia ya siku ya kuzaliwa ya masanduku fulani ya balungi, mananasi, na machungwa yakiwa zawadi ya siku ya kuzaliwa. Hilo latuonyesha kidogo tu vile ilivyokuwa wakati uliopita. Ili kuelewa hali ilivyokuwa, kumbuka kwamba wakati wa kipindi hicho, Wanafunzi wa Biblia waliadhimisha Desemba 25 kuwa siku ya ukumbusho wa kuzaliwa kwa Yesu. Hata ilikuwa desturi yao kuwa na mlo mkuu wa Krismasi katika makao makuu ya Brooklyn.
Bila shaka, watu wa Mungu wamekua kiroho tangu wakati huo. Katika miaka ya 1920, nuru iliyoongezeka ya kweli iliwawezesha kuona yafuatayo:
Yesu hakuzaliwa Desemba 25, tarehe iliyohusianishwa na dini ya kipagani. Biblia hutuagiza kuadhimisha tarehe ya kifo cha Yesu wala si siku ya ukumbusho wa kuzaliwa kwake au kwa mtu mwingine yeyote. Kufanya hivyo kwapatana na Mhubiri 7:1 na jambo la hakika la kwamba jinsi maisha ya mtu mwaminifu yanavyokuwa ndilo jambo la maana kuliko siku ya kuzaliwa kwake. Biblia haina rekodi kwamba mtumishi yeyote mwaminifu aliadhimisha siku ya kuzaliwa kwake. Yarekodi miadhimisho ya siku ya kuzaliwa ya wapagani tu, ikiihusianisha na matendo makatili. Acheni tuangalie mambo yaliyozunguka siku hizo za ukumbusho wa kuzaliwa.
Ya kwanza ni siku ya kuzaliwa ya Farao katika siku za Yosefu. (Mwanzo 40:20-23) Kuhusiana nayo, makala inayoongea kuhusu siku za kuzaliwa katika Encyclopædia of Religion and Ethics ya Hastings, yaanza hivi: “Namna ya desturi ya kuadhimisha siku ya kuzaliwa huhusiana na kuhesabu wakati, nayo maana yake huhusiana na kanuni kadhaa za kikale za kidini.” Baadaye, ensaiklopedia hiyo yamnukuu Mtaalamu wa Vitu vya Misri Sir J. Gardner Wilkinson, aliyeandika hivi: “Kila Mmisri aliiona siku, na hata saa ya kuzaliwa kwake kuwa ya maana sana; na labda kama ilivyokuwa katika Uajemi, kila mtu aliadhimisha siku yake ya kuzaliwa kwa shangwe kuu, akialika rafiki zake na vifurahishaji vyote vya jamii, na wingi wa vyakula vitamu.”
Mwadhimisho mwingine unaotajwa katika Biblia ni ule wa Herode, ambapo Yohana Mbatizaji alikatwa kichwa. (Mathayo 14:6-10) The International Standard Bible Encyclopedia (toleo la 1979) huandaa ufahamu huu: “Wagiriki walisherehekea siku za kuzaliwa za miungu na watu mashuhuri. Sherehe ya K[igiri]ki genéthlia ilionyesha sherehe hizo, genésia ilimaanisha sherehe ya kuadhimisha siku ya kuzaliwa ya mtu wa maana aliyekufa. Katika 2 Mak[abayo] 6:7 twaona rejezo genéthlia ya kila mwezi ya Antiokia wa 4, wakati ambapo Wayahudi walilazimishwa ‘kula dhabihu.’ . . . Herode aliposherehekea siku ya kuzaliwa kwake alikuwa akitenda kulingana na desturi ya Kigiriki; hakuna uthibitisho wa kwamba sherehe za siku ya kuzaliwa katika Israeli ni za nyakati za kabla ya Ugiriki.”
Kwa kukiri wazi, Wakristo wa kweli leo hawashughuliki na asili na yawezayo kuwa mahusiano ya kidini ya kikale ya kila aina ya zoea au desturi, wala hawapuuzi mambo yafaayo yaonyeshwayo katika Neno la Mungu. Hilo latia ndani kwamba sherehe pekee za siku za kuzaliwa zilizorekodiwa katika Biblia zilikuwa za wapagani na zilihusiana na visa vya ukatili. Kwa sababu hiyo, Maandiko huonyesha sherehe za siku ya kuzaliwa kuwa zisizofaa, jambo ambalo Mkristo mwenye moyo mweupe hapuuzi.
Basi, ijapokuwa ni jambo la kibinafsi kabisa Wakristo wakichagua kuadhimisha siku ya ukumbusho wa arusi yao, kuna sababu nzuri za Wakristo wakomavu kuepuka kusherehekea siku za kuzaliwa.