Maoni ya Biblia
Je, Tumlaumu Shetani kwa Dhambi Zetu?
SHETANI alilaumiwa kwa dhambi ya kwanza ya binadamu. “Nyoka alinidanganya, nikala,” Hawa akasema. (Mwanzo 3:13) Tangu wakati huo, “nyoka wa awali, yeye aitwaye Ibilisi na Shetani” ameendelea kudanganya wanadamu, ‘akipofusha akili za’ watu na ‘kuiongoza vibaya dunia nzima inayokaliwa.’ (Ufunuo 12:9; 2 Wakorintho 4:4) Hakuna mwanadamu awezaye kuepa msongo wake, lakini je, hiyo inamaanisha kwamba hatuwezi kukinza uvutano wake? Na tutendapo dhambi, je, ni yeye apaswaye kulaumiwa sikuzote?
Biblia inaeleza kwamba kwa kweli Shetani alimdanganya Hawa. (1 Timotheo 2:14) Hawa alidanganywa akafikiri kwamba kwa kupuuza amri ya Mungu, angekuwa na ufahamu na uhuru kama Mungu. (Mwanzo 3:4, 5) Akidhani hivyo, akatenda dhambi. Lakini, Mungu aliamua kwamba yeye alitenda dhambi akamhukumia kifo. Kwa nini? Kwa sababu ingawa Shetani alisema uwongo, yeye alijua vizuri sana amri ya Mungu. Yeye hakulazimishwa akose kutii; badala yake, yeye alifahamu matendo yake, na alikuwa na uwezo kabisa wa kukinza uvutano wa Shetani.
Kinza Ibilisi
Inawezekana kwa wanadamu kumkinza Ibilisi. Kwenye Waefeso 6:12, twaambiwa kwamba “tuna kushindana mwereka” dhidi ya “roho waovu katika mahali pa kimbingu.” Kwa wazi basi, Mungu anatazamia tupigane na uvutano wa Shetani. Lakini mwanadamu aweza kupiganaje na uwezo mkubwa sana wa Shetani na mashetani wake? Je, twaambiwa tupigane vita ambavyo hatuwezi, vita ambavyo bila shaka tutashindwa? La, kwa sababu Mungu hatuambii tupigane na Shetani kwa nguvu zetu wenyewe. Yehova hutupatia njia mbalimbali ambazo tunaweza kutumia ili kukinza uvutano wa Ibilisi na kushinda. Biblia hutuambia Ibilisi ni nani, jinsi anavyotenda, na jinsi tunavyoweza kujilinda.—Yohana 8:44; 2 Wakorintho 2:11; 11:14.
Jinsi ya ‘Kumpinga Ibilisi’
Maandiko hupendekeza njia mbili za kumkinza Ibilisi. Tunahimizwa: “Basi, jitiisheni wenyewe kwa Mungu; lakini mpingeni Ibilisi, naye atawakimbia.” (Yakobo 4:7) Hatua ya kwanza ya kujitiisha kwa Mungu yatia ndani kutii amri zake. Kujua sikuzote kwamba Mungu yupo, wema wake, uwezo wake mkubwa sana na mamlaka yake, na kanuni zake bora zitatupatia nguvu za kumkinza Shetani. Sala ya daima kwa Mungu ni muhimu pia.—Waefeso 6:18.
Ebu fikiria pindi ambapo Yesu alijaribiwa na Ibilisi. Kukumbuka na kunukuu amri kadhaa za Mungu kwa hakika kulimsaidia Yesu kumkinza. Akishindwa kumshawishi Yesu atende dhambi, Shetani alimwacha. Baada ya masaibu hayo, Yehova alimwimarisha Yesu zaidi kupitia malaika wake. (Mathayo 4:1-11) Kwa hiyo, akiwa na uhakika Yesu angeweza kuwatia moyo wanafunzi wake wamwombe Mungu ‘awakomboe kutokana na yule mwovu.’—Mathayo 6:13.
Hali ya Mungu kutukomboa haimaanishi kwamba anatuwekea kingo fulani kutuzunguka. Badala yake, yeye atuambia tufuatie sifa za kimungu, kama vile kweli, uadilifu, amani, na imani. Sifa hizi hutenda kama ‘suti ya silaha,’ zikituwezesha “kusimama imara dhidi ya mbinu za Ibilisi.” (Waefeso 6:11, 13-18) Basi kwa msaada wa Mungu inawezekana kukinza majaribu ya Ibilisi.
Hatua ya pili inayopendekezwa kwenye Yakobo 4:7 ni ‘kumpinga Ibilisi.’ Hilo lahusisha kutenda kwa dhati, kutoroka uvutano wake wenye kudhuru. Ni lazima mtu aepuke uwezo wake wenye udanganyifu na kukataa falsafa zake za kufuatia vitu vya kimwili na za ukosefu wa adili ambazo zimeenea sana ulimwenguni leo. Kumpinga Ibilisi kwa njia hiyo leo pamoja na maisha yaliyowekwa wakfu ili kumpendeza Mungu ni muhimu sana katika pigano letu dhidi ya Shetani. Lakini, je, dhambi zote ni matokeo ya moja kwa moja ya uvutano wa Ibilisi?
Pigano Letu la Ndani
Mwandikaji wa Biblia Yakobo aeleza hivi: “Kila mmoja hujaribiwa kwa kuvutwa na kutongozwa na tamaa yake mwenyewe. Kisha tamaa, wakati imetungika mimba, huzaa dhambi; nayo, dhambi, wakati imetimilika, hutokeza kifo.” (Yakobo 1:14, 15) Kwa ubaya, hatuwezi kushinda kabisa udhaifu na kutokamilika tulikorithi. (Waroma 5:12) “Hakuna mwanadamu mwenye haki hapa duniani, ambaye afanya mema, asifanye dhambi,” yasema Biblia.—Mhubiri 7:20.
Hilo halimaanishi kwamba hatuwezi kudhibiti dhambi zote. Katika hali fulani, kwa uchaguzi wetu mbaya, twajiletea majaribu sisi wenyewe. Basi ingawa tamaa mbaya yaweza kutokana na kutokamilika kwetu au uvutano wa Shetani, ni juu yetu sisi wenyewe kuikuza au kuikatalia mbali. Kwa kufaa, mtume Paulo alisema: “Lolote lile mtu analopanda, hilo atavuna pia.”—Wagalatia 6:7.
Kubali Daraka
Mara nyingi ni vigumu kwa wanadamu kukiri udhaifu wao, mapungukio yao—ndiyo, dhambi zao wenyewe. (Zaburi 36:2) Jambo moja liwezalo kutusaidia kukubali daraka letu kwa dhambi zetu ni kujua kwamba Mungu hadai kwamba tuwe wakamilifu. “Hakututenda sawasawa na hatia zetu, wala hakutulipa kwa kadiri ya maovu yetu,” akatangaza mtunga-zaburi Daudi. (Zaburi 103:10) Ingawa Mungu ni mwenye kusamehe, yeye bado anatutazamia tupigane vikali, kujitia nidhamu, dhidi ya vishawishi vya Ibilisi na mielekeo ya kufanya dhambi.—1 Wakorintho 9:27.
Ni lazima tuelewe kwamba ingawa Mungu anakiri Ibilisi anaweza kushawishi matendo yetu naye ana lawama kubwa ya hali ya dhambi ya wanadamu, hiyo haituondolei wajibu wetu binafsi. Kwa hiyo, Waroma 14:12 inasema: “Kila mmoja wetu atatoa hesabu kwa Mungu kwa ajili yake mwenyewe.”
Lakini, ‘tukikirihi lililo ovu’ na ‘kuambatana na lililo jema,’ twaweza kushinda uovu. (Waroma 12:9, 21) Mwanamke wa kwanza, Hawa, alishindwa kufanya hayo akaadhibiwa kwa kutotii; yeye angeweza kumkinza Shetani na kumtii Mungu. (Mwanzo 3:16) Lakini, Mungu hakupuuza fungu la Ibilisi kwa kumdanganya. Ibilisi alilaaniwa na kuhukumiwa uharibifu wa hatimaye. (Mwanzo 3:14, 15; Waroma 16:20; Waebrania 2:14) Karibuni hatutalazimika kupigana na uvutano wake mwovu.—Ufunuo 20:1-3, 10.
[Hisani ya Picha katika ukurasa wa 26]
Erich Lessing/Art Resource, NY