Mkaribie Mungu
“Huona Jinsi Moyo Ulivyo”
SURA inaweza kudanganya. Sura ya nje haionyeshi jinsi mtu alivyo kwa ndani, yaani, jinsi moyo wake ulivyo. Mara nyingi wanadamu wanahukumu kwa kutazama sura ya nje. Inapendeza kujua kwamba Yehova Mungu haangalii tu sura ya nje. Hilo linaonyeshwa wazi na maneno yaliyorekodiwa katika 1 Samweli 16:1-12.
Wazia tukio hilo. Yehova anataka kumtia mafuta mfalme mpya wa taifa la Israeli. Mungu anamwambia hivi nabii Samweli: “Nitakutuma kwa Yese Mbethlehemu, kwa maana nimejipatia mfalme kati ya wanawe.” (Mstari wa 1) Yehova hataji jina lakini anasema tu kwamba aliyechaguliwa atakuwa mmoja wa wana wa Yese. Samweli akiwa njiani kuelekea Bethlehemu, huenda anajiuliza, ‘Nitajua jinsi gani mwana wa Yese ambaye amechaguliwa na Yehova?’
Anapofika Bethlehemu, Samweli anafanya mpango ili ale chakula cha dhabihu pamoja na Yese na wanawe. Eliabu, mwana aliye mkubwa zaidi anapoingia, mara moja Samweli anavutiwa na sura yake. Samweli anafikiria kwamba kwa hakika umbo la Eliabu linamfanya astahili kuwa mfalme, anajiambia hivi: “Hakika mtiwa-mafuta wake yuko mbele za Yehova.”—Mstari wa 6.
Hata hivyo, Yehova anaona mambo kwa njia tofauti. Anamwambia Samweli hivi: “Usiangalie sura yake wala urefu wa umbo lake, kwa maana nimemkataa.” (Mstari wa 7) Yehova hapendezwi na urefu wala sura nzuri ya Eliabu. Macho ya Yehova yanaona kila kitu kumhusu mwanadamu na yanaangalia ndani kabisa mahali ambapo uzuri wa kweli unapatikana.
Yehova anamweleza Samweli hivi: “Mungu haoni kama mwanadamu anavyoona, kwa maana mwanadamu huona kile kinachoonekana kwa macho, lakini Yehova huona jinsi moyo ulivyo.” (Mstari wa 7) Ndiyo, Yehova anapendezwa na moyo, yaani, mtu wa ndani, chanzo cha mawazo ya mtu, mitazamo na hisia. “Mchunguzaji wa mioyo” anamkataa Eliabu pamoja na wana wengine sita wa Yese wanaokuja mbele ya Samweli.—Methali 17:3.
Yese ana mwana mwingine mmoja mdogo zaidi, Daudi, ambaye “analisha kondoo.” (Mstari wa 11) Hivyo, Daudi anaitwa kutoka malishoni na anakuja mbele ya Samweli. Kisha Yehova anamwambia Samweli: “Simama, mtie mafuta, kwa maana huyu ndiye!” (Mstari wa 12) Ni kweli kwamba Daudi ni “kijana mwenye macho yenye kupendeza na mwenye sura nzuri.” Lakini moyo wake ndio unaofanya akubalike machoni pa Mungu.—1 Samweli 13:14.
Katika ulimwengu ambao unakazia sana sura ya nje, inatia moyo kujua kwamba Yehova Mungu haongozwi na sura yetu ya nje. Yeye haangalii urefu wako au ikiwa wengine wanakuona kuwa mrembo au mwenye sura nzuri. Yehova anapendezwa na jinsi ulivyo kwa ndani, yaani moyoni. Je, kujua jambo hilo hakupaswi kukuchochea usitawishe sifa ambazo zitafanya upendeze machoni pa Yehova?