Walifanya Mapenzi ya Yehova

Eliya Amkweza Mungu wa Kweli

ALIKUWA mtu aliyetafutwa-tafutwa kwa bidii zaidi katika Israeli. Yaelekea sana kwamba angeuawa kwa hakika ikiwa mfalme angempata. Mtu huyu mwenye kutafutwa-tafutwa kwa bidii alikuwa nani? Eliya nabii wa Yehova.

Mfalme Ahabu na Yezebeli, mke wake mpagani, walikuwa wamefanya ibada ya Baali isitawi katika Israeli. Tokeo ni kwamba, Yehova alikuwa ameleta ukame juu ya nchi, ambao sasa ulikuwa katika mwaka wake wa nne. Yezebeli mwenye kukasirishwa alianza kuwaua manabii wa Yehova, lakini Ahabu alitaka hasa Eliya auawe. Ni Eliya aliyekuwa amemwambia Ahabu hivi miaka mitatu mapema: “Hakutakuwa na umande wala mvua miaka hii, ila kwa neno langu.” (1 Wafalme 17:1) Na ukame uliotokea uliendelea bado.

Katika hali hii ya hatari, Eliya aliambiwa na Yehova hivi: “Enenda, ukajionyeshe kwa Ahabu; nami nitaleta mvua juu ya nchi.” Kwa kujihatarisha sana kibinafsi, Eliya alitii amri ya Yehova.—1 Wafalme 18:1, 2.

Wapinzani Wawili Wakutana

“Je! ni wewe, Ewe mtaabishaji wa Israeli?” Ahabu akauliza, alipomwona Eliya. “Si mimi niliyewataabisha Israeli,” Eliya akajibu kwa ujasiri, “bali ni wewe, na nyumba ya baba yako, kwa kuwa mmeziacha amri za BWANA; nawe umewafuata mabaali.” Ndipo Eliya akaagiza kwamba Israeli wote wakusanyike kwenye Mlima Karmeli, kutia na “wale manabii wa Baali mia nne na hamsini, na wale manabii wa Ashera mia nne.” Kisha Eliya akauhutubia umati akisema: “Mtasita-sita [“Mtachechemea,” NW] katikati ya mawazo mawili hata lini?a BWANA [“Yehova,” NW] akiwa ndiye Mungu [“wa kweli,” NW], mfuateni; bali ikiwa Baali ni Mungu [“wa kweli,” NW], haya! mfuateni yeye.”—1 Wafalme 18:17-21.

Watu walikuwa kimya. Labda walitambua hatia yao katika kushindwa kumtolea Yehova ujitoaji usiohusisha miungu mingine. (Kutoka 20:4, 5) Au huenda ikawa dhamiri zao zilikuwa zimeunguzwa sana hivi kwamba hawakuufikiria kuwa wenye dhambi mwenendo wao wa kugawanya uaminifu-mshikamanifu wao kati ya Yehova na Baali. Kwa vyovyote, Eliya aliwaagiza watu watoe fahali wawili wachanga—mmoja kwa manabii wa Baali na yule mwingine kwake. Fahali wote wawili wangetayarishwa ili watolewe wakiwa dhabihu, lakini hakuna moto ungewashwa. “Nanyi ombeni kwa jina la mungu wenu,” Eliya akasema, “nami nitaomba kwa jina la BWANA [“Yehova,” NW]; na Mungu yule ajibuye kwa moto, na awe ndiye Mungu [“wa kweli,” NW].”—1 Wafalme 18:23, 24.

Yehova Akwezwa

Manabii wa Baali walianza ‘kuruka-ruka juu ya madhabahu waliyoifanya.’ Wakapaaza kilio tangu asubuhi wakisema: “Ee Baali, utusikie.” Lakini Baali hakujibu. (1 Wafalme 18:26) Kisha Eliya akaanza kuwadhihaki vikali akiwaambia hivi: “Mwiteni kwa sauti kuu; maana ni mungu huyo.” (1 Wafalme 18:27) Manabii wa Baali hata walianza kujikatakata na visu na vyembe—zoea lililotumiwa mara nyingi na wapagani kuamsha sikitiko la miungu yao.b—1 Wafalme 18:28.

Wakati wa adhuhuri ulikuwa sasa umepita, na waabudu wa Baali waliendelea “kutenda kama manabii,” (NW)—fungu la maneno ambalo katika muktadha huu lawasilisha wazo la kuendelea kufanya hivyo katika njia ya kichaa na ya kutojidhibiti. Mwishowe, Eliya aliwaambia watu wote jioni-jioni hivi: “Nikaribieni mimi.” Wote walitazama kwa makini Eliya alipojenga upya madhabahu ya Yehova, akachimba mfereji kuizunguka, akamkatakata yule fahali mchanga vipande-vipande, na kuviweka juu ya madhabahu pamoja na kuni za kuvichoma. Baadaye, yule fahali, madhabahu, na kuni zikaloweshwa maji kabisa, na mfereji ukajazwa maji (hapana shaka maji ya bahari ambayo yalipatikana kutoka Bahari ya Mediterania). Kisha, Eliya akasali kwa Yehova hivi: “Na ijulikane leo ya kuwa wewe ndiwe Mungu [“wa kweli,” NW] katika Israeli, na ya kuwa mimi ni mtumishi wako, na ya kuwa nimefanya mambo haya yote kwa neno lako. Unisikie, Ee BWANA, unisikie, ili watu hawa wajue ya kuwa wewe, BWANA [“Yehova,” NW], ndiwe Mungu [“wa kweli,” NW], na ya kuwa wewe umewageuza moyo wakurudie.”—1 Wafalme 18:29-37.

Kwa ghafula, moto ulitoka mbinguni “ukaiteketeza sadaka ya kuteketezwa, na kuni, na mawe, na mavumbi, ukayaramba yale maji yaliyokuwamo katika mfereji.” Watu waliokuwa wakitazama wakajiangusha chini mara, wakisema hivi: “BWANA [“Yehova,” NW] ndiye Mungu [“wa kweli,” NW], BWANA [“Yehova,” NW] ndiye Mungu [“wa kweli,” NW].” Kwa amri ya Eliya, manabii wa Baali walikamatwa na kupelekwa hadi bonde la mvo la Kishoni, ambako walifishwa.—1 Wafalme 18:38-40.

Somo Kwetu

Eliya alionyesha kile ambacho huenda kikaonekana kama ujasiri upitao wa kibinadamu. Lakini Yakobo, mwandikaji wa Biblia atuhakikishia kwamba “Eliya alikuwa mtu mwenye hisia kama zetu.” (Yakobo 5:17) Hakuwa mtu asiyeweza kudhuriwa kwa kadiri fulani na hofu na hangaiko. Kwa kielelezo, baadaye Yezebeli alipoweka nadhiri ya kulipiza kisasi kwa sababu ya kuuawa kwa manabii wa Baali, Eliya alikimbia kisha akapaaza kilio kwa Yehova katika sala akisema: “Yatosha; sasa, Ee BWANA, uiondoe roho [“nafsi,” NW] yangu.”—1 Wafalme 19:4.

Yehova hakuiondolea mbali nafsi ya Eliya katika kifo. Badala yake, kwa rehema aliandaa msaada. (1 Wafalme 19:5-8) Watumishi wa Mungu leo waweza kuhakikishiwa kwamba Yehova atafanya vivyo hivyo wakabilipo vipindi vya hangaiko kali, labda kwa sababu ya upinzani. Kwa kweli, wakisali ili wapate msaada wa Yehova, aweza kuwapa “nguvu ipitayo iliyo ya kawaida,” hivi kwamba ikiwa ‘wamesongwa katika kila njia,’ ‘hawatafinywa kupita wawezavyo kusonga.’ Hivyo, watasaidiwa kuvumilia, kama vile Eliya alivyosaidiwa.—2 Wakorintho 4:7, 8.

[Maelezo ya Chini]