Je, Yuda Ilibaki Ukiwa?
BIBLIA ilitabiri kwamba nchi ya ufalme wa Yuda ingeharibiwa na Wababiloni nayo ingebaki ukiwa hadi wakati ambapo wahamishwa Wayahudi wangerudi. (Yeremia 25:8-11) Sababu nzuri zaidi ya kuamini kwamba unabii huo ulitimia ni simulizi la kihistoria lililoandikwa kwa roho ya Mungu miaka 75 baada ya kikundi cha kwanza cha wahamishwa kurudi kwenye nchi yao. Unabii huo unasema kwamba mfalme wa Babiloni “akawachukua mateka mpaka Babiloni wale waliobaki kutokana na upanga, nao wakawa watumishi wake na wa wanawe mpaka mamlaka ya kifalme ya Uajemi ilipoanza kutawala.” Na kuhusu nchi hiyo, inasemekana hivi: “Siku zote za kukaa ukiwa ilishika sabato.” (2 Mambo ya Nyakati 36:20, 21) Je, kuna vitu vyovyote vya kale vinavyothibitisha hilo?
Ephraim Stern, profesa wa Chuo Kikuu cha Hebrew, ambaye anachunguza vitu vya kale huko Palestina, anasema hivi katika gazeti moja (Biblical Archaeology Review): “Waashuru na Wababiloni waliharibu sehemu kubwa ya nchi ya kale ya Israeli, lakini vitu vya kale kutoka katika magofu hayo vinaonyesha mambo mawili tofauti.” Anaeleza hivi: “Ingawa kuna uthibitisho unaoonyesha kwamba Waashuru walishambulia eneo la Palestina, inashangaza kuwa hakuna uthibitisho unaoonyesha uharibifu wa Wababiloni. . . . Hatujapata uthibitisho wowote kamwe, unaoonyesha kwamba eneo hilo lilikaliwa kabla ya wakati wa Uajemi . . . Hakuna uthibitisho hata mmoja unaoonyesha kwamba lilikaliwa. Wakati huo wote, hakuna mji hata mmoja ulioharibiwa na Wababiloni ambao ulikaliwa tena.”
Profesa Lawrence E. Stager wa Chuo Kikuu cha Harvard anakubaliana na hilo. Anasema kwamba “katika eneo lote la Ufilisti na baadaye la Yuda, sera ya mfalme wa Babiloni ya kuharibu na kuteketeza kila kitu ilifanya nchi yote iliyokuwa magharibi ya Mto Yordani iwe ukiwa kabisa.” Stager anaongeza hivi: ‘Rekodi za vitu vya kale zinaanza tena kusema kuhusu Yerusalemu na Yuda, ambako wahamishwa wengi Wayahudi walirudi katika nchi yao, kuanzia wakati Koreshi Mkuu Mwajemi alipoanza kutawala baada ya Wababiloni.’
Kwa kweli, neno la Yehova kuhusu kubaki ukiwa kwa Yuda lilitimizwa. Yale ambayo Yehova Mungu hutabiri hutimia sikuzote. (Isaya 55:10, 11) Tunaweza kumtumaini kabisa Yehova na ahadi zilizoandikwa katika Neno lake, Biblia.—2 Timotheo 3:16.