Walifanya Mapenzi ya Yehova

Uaminifu-Maadili wa Ayubu Wathawabishwa

AYUBU alikuwa mwanamume mwenye huruma, mtetezi wa wajane, mayatima, na waliotaabishwa. (Ayubu 29:12-17; 31:16-21) Kisha kwa ghafula, akapatwa na maafa, akipoteza mali yake, watoto wake, na afya yake. Kwa kusikitisha, mwanamume huyu mwenye sifa nzuri, ambaye alikuwa amekuwa nguzo la tegemezo kwa walioonewa, alipata msaada mdogo wakati yeye alipokuwa na uhitaji. Hata mke wake mwenyewe alimwambia ‘amkufuru Mungu, akafe!’ Nao “rafiki” zake Elifazi, Bildadi, na Zofari, hawakumwandalia faraja yoyote. Badala yake, walisingizia kwamba Ayubu alikuwa amefanya dhambi na kwa sababu hiyo, alistahili kupatwa na maumivu.—Ayubu 2:9; 4:7, 8; 8:5, 6; 11:13-15.

Ijapokuwa aliteseka sana, Ayubu aliendelea kuwa mwaminifu. Kwa sababu hiyo, hatimaye Yehova alimwonyesha Ayubu rehema na kumbariki. Simulizi la jinsi alivyofanya hivyo, huwahakikishia watumishi wote wa Mungu wenye kushika uaminifu-maadili kwamba, baada ya muda, wao pia watathawabishwa.

Kuondolewa Mashtaka na Kurudishwa

Kwanza, Yehova alimkaripia Elifazi, Bildadi, na Zofari. Akisema na Elifazi, ambaye kwa wazi ndiye aliyekuwa mwenye umri mkubwa zaidi, alisema hivi: “Hasira zangu zinawaka juu yako, na juu ya hao rafiki zako wawili; kwa kuwa ninyi hamkunena yaliyo sawa katika habari zangu, kama alivyonena mtumishi wangu Ayubu. Basi sasa, jitwalieni ng’ombe waume saba, na kondoo waume saba, mkamwendee mtumishi wangu Ayubu, mjisongezee sadaka ya kuteketezwa; na huyo mtumishi wangu Ayubu atawaombea ninyi.” (Ayubu 42:7, 8) Ebu wazia kilichodokezwa na usemi huo!

Yehova aliwataka Elifazi, Bildadi, na Zofari watoe dhabihu kubwa, labda ili kuwakazia uzito wa dhambi yao. Kwa kweli, ama kwa kukusudia ama bila kukusudia, walikuwa wamemkufuru Mungu kwa kusema kwamba yeye ‘hana imani katika watumishi wake’ na kwamba kwa kweli halikuwa jambo la maana kwa Mungu kama Ayubu alikuwa mwaminifu au la. Elifazi hata alisema kwamba machoni pa Mungu, Ayubu hakuwa mwenye thamani zaidi ya nondo! (Ayubu 4:18, 19; 22:2, 3) Si ajabu kwamba Yehova alisema hivi: “Ninyi hamkunena yaliyo sawa katika habari zangu”!

Lakini kuna mengi zaidi. Elifazi, Bildadi, na Zofari pia walifanya dhambi dhidi ya Ayubu binafsi, kwa kumwambia kwamba yeye mwenyewe ndiye aliyesababisha matatizo yake. Mashtaka yao yasiyo na msingi na yaliyokosa hisia-mwenzi, yalimwacha Ayubu akiwa mwenye uchungu na mwenye kushuka moyo, yakimfanya apaaze kilio hivi: “Je! mtanichukiza nafsi yangu hata lini?” (Ayubu 10:1; 19:2) Ebu wazia nyuso zenye aibu za wanaume hao watatu, kwa kuwa sasa walipaswa kumtolea Ayubu toleo kwa sababu ya dhambi zao!

Lakini Ayubu hakupaswa kufurahia kutwezwa kwao. Kwa kweli, Yehova alimtaka asali kwa niaba ya washtaki wake. Ayubu alifanya tu vile alivyoagizwa afanye, naye alibarikiwa kwa sababu ya kufanya hivyo. Kwanza, Yehova aliponya maradhi yake yenye kuogopwa. Kisha, ndugu, dada, na washiriki wa Ayubu wa zamani wakaja kumfariji, “kila mtu akampa kipande cha fedha, na pete ya dhahabu kila mmoja.”a Isitoshe, Ayubu ‘alipata kuwa na kondoo kumi na nne elfu, na ngamia elfu sita, na jozi za ng’ombe elfu, punda wake elfu.’b Na kwa kweli mke wa Ayubu alipatanishwa naye. Halafu, Ayubu akabarikiwa kuwa na wana saba na binti watatu, naye aliishi kuviona vizazi vinne vya uzao wake.—Ayubu 42:10-17.

Masomo Kwetu

Ayubu aliwawekea watumishi wa Mungu wa siku ya kisasa kielelezo chenye kutokeza. Alikuwa “mkamilifu na mwelekevu,” mwanamume ambaye Yehova alijivunia kumwita “mtumishi wangu.” (Ayubu 1:8; 42:7, 8) Hata hivyo, hilo halimaanishi kwamba Ayubu alikuwa mkamilifu. Pindi moja wakati wa majaribu yake, alidhania kimakosa kwamba Mungu ndiye aliyesababisha afa lake. Hata aliichambua njia ya Mungu ya kushughulika na mwanadamu. (Ayubu 27:2; 30:20, 21) Naye alitangaza uadilifu wake mwenyewe badala ya kutangaza uadilifu wa Mungu. (Ayubu 32:2) Lakini Ayubu alikataa kumkana Muumba, naye alikubali kwa unyenyekevu kusahihishwa na Mungu. “Nimesema maneno nisiyoyafahamu,” akakiri. “Najichukia nafsi yangu, na kutubu katika mavumbi na majivu.”—Ayubu 42:3, 6.

Tunapokuwa chini ya majaribu, huenda tukafikiri, tukasema, au tukatenda katika njia isiyofaa. (Linganisha Mhubiri 7:7.) Hata hivyo, ikiwa upendo wetu kwa Mungu ni wenye kina, hatutaasi dhidi yake au kuwa wenye uchungu kwa sababu yeye huturuhusu tupatwe na shida. Badala yake, tutadumisha uaminifu-maadili wetu na hivyo hatimaye kuvuna baraka kubwa. Mtunga-zaburi alisema hivi kumhusu Yehova: “Kwa mtu mwenye fadhili [“uaminifu-mshikamanifu,” NW] utakuwa mwenye fadhili [“uaminifu-mshikamanifu,” NW].”—Zaburi 18:25.

Kabla ya kumrudishia hali nzuri ya afya, Yehova alimtaka Ayubu asali kwa niaba ya wale waliofanya dhambi dhidi yake. Ni kielelezo kizuri kama nini kwetu! Yehova hutaka kwamba tuwasamehe wale wafanyao dhambi dhidi yetu kabla ya dhambi zetu wenyewe kuweza kusamehewa. (Mathayo 6:12; Waefeso 4:32) Ikiwa hatuko tayari kuwasamehe wengine kunapokuwa na msingi mzuri wa kufanya hivyo, je, twaweza kwa haki kumtarajia Yehova atuonyeshe rehema?—Mathayo 18:21-35.

Sisi sote hukabili majaribu pindi kwa pindi. (2 Timotheo 3:12) Hata hivyo, kama Ayubu twaweza kushika uaminifu-maadili. Kwa kufanya hivyo, tutavuna thawabu kubwa. Yakobo aliandika hivi: “Tazameni! Twawatamka kuwa wenye furaha wale ambao wamevumilia. Nyinyi mmesikia juu ya uvumilivu wa [Ayubu] na mmeona tokeo alilotoa Yehova, kwamba Yehova ni mwenye wororo sana katika shauku na mwenye rehema.”—Yakobo 5:11.

[Maelezo ya Chini]