Wafundishe Watoto Wako
Yothamu Aliendelea Kuwa Mwaminifu Licha ya Matatizo Nyumbani
MZAZI anapoamua kuacha kumtumikia Mungu wa kweli, Yehova, maisha ya mtoto yanaweza kuwa magumu. Acheni tuzungumze kumhusu Yothamu. Tutachunguza matatizo aliyokabili nyumbani alipokuwa akikua.
Uzia, baba ya Yothamu, alikuwa mfalme wa Yuda. Alikuwa mtu mwenye mamlaka zaidi katika nchi. Uzia alikuwa mfalme mzuri kwa miaka mingi hata kabla Yothamu hajazaliwa. Lakini baadaye, Yothamu alipokuwa bado mdogo, Uzia alisitawisha kiburi na akavunja Sheria ya Mungu. Hivyo, Mungu akampiga kwa ugonjwa mbaya wa ukoma. Unajua Yothamu alifanya nini?—a
Yothamu aliendelea kumtumikia Yehova. Labda mama yake aliyeitwa Yerusha alimsaidia. Lakini, huenda bado ilikuwa vigumu kwa Yothamu kuendelea kuwa mwaminifu kwa Yehova baada ya baba yake, Uzia, kuiacha nyumba ya Yehova.
Namna gani ikiwa baba au mama yako anaacha kumwabudu Yehova? Hilo lingefanya mambo yawe magumu sana kwako, sivyo?— Lakini si makosa kuwazia jambo kama hilo likitokea. Maneno ambayo Daudi aliandika katika Biblia yanatuonyesha hivyo.
Yese, baba ya Daudi, alikuwa mtu mzuri. Alimtumikia Yehova, na tunaweza kuwa na hakika kwamba Daudi alimpenda baba yake. Lakini Daudi alijifunza kumpenda Yehova zaidi kuliko jinsi alivyompenda Yese. Acheni tuone kwa nini tunasema hivyo.
Tafadhali fungua Biblia kwenye kitabu cha Zaburi 27:10. Daudi aliandika hivi: “Hata ikiwa baba yangu na mama yangu wangeniacha, Yehova mwenyewe angenichukua.” Fikiria jambo hili: Biblia inamaanisha kwamba ikiwa Yese baba ya Daudi, au mama yake wangeacha kumtumikia Yehova, Daudi angeendelea kumtumikia.
Namna gani wewe? Je, unaweza kuendelea kumtumikia Yehova hata baba au mama yako wakiacha kumtumikia?— Ni vizuri ujiulize swali hilo. Kwa sababu linahusiana na amri muhimu zaidi katika Biblia. Amri hii: “Lazima umpende Yehova Mungu wako kwa moyo wako wote na kwa nafsi yako yote na kwa akili yako yote.”
Amri hiyo inamaanisha tuwe waaminifu kwa Yehova hata inapokuwa vigumu kufanya hivyo. Unafikiri ni nani anayetaka tuache kumtumikia Yehova?— Ni adui ya Mungu, Shetani Ibilisi. Yesu alimwita “mtawala wa ulimwengu huu.” Pia, Biblia inasema kwamba yeye ni “mungu wa mfumo huu wa mambo.” Je, tunapaswa kumwogopa Shetani?—
Hapana, hatupaswi kumwogopa. Badala yake, tunapaswa kukumbuka kwamba Yehova ana nguvu nyingi kuliko Shetani. Yehova atatulinda ikiwa tutamtegemea. Soma katika Biblia yako jinsi Yehova alivyomlinda Daudi kutokana na Goliathi, lile jitu lenye kuogopesha. Yehova anaweza pia kukulinda ukiendelea kuwa mwaminifu kwake.
Soma katika Biblia yako
2 Mambo ya Nyakati 26:16-21; 27:1, 2
Yohana 12:31; 2 Wakorintho 4:4
[Maelezo ya Chini]
a Kama unasoma sehemu hii na mtoto, unapoona kistari kama hiki (—), tua na umtie mtoto moyo atoe maoni yake.