“Kusafiri Baharini Wakati wa Dhoruba”

JE, USINGEONA kujasiria kama huko kuwa kwa wakati usiofaa, kwa kipumbavu, na kuwezao kutokeza msiba? Hata hivyo, watu fulani hujiingiza katika hali kama hiyo, kusema kitamathali. Jinsi gani? Mwandishi Mwingereza wa karne ya 17, Thomas Fuller, alisema hivi: “Usifanye lolote ukiwa na hasira kali. [Kufanya hivyo] ni kama kusafiri baharini wakati wa dhoruba.”

Kuchukua hatua fulani unapokuwa na hasira isiyodhibitiwa kwaweza kuwa na matokeo yenye msiba. Jambo hilo linathibitishwa na tukio fulani lililorekodiwa katika Biblia. Simeoni na Lawi, wana wa mzee wa ukoo Yakobo, walichukua hatua ya kupinga kuchafuliwa kwa dada yao Dina kwa kuondoka wakiwa na hasira kali ya kisasi. Matokeo yalikuwa uuaji-kimakusudi wa ujumla na uporaji. Si ajabu kwamba Yakobo alilaumu kitendo chao kiovu kwa kusema hivi: “Mmenitaabisha, kunifanya ninuke vibaya kati ya watu wa nchi hii.”—Mwanzo 34:25-30.

Kwa hekima, Neno la Mungu, Biblia, hupendekeza kuchukua hatua tofauti na hiyo. Hilo lasema hivi: “Ukomeshe hasira, uache ghadhabu, usikasirike, mwisho wake ni kutenda mabaya.” (Zaburi 37:8) Kufuata shauri hilo kwaweza kuzuia kutenda dhambi nzito.—Mhubiri 10:4; ona pia Mithali 22:24, 25.