Sura ya 29

Kuimba Wimbo Mpya wa Sherehe ya Ushindi

Njozi ya 9—Ufunuo 14:1-20

Habari: Wale 144,000 wako pamoja na Mwana-Kondoo juu ya Mlima Sayuni; matamko ya kimalaika yavuma kotekote duniani; mavuno yavunwa

Wakati wa utimizo: 1914 kufika dhiki kubwa

1. Tumekwisha jifunza nini kwa habari ya Ufunuo sura ya 7, 12, na 13, na sasa tutajifunza nini?

INABURUDISHA kama nini kwenda kwenye njozi ya Yohana inayofuata! Tofauti na matengenezo ya drakoni yaliyo kama hayawani mwenye maumbo mageni-mageni, sasa sisi tunaona watumishi washikamanifu wa Yehova na utendaji wao wakati wa siku ya Bwana. (Ufunuo 1:10) Tayari, Ufunuo 7:1, 3 umetufumbulia kwamba pepo nne za uharibifu zinazuiwa mpaka wote 144,000 wa hawa watumwa wapakwa-mafuta waishe kutiwa muhuri. Ufunuo 12:17 umejulisha kwamba hawa “wabakio wa mbegu [ya mwanamke]” wanakuwa shabaha ya pekee ya Shetani, drakoni, katika wakati huo. Na Ufunuo 13 umeonyesha picha iliyo wazi ya matengenezo ya kisiasa ambayo Shetani ameinua duniani ili kuleta mbano mwingi na mnyanyaso wa ukatili juu ya watumishi waaminifu wa Yehova. Lakini adui mkuu huyo hawezi kubatili kusudi la Mungu! Sasa tutajifunza kwamba ujapokuwa utendaji wa nia mbovu wa Shetani, 144,000 wote wanakusanywa kwa ushindi wenye shangwe.

2. Ni mwono wa kimbele gani wa tamati yenye furaha anaotupa Yohana kwenye Ufunuo 14:1, na Mwana-Kondoo ni nani?

² Yohana, na pamoja naye ile jamii ya Yohana leo, wanapewa mwono wa kimbele wa tokeo hilo lenye furaha: “Na mimi nikaona, na, tazama! Mwana-Kondoo akisimama juu ya Mlima Sayuni, na pamoja na yeye mia na arobaini na nne elfu wakiwa na jina lake na jina la Baba yake limeandikwa juu ya vipaji vya nyuso zao.” (Ufunuo 14:1, NW) Kama vile tumeona, Mwana-Kondoo huyu ni yule yule Mikaeli ambaye alitakasa mbingu kwa kumtupa nje Ibilisi na roho waovu wake. Yeye ni Mikaeli ambaye Danieli hueleza kuwa ‘akisimama kwa ajili ya wana wa watu wa Mungu’ anapojitayarisha ‘kusimama’ katika kutekeleza hukumu za uadilifu za Yehova. (Danieli 12:1; Ufunuo 12:7, 9, NW) Tangu 1914 Mwana-Kondoo huyu wa Mungu mwenye kujidhabihu amekuwa akisimama juu ya Mlima Sayuni akiwa Mfalme wa Kimesiya.

3. “Mlima Sayuni” ambao juu yao Mwana-Kondoo na 144,000 ‘wanasimama’ ni nini?

³ Ni kama vile Yehova alivyotabiri: “Mimi, hata mimi, nimeweka mfalme wangu juu ya Sayuni, mlima wangu mtakatifu.” (Zaburi 2:6; 110:2, NW) Hii hairejezei tena Mlima Sayuni wa kidunia, mahali pa kijiografia pa jiji ambalo katika hilo wafalme binadamu wa nasaba ya Daudi walizoea kutawala. (1 Nyakati 11:4-7; 2 Nyakati 5:2) La, kwa kuwa Yesu, baada ya kifo chake na ufufuo katika 33 W.K., aliwekwa kuwa jiwekona la msingi kwenye Mlima Sayuni wa kimbingu, mahali pa kimbingu ambapo Yehova aliazimia kuweka “jiji la Mungu aliye hai, Yerusalemu la kimbingu.” Kwa sababu hiyo, “Mlima Sayuni” hapa huwakilisha cheo kilichokwezwa cha Yesu na warithi washirika wake, ambao hujumlika kuwa Yerusalemu la kimbingu, ambalo ndilo Ufalme. (Waebrania 12:22, 28; Waefeso 3:6, NW) Ni hali tukufu ya kifalme ambayo katika hiyo Yehova huwainua wakati wa siku ya Bwana. Katika muda wa karne zilizopita, Wakristo wapakwa-mafuta, wakiwa “mawe yaliyo hai,” wametazamia kwa hamu nyingi, kusimama juu ya Mlima Sayuni huo wa kimbingu, wakiwa wameungana na Bwana Yesu Kristo aliyetukuzwa katika Ufalme wake wenye fahari ya kifalme.—1 Petro 2:4-6, NW; Luka 22:28-30; Yohana 14:2, 3.

4. Inakuwaje kwamba 144,000 wote wanasimama juu ya Mlima Sayuni?

⁴ Yohana anaona Yesu na pia mwili kamili wa 144,000 warithi wenzi wa Ufalme wa kimbingu wakiwa wanasimama juu ya Mlima Sayuni. Katika wakati unaowakilishwa na njozi, wengi, lakini si wote, wa wale 144,000 tayari wako katika mbingu. Baadaye katika njozi iyo hiyo, Yohana anajifunza kwamba baadhi ya watakatifu wangali wanapaswa kuvumilia na kufa wakiwa waaminifu. (Ufunuo 14:12, 13) Kwa wazi, basi, baadhi ya 144,000 wangali wako duniani. Kwa hiyo inakuwaje kwamba Yohana anaona 144,000 wote wakisimama pamoja na Yesu juu ya Mlima Sayuni?a Kwamba, wakiwa washiriki wa kundi la Wakristo wapakwa-mafuta, sasa hawa ‘wamekaribia Mlima Sayuni na jiji la Mungu aliye hai, Yerusalemu la kimbingu.’ (Waebrania 12:22, NW) Kama Paulo wakati alipokuwa angali duniani, tayari wao—katika maana ya kiroho—wameinuliwa juu wakawe katika muungano na Kristo Yesu katika mahali pa kimbingu. (Waefeso 2:5, 6) Kwa kuongezea, katika 1919 wao waliitikia mwito, “Njooni juu huku,” na kitamathali ‘walienda ndani ya mbingu katika wingu.’ (Ufunuo 11:12, NW) Kwa sababu ya maandiko haya, sisi tunaweza kuona kwamba wote 144,000—kusema kiroho—wako kwenye Mlima Sayuni pamoja na Yesu Kristo.

5. Ni majina ya nani yaliyoandikwa juu ya vipaji vya nyuso za 144,000, na ni nini maana ya kila jina?

⁵ Hao 144,000 hawana sehemu yoyote pamoja na waabudu wa hayawani-mwitu, ambao wametiwa alama ya nambari ya ufananisho 666. (Ufunuo 13:15-18) Kwa kutofautiana, washikamanifu hawa wana jina la Mungu na la Mwana-Kondoo limeandikwa juu ya vipaji vya nyuso zao. Hapana shaka Yohana, Myahudi, aliona jina la Mungu katika herufi za Kiebrania, יהוה.b Katika kuwa na jina la Baba ya Yesu limeandikwa kwa ufananisho juu ya vipaji vya nyuso zao, hawa watiwa-muhuri wanajulisha wote kwamba wao ni mashahidi wa Yehova, watumwa Wake. (Ufunuo 3:12) Kuwa kwao na jina la Yesu pia likiwa linaonyeshwa juu ya vipaji vya nyuso zao hudokeza kwamba wanakiri kuwa wao ni milki yake. Yeye ni “mume” wao aliyewaposa, na wao wanatazamia kuwa “bibi-arusi” wake, “uumbaji mpya” wakitumikia Mungu wakitazamia uhai wa kimbingu. (Waefeso 5:22-24; Ufunuo 21:2, 9; 2 Wakorintho 5:17, NW) Uhusiano wao wa usiri pamoja na Yehova na Yesu Kristo huathiri mawazo na matendo yao.

Wakiimba Kana Kwamba ni Wimbo Mpya

6. Yohana anasikia wimbaji gani, naye anauelezaje?

⁶ Kupatana na hili, Yohana aripoti: “Na mimi nikasikia mvumo kutoka katika mbingu kama mvumo wa maji mengi na kama mvumo wa ngurumo yenye sauti kubwa; na mvumo ambao mimi nilisikia ulikuwa kama wa waimbaji ambao hujifuatisha wenyewe kwa kinubi wakipiga vinubi vyao. Na wao wanaimba kana kwamba ni wimbo mpya mbele ya kiti cha ufalme na mbele ya viumbe hai wanne na wazee; na hakuna yeyote aliyeweza kuwa bingwa wa wimbo huo ila wale mia na arobaini na nne elfu, ambao wamenunuliwa kutoka dunia.” (Ufunuo 14:2, 3, NW) Si ajabu kwamba Yohana, aliposikia sauti 144,000 zikiungana katika korasi moja ya kimelodia, anakumbushwa mngurumo wa poromoko la maji na makofi yenye mlio wa mngurumo. Ni wenye kupendeza kama nini mfuatisho huo kama wa kinubi! (Zaburi 81:2) Ni kwaya gani ya kidunia ambayo ingefikia utukufu mkuu wa korasi hiyo yenye uzuri mwingi mno?

7. (a) Wimbo mpya wa Ufunuo 14:3 ni nini? (b) Inakuwaje kwamba wimbo wa Zaburi 149:1 ni mpya kwa siku yetu?

⁷ Na huu “wimbo mpya” ni nini? Kama tulivyoona tulipozungumzia Ufunuo 5:9, 10, wimbo huo unahusiana na makusudi ya Ufalme wa Yehova na uandalizi mzuri ajabu wake kupitia Yesu Kristo, kwa ajili ya kufanya Israeli wa kiroho “ufalme na makuhani kwa Mungu wetu.” Ni wimbo wa sifa kwa Yehova wenye kutangaza vitu vipya anavyotimiza kupitia Israeli wa Mungu na kwa niaba yao. (Wagalatia 6:16) Washiriki wa Israeli wa kiroho wanaitikia mwaliko wa mtunga zaburi: “Sifuni Yah enyi watu! Imbieni Yehova wimbo mpya, sifa yake katika kundi la washikamanifu. Acheni Israeli ashangilie katika Mfanyi wake mtukufu, wana wa Sayuni—acheni wao wawe wenye shangwe katika Mfalme wao.” (Zaburi 149:1, 2, NW) Kweli, maneno hayo yaliandikwa karne nyingi zilizopita, lakini katika siku yetu, yameimbwa kwa uelewevu mpya. Katika 1914 Ufalme wa Kimesiya ulizaliwa. (Ufunuo 12:10) Katika 1919 watu wa Yehova duniani walianza kutangaza “neno la ufalme” wakiwa na bidii iliyofanywa upya. (Mathayo 13:19) Wakichochewa na andiko la mwaka kwa ajili ya 1919 (Isaya 54:17) na wakitiwa moyo na kurudishwa kwao kwenye paradiso ya kiroho, wao walianza katika mwaka huo ‘kuimbia Yehova kwa muziki katika mioyo yao.’—Waefeso 5:19, NW.

8. Ni kwa nini ni wale 144,000 tu wanaoweza kujifunza wimbo mpya wa Ufunuo 14:3?

⁸ Ingawa hivyo, ni kwa nini ni wale 144,000 tu wanaoweza kujifunza wimbo unaotajwa kwenye Ufunuo 14:3? Ni kwa sababu unahusiana na wanayoona wakiwa warithi wachaguliwa wa Ufalme wa Mungu. Wao pekee ndio wanaolelewa kuwa wana wa Mungu na kupakwa mafuta kwa roho takatifu. Wao pekee ndio walionunuliwa kutoka dunia na kuwa sehemu ya Ufalme huo wa kimbingu, na wao pekee ndio “watakuwa makuhani . . . na watatawala wakiwa wafalme” pamoja na Yesu Kristo kwa miaka elfu ili kuleta aina ya binadamu kwenye ukamilifu. Wao pekee ndio wanaoonwa “wanaimba kana kwamba ni wimbo mpya” katika kuwapo kwenyewe kwa Yehova.c Maono haya yasiyo na kifani na mataraja huwapa wao uthamini wa pekee wa Ufalme na kuwawezesha kuimba juu ya huo katika njia ambayo hakuna mwingine awezaye.—Ufunuo 20:6; Wakolosai 1:13; 1 Wathesalonike 2:11, 12, NW.

9. Umati mkubwa umeitikiaje wimbaji wa wapakwa-mafuta, na wao wametimiza hivyo waadhi gani?

⁹ Hata hivyo, wengine husikiliza na kuitikia wimbaji wao. Tangu 1935 umati mkubwa wenye kukua wa kondoo wengine umesikia wimbo wao wa ushindi wenye shangwe na wakasogezwa wajiunge nao katika kutangaza peupe Ufalme wa Mungu. (Yohana 10:16; Ufunuo 7:9) Kweli, waja-leo hawa hawawezi kujifunza kuimba sawasawa wimbo mpya ule ule ambao watawala wa wakati ujao wa Ufalme wa Mungu wanaimba. Lakini wao vilevile huvumisha korasi ya kimelodia ya sifa kwa Yehova ambayo ni wimbo unaohimidi Yehova kwa ajili ya vitu vipya ambavyo yeye anatimiza. Hivyo wao wanatimiza waadhi wa mtunga zaburi: “Imbieni Yehova wimbo mpya. Imbieni Yehova, nyinyi watu wote wa dunia. Imbieni Yehova, barikini jina lake. Kutoka siku hadi siku simulieni habari njema za wokovu kwa yeye. Julisheni wazi miongoni mwa mataifa utukufu wake, miongoni mwa vikundi vyote vya watu kazi zake za ajabu. Mpeni Yehova, O nyinyi jamaa za vikundi vya watu, mpeni Yehova utukufu na imara. Semeni miongoni mwa mataifa: ‘Yehova mwenyewe amekuwa mfalme.’”—Zaburi 96:1-3, 7, 10; 98:1-9, NW.

10. Inawezekanaje kwa 144,000 kuimba “mbele ya” wale wazee wa ufananisho 24?

¹⁰ Wale 144,000 wanawezaje kuimba “mbele ya” wazee, kwa kuwa wazee ndio hao 144,000 wakiwa katika vyeo vyao vya kimbingu vyenye utukufu? Mapema katika siku ya Bwana, wale “wafu katika muungano pamoja na Kristo” walifufuliwa wakiwa viumbe vya roho. Hivyo, Wakristo wapakwa-mafuta waaminifu ambao wameshinda sasa wako katika mbingu, wakitimiza kwa ufananisho kazi zao zinazolinganika na zile za migawanyo 24 ya wazee wa kikuhani. Wao wanatiwa ndani ya ile njozi ya tengenezo la Yehova la kimbingu. (1 Wathesalonike 4:15, 16; 1 Nyakati 24:1-18; Ufunuo 4:4; 6:11, NW) Kwa hiyo lile baki la 144,000 ambalo lingali duniani linaimba wimbo mpya mbele ya, au katika mwono wa, ndugu zao waliofufuliwa katika mbingu.

11. Ni kwa nini washindi wapakwa-mafuta wanarejezewa kuwa wazee 24 na pia 144,000?

¹¹ Kufikia hapa twaweza pia kuuliza: Ni kwa nini washindi hawa wapakwa-mafuta wanarejezewa kuwa wazee wa ufananisho 24 na pia 144,000? Ni kwa sababu Ufunuo hukiona kikundi hiki kutokana na vituo vya msimamo viwili tofauti. Sikuzote wazee 24 wanaonyeshwa wakiwa katika cheo chao cha mwisho kabisa kuzunguka kiti cha ufalme cha Yehova, wakiwa wamewekwa kuwa wafalme na makuhani katika mbingu. Wao hufananisha kikundi kizima cha 144,000 katika vyeo vyao vya kimbingu, ijapokuwa kwa wakati uliopo baki dogo la hawa lingali duniani. (Ufunuo 4:4, 10; 5:5-14; 7:11-13; 11:16-18) Hata hivyo, Ufunuo sura ya 7, huelekeza fikira juu ya 144,000 kama wakitolewa katika aina ya kibinadamu, na hukazia kusudi tukufu la Yehova la kutia muhuri hesabu kamili ya Waisraeli wa kiroho mmoja mmoja na kuupa wokovu umati mkubwa usiohesabika. Ufunuo sura ya 14 huandaa picha ikithibitisha kwamba jamii kamili ya Ufalme 144,000 washindi mmoja mmoja watakusanyishwa pamoja na Mwana-Kondoo juu ya Mlima Sayuni. Sifa za kutimizwa ili kuwa katika hesabu hiyo pamoja na 144,000 zinajulishwa pia, kama tutakavyoona sasa.d

Wafuasi wa Mwana-Kondoo

12. (a) Yohana anaendelezaje elezo lake la habari za 144,000? (b) Ni katika maana gani 144,000 hurejezewa kuwa mabikira?

¹² Akiendelea na elezo lake juu ya 144,000 ‘wanaonunuliwa kutoka dunia,’ Yohana anatuambia: “Hawa ndio ambao hawakujichafua wenyewe na wanawake; kwa kweli, wao ni mabikira. Hawa ndio ambao hufuliza kufuata Mwana-Kondoo si kitu aenda wapi. Hawa walinunuliwa kutoka miongoni mwa aina ya binadamu wakiwa matunda ya kwanza kwa Mungu na kwa Mwana-Kondoo, na hakuna ubandia ambao ulipatikana katika vinywa vyao; wao wako bila waa.” (Ufunuo 14:4, 5, NW) Uhakika wa kwamba 144,000 “ni mabikira” haumaanishi kwamba washiriki wa jamii hii kwa lazima ni wasiooa na wasioolewa katika mnofu. Mtume Paulo aliandikia Wakristo ambao walikuwa na mwito wa kimbingu kwamba, ingawa kuna faida katika useja wa Kikristo, ndoa ni afadhali katika hali fulani. (1 Wakorintho 7:1, 2, 36, 37) Kinachoainisha jamii hii ni ubikira wa kiroho. Wao wameepuka uzinzi wa kiroho pamoja na siasa za kilimwengu na pamoja na dini bandia. (Yakobo 4:4; Ufunuo 17:5) Wakiwa bibi-arusi aliyeposwa na Kristo, wao wamejiweka wenyewe safi, “wakiwa bila waa miongoni mwa kizazi kombo na chenye kupopotolewa.”—Wafilipi 2:15, NW.

13. Ni kwa nini 144,000 ni bibi-arusi anayefaa Yesu Kristo, na ni jinsi gani wao “hufuliza kufuata Mwana-Kondoo si kitu aenda wapi”?

¹³ Kuongezea, “hakuna ubandia ambao ulipatikana katika vinywa vyao.” Katika hili, wao wako kama Mfalme wao, Yesu Kristo. Akiwa binadamu mkamilifu, “yeye hakufanya dhambi, wala udanganyi haukupatikana katika kinywa chake.” (1 Petro 2:21, 22, NW) Wakiwa wakati ule ule bila waa na wakiwa wasema-kweli, 144,000 wametayarishwa wakiwa bibi-arusi safi kwa ajili ya Kuhani Mkuu mkubwa wa Yehova. Yesu alipokuwa duniani, yeye alikaribisha watu wenye mioyo inayofaa wamfuate. (Marko 8:34; 10:21; Yohana 1:43) Wale walioitikia waliiga njia yake ya maisha na wakatii mafundisho yake. Hivyo, katika pindi ya mwendo wao wa kidunia, wao “hufuliza kufuata Mwana-Kondoo si kitu aenda wapi” anapowaongoza kupitia ulimwengu wa Shetani.

14. (a) Ni jinsi gani 144,000 ni “matunda ya kwanza kwa Mungu na kwa Mwana-Kondoo”? (b) Ni katika maana gani umati mkubwa pia ni matunda ya kwanza?

¹⁴ Hao 144,000 ‘hununuliwa kutoka dunia,’ ‘hununuliwa kutoka miongoni mwa aina ya binadamu.’ Wao wanalelewa kuwa wana wa Mungu, na baada ya ufufuo wao, hawatakuwa tena binadamu tu wa mnofu na damu. Kama inavyotajwa katika mstari wa 4, wao wanakuwa “matunda ya kwanza kwa Mungu na kwa Mwana-Kondoo.” Kweli, huko nyuma katika karne ya kwanza, Yesu alikuwa “matunda ya kwanza kwa wale ambao wamelala usingizi katika kifo.” (1 Wakorintho 15:20, 23, NW) Lakini 144,000 ni “matunda ya kwanza fulani” ya aina ya binadamu wasiokamilika, walionunuliwa kwa dhabihu ya Yesu. (Yakobo 1:18, NW) Hata hivyo, kukusanywa kwa matunda kutoka aina ya binadamu hakumaliziki na wao. Kitabu cha Ufunuo kimekwisha kuelekeza kwenye kazi ya kuvunwa kwa umati mkubwa usio na hesabu ambao hulia kwa sauti kubwa: “Wokovu wetu ni kwa Mungu wetu, ambaye ameketi juu ya kiti cha ufalme, na kwa Mwana-Kondoo.” Huu umati mkubwa utaokoka dhiki kubwa, na waendeleapo kuburudishwa na “vibubujiko vya maji ya uhai,” wao watainuliwa wafikie ukamilifu wa kibinadamu duniani. Wakati fulani baada ya hiyo dhiki kubwa, Hadesi itafanywa kuwa tupu, na mamiloni yasiyohesabika ya binadamu wengine yatafufuliwa na kuwa na fursa ya kunywa kutokana na hayo maji ya uhai. Tukiwa na hilo akilini, ingekuwa sahihi kuuita umati mkubwa matunda ya kwanza ya kondoo wengine—wao ndio wa kwanza ‘kufua majoho yao na kuyafanya meupe katika damu ya Mwana-Kondoo’ wakiwa na tumaini la kuishi milele duniani.—Ufunuo 7:9, 10, 14, 17; 20:12, 13, NW.

15. Kuna milingano gani kati ya matunda ya kwanza matatu tofautitofauti na sikukuu zilizosherehekewa chini ya Sheria ya Musa?

¹⁵ Haya matunda ya kwanza (Yesu Kristo, 144,000, na umati mkubwa) yana milingano yenye kupendeza katika sikukuu zilizosherehekewa kulingana na Sheria ya Musa. Katika Nisani 16, wakati wa Sikukuu ya Keki Zisizochachushwa, mganda wa matunda ya kwanza ya vuno la shayiri ulitolewa kwa Yehova. (Walawi 23:6-14) Nisani 16 ndiyo siku ambayo Yesu alifufuliwa kutoka kwa wafu. Katika siku ya 50 kutoka Nisani 16, katika mwezi wa tatu, Waisraeli walisherehekea siku ya vuno la matunda mapevu ya kwanza ya vuno la ngano. (Kutoka 23:16; Walawi 23:15, 16) Sikukuu hii ikaja kuitwa Pentekoste (Kutokana na neno la Kigiriki linalomaanisha “-a hamsini”), na ilikuwa kwenye Pentekoste 33 W.K. kwamba washiriki wa kwanza wa 144,000 wakapakwa mafuta kwa roho takatifu. Mwishowe, katika mwezi wa saba wakati vuno lote lilikuwa limekusanywa ndani, kulikuwako Sikukuu ya Vibanda, wakati wa shangwe wa utoaji-shukrani Waisraeli walipokaa kwa juma moja katika vibanda vilivyofanywa kwa, miongoni mwa vitu vingine, matawi ya mitende. (Walawi 23:33-43) Kwa kulingana, umati mkubwa, ambao ni sehemu ya mkusanyo-ndani, hutoa shukrani mbele ya kiti cha ufalme wakiwa na “matawi ya mitende katika mikono yao.”—Ufunuo 7:9, NW.

Kujulisha Wazi Habari Njema za Milele

16, 17. (a) Yohana anaona malaika akiruka wapi, na huyo malaika anapiga mbiu gani? (b) Ni nani wanaohusika katika ile kazi ya kuhubiri Ufalme, na ni maono gani yanayoonyesha hili?

¹⁶ Halafu, Yohana huandika: “Na mimi nikaona malaika mwingine akiruka katika mbingu ya kati, na yeye alikuwa na habari njema za milele kujulisha wazi kuwa taarifa teremeshi kwa wale ambao hukaa juu ya dunia, na kwa kila taifa na kabila na ulimi na kikundi cha watu, akisema kwa sauti kubwa: ‘Hofuni Mungu na kumpa yeye utukufu, kwa sababu saa ya hukumu kwa yeye imewasili, na hivyo abuduni yule Mmoja ambaye alifanyiza mbingu na dunia na bahari na vibubujiko vya maji.’” (Ufunuo 14:6, 7, NW) Huyo malaika anaruka “katika mbingu ya kati,” wanamoruka ndege. (Linga Ufunuo 19:17.) Kwa sababu hiyo, sauti yake inaweza kusikika kuzunguka tufe lote. Mbiu ya ulimwenguni pote ya malaika huyu ni yenye mfiko mkubwa kama nini, kuliko mrusho wowote wa taarifa ya habari ya televisheni!

¹⁷ Kila mmoja anahimizwa ahofu, si yule hayawani-mwitu na mfano wake, bali Yehova, ambaye bila kulinganika ni mwenye nguvu zaidi ya hayawani yeyote wa ufananisho anayedhibitiwa na Shetani. Kwani, Yehova aliumba mbingu na dunia, na sasa wakati umekuja ahukumu dunia! (Linga Mwanzo 1:1; Ufunuo 11:18.) Alipokuwa duniani, Yesu alitoa unabii kuhusu siku yetu: “Na habari njema hizi za ufalme zitahubiriwa katika dunia yote inayokaliwa kwa ajili ya ushahidi kwa mataifa yote; na ndipo ule mwisho utakuja.” (Mathayo 24:14, NW) Kundi la Wakristo wapakwa-mafuta linatimiza utume huu. (1 Wakorintho 9:16; Waefeso 6:15) Ufunuo unafunua hapa kwamba malaika wasioonekana wanahusika pia katika hii kazi ya kuhubiri. Jinsi mwongozo wa kimalaika umekuwa wazi mara nyingi katika kuleta mmoja wa Mashahidi wa Yehova kwenye nyumba ambamo nafsi fulani yenye taabu ilikuwa ikitaka sana, hata ikisali, ipate msaada wa kiroho!

18. Kulingana na malaika anayeruka katika mbingu ya kati, ni saa ya nini ambayo imewasili, na ni nani watakuwa wakifanya matangazo zaidi?

¹⁸ Kama vile malaika anayeruka katika mbingu ya kati amejulisha wazi, saa ya hukumu imewasili. Sasa Mungu atatoa hukumu gani? Masikio yatawashwa na matangazo yanayopasa kufanywa sasa na malaika wa pili, wa tatu, wa nne, na wa tano.—Yeremia 19:3.

[Maelezo ya Chini]

[Picha katika ukurasa wa 202, 203]

144,000

Wazee 24

Warithi-washirika pamoja na Mwana-Kondoo, Kristo Yesu, wanapoonwa kutokana na vituo vya msimamo viwili tofauti