Sura ya Saba

Kwa Nini Mungu Ameruhusu Uovu?

1, 2. (a) Kama Yehova angaliwaangamiza wale waasi katika Edeni mara moja, hilo lingetuathirije? (b) Kwa upendo, Yehova amefanya mipango gani kwa ajili yetu?

“SIKU za miaka ya maisha yangu zimekuwa chache, tena za taabu,” akasema mzee wa ukoo Yakobo. (Mwanzo 47:9) Vivyo hivyo, Ayubu alisema hivi kumhusu mwanadamu: “Siku zake za kuishi si nyingi, naye hujaa taabu.” (Ayubu 14:1) Wengi wetu tumepata magumu, tumetendewa isivyo haki, na hata tumepata misiba kama watu hao. Hata hivyo, Mungu hakutenda isivyo haki kwa kuruhusu tuzaliwe. Ni kweli kwamba sisi si wakamilifu kiakili na kimwili kama Adamu na Hawa walivyokuwa hapo mwanzoni, wala hatuishi katika Paradiso kama wao. Lakini ingalikuwaje kama Yehova angaliwaangamiza mara tu walipoasi? Magonjwa, huzuni, na kifo havingelikuwapo, lakini wanadamu hawangelikuwapo pia. Hatungalizaliwa. Kwa rehema, Mungu aliwaruhusu Adamu na Hawa wazae watoto, ijapokuwa watoto hao walirithi hali ya kutokamilika. Na kupitia Kristo, Yehova alifanya mpango ili tuweze kupata kile ambacho Adamu alipoteza—uhai wa milele katika paradiso duniani.—Yohana 10:10; Waroma 5:12.

² Tunatiwa moyo sana na tumaini la kuishi milele katika ulimwengu mpya wenye mazingira ya Paradiso, bila magonjwa, huzuni, maumivu, kifo, na watu waovu. (Mithali 2:21, 22; Ufunuo 21:4, 5) Biblia inaonyesha kwamba ingawa wokovu wetu ni muhimu sana kwetu na kwa Yehova, kuna jambo jingine ambalo ni muhimu hata zaidi.

Kwa Ajili ya Jina Lake Kuu

 3. Ni nini kinachohusika katika utimizo wa kusudi la Yehova kwa dunia na wanadamu?

³ Jina la Mungu linahusika katika utimizo wa kusudi lake kwa dunia na wanadamu. Jina Yehova, linamaanisha “Yeye Husababisha Kuwa.” Kwa hiyo jina lake linaonyesha kwamba yeye ndiye Mwenye Enzi Kuu ya Ulimwengu, Mkusudiaji, na Mungu wa kweli. Kwa sababu Yehova ni mtawala mkuu wa ulimwengu wote, ni lazima jina lake na kile kinachowakilishwa na jina hilo kiheshimiwe, na wote wamtii ili kuwe na amani na hali nzuri ulimwenguni.

 4. Kusudi la Yehova kwa dunia lilihusisha nini?

⁴ Baada ya kuwaumba Adamu na Hawa, Yehova aliwapa kazi ya kufanya. Aliwaambia waziwazi kwamba alikusudia waitiishe dunia, na hivyo kuieneza Paradiso, ili wazao wao wakae kotekote humo. (Mwanzo 1:28) Je, kusudi hilo lingekosa kutimia kwa sababu ya dhambi yao? Jina la Yehova mwenyezi lingepata suto kubwa sana kama angeshindwa kutimiza kusudi lake kwa dunia na wanadamu.

 5. (a) Wanadamu wa kwanza wangekufa lini kama wangekula tunda la mti wa ujuzi wa mema na mabaya? (b) Yehova alitimizaje maneno yake yaliyo kwenye Mwanzo 2:17 bila kuvunja kusudi lake kwa dunia?

⁵ Yehova alikuwa amewaonya Adamu na Hawa kwamba kama wangemwasi na kula tunda la mti wa ujuzi wa mema na mabaya, wangekufa “siku” hiyohiyo. (Mwanzo 2:17, italiki ni zetu.) Ndivyo ilivyokuwa, Yehova aliwahukumia kifo siku ileile ambayo walifanya dhambi. Machoni pa Mungu, Adamu na Hawa walikufa siku hiyohiyo. Hata hivyo, Yehova aliwaruhusu wazae watoto kabla ya kufa kihalisi ili aweze kutimiza kusudi lake kwa dunia. Lakini, kwa sababu miaka 1,000 ni kama siku moja kwa Mungu, Adamu alipokufa akiwa na umri wa miaka 930, alikufa katika “siku” hiyo moja. (2 Petro 3:8; Mwanzo 5:3-5) Kwa hiyo Yehova alitimiza maneno yake kuhusu wakati wa kutekeleza adhabu, na kusudi lake kwa dunia halikuzuiwa walipokufa. Lakini watu wasiokamilika, kutia ndani watu waovu, wameruhusiwa kuishi kwa muda fulani.

6, 7. (a) Kulingana na Kutoka 9:15, 16, kwa nini Yehova anawaruhusu waovu waendelee kuwapo kwa muda? (b) Yehova alionyeshaje nguvu zake katika kisa cha Farao, na jina Lake lilitangazwaje? (c) Matokeo yatakuwa nini ulimwengu huu mwovu utakapoharibiwa?

⁶ Maneno ambayo Yehova alimwambia mtawala wa Misri katika siku za Musa yanaonyesha kwa nini Mungu amewaruhusu waovu waendelee kuwapo. Farao alipowakataza wana wa Israeli wasitoke Misri, Yehova hakumwangamiza papo hapo. Nchi hiyo ilipata mapigo kumi ambayo yalionyesha nguvu za Yehova kwa njia zenye kustaajabisha. Alipoonya kuhusu pigo la saba, Yehova alimwambia Farao kwamba Angeweza kumwangamiza yeye na watu wake wote wasiwepo tena nchini. “Lakini,” Yehova akasema, “nilikusimamisha wewe kwa sababu hii hii, ili nikuonyeshe uweza wangu, tena kwamba jina langu litangazwe katika dunia yote.”—Kutoka 9:15, 16.

⁷ Na kwa kweli, Yehova alipowakomboa Waisraeli, jina lake lilitangazwa kote. (Yoshua 2:1, 9-11) Tukio hilo lingali linakumbukwa leo, baada ya miaka 3,500 hivi kupita. Jina la Yehova na vilevile ukweli kumhusu ukatangazwa. Jambo hilo lilithibitisha kwamba Yehova ni Mungu anayetimiza ahadi zake na kwamba yeye huwatetea watumishi wake. (Yoshua 23:14) Tukio hilo lilithibitisha kwamba hakuna kitu kinachoweza kumzuia asitimize kusudi lake kwa sababu ana nguvu zisizo na mipaka. (Isaya 14:24, 27) Kwa hiyo tunaweza kuwa na hakika kwamba hivi karibuni atawaokoa watumishi wake waaminifu kwa kuuharibu ulimwengu wote mwovu wa Shetani. Tendo hilo litaletea jina la Yehova sifa na utukufu ambao hautasahauliwa kamwe. Kutakuwa na faida za milele.—Ezekieli 38:23; Ufunuo 19:1, 2.

‘Lo! Kina cha Hekima ya Mungu!’

 8. Paulo anatuhimiza tufikirie mambo yapi?

⁸ Katika barua yake kwa Waroma, mtume Paulo auliza swali hili: “Je, kwa Mungu kuna ukosefu wa haki?” Kisha anajibu hivi kwa mkazo: “Hilo lisipate kuwa hivyo kamwe!” Kisha anakazia rehema ya Mungu na kutaja tena sababu ya Yehova kumruhusu Farao aishi kwa muda. Paulo pia aonyesha kwamba sisi wanadamu ni kama udongo mikononi mwa mfinyanzi. Halafu anasema: “Basi, ikiwa Mungu, ingawa anayo nia ya kuonyesha hasira ya kisasi yake na kujulisha nguvu yake, alivumilia kwa ustahimilivu mwingi vyombo vya hasira ya kisasi vilivyofanywa kufaa kwa ajili ya uharibifu, ili apate kujulisha utajiri wa utukufu wake juu ya vyombo vya rehema, alivyotayarisha kimbele kwa ajili ya utukufu, yaani, sisi, alioita si kutoka miongoni mwa Wayahudi tu bali pia kutoka miongoni mwa mataifa, kuna ubaya gani?”—Waroma 9:14-24.

 9. (a) “Vyombo vya hasira ya kisasi vilivyofanywa kufaa kwa ajili ya uharibifu” ni nani? (b) Kwa nini Yehova ameonyesha ustahimilivu mwingi sana kwa wapinzani wake, na matokeo yatawafaidije wale wanaompenda?

⁹ Tangu uasi ulipotukia Edeni, watu wote ambao wamempinga Yehova na sheria zake wamekuwa “vyombo vya hasira ya kisasi vilivyofanywa kufaa kwa ajili ya uharibifu.” Tangu wakati huo, Yehova ameonyesha ustahimilivu mwingi. Watu waovu wamedhihaki njia zake, wamewatesa watumishi wake, na hata walimuua Mwanaye. Lakini Yehova amejizuia sana na kuruhusu muda wa kutosha ili viumbe wote waone matokeo mabaya ya kumwasi na vilevile ya utawala wa wanadamu. Wakati huohuo, kifo cha Yesu kilikuwa njia ya kuwakomboa wanadamu watiifu na ‘kuvunja-vunja kazi za Ibilisi.’—1 Yohana 3:8; Waebrania 2:14, 15.

10. Kwa nini Yehova amewastahimili waovu kwa miaka 1,900 iliyopita?

¹⁰ Tangu Yesu alipofufuliwa zaidi ya miaka 1,900 iliyopita, Yehova amekuwa akistahimili “vyombo vya hasira,” akiahirisha uharibifu wao. Kwa nini? Kwanza, ni kwa sababu amekuwa akiwatayarisha wale ambao watatawala pamoja na Yesu Kristo katika Ufalme wake wa mbinguni. Watu hao 144,000, ni “vyombo vya rehema” ambavyo vinatajwa na mtume Paulo. Wayahudi ndio walioalikwa kwanza wawe washiriki wa jamii hiyo ya kimbingu. Baadaye, Mungu aliwaalika watu wasio Wayahudi. Yehova hajamlazimisha yeyote kati yao amtumikie. Lakini aliwapa baadhi ya wale waliothamini mipango yake nafasi ya pekee ya kutawala pamoja na Mwanaye katika Ufalme wa mbinguni. Sasa matayarisho ya jamii hiyo ya kimbingu yanakaribia kumalizika.—Luka 22:29; Ufunuo 14:1-4.

11. (a) Ustahimilivu wa Yehova unafaidi kikundi gani sasa? (b) Wafu watafaidikaje?

¹¹ Lakini vipi kuhusu taraja la watu kuishi duniani? Kwa sababu ya ustahimilivu wa Yehova, “umati mkubwa” kutoka kwa mataifa yote umekusanywa. Hivi sasa umati huo una mamilioni ya watu. Yehova ameahidi kwamba watu hao watakaoishi duniani wataokoka mwisho wa mfumo huu na kuwa na tumaini la kuishi milele katika paradiso duniani. (Ufunuo 7:9, 10; Zaburi 37:29; Yohana 10:16) Wakati wa Mungu ufikapo, watu wengi waliokufa watafufuliwa na kupewa nafasi ya kuishi duniani wakiwa raia wa Ufalme huo wa mbinguni. Neno la Mungu linatabiri hivi kwenye Matendo 24:15: “Kutakuwa na ufufuo wa waadilifu na wasio waadilifu pia.”—Yohana 5:28, 29.

12. (a) Tunajifunza nini kumhusu Yehova kwa sababu amevumilia uovu? (b) Unahisije kuhusu jinsi Yehova alivyoshughulikia mambo hayo?

¹² Je, Mungu ametenda isivyo haki katika mambo hayo yote? La, kwa kuahirisha uharibifu wa watu waovu au vile “vyombo vya hasira,” Mungu anawaonyesha wengine huruma kupatana na kusudi lake. Jambo hilo linaonyesha kwamba yeye ni Mungu mwenye rehema na upendo. Isitoshe, tunajifunza mengi kumhusu Yehova tunapoona kusudi lake likitimia. Tunastaajabia sifa mbalimbali za utu wake kama vile; haki yake, rehema yake, ustahimilivu wake, na hekima yake isiyo na kifani. Jinsi Yehova anavyoshughulikia kwa hekima suala la enzi kuu ya ulimwengu, yaani, haki yake ya kutawala, itathibitisha kwa umilele wote kwamba utawala wake ndio bora kabisa. Twamuunga mkono mtume Paulo kwa kusema hivi: “Lo! kina cha utajiri wa Mungu na hekima na ujuzi! Jinsi hukumu zake zisivyotafutikana na njia zake zapita uwezo wa kufuatilia!”—Waroma 11:33.

Nafasi ya Kuonyesha Upendo Wetu

13. Tunapoteseka, tunapata nafasi ya kufanya nini, na nini kitakachotusaidia kutenda kwa hekima?

¹³ Watumishi wengi wa Mungu wanateseka sana. Wanaendelea kuteseka kwa sababu Mungu hajawaharibu waovu na kuwafanya wanadamu wawe wakamilifu. Je, hilo litutie uchungu? Au tunaziona hali hizo kuwa fursa za kuthibitisha kwamba Ibilisi ni mwongo? Tunaweza kutiwa moyo kufanya hivyo tukikumbuka ombi hili: “Mwanangu, uwe na hekima na kunifurahisha moyo wangu; ili nipate kumjibu anilaumuye.” (Mithali 27:11) Shetani, anayemlaumu Yehova, alidai kwamba watu wakipoteza vitu vya kimwili au wakiteseka, watamlaumu au hata kumlaani Mungu. (Ayubu 1:9-11; 2:4, 5) Tunaufurahisha moyo wa Yehova tunapopinga madai hayo kwa kuwa waaminifu kwake licha ya magumu tunayokabili.

14. Tukimtegemea Yehova wakati wa majaribu, tutaweza kupata faida gani?

¹⁴ Tukimtegemea Yehova wakati wa majaribu, tunaweza kukuza sifa nzuri sana. Kwa mfano, Yesu “alijifunza utii” kwa njia mpya kabisa kutokana na mateso yaliyompata. Majaribu yanaweza kutusaidia pia kukuza sifa kama vile ustahimilivu, uvumilivu, na yanatusaidia kuthamini zaidi njia za Yehova za uadilifu.—Waebrania 5:8, 9; 12:11; Yakobo 1:2-4.

15. Huenda wengine wakafaidikaje wanapoona tukivumilia mateso?

¹⁵ Wengine wataona kielelezo chetu. Huenda baadhi yao wakatambua kwamba sisi ndio Wakristo wa kweli wanapoona tukiteseka kwa sababu tunapenda uadilifu. Na wakijiunga nasi katika ibada, wanaweza kuwa na tumaini la kuishi milele. (Mathayo 25:34-36, 40, 46) Yehova na Mwanaye wanataka watu wawe na tumaini hilo.

16. Maoni yetu kuhusu mateso tunayopata yanachangiaje umoja?

¹⁶ Ni jambo zuri sana tunapoyaona mateso kuwa fursa ya kufanya mapenzi ya Yehova na kuonyesha kwamba tunampenda! Tukifanya hivyo tutathibitisha kwamba tunajitahidi kuwa na umoja na Mungu na Kristo. Yesu alisali hivi kwa Yehova kwa niaba ya Wakristo wote wa kweli: “Nafanya ombi, si kuhusu hawa tu [wanafunzi wake wa karibu], bali pia kuhusu wale wanaoweka imani katika mimi kupitia neno lao; ili wote wapate kuwa mmoja, kama vile wewe, Baba, umo katika muungano na mimi na mimi nimo katika muungano na wewe, ili wao pia wapate kuwa katika muungano na sisi.”—Yohana 17:20, 21.

17. Tunaweza kuwa na uhakika gani tukiwa waaminifu kwa Yehova?

¹⁷ Yehova atatuthawabisha sana tukiwa waaminifu kwake. Neno lake linasema hivi: “Iweni imara, wasioondoleka, sikuzote mkiwa na mengi ya kufanya katika kazi ya Bwana, mkijua kwamba kazi yenu ya jasho si bure kuhusiana na Bwana.” (1 Wakorintho 15:58) Neno lake lasema hivi pia: “Mungu si asiye mwadilifu ili asahau kazi yenu na upendo mlioonyesha kwa ajili ya jina lake.” (Waebrania 6:10) Andiko la Yakobo 5:11 lasema: “Tazameni! Twawatamka kuwa wenye furaha wale ambao wamevumilia. Nyinyi mmesikia juu ya uvumilivu wa Yobu na mmeona tokeo alilotoa Yehova, kwamba Yehova ni mwenye wororo sana katika shauku na mwenye rehema.” Ayubu alipata matokeo gani? “BWANA akaubarikia huo mwisho wa Ayubu zaidi ya mwanzo wake.” (Ayubu 42:10-16) Naam, Yehova ni “mthawabishaji wa wale wanaomtafuta kwa bidii.” (Waebrania 11:6) Na tuna tumaini zuri ajabu la kuishi milele katika paradiso duniani!

18. Hatimaye itakuwaje kwa kumbukumbu yoyote yenye kutia uchungu ambayo huenda tunayo?

¹⁸ Ufalme wa Mungu utaondoa madhara yote ambayo yamewapata wanadamu kwa miaka mingi. Shangwe tutakayopata wakati huo itazidi mateso tunayopata sasa. Hatutasumbuliwa na kumbukumbu mbaya ya mateso tuliyopata. Mawazo na shughuli zenye kujenga za kila siku katika ulimwengu mpya zitafanya kumbukumbu yenye kutia uchungu isahaulike hatua kwa hatua. Yehova atangaza hivi: “Mimi naumba mbingu mpya [serikali mpya ya kimbingu ya Ufalme itakayowatawala wanadamu] na nchi mpya [jamii ya wanadamu waadilifu], na mambo ya kwanza hayatakumbukwa, wala hayataingia moyoni. Lakini furahini, mkashangilie daima, kwa ajili ya hivi niviumbavyo.” Naam, katika ulimwengu mpya wa Yehova, watu waadilifu watasema: “Dunia yote inastarehe na kutulia; hata huanzilisha kuimba.”—Isaya 14:7; 65:17, 18.

Mazungumzo ya Kurudia

• Yehova ameliheshimuje jina lake huku akiruhusu uovu uwepo?

• Mungu ametuonyeshaje rehema kwa kustahimili “vyombo vya hasira”?

• Tunapaswa kuyaonaje mateso tunayopata?

[Picha katika ukurasa wa 67]

Yehova ‘aliubariki mwisho wa Ayubu zaidi ya mwanzo wake’