Je, Mungu Hufanya Mambo kwa Njia ‘Zilizopotoka’?

“DEUS ESCREVE CERTO POR LINHAS TORTAS” (“MUNGU HUANDIKA kwa usahihi akitumia mistari iliyopotoka”) ni usemi ambao hutumiwa Brazili. Wamaanisha kwamba sikuzote Mungu hufanya lililo sawa lakini nyakati nyingine kwa njia ionekanayo kwa mwanadamu kuwa imepotoka. Kwa mfano, mtu anapokufa katika kipindi bora zaidi maishani, wengi husema, ‘Mungu alimwita mbinguni.’ Ikiwa mtu anasumbuliwa na udhaifu wa kimwili au anakabili msiba, wengine husema, ‘Ni mapenzi ya Mungu.’ Kwa kuwa Mungu hulaumiwa kwa vifo, matatizo ya kimwili, na visababishi vingine vya huzuni, semi kama hizo humaanisha kwamba Mungu ‘huandika maandishi yaliyopotoka,’ kwamba yeye hufanya mambo kwa njia ambayo mwanadamu hawezi kuelewa.

Kwa nini watu wengi wa kidini huamini kwamba Mungu ndiye wa kulaumiwa kwa vifo na shida mbalimbali? Mara nyingi itikadi hizo hutegemea kuelewa vibaya maandiko fulani ya hapa na pale katika Biblia. Acheni tuangalie kwa ufupi machache kati ya hayo.

●“Ni nani afanyaye mtu kuwa bubu au kiziwi, au mwenye kuona, au kuwa kipofu? Si mimi BWANA?”—Kutoka 4:11.

Je, hilo lamaanisha kwamba Mungu ndiye wa kulaumiwa kuhusiana na wote wanaosumbuliwa na udhaifu wa namna mbalimbali? La. Hilo halingepatana na utu wa Mungu. Biblia hutuambia hivi: “Kila kiumbe cha Mungu ni bora.” (1 Timotheo 4:4) Yeye si wa kulaumiwa ikiwa mtu anazaliwa akiwa kipofu, bubu, au kiziwi. Yeye huutakia mema uumbaji wake, kwa kuwa yeye ndiye Chanzo cha “kila zawadi njema na kila upaji mkamilifu.”—Yakobo 1:17.

Ni wazazi wetu wa kwanza, Adamu na Hawa, walioamua wenyewe kuasi dhidi ya Mungu na kupoteza ukamilifu wao na hivyo uwezo wao wa kuzaa watoto wakamilifu. (Mwanzo 3:1-6, 16, 19; Ayubu 14:4) Wazao wao walipooana na kuzaa watoto, kutokamilika zaidi na zaidi, kutia ndani kasoro za kimwili, kukaanza kudhihirika miongoni mwa wanadamu. Ingawa Yehova Mungu hakusababisha jambo hilo, ameliruhusu litukie. Hivyo, yeye angeweza kusema juu yake mwenyewe kuwa ‘anafanya’ mtu kuwa bubu, kiziwi, au kipofu.

●“Yaliyopotoka hayawezi kunyoshwa.”—Mhubiri 1:15.

Je, Mungu ndiye aliyepotoa vitu? Kwa wazi la. Mhubiri 7:29 husema: “Mungu amemfanya mwanadamu mnyofu, lakini wamebuni mavumbuzi mengi.” Biblia ya Contemporary English Version inafafanua mstari huu hivi: “Tulikuwa bila hatia yoyote Mungu alipotuumba, lakini sasa tuna mawazo yaliyopotoka.” Badala ya kufuata viwango vya Mungu vya uadilifu, kwa ujumla wanaume kwa wanawake wamechagua kwa hiari kufuata mipango, taratibu, mbinu, au njia zao wenyewe—kwa hasara yao.—1 Timotheo 2:14.

Pia, kama mtume Paulo alivyosema, kwa sababu ya dhambi ya wanadamu, “viumbe vilitiishwa chini ya ubatili.” (Waroma 8:20) Na hali hiyo ‘haiwezi kunyoshwa’ kwa jitihada za binadamu. Upotovu na ubatili wote kuhusiana na mambo ya kidunia utaondolewa kupitia tu Mungu kuchukua hatua.

●“Tafakari vema kazi yake Mungu; kwa sababu ni nani awezaye kukinyosha kitu kile alichokipotosha yeye?”— Mhubiri 7:13.

Yaani, Mfalme Solomoni auliza hivi: ‘Ni nani kati ya wanadamu awezaye kunyosha kasoro na kutokamilika mbalimbali ambako Mungu huruhusu?’ Hakuna yeyote, kwa kuwa kuna sababu inayomfanya Yehova Mungu aruhusu mambo hayo yatukie.

Hivyo, Solomoni apendekeza hivi: “Katika siku za fanaka uwe na furaha; katika siku za maafa utafakari jambo hili: fanaka pia maafa, Mungu amefanya hiyo ya kwanza iambatane na ya pili ili binadamu asiweze kujua yatakayotukia baada yake.” (Mhubiri 7:14, BHN) Mtu apaswa kuithamini siku ya fanaka na kuonyesha uthamini wake kwa kufurahi. Anapaswa kuiona siku ya fanaka kuwa zawadi kutoka kwa Mungu. Lakini vipi siku ikiwa ya maafa? Ni vema mtu ‘kutafakari,’ yaani, kutambua kwamba Mungu ameruhusu maafa hayo yatukie. Kwa nini amefanya hivyo? Solomoni asema hivi: “Ili mwanadamu asiweze kujua yatakayotukia baada yake.” Hilo lamaanisha nini?

Uhakika wa kwamba Mungu huturuhusu tupate shangwe na taabu hutukumbusha kwamba hatuwezi kujua wakati ujao utakuwaje. Maafa yaweza kumpata mwadilifu na mwovu vilevile. Hakuna tofauti. Hilo lapaswa kutufanya tung’amue umuhimu wa kutojitegemea bali kumtegemea Mungu, tukikumbuka kwamba “Mungu ni upendo.” (1 Yohana 4:8) Ingawa huenda tusielewe mambo fulani sasa, tunaweza kuwa na hakika kwamba baada ya mambo yote kutimizwa kwa ukamili, yale ambayo Mungu ameruhusu yatukie yatakuwa yametimiza kusudi lenye manufaa kwa wote wenye kuhusika.

Lolote analoruhusu halitawadhuru milele watu wenye mioyo minyofu. Mtume Petro alidhihirisha jambo hilo alipoeleza juu ya kuteseka kulikowapata waamini wenzake wakati wake: “Mkiisha kuteseka muda kidogo, Mungu wa fadhili yote isiyostahiliwa, ambaye aliwaita nyinyi kwenye utukufu wake udumuo milele katika muungano na Kristo, yeye mwenyewe atamaliza mazoezi yenu, atawafanya imara, atawafanya kuwa wenye nguvu.”—1 Petro 5:10.

Wakati wa Kunyosha Mambo

Yehova hutupa nguvu za kuvumilia majaribu yetu ya wakati huu. Pia anaahidi kufanya “vitu vyote kuwa vipya.” (Ufunuo 21:5) Naam, ni kusudi lake kwamba karibuni Ufalme wake wa kimbingu utawarudishia afya bora wale wanaosumbuliwa na udhaifu mbalimbali na utasimamia ufufuo wa wafu. Ufalme huo utaondolea mbali mtu ambaye njia zake ni potovu kwelikweli—Shetani Ibilisi. (Yohana 5:28, 29; Waroma 16:20; 1 Wakorintho 15:26; 2 Petro 3:13) Itakuwa baraka iliyoje kwa watu wenye kumhofu Mungu kotekote duniani wakati wa Mungu wa kunyosha mambo ufikapo!

[Hisani ya Picha katika ukurasa wa 28]

Job Hearing of His Ruin/The Doré Bible Illustrations/Dover Publications