Hekima ya Kimungu^-Inaonyeshwaje?

“HEKIMA ya maskini hudharauliwa, wala maneno yake hayasikilizwi.” Akitumia maneno hayo Mfalme Solomoni mwenye hekima alimalizia hadithi ya mtu aliyekuwa maskini lakini mwenye hekima ambaye aliokoa mji mzima usiharibiwe. Lakini, kwa kusikitisha “hapakuwa na mtu ye yote aliyemkumbuka yule mtu maskini.”—Mhubiri 9:14-16.

Wanadamu kwa kawaida wana mwelekeo wa kudharau watu maskini hata ikiwa maskini hao wamefanya matendo yenye kustahiki. Jambo kama hilo lilimpata Yesu. Isaya alitabiri hivi kumhusu: “Alidharauliwa na kukataliwa na watu; mtu wa huzuni nyingi, ajuaye sikitiko.” (Isaya 53:3) Baadhi ya wengine walimdharau Yesu kwa sababu tu hakuwa na hadhi wala umashuhuri kama viongozi wa siku zake. Ingawa hivyo, alikuwa na hekima nyingi kuliko mwanadamu yeyote asiye mkamilifu. Watu wa mji alimoishi Yesu walikataa kukubali kwamba ‘mwana huyo wa seremala’ angelikuwa na hekima hiyo na uwezo wa kufanya kazi zenye nguvu. Hata hivyo, hilo lilikuwa kosa baya sana kwa maana simulizi hilo laendelea kusema kwamba Yesu “hakufanya kazi nyingi zenye nguvu huko kwa sababu ya ukosefu wao wa imani.” Ilikuwa hasara kama nini kwa watu hao!—Mathayo 13:54-58.

Tusije tukafanya kosa kama hilo. “Hekima huthibitishwa kuwa yenye uadilifu kwa kazi zayo,” Yesu akasema. Wale wanaofanya kazi ya Mungu na kuwapa wengine hekima itokayo mbinguni hutambuliwa, si kwa hadhi wala tabaka yao katika jamii, bali kwa “matunda bora” wanayoonyesha—matendo na imani yao inayotegemea Biblia.—Mathayo 7:18-20; 11:19.