Dumisha Uhakika Wako Ukiwa Imara Hadi Mwisho

WAZIA ndege ndogo inayoingia katika hali mbaya ya hewa. Rubani hawezi tena kutambua ishara za ardhi. Amefunikwa kwa mawingu mazito. Hawezi kuona mbali kupita kioo cha mbele, lakini ana hakika kwamba anaweza kukamilisha safari yake kwa usalama. Kwa nini yeye ana uhakika?

Yeye ana vyombo vilivyo sahihi vinavyomsaidia kuendesha ndege kupitia mawingu na kutua wakati wa giza. Njiani, hasa karibu na uwanja wa ndege, ishara za taa humwongoza kielektroni, naye anawasiliana pamoja na waongoza-ndege walio chini kupitia redio.

Kwa njia ya kulinganisha, twaweza kukabili wakati ujao kwa uhakika, hata ingawa hali za ulimwengu huzidi kuwa zenye giza siku baada ya siku. Safari yetu kupitia mfumo huu mwovu huenda inachukua muda mrefu kuliko wengine walivyotarajia, lakini twaweza kuwa na uhakika kwamba tuko katika njia ifaayo na pia kwa wakati. Kwa nini twaweza kuwa na hakika hivyo? Kwa sababu tuna mwongozo unaotuwezesha kuona kile ambacho macho ya kibinadamu hakiwezi kuona.

Neno la Mungu ni ‘mwanga wa njia yetu,’ nalo ni ‘amini, na humtia mjinga hekima.’ (Zaburi 19:7; 119:105) Kama ishara za taa zinazomwonyesha rubani njia ya kufuata, Biblia kwa usahihi hutaja matukio ya wakati ujao na kutupa maagizo yaliyo wazi ili kuhakikisha twafika salama tunakoenda. Hata hivyo, ili tunufaike na mwongozo wa kimungu, ni lazima tuutumaini.

Katika barua yake kwa Waebrania, Paulo aliwahimiza Wakristo Wayahudi ‘washikilie sana kwa imara hadi mwisho uhakika waliokuwa nao mwanzoni.’ (Waebrania 3:14, NW) Tumaini laweza kutikiswa ikiwa ‘hatulishikilii kwa imara.’ Basi swali lazuka, Twawezaje kudumisha uhakika wetu kwa Yehova ukiwa imara hadi mwisho?

Dhihirisha Imani Yako

Kabla ya rubani kuweza kuendesha ndege bila kuona aendako, akitegemea tu vyombo na waongoza-ndege walio chini, yeye huhitaji mazoezi ya kutosha na kutumia muda wa saa nyingi kuendesha ndege. Vivyo hivyo, Mkristo ahitaji kudhihirisha imani yake kwa kuendelea ili adumishe uhakika wake katika mwongozo wa Yehova, hasa hali zilizo ngumu zitokeapo. Mtume Paulo aliandika: “Kwa kuwa tuna roho ile ile ya imani; kama ilivyoandikwa, Naliamini [“Nilidhihirisha imani,” NW], na kwa sababu hiyo nalinena; sisi nasi twaamini [“hudhihirisha imani,” NW], na kwa sababu hiyo twanena.” (2 Wakorintho 4:13) Hivyo, tusemapo juu ya habari njema za Mungu, tunadhihirisha na kuimarisha imani yetu.

Magdalena, aliyekuwa katika kambi ya mateso kwa miaka minne wakati wa vita ya ulimwengu ya pili, aeleza thamani ya utendaji wa kuhubiri: “Mama yangu alinifundisha kwamba ili kudumisha imani yenye nguvu, ni muhimu kuhangaikia hali-njema ya kiroho ya wengine. Nakumbuka tukio moja lionyeshalo jinsi tulivyohisi. Baada ya kufunguliwa kwetu kutoka kambi ya mateso ya Ravensbrück, mama nami tulifika nyumbani Ijumaa. Siku mbili baadaye, Jumapili, tulijiunga na akina ndugu katika kuhubiri nyumba kwa nyumba. Naamini kabisa kwamba tukikazia fikira kusaidia wengine wazitumaini baraka za Mungu, baraka izo hizo zitakuwa halisi zaidi kwetu.”—Linganisha Matendo 5:42.

Kudumisha uhakika wetu ukiwa imara hadi mwisho kwahitaji utendaji wa kiroho katika nyanja nyinginezo. Funzo la kibinafsi ni zoea jingine bora lenye kuimarisha imani. Tukiiga Waberoya na kuchunguza kwa bidii Maandiko kila siku, kutatusaidia “kuwa na uhakikisho kamili wa tumaini mpaka mwisho.” (Waebrania 6:11, NW; Matendo 17:11) Ni kweli kwamba funzo la binafsi huhitaji wakati na azimio. Yawezekana hiyo ndiyo sababu Paulo aliwaonya Waebrania juu ya hatari ya kuwa “wavivu,” au wazembe katika mambo kama hayo.—Waebrania 6:12.

Mtazamo wa kizembe waweza kuwa na matokeo mabaya katika maeneo mbalimbali ya maisha. Sulemani alisema kwamba “kwa sababu ya uvivu paa hunepa.” (Mhubiri 10:18) Baada ya muda fulani mvua huanza kuvuja kupitia paa ambalo halikutunzwa. Tukiwa wavivu kiroho na kushindwa kudumisha imani yetu, shaka zaweza kuanza. Kwa upande mwingine, kutafakari na kujifunza Neno la Mungu kwa ukawaida kutatulisha na kulinda imani yetu.—Zaburi 1:2, 3.

Kujenga Tumaini Kupitia Mambo Uonayo

Bila shaka, rubani hujua kupitia mambo ayaonayo na vilevile kupitia kujifunza kwamba vyombo vyake ni vyenye kutumainika. Vivyo hivyo, uhakika wetu katika Yehova hukua tuonapo katika maisha zetu uthibitisho wa utunzi wake wenye upendo. Yoshua aliona hilo, naye aliwakumbusha Waisraeli wenzake hivi: “Mnajua mioyoni mwenu, na rohoni mwenu, ya kuwa halikuwapungukia ninyi hata neno moja katika mambo hayo mema yote aliyoyanena BWANA, Mungu wenu, katika habari zenu; yote yametimia kwenu.”—Yoshua 23:14.

Josefina, dada aliyeolewa kutoka Filipino, alijifunza somo lilo hilo. Yeye aeleza jinsi maisha yalivyokuwa kabla ya yeye kujifunza kweli: “Mume wangu alikuwa mnywaji sana, na alipolewa, alikuwa akikasirika na kunipiga. Ndoa yetu isiyo na furaha ilikuwa ikimwathiri mwana wetu vilevile. Mume wangu nami tulikuwa tunafanya kazi, tukichuma pesa nyingi, lakini tulichezea kamari sehemu kubwa ya mishahara yetu. Mume wangu alikuwa na marafiki wengi, lakini wengi wao walitafuta urafiki wake ili awalipie vinywaji, na wengine hata walijaribu kumfanya alewe ili tu wamcheke.

“Mambo yalibadilika tulipokuja kumjua Yehova na kutii shauri lake moyoni. Mume wangu hanywi tena, tumeacha kucheza kamari, nasi tuna marafiki wa kweli wanaotupenda na kutusaidia. Ndoa yetu ni yenye furaha, na mwana wetu anakua akiwa mwanamume kijana mzuri. Tunafanya kazi kwa muda wa saa chache, lakini tuna pesa nyingi zaidi. Mambo tuliyoona yametufundisha kwamba Yehova ni kama baba mwenye upendo, atuongozaye sikuzote kutembea katika njia ifaayo.”

Kwa sababu ya maagizo wanayopata kwa njia ya redio kutoka kwa waongoza-ndege au uchunguzi wa vyombo, marubani nyakati nyingine hutambua kwamba wanahitaji kubadili njia yao. Sisi vilevile huenda tukahitaji kubadili njia kulingana na agizo la Yehova. “Masikio yako yatasikia neno nyuma yako, likisema, Njia ni hii, ifuateni; mgeukapo kwenda mkono wa kulia, na mgeukapo kwenda mkono wa kushoto.” (Isaya 30:21) Kupitia neno lake na tengenezo lake, sisi hupokea mashauri yanayotutahadharisha juu ya hatari za kiroho. Mojawapo hatari hizo yahusu mashirika.

Mashirika Yaweza Kutupeperusha Mbali

Ndege ndogo yaweza kwa urahisi kupeperushwa mbali ikiwa marekebisho yanayohitajiwa hayafanywi. Leo vilevile, mavutano ya nje hukumba Wakristo daima. Twaishi katika ulimwengu wenye kufikiria mambo ya kimwili ambamo wengi hudharau maadili ya kiroho, wakiona pesa na raha kuwa muhimu zaidi. Paulo alimwonya Timotheo kwamba siku za mwisho zingekuwa “ngumu kushughulika nazo.” (2 Timotheo 3:1-5, NW) Matineja, wanaotamani kukubalika na kuwa mashuhuri, hasa wamo katika hatari ya mashirika mabaya.—2 Timotheo 2:22.

Amanda, mwenye umri wa miaka 17, aeleza: “Kwa muda fulani imani yangu ilikuwa imedhoofishwa kwa kiasi fulani na wanadarasa wenzangu. Wao walifuliza kusema kwamba dini yangu ilikuwa na vizuizi na haitumii akili, na hilo likaanza kunivunja moyo. Hata hivyo, wazazi wangu walinisaidia kuelewa miongozo ya Kikristo itumikayo kutulinda badala ya kutuwekea vizuizi. Sasa natambua kwamba kanuni hizi hunisaidia kuwa na maisha yenye kuridhisha zaidi kuliko yale ya waandamani wangu wa zamani wa shule. Nimejifunza kutumaini wale ambao hunijali kikweli—wazazi wangu na Yehova—nami nafurahia utumishi wa upainia.”

Hata tuwe wa rika gani, tutakutana na watu wasemao maneno ya kudharau itikadi zetu. Huenda wao wakaonekana kuwa wenye hekima, lakini kwa Mungu, wao ni watu wa kimwili, wasio wa kiroho. (1 Wakorintho 2:14) Kikundi kimoja chenye uvutano katika Korintho la siku ya Paulo kilikuwa cha Watilia-shaka wenye hekima ya kilimwengu. Mafundisho ya wanafalsafa hao yaelekea yalifanya Wakristo fulani wa Korintho kupoteza imani yao katika tumaini la ufufuo. (1 Wakorintho 15:12) “Msidanganyike,” akaonya mtume Paulo. “Mazungumzo [“Mashirika,” NW] mabaya huharibu tabia njema.”—1 Wakorintho 15:33.

Kwa upande mwingine, mashirika mazuri hutuimarisha kiroho. Katika kutaniko la Kikristo, tuna fursa ya kuchangamana na watu waishio maisha ya imani. Norman, ndugu aliyejifunza kweli katika 1939, angali chanzo cha kitia-moyo kikuu kwa wote. Ni nini ambacho kimedumisha mwono wake wa kiroho ukiwa makini? “Mikutano na urafiki wa karibu pamoja na ndugu waaminifu ni muhimu,” yeye ajibu. “Ushirika wa aina hii umenisaidia kuona wazi tofauti kati ya tengenezo la Mungu na la Shetani.”

Uwezo Wenye Kudanganya wa Mali

Brian, rubani mwenye uzoefu, aeleza kwamba “nyakati nyingine rubani aweza kupata ugumu wa kuamini vyombo anavyotumia—kwa sababu tu silika yake yakataa. Marubani wa ndege za kijeshi wenye uzoefu wamejulikana kuendesha ndege zikiwa zimejipindua kwa sababu taa za ardhini zafanana kabisa na nyota—hata ingawa vyombo vyao viliwaonyesha vingine.”

Vivyo hivyo, silika zetu zenye ubinafsi zaweza kutudanganya kiroho. Yesu alisema kwamba mali ina “udanganyifu,” naye Paulo alionya kwamba ‘kupenda fedha kumefanya wengi wafarakane na imani.’—Marko 4:19; 1 Timotheo 6:10.

Kama taa zenye kudanganya zinazometa-meta, miradi ya kimwili yenye kumeta-meta yaweza kutuelekeza kwenye njia isiyofaa. Badala ya kushangilia katika “mambo yatarajiwayo,” twaweza kukengeushwa na wonyesho wa majivuno wa ulimwengu unaopitilia mbali. (Waebrania 11:1; 1 Yohana 2:16, 17) Ikiwa ‘tumeazimia’ kuwa na mtindo wa maisha wa hali ya juu, yaelekea tutakuwa na wakati mchache wa kufanya maendeleo ya kiroho.—1 Timotheo 6:9, NW; Mathayo 6:24; Waebrania 13:5.

Mwanamume mmoja mchanga aliyefunga ndoa aitwaye Patrick alikiri kwamba yeye na mkeye walidhabihu miradi ya kiroho ili waishi maisha ya hali ya juu. Yeye aeleza: “Tulivutiwa na wale waliokuwa na magari yenye bei na nyumba za starehe kutanikoni. Ingawa hatukupoteza tumaini la Ufalme, tulihisi kwamba hata sisi tuishi kwa ustarehe. Hata hivyo, baada ya muda, tulitambua kwamba furaha ya kweli huja kupitia kumtumikia Yehova na kufanya maendeleo kiroho. Sasa kwa mara nyingine tena maisha zetu ni sahili. Tumepunguza muda wa kufanya kazi, nasi tumekuwa mapainia wa kawaida.”

Imani Hutegemea Moyo Mpokezi

Moyo mpokezi pia hutimiza fungu muhimu katika kujenga uhakika katika Yehova. Kweli, “imani ni kuwa na hakika ya mambo yatarajiwayo, ni bayana [au, “uthibitisho wenye kusadikisha,” kielezi-chini cha New World Translation of the Holy Scriptures—With References] ya mambo yasiyoonekana.” (Waebrania 11:1) Lakini tusipokuwa na moyo mpokezi, haielekei kwamba tutasadikishwa. (Mithali 18:15; Mathayo 5:6) Kwa sababu hii mtume Paulo alisema kwamba “si wote walio na imani.”—2 Wathesalonike 3:2.

Basi, tunawezaje kudumisha mioyo yetu ikiwa yenye upokezi kwa uthibitisho wote wenye kusadikisha unaobaki? Kwa kusitawisha sifa za kimungu, sifa ziimarishazo na kuchochea imani. Petro atuhimiza ‘tutie katika imani yetu wema, maarifa, kiasi, saburi, utauwa, upendano wa ndugu, na upendo.’ (2 Petro 1:5-7; Wagalatia 5:22, 23) Kwa upande mwingine, tukiishi maisha yenye ubinafsi au kumtolea Yehova utumishi kidogo tu, kwa kufaa hatuwezi kutazamia imani yetu ikue.

Ezra ‘aliuelekeza moyo wake’ kusoma Neno la Yehova na kulitumia. (Ezra 7:10) Mika vilevile alikuwa na moyo mpokezi. “Lakini mimi, nitamtazamia BWANA; nitamngojea Mungu wa wokovu wangu; Mungu wangu atanisikia.”—Mika 7:7.

Magdalena, aliyenukuliwa mapema, pia humngoja Yehova kwa saburi. (Habakuki 2:3) Yeye asema: “Tayari tuna paradiso ya kiroho. Hatua ifuatayo, Paradiso halisi, itakuja upesi vya kutosha. Kwa wakati huu mamia ya maelfu yanajiunga na umati mkubwa. Mimi husisimuka kuona wengi sana wakimiminikia tengenezo la Mungu.”

Kutazamia Mungu wa Wokovu Wetu

Kudumisha uhakika wetu ukiwa imara hadi mwisho kwahitaji kudhihirisha imani yetu na kusikiliza kwa uangalifu mwongozo tupokeao kutoka kwa Yehova na tengenezo lake. Hakika kwastahili jitihada tufanyayo. Rubani huhisi uradhi mkubwa sana baada ya safari ndefu iliyo ngumu, anaposhuka na kutoka kwenye mawingu mazito. Hapo mbele yake ardhi imejitandaza—ikiwa na rangi ya kijani-kibichi na yenye kukaribisha. Uwanja wa ndege upo hapo chini ukingoja kumpokea.

Mambo yenye kusisimua yatungoja pia. Ulimwengu huu mwovu wenye giza utaondolewa na dunia mpya yenye uadilifu itakuja. Ukaribishaji wa kimungu watungoja. Twaweza kufika huko tukitii maneno ya mtunga-zaburi: “Ndiwe taraja langu, Ee Bwana MUNGU, tumaini langu tokea ujana wangu. . . . Ninakusifu Wewe daima.”—Zaburi 71:5, 6.