Ni Nani Atakayekomesha Jeuri?

MNAMO Septemba 1999, Katibu Mkuu wa Umoja wa Mataifa Kofi Annan aliwakaribisha wajumbe kwenye mkutano wa 54 wa kila mwaka wa Baraza Kuu la Umoja wa Mataifa. Kulingana na taarifa katika gazeti la The Toronto Star, aliwatolea viongozi wa ulimwengu mwito wa ushindani, akisema hivi: “Kuna watu wengi ambao hawahitaji kuhurumiwa tu na mataifa. Wanahitaji kuhakikishiwa kwamba watasaidiwa kukomesha jeuri inayowapata na kuanza kuishi maisha yatakayowaletea ufanisi.”

Je, Umoja wa Mataifa na mataifa mashirika yake zaweza ‘kuhakikisha’ kwamba jeuri itakoma? Rais Bill Clinton wa Marekani aliyenukuliwa katika taarifa ileile ya gazeti Star alisema hivi: “Kwa sababu ya umwagikaji mwingi wa damu katika karne hii, tunajua ni rahisi kusema ‘haitatukia tena kamwe,’ lakini ni vigumu zaidi sana kuzuia isitukie.” Kisha akasema: “Kuahidi mengi mno kwaweza kuwa ukatili kama vile tu kutojali.”

Zaidi ya miaka 2,500 iliyopita nabii Yeremia alisema hivi kuhusu jitihada za wanadamu: “Ee BWANA, najua ya kuwa njia ya mwanadamu haimo katika nafsi yake; kuelekeza hatua zake si katika uwezo wa mwanadamu.” (Yeremia 10:23) Basi, kuna tumaini gani la kuona mwisho wa jeuri?

Mungu ametoa uhakikisho kama tunavyosoma katika Isaya 60:18: “Jeuri haitasikiwa tena katika nchi yako, ukiwa na uharibifu hazitakuwa mipakani mwako.” Unabii huo ulitimizwa mara ya kwanza Mungu alipowarudisha watu wake, waliokuwa uhamishoni, kwenye nchi yao ya asili. Pia, unabii huo una utimizo mkubwa zaidi ambao sisi tutaweza kufurahia. Yehova Mungu ‘haahidi mengi mno.’ Kwa sababu yeye ndiye Muumba wa wanadamu naye ndiye Aliye Juu Zaidi, ana uwezo kupita wote wa “kukomesha jeuri.” Chini ya Ufalme wa Mungu amani itadumu. Jeuri itakuwa imekwisha milele!—Danieli 2:44.