Sura Ya Ishirini Na Sita

‘Mkashangilie Daima kwa Ajili ya Hivi Niviumbavyo’

Isaya 65:1-25

 1. Ni maneno gani yenye kufariji yaliyoandikwa na mtume Petro, na ni swali gani linalotokea?

JE, KUNA wakati ambapo dhuluma na mateso zitakwisha? Zaidi ya miaka 1,900 iliyopita, mtume Petro aliandika maneno haya yenye kufariji: “Ziko mbingu mpya na dunia mpya ambazo tunangojea kulingana na ahadi yake [Mungu], na katika hizo uadilifu utakaa.” (2 Petro 3:13) Petro, pamoja na watumishi wengine wengi wa Mungu wa karne zote zilizopita, waliitazamia siku kuu ambapo uasi-sheria, ukandamizaji, na jeuri zingekoma kisha uadilifu uenee kila mahali. Je, tunaweza kuwa na hakika kwamba ahadi hiyo itatimizwa?

 2. Ni nabii yupi aliyekuwa ameongea juu ya “mbingu mpya na dunia mpya,” na unabii huo wa kale unatimizwa kwa njia zipi?

² Ndiyo, tunaweza! Petro alipoongea juu ya “mbingu mpya na dunia mpya,” hakuwa akianzisha wazo jipya. Karibu miaka 800 mapema, Yehova alimtumia nabii Isaya kutamka maneno kama hayo. Ahadi hiyo ya mapema ilitimizwa kwa njia ndogo mwaka wa 537 K.W.K. wakati Wayahudi walipofunguliwa kutoka utekwani Babiloni, na hivyo wakaweza kuirudia nchi yao. Lakini unabii wa Isaya unatimizwa kwa njia kubwa leo, na tunatazamia utimizo wa kusisimua hata zaidi katika ulimwengu mpya wa Mungu unaokuja. Kwa kweli, unabii wa kuchangamsha moyo uliotolewa kupitia Isaya ni kionjo tu cha baraka ambazo Mungu amewawekea wale wanaompenda.

Yehova Anajitahidi Kuwavutia ‘Watu Wenye Vichwa Vigumu’

 3. Tunapewa jibu la swali gani katika Isaya sura ya 65?

³ Kumbuka kwamba andiko la Isaya 63:15–64:12 lina sala ya Isaya ya kiunabii iliyotolewa kwa ajili ya wahamishwa Wayahudi walioko Babiloni. Kama vile maneno ya Isaya yanavyoonyesha wazi, Wayahudi wengi hawamwabudu Yehova kwa nafsi yote, lakini wengine wao wametubu na kumgeukia. Je, sasa Yehova atalirudishia taifa hali yake ya kwanza kwa ajili ya mabaki hao wenye majuto? Tunapata jibu la Yehova katika Isaya sura ya 65. Lakini kabla ya kutamka ahadi ya ukombozi kwa ajili ya waaminifu hao wachache, Yehova anaeleza hukumu inayowangoja wengi wasio na imani.

 4. (a) Kwa kutofautiana na watu wake waasi, ni nani atakayemtafuta Yehova? (b) Mtume Paulo aliyatumiaje maneno ya Isaya 65:1, 2?

⁴ Yehova ameuvumilia uasi ambao watu wake wamezidi kuonyesha. Hata hivyo, wakati utafika awaachilie mikononi mwa adui zao, kisha awapokee wengine kwa fadhili na kuwaonyesha ukubali wake. Yehova anasema hivi kupitia Isaya: “Watu wasionitaka wanauliza habari zangu; nimeonekana na hao wasionitafuta; naliliambia taifa lisiloitwa kwa jina langu, Nitazameni, nitazameni.” (Isaya 65:1, 2a) Inasikitisha sana kwamba watu wa mataifa watamjia Yehova, lakini taifa la Yuda lenye kichwa kigumu litakataa kwa ujumla kufanya hivyo. Si nabii Isaya peke yake aliyetabiri kwamba hatimaye Mungu atachagua jamii ya watu wasiowahi kutambulikana hapo kwanza. (Hosea 1:10; 2:23) Mtume Paulo alinukuu Isaya 65:1, 2 kutoka kwenye Septuagint ili kuthibitisha kwamba watu wa mataifa wangepata “uadilifu utokanao na imani,” hata ingawa Wayahudi wa asili waliukataa.—Waroma 9:30; 10:20, 21.

5, 6. (a) Yehova ameonyesha kwamba anatamani nini sana, lakini watu wake wameitikiaje? (b) Tunaweza kujifunza nini kutokana na njia za Yehova za kushughulika na Yuda?

⁵ Yehova anaeleza ni kwa nini ataruhusu watu wake mwenyewe wapatwe na mabaya: “Mchana kutwa nimewanyoshea mikono yangu watu walioasi [“wenye vichwa vigumu,” “NW”], watu waendao katika njia isiyo njema, wakifuata mawazo yao wenyewe.” (Isaya 65:2b) Kunyoosha mikono kunamaanisha kualika watu au kuwasihi. Yehova amenyoosha mikono yake, si kwa muda mfupi tu, bali mchana kutwa. Moyo wake unatamani kwamba Yuda wamrudie. Lakini watu hawa wenye vichwa vigumu wamekataa kuitikia.

⁶ Lo, maneno ya Yehova yanatufunza somo la kuchangamsha kama nini! Anataka tumkaribie kwa sababu yeye ni Mungu anayeweza kufikiwa. (Yakobo 4:8) Vilevile maneno hayo yanatuonyesha kwamba Yehova ni mnyenyekevu. (Zaburi 113:5, 6) Ingawaje, yeye huendelea kunyoosha mikono yake kwa njia ya mfano, akiwasihi sana watu wake warudi ijapokuwa vichwa vyao vigumu vimefanya ‘ahuzunike.’ (Zaburi 78:40, 41) Hatimaye anawaachilia mikononi mwa adui zao, baada tu ya kuwasihi kwa upole muda wa karne nyingi. Na bado hawafungii mlango watu mmoja-mmoja walio wanyenyekevu wanaotaka kurudi.

7, 8. Watu wa Yehova walio na vichwa vigumu wamechocheaje hasira yake?

⁷ Wayahudi wenye vichwa vigumu wamechochea hasira ya Yehova mara nyingi kwa mwenendo wao wa aibu. Yehova anaeleza hivi kuhusu matendo yao yenye kuudhi: “Watu wanikasirishao mbele za uso wangu daima, wakitoa dhabihu katika bustani zao, na kufukiza uvumba juu ya matofali; waketio kati ya makaburi, na kulala katika mahali pao pa siri; walao nyama ya nguruwe, na mchuzi wa vitu vinichukizavyo u katika vyombo vyao; watu wasemao, Simama peke yako, usinikaribie mimi, kwa maana mimi ni mtakatifu kuliko wewe; watu hao ni moshi puani mwangu, moto uwakao mchana kutwa.” (Isaya 65:3-5) Watu hawa ambao wanaonekana kama wenye kicho wanamwudhi Yehova ‘mbele za uso wake’—usemi unaoweza kumaanisha ujeuri na madharau. Hawajitahidi hata kidogo kuyaficha machukizo yao. Je, si kweli kwamba hatia ya dhambi zao inazidi kuwa kubwa kwa sababu wanazitenda pale pale mbele za Yule wanayepaswa kumheshimu na kumtii?

⁸ Kwa kweli, watenda-dhambi hao wanaojiona kuwa waadilifu ni kama wanawaambia hivi Wayahudi wenzao: ‘Kaa mbali nami, kwa sababu mimi ni mtakatifu kukushinda.’ Unafiki gani huo! Watu hao wanaodai eti ni “wenye kicho” wanatoa dhabihu na kuiwashia uvumba miungu ya uwongo, jambo linalokatazwa na Sheria ya Mungu. (Kutoka 20:2-6) Wameketi kati ya makaburi,hiyo ikiwafanya wawe wachafu kulingana na Sheria.(Hesabu 19:14-16)Wanakula nyama ya nguruwe, chakula kichafu.a (Mambo ya Walawi 11:7) Hata hivyo, utendaji wao wa kidini unawafanya wajione kuwa watakatifu kuliko Wayahudi wengine, na wanataka wengine wakae mbali nao, eti watu hao wasitakasike au kuwa safi kwa sababu ya kushirikiana nao. Hata hivyo, jambo hilo halipatani hata kidogo na maoni ya yule Mungu ambaye hutaka apewe “ujitoaji wa pekee”!—Kumbukumbu la Torati 4:24, NW.

 9. Yehova anawaonaje watenda-dhambi hao wanaojiona kuwa waadilifu?

⁹ Badala ya kuwaona kuwa watakatifu watu hawa wanaojiona kuwa waadilifu, Yehova anasema hivi: “Watu hao ni moshi puani mwangu.” Neno la Kiebrania la kutaja ‘pua’ au ‘tundu la pua’ hutumiwa mara nyingi kwa njia ya mfano kumaanisha hasira. Vilevile, moshi hushirikishwa na hasira ya Yehova inayowaka. (Kumbukumbu la Torati 29:20) Ibada ya sanamu yenye kuchukiza ambamo watu wake wametumbukia imechochea hasira kali ya Yehova.

10. Yehova atawalipaje wale walio katika Yuda kwa sababu ya dhambi zao?

¹⁰ Kwa kufuata haki yake, Yehova hawezi kuwaachilia watenda-dhambi hao wa kukusudia bila kuwapa adhabu. Isaya anaandika hivi: “Tazama, neno hili limeandikwa mbele zangu. Sitanyamaza, lakini nitalipa, naam, mimi nitawalipa ujira wao vifuani mwao; maovu yenu na maovu ya baba zenu pamoja, asema BWANA, ninyi mliofukiza uvumba juu ya milima, na kunitukana juu ya vilima; basi, kwa ajili ya hayo nitawapimia kwanza kazi yao vifuani mwao.” (Isaya 65:6, 7) Kwa kujihusisha katika ibada ya uwongo, Wayahudi hawa wamemletea Yehova aibu. Wameifanya ibada ya Mungu wa kweli ionekane kuwa sawa tu na ibada ya mataifa yanayowazunguka. Yehova atawalipa “vifuani mwao” kwa ajili ya ‘maovu yao,’ ambayo ni kutia na ibada ya sanamu na uwasiliani-roho. Inaonekana kwamba usemi ‘kifua’ unamaanisha mkunjo uliotokea katika sehemu ya juu ya vazi, ukawa kama mfuko mdogo ambamo wauzaji wa bidhaa wangeweza kumwagilia mazao ya kipimo fulani. (Luka 6:38) Kinachomaanishwa kuhusu Wayahudi waasi-imani ni wazi—Yehova atawapimia “ujira” au adhabu yao. Mungu wa haki atadai malipo. (Zaburi 79:12; Yeremia 32:18) Vivyo hivyo, tunaweza kuwa na hakika kwamba, kwa kuwa Yehova si kigeugeu, yeye ataupimia mfumo huu mwovu wa mambo kipimo cha adhabu katika wakati wake mwenyewe.—Malaki 3:6.

“Kwa Ajili ya Watumishi Wangu”

11. Yehova anaonyeshaje kwamba ataokoa mabaki waaminifu?

¹¹ Je, Yehova atawaonyesha rehema waaminifu walio miongoni mwa watu wake? Isaya anaeleza hivi: “BWANA asema hivi, Kama vile divai mpya ipatikanavyo katika kichala, na mtu mmoja husema, Usikiharibu kwa maana mna baraka ndani yake; ndivyo nitakavyotenda kwa ajili ya watumishi wangu, ili nisiwaharibu wote. Nami nitaleta uzao toka Yakobo, na mrithi wa milima yangu toka Yuda, na mteule wangu atairithi, na watumishi wangu watakaa huko.” (Isaya 65:8, 9) Akiwalinganisha watu wake na kichala cha zabibu, Yehova anatumia mfano wanaoweza kuuelewa kwa urahisi. Zabibu ni tele nchini, na divai inayotayarishwa kutokana na zabibu ni baraka kwa wanadamu. (Zaburi 104:15) Huenda ikawa kwamba wazo linalotolewa hapa ni lile la kichala ambacho kina zabibu kadhaa nzuri, na nyingine zisizo nzuri. Au huenda ikawa kwamba kichala kimoja ndicho kizuri, lakini vichala vile vingine havijaiva au vimeoza. Vyovyote vile, mtunza-mizabibu hataharibu zabibu nzuri. Hivyo Yehova anawahakikishia watu wake kwamba hataliharibu taifa hilo kabisa bali ataachilia mabaki waaminifu. Anasema kwamba mabaki hao wenye hali ya kukubaliwa watarithi “milima” yake, yaani Yerusalemu na nchi ya Yuda, nchi ya vilima-vilima ambayo Yehova aliitwaa iwe mali yake mwenyewe.

12. Ni baraka zipi zinazowangoja mabaki waaminifu?

¹² Ni baraka zipi zinazowangoja mabaki hawa waaminifu? Yehova anaeleza hivi: “Sharoni itakuwa zizi la makundi ya kondoo, na bonde la Akori mahali pa kulala makundi ya ng’ombe, kwa ajili ya watu wangu walionitafuta.” (Isaya 65:10) Makundi ya kondoo ni sehemu muhimu ya maisha ya Wayahudi wengi, na nchi kubwa ya malisho inasaidia kuleta ufanisi nyakati za amani. Yehova anataja maeneo mawili yaliyo kwenye miisho ya nchi ili kuonyesha hali ya amani na ufanisi. Upande wa magharibi kuna Uwanda wa Sharoni, unaojulikana sana kwa uzuri na rutuba yake, nao unaambaa na Pwani ya Mediterania kwa mwendo mrefu. Bonde la Akori ni sehemu ya mpaka wa nchi ulioko kaskazini-mashariki. (Yoshua 15:7) Maeneo haya, kutia na sehemu ile nyingine yote ya nchi, yatakaa hali ya ukiwa wakati wa uhamisho unaokuja. Hata hivyo, Yehova anaahidi kwamba baada ya uhamisho maeneo hayo yatakuwa malisho mazuri, yatumiwe na mabaki watakaorudi.—Isaya 35:2; Hosea 2:15.

Kumtumaini “Mungu wa Bahati Nzuri”

13, 14. Ni mazoea gani yanayoonyesha kwamba watu wa Mungu wamemwacha, nao watapatwa na jambo gani?

¹³ Sasa unabii wa Isaya unaelekezwa tena kwa wale ambao wamemwacha Yehova na kudumu katika ibada ya sanamu. Unasema hivi: “Ninyi mmwachao BWANA, na kuusahau mlima wangu mtakatifu, na kuandika meza kwa ajili ya Bahati [“mungu wa Bahati Nzuri,” “NW”], na kuijazia Ajali [“mungu wa Ajali,” “NW”] vyombo vya divai iliyochanganyika.” (Isaya 65:11) Kwa kutandika meza ya chakula na kinywaji mbele ya “mungu wa Bahati Nzuri” na “mungu wa Ajali,” Wayahudi hawa wenye kurudi nyuma wametumbukia katika mazoea ya ibada ya sanamu ya mataifa ya kipagani.b Itakuwaje kwa wowote wanaoitumaini miungu hiyo kwa ujinga-ujinga?

¹⁴ Yehova anawaonya wazi hivi: “Mimi nitawaandikia [“nitawajalia,” “NW”] kuuawa kwa upanga, na ninyi nyote mtainama ili kuchinjwa; kwa sababu nilipoita hamkuitika; niliponena, hamkusikia; bali mlitenda yaliyo mabaya machoni pangu, mlichagua mambo nisiyoyafurahia.” (Isaya 65:12) Kwa kutumia Kiebrania cha awali, Yehova anagonganisha maneno ‘jalia’ na “ajali” kusema kwamba wale wanaomwabudu mungu huyo wa uwongo ‘watajaliwa kuuawa kwa upanga,’ maana yake kupatwa na uharibifu. Mara nyingi Yehova amewatumia manabii wake kuwahimiza watu hao watubu, lakini wamempuuza wakaamua kwa vichwa vigumu kufanya yale wanayojua ni mabaya machoni pake. Lo, wanamwonyesha Mungu madharau yaliyoje! Onyo la Mungu litatimizwa wakati taifa hilo litakapopatwa na maangamizi makubwa mwaka wa 607 K.W.K. Huo ni wakati ambao Yehova atawaruhusu Wababiloni waharibu Yerusalemu na hekalu lake. Hapo “mungu wa Bahati Nzuri” atashindwa kuwalinda wafuasi wake wenye bidii walioko Yuda na Yerusalemu.—2 Mambo ya Nyakati 36:17.

15. Wakristo wa kweli wanaliitikiaje onyo linalopatikana kwenye Isaya 65:11, 12?

¹⁵ Leo Wakristo wa kweli wanatii onyo linalopatikana kwenye Isaya 65:11, 12. Wao hawaamini “Bahati Nzuri,” kana kwamba ina nguvu nyingi zinazopita zile za asili ya kibinadamu katika kuwafanyia mambo ya hisani. Wao hukataa kutapanya mali zao kwa kujaribu kumtuliza “mungu wa Bahati Nzuri,” na kwa hiyo wanaepuka namna zote za kucheza kamari. Wanasadiki kwamba wale wanaojitoa kufanya mapenzi ya mungu huyo watapoteza kila kitu hatimaye, kwani Yehova anawaambia hivi watu wa namna hiyo: ‘Nitawajalia kuuawa kwa upanga.’

“Tazama, Watumishi Wangu Watafurahi”

16. Yehova atawabariki watumishi wake waaminifu kwa njia zipi, lakini itakuwaje kwa wale ambao wamemwacha?

¹⁶ Unabii unaeleza kwamba kuna thawabu tofauti-tofauti ambazo zinawangoja wale wanaomwabudu Mungu kwa moyo mweupe na wale wanaofanya hivyo kwa unafiki. Unafanya hivyo kwa kuwakaripia wale ambao wamemwacha Yehova: “Bwana MUNGU asema hivi, Tazama, watumishi wangu watakula, bali ninyi mtaona njaa; tazama, watumishi wangu watakunywa, bali ninyi mtaona kiu; tazama, watumishi wangu watafurahi, bali ninyi mtatahayarika; tazama, watumishi wangu wataimba kwa furaha [“hali njema,” “NW”] ya moyo, bali ninyi mtalia kwa huzuni ya moyo; mtapiga kelele kwa sababu ya uchungu wa roho zenu.” (Isaya 65:13, 14) Yehova atawabariki watumishi wake waaminifu. Wakiwa na mioyo inayofurika shangwe, watabubujika kelele za furaha. Kula, kunywa, na kufurahi ni maneno yanayoonyesha kwamba Yehova atatosheleza mahitaji ya waabudu wake kwa vitu kemkemu. Tofauti na hivyo, wale ambao wamechagua kumwacha Yehova wataona njaa na kiu ya kiroho. Mahitaji yao hayatatoshelezwa. Watalia kwa sauti kubwa na kupiga makelele ya kuomboleza kwa uchungu na msononeko.

17. Kwa nini watu wa Mungu leo wana sababu nzuri ya kuimba kwa furaha?

¹⁷ Maneno ya Yehova yanaieleza vizuri hali ya kiroho ya watu ambao leo wanadai kwa maneno tu kwamba wanamtumikia Mungu. Hata ingawa mamilioni ya watu wa Jumuiya ya Wakristo wana uchungu wa roho, waabudu wa Yehova wanaimba kwa furaha. Nao wana sababu nzuri ya kushangilia. Wanalishwa vema kiroho. Yehova huwaandalia chakula kingi cha kiroho kupitia vichapo vya Kibiblia na makusanyiko ya Kikristo. Kwa hakika, zile kweli zenye kujenga na ahadi zenye faraja zilizo katika Neno la Mungu hutupatia ‘hali njema ya moyo’!

18. Wale ambao wamemwacha Yehova watabaki na kitu gani, na kuapa kwa jina lao huenda kukawa kunadokeza nini?

¹⁸ Yehova anaendelea kuongea na wale ambao wamemwacha: “Nanyi mtaliacha jina lenu kuwa laana kwa wateule wangu. Na Bwana MUNGU atakuua; naye atawaita watumishi wake kwa jina lingine. Hata itakuwa yeye atakayejibariki duniani, atajibariki kwa Mungu wa kweli; naye atakayeapa duniani, ataapa kwa Mungu wa kweli. Kwa kuwa taabu za kwanza zimesahauliwa, na kwa kuwa zimefichwa machoni pangu.” (Isaya 65:15, 16) Wale ambao wamemwacha Yehova watabaki na jina lao tu, nalo litatumika katika kuapa tu, au kulaani. Huenda hiyo ikamaanisha kwamba wale wanaotaka kujifunga kwa kiapo kizito, watakuwa ni kama wanasema hivi: ‘Nisipotimiza ahadi hii, acha nipatwe na adhabu iliyowapata wale waasi-imani.’ Huenda hata ikamaanisha kwamba jina lao litatumiwa kwa njia ya mfano, kama Sodoma na Gomora, ili liwe mfano wa adhabu ya Mungu juu ya waovu.

19. Watumishi wa Mungu wataitwaje jina jingine, na kwa nini watakuwa na uhakika wa kumwamini yule Mungu wa uaminifu? (Ona pia kielezi-chini.)

¹⁹ Lakini hali ya watumishi wa Mungu itakuwa tofauti kama nini! Wataitwa jina jingine. Hiyo ni kuonyesha kwamba watabarikiwa na kuheshimiwa wakiisha kurudi katika nchi ya kwao. Hawatatafuta baraka kwa mungu yeyote wa uwongo wala hawataapa kwa jina la sanamu yoyote isiyo na uhai. Bali, wanapojibariki au kuapa, watafanya hivyo kwa jina la yule Mungu wa uaminifu. (Isaya 65:16, kielezi-chini katika tafsiri ya NW) Wakaaji wa nchi watakuwa na sababu ya kumwamini Mungu wakiwa na uhakika kabisa, kwani atakuwa amethibitisha kuwa yeye ni mtimizaji wa ahadi zake.c Wayahudi wakiisha kuwa salama nchini mwao, wataisahau upesi misononeko iliyowapata zamani.

“Ninaumba Mbingu Mpya na Dunia Mpya”

20. Ahadi ya Yehova ya “mbingu mpya na dunia mpya” ilitimizwaje mwaka wa 537 K.W.K.?

²⁰ Sasa Yehova anaieleza kwa mapana na marefu ahadi yake ya kuwarudishia hali nzuri wale mabaki wenye toba wakiisha kurejea kutoka uhamishoni Babiloni. Kupitia Isaya, Yehova anasema hivi: “Tazama, mimi ninaumba mbingu mpya na dunia mpya, na maneno ya kwanza hayatakumbukwa, wala hayataingia moyoni.” (Isaya 65:17, “Zaire Swahili Bible”) Ni hakika kwamba ahadi ya Yehova ya kurudishwa kwa hali za kwanza itatimizwa, kwa hiyo yeye anaongea kana kwamba tukio hilo la wakati ujao la kurudishwa kwa hali za kwanza limekwisha anza. Unabii huu ulitimizwa mara ya kwanza mwaka wa 537 K.W.K. wakati mabaki Wayahudi waliporudishwa Yerusalemu. “Mbingu mpya” zilikuwa nini wakati huo? Zilikuwa ugavana wa Zerubabeli ulioungwa mkono na Kuhani wa Cheo cha Juu, Yoshua, mahali pakuu pa ugavana huo pakiwa ni Yerusalemu. Mabaki Wayahudi waliorudishwa ndio waliokuwa “dunia mpya,” yaani jamii iliyosafishwa, nao walijitiisha chini ya utawala huo na kusaidia kuanzisha upya ibada safi nchini. (Ezra 5:1, 2) Shangwe ya kurudishwa huko ilifunika mateso yote ya zamani; misononeko ya zamani hata haikukumbukwa.—Zaburi 126:1, 2.

21. Ni mbingu mpya zipi zilizotokea mwaka wa 1914?

²¹ Hata hivyo, kumbuka kwamba Petro alirudia maneno ya unabii wa Isaya akaonyesha kwamba ungetimizwa wakati ujao. Mtume huyo aliandika hivi: “Ziko mbingu mpya na dunia mpya ambazo tunangojea kulingana na ahadi yake, na katika hizo uadilifu utakaa.” (2 Petro 3:13) Mwaka wa 1914 zile mbingu mpya zilizokuwa zimengojewa sana zilitokea. Ufalme wa Kimesiya uliozaliwa mwaka huo unatawala kutoka mbinguni kwenyewe, na Yehova ameupa ufalme huo mamlaka ya kuitawala dunia yote. (Zaburi 2:6-8) Serikali hiyo ya Ufalme, iliyo chini ya Kristo na watawala wenzake 144,000, ndio mbingu mpya.—Ufunuo 14:1.

22. Dunia mpya itafanyizwa kwa watu gani, na watu wanatayarishwaje hata sasa ili wawe kiini cha mpango huo?

²² Namna gani dunia mpya? Kwa kufuata kielelezo cha utimizo wa kale, dunia mpya itafanyizwa kwa watu wanaofurahia kujitiisha chini ya utawala wa serikali mpya ya kimbingu. Hata sasa, mamilioni ya watu mmoja-mmoja wenye mwelekeo unaofaa wananyenyekea chini ya serikali hiyo na kujitahidi kufuata sheria zake zilizo katika Biblia. Wanatoka katika taifa zote, lugha zote, na jamii zote, nao hushirikiana kumtumikia Mfalme Yesu Kristo anayetawala. (Mika 4:1-4) Mfumo mwovu wa mambo uliopo ukiisha kupita, kikundi hicho ndicho kitakachofanyizwa kuwa kiini cha dunia mpya na hatimaye kiwe jamii ya wanadamu wenye kumhofu Mungu watakaokuwa kila mahali ulimwenguni, wakiwa warithi wa makao ya kidunia ya Ufalme wa Mungu.—Mathayo 25:34.

23. Ni habari zipi tunazozipata katika kitabu cha Ufunuo kuhusu “mbingu mpya na dunia mpya,” na unabii huo utatimizwaje?

²³ Kitabu cha Ufunuo kinaelezea njozi ambayo mtume Yohana aliona kuhusu siku ya Yehova inayokuja, wakati ambao mfumo huu wa mambo utaondolewa. Halafu Shetani atafungwa ndani ya abiso. (Ufunuo 19:11–20:3) Baada ya maelezo hayo, Yohana anayarudia maneno ya kiunabii ya Isaya, akiandika hivi: “Nikaona mbingu mpya na dunia mpya.” Mistari inayofuata ya masimulizi ya njozi hii tukufu inaeleza juu ya wakati ambao Yehova Mungu atabadili kabisa hali za dunia hii ziwe nzuri zaidi. (Ufunuo 21:1, 3-5) Ni wazi kwamba ahadi ya Isaya ya “mbingu mpya na dunia mpya” itatimizwa vizuri ajabu katika ulimwengu mpya wa Mungu! Jamii mpya ya kidunia itafurahia paradiso ya kiroho na hata ya kihalisi, ikiwa chini ya mbingu mpya za kiserikali. Ile ahadi ya kwamba “maneno ya kwanza [magonjwa, mateso, na ole mwingine mwingi unaopata wanadamu] hayatakumbukwa, wala hayataingia moyoni” inafariji kweli kweli. Ikiwa wakati huo tutakumbuka jambo lolote lile, halitatutia madhara wala maumivu yanayolemea mioyo ya wengi wakati wa sasa.

24. Kwa nini Yehova atashangilia kurudishwa kwa Yerusalemu, na ni nini ambacho hakitasikiwa tena katika barabara za jiji?

²⁴ Unabii wa Isaya unaendelea kusema hivi: “Furahini, mkashangilie daima, kwa ajili ya hivi niviumbavyo; maana, tazama, naumba Yerusalemu uwe shangwe, na watu wake wawe furaha. Nami nitaufurahia Yerusalemu, nitawaonea shangwe watu wangu; sauti ya kulia haitasikiwa ndani yake tena, wala sauti ya kuomboleza.” (Isaya 65:18, 19) Si Wayahudi peke yao watakaoshangilia kurudishwa kwenye nchi yao, bali Mungu mwenyewe atashangilia pia, kwa maana atarembesha jiji la Yerusalemu—ambalo kwa mara nyingine litakuwa limekuwa mahali pakuu pa ibada ya kweli duniani. Ile sauti ya kulia kwa sababu ya maafa, iliyosikiwa katika barabara za jiji miongo kadhaa mapema, haitasikiwa tena.

25, 26. (a) Katika siku zetu, Yehova anafanyaje Yerusalemu liwe “shangwe”? (b) Yehova atatumia Yerusalemu Jipya kwa njia gani, na kwa nini sisi tunaweza kushangilia leo?

²⁵ Leo, pia, Yehova anafanya Yerusalemu liwe “shangwe.” Jinsi gani? Kama vile tumekwisha kuona, hatimaye zile mbingu mpya zilizotokea mwaka wa 1914 zitahusisha pia watawala wenzi 144,000, wenye kushiriki katika ile serikali ya kimbingu. Mbingu hizo zinatajwa kiunabii kuwa “Yerusalemu Jipya.” (Ufunuo 21:2) Yerusalemu Jipya ndilo linalomaanishwa wakati Mungu anaposema hivi: “Tazama, naumba Yerusalemu uwe shangwe, na watu wake wawe furaha.” Yerusalemu Jipya litatumiwa na Mungu kuwamiminia wanadamu watiifu baraka zisizo na kifani. Haitasikiwa tena sauti ya kulia wala ya maombolezo, kwa maana Yehova atatosheleza “haja za moyo [wetu].”—Zaburi 37:3, 4.

²⁶ Kwa kweli, sisi leo tuna sababu kamili ya kufurahi sana! Karibuni Yehova atatakasa jina lake maarufu kwa kuwaharibu wapinzani wote. (Zaburi 83:17, 18) Kisha mbingu mpya peke yake zishike usukani kusimamia mambo yote. Lo, hizo ni sababu nzuri kama nini za kufurahi sana na kukishangilia milele kile kinachoumbwa na Mungu!

Ahadi ya Wakati Ujao Wenye Usalama

27. Isaya anaelezaje kuhusu usalama ambao wale wenye kurudi wataufurahia katika nchi yao?

²⁷ Katika utimizo wa kwanza, maisha yatakuwaje kwa Wayahudi wenye kurudi wakiwa chini ya mbingu mpya? Yehova anasema hivi: “Hatakuwapo tena mtoto wa siku chache, wala mzee asiyetimia siku zake; kwa maana mtoto atakufa mwenye umri wa miaka mia; bali mtenda dhambi mwenye umri wa miaka mia atalaaniwa.” (Isaya 65:20) Hiyo inaonyesha vizuri kama nini usalama ambao wahamishwa wenye kurudi watafurahia katika nchi yao iliyorudishwa! Kifo kisichotazamiwa hakitampata mzaliwa-juzi, maana yake kitoto cha siku chache tu. Wala kifo cha jinsi hiyo hakitammaliza mzee asiyetimiza maisha yake.d Maneno ya Isaya yanawafariji kweli kweli Wayahudi watakaorudi Yuda! Wakiisha kuwa salama nchini mwao, hawana tena haja ya kufanya wasiwasi eti adui zao watasomba watoto wao wachanga au kuchinja mashujaa wao.

28. Tunajifunza nini kutokana na maneno ya Yehova juu ya maisha katika ulimwengu mpya chini ya Ufalme wake?

²⁸ Maneno ya Yehova yanatuambia nini juu ya maisha katika ulimwengu mpya unaokuja? Chini ya Ufalme wa Mungu, kila mtoto atakuwa na tarajio la kupata wakati ujao ulio salama. Kifo hakitaua tena mwanamume anayemhofu Mungu akiwa katika umri wake wa ufanisi mkubwa. Bali, wanadamu watiifu watakuwa salama salimini, na wataweza kufurahia maisha. Namna gani watu wowote wanaochagua kumwasi Mungu? Watapoteza pendeleo la uhai. Hata ikiwa mtenda-dhambi anayeasi ana “umri wa miaka mia,” atakufa. Hapo yeye atakuwa “mtoto wa siku chache” akilinganishwa na vile angaliweza kuwa—mtu mwenye maisha yasiyo na kikomo.

29. (a) Watu wa Mungu walio watiifu watapata shangwe zipi katika nchi ya Yuda iliyorudishwa? (b) Kwa nini miti ni mfano unaofaa wa maisha marefu? (Ona kielezi-chini.)

²⁹ Yehova anaendelea kueleza juu ya hali zitakazokuwako katika nchi iliyorudishwa ya Yuda: “Nao watajenga nyumba, na kukaa ndani yake; watapanda mizabibu, na kula matunda yake. Hawatajenga, akakaa mtu mwingine ndani yake; hawatapanda, akala mtu mwingine; maana kama siku za mti ndivyo zitakavyokuwa siku za watu wangu, na wateule wangu wataifurahia kazi ya mikono yao muda wa siku nyingi.” (Isaya 65:21, 22) Baada ya kuirudia nchi ya Yuda, ambayo bila shaka haikuwa na nyumba wala mizabibu, watu wa Mungu walio watiifu watakuwa na shangwe ya kuishi katika nyumba zao wenyewe na kula matunda kutoka mashamba yao wenyewe ya mizabibu. Mungu ataibariki kazi yao, na wataishi maisha marefu—marefu kama siku za mti—wafurahie matunda ya kazi zao.e

30. Watumishi wa Yehova wanafurahia hali gani leo, na watafurahia nini katika ulimwengu mpya?

³⁰ Unabii huu umepata utimizo fulani katika siku zetu. Watu wa Yehova walitoka kwenye uhamisho wa kiroho mwaka wa 1919, wakaanza kurudisha hali za kwanza katika “nchi” au makao yao ya utendaji na ibada. Walijenga makutaniko na kusitawisha hali ya kuzaa matunda ya kiroho. Matokeo ni kwamba, hata sasa watu wa Yehova wanafurahia paradiso ya kiroho na amani waliyopewa na Mungu. Tunaweza kuwa na hakika kwamba amani hiyo itaendelea mpaka ndani ya ile Paradiso halisi. Hata haiwezekani kuwaza kwa usahihi ni maajabu gani ambayo Yehova atafanya katika ulimwengu mpya kwa kuitumia mioyo na mikono ya waabudu wake wenye nia ya kufanya kazi. Itakuwa shangwe iliyoje kujenga nyumba yako mwenyewe kisha kuishi ndani yake! Chini ya utawala wa Ufalme, hakutakuwako upungufu wa kazi ya kuridhisha. Utafurahi kama nini “kujiburudisha kwa mema” ya matunda ya kazi zako mwenyewe sikuzote! (Mhubiri 3:13) Je, tutapata wakati wa kutosha kuifurahia sana kazi ya mikono yetu? Kabisa! Maisha yasiyo na kikomo ya wanadamu waaminifu yatakuwa “kama siku za mti”—maelfu ya miaka, na hata zaidi!

31, 32. (a) Wahamishwa wanaorudi watafurahia baraka zipi? (b) Wanadamu waaminifu watakuwa na tazamio gani katika ulimwengu mpya?

³¹ Yehova anaeleza juu ya baraka zaidi zinazowangoja wahamishwa wanaorudi: “Hawatajitaabisha kwa kazi bure, wala hawatazaa kwa taabu; kwa sababu wao ni wazao wa hao waliobarikiwa na BWANA, na watoto wao pamoja nao.” (Isaya 65:23) Wayahudi hao waliorudishwa watabarikiwa na Yehova, na kwa hiyo hawatafanya kazi ya bure. Wazazi hawatazaa watoto ili tu wapatwe na kifo cha mapema. Watu wale waliokuwa uhamishoni hawatafurahia baraka za kurudishwa wakiwa peke yao; wazao wao watakuwa pamoja nao. Mungu ana hamu nyingi ya kutimiza mahitaji ya watu wake kiasi cha kuahidi hivi: “Itakuwa ya kwamba, kabla hawajaomba, nitajibu; na wakiwa katika kunena, nitasikia.”—Isaya 65:24.

³² Yehova atatimizaje ahadi hizo katika ulimwengu mpya unaokuja? Tungoje tuone. Yehova hajaeleza jinsi kila kitu kitakavyokuwa, lakini tunaweza kuwa na hakika kwamba wanadamu waaminifu “hawatajitaabisha kwa kazi bure” tena. Umati mkubwa wa waokokaji wa Har-Magedoni na watoto wowote ambao huenda wakawazaa watakuwa na tazamio la maisha marefu ya kuridhisha—uhai wa milele! Hata wale watakaofufuliwa kisha wachague kuishi kupatana na viwango vya Mungu watapata shangwe ya kuwa katika ulimwengu mpya. Yehova atayasikia na kuyatimiza mahitaji yao, hata kuyatazamia. Kwa kweli, Yehova ataufungua mkono wake na kuridhisha “kila kilicho hai matakwa yake.”—Zaburi 145:16.

33. Wayahudi watakapoirudia nchi yao, wanyama wataishije kwa amani?

³³ Amani na usalama ambazo zimeahidiwa zitakuwa za kiasi gani? Yehova anamalizia sehemu hii ya unabii kwa kusema hivi: “Mbwa-mwitu na mwana-kondoo watalisha pamoja, na simba atakula majani kama ng’ombe; na mavumbi yatakuwa chakula cha nyoka. Hawatadhuru wala kuharibu katika mlima wangu mtakatifu wote, asema BWANA.” (Isaya 65:25) Wakati mabaki ya Wayahudi waaminifu watakapoirudia nchi yao, watakuwa chini ya utunzaji wa Yehova. Itakuwa ni kama simba anakula majani kama ng’ombe, kwa maana simba hatawadhuru Wayahudi wala wanyama wao wa kufugwa. Ahadi hiyo ni hakika, kwa maana inamalizika kwa kusema, ‘asema Yehova.’ Na neno lake hutimia daima!—Isaya 55:10, 11.

34. Maneno ya Yehova yana utimizo gani wenye kusisimua leo na katika ulimwengu mpya?

³⁴ Leo maneno ya Yehova yanatimizwa kwa njia ya kusisimua miongoni mwa waabudu wa kweli. Tangu mwaka wa 1919, Mungu ameibariki nchi ya kiroho ya watu wake, akaigeuza kuwa paradiso ya kiroho. Wale wanaoingia katika paradiso hii ya kiroho hufanya mabadiliko ya ajabu katika maisha yao. (Waefeso 4:22-24) Watu mmoja-mmoja ambao wakati mmoja walikuwa na nyutu za kinyama—ambao labda waliwatumia vibaya wanadamu wenzao au wakawadhulumu kwa njia nyinginezo—wanafanya maendeleo ya kuyamaliza makali ya tabia zisizopendeza kwa msaada wa roho ya Mungu. Matokeo ni kwamba, wanafurahia amani na umoja wa ibada pamoja na waamini wenzao. Baraka zinazofurahiwa sasa na watu wa Yehova katika paradiso yao ya kiroho zitaendelea mpaka ndani ya Paradiso halisi, ambamo amani itakuwamo miongoni mwa wanadamu, na hali kadhalika miongoni mwa wanyama. Tunaweza kuwa na hakika kwamba lile agizo ambalo Mungu aliwapa wanadamu hapo awali litatimizwa kabisa kwa njia inayofaa, yaani: ‘Kuitiisha nchi; kutawala samaki wa baharini, na ndege wa angani, na kila kiumbe chenye uhai kiendacho juu ya nchi.’—Mwanzo 1:28.

35. Kwa nini tuna sababu nzuri sana ya ‘kushangilia daima’?

³⁵ Tunashukuru kama nini kwa ajili ya ahadi ya Yehova ya kuumba “mbingu mpya na dunia mpya”! Ahadi hiyo ilitimizwa mwaka wa 537 K.W.K., na inatimizwa zaidi leo. Utimizo huo wa mara mbili unaonyesha jinsi wanadamu watiifu wanavyoweza kupata wakati ujao ulio mtukufu. Yehova ametufadhili kwa kutupatia sisi, kupitia unabii wa Isaya, kionjo cha mambo ambayo amewawekea wale wanaompenda. Kwa kweli tuna sababu nzuri sana ya kuyatii maneno haya ya Yehova: “Mkashangilie daima, kwa ajili ya hivi niviumbavyo”!—Isaya 65:18.

[Maelezo ya Chini]

[Picha katika ukurasa wa 389]

Katika ulimwengu mpya wa Mungu, tutakuwa na wakati wa kutosha kuifurahia kazi ya mikono yetu