Jinsi Kuzaliwa kwa Yesu Kunavyoleta Amani

TANGAZO la “amani kati ya watu wa nia njema” si unabii pekee uliohusiana na kuzaliwa kwa Yesu. Zaidi ya tangazo ambalo malaika walikuwa wamewatolea wachungaji, wajumbe kutoka mbinguni waliongozwa na Mungu kumtangazia Maria na Yosefu mume wake ujumbe kumhusu Yesu aliyetoka tu kuzaliwa. Kuchunguza ujumbe huo kutatusaidia kuelewa zaidi kuzaliwa kwa Yesu na kinachomaanishwa na ahadi ya malaika ya amani kati ya wanadamu.

Kabla ya Yesu kuzaliwa, na hata kabla Maria hajapata mimba, Maria alitembelewa na malaika ambaye Biblia inamwita Gabrieli. Malaika huyo alimsalimu hivi: “Siku njema, uliyependelewa sana, Yehova yuko pamoja nawe.” Unaweza kuwazia jinsi Maria alivyovurugika sana na kuwa na wasiwasi aliposikia maneno hayo. Salamu kama hiyo ingemaanisha nini?

Gabrieli alieleza hivi: “Tazama! utachukua mimba katika tumbo lako la uzazi na kuzaa mwana, nawe utamwita jina lake Yesu. Huyo atakuwa mkuu naye ataitwa Mwana wa Aliye Juu Zaidi; na Yehova Mungu atampa kiti cha ufalme cha Daudi baba yake, naye atatawala akiwa mfalme juu ya nyumba ya Yakobo milele, na ufalme wake hautakuwa na mwisho.” Maria aliuliza jambo hilo lingewezekana jinsi gani kwa kuwa bado alikuwa bikira, hakuwa akilala na mwanamume. Gabrieli alijibu kwamba mimba ya mtoto huyo ingetungwa kwa njia ya roho takatifu ya Mungu. Mtoto huyo hangekuwa mtoto wa kawaida.—Luka 1:28-35.

Mfalme Aliyetabiriwa

Bila shaka, maneno ya Gabrieli yalimsaidia Maria kujua kwamba mtoto ambaye angemzaa alikuwa ametabiriwa zamani katika unabii mbalimbali. Ufunuo wa kwamba Yehova angempa mwana wa Maria “kiti cha ufalme cha Daudi baba yake” ungemfanya Maria na pia Myahudi mwingine yeyote aliyefahamu Maandiko afikirie ahadi ambayo Mungu alimpa Mfalme Daudi wa Israeli.

Kupitia nabii Nathani, Yehova alimwambia Daudi hivi: “Nyumba yako na ufalme wako hakika zitakuwa imara mpaka wakati usio na kipimo mbele yako; nacho kiti chako cha ufalme kitafanywa imara mpaka wakati usio na kipimo.” (2 Samweli 7:4, 16) Yehova alisema hivi kumhusu Daudi: “Nami hakika nitaweka imara uzao wake milele na kiti chake cha ufalme kama siku za mbingu. Uzao wake mwenyewe utakuwako mpaka wakati usio na kipimo, na kiti chake cha ufalme kama vile jua lilivyo mbele zangu.” (Zaburi 89:20, 29, 35, 36) Hivyo, Maria na Yosefu hawakutokana na nyumba ya Daudi kivivi hivi tu.

Huo si unabii pekee katika Maandiko ya Kiebrania unaohusu mwana wa kifalme wa Daudi. Inaelekea Maria alijua pia unabii huu wa Isaya: “Kuna mtoto ambaye amezaliwa kwetu, kuna mwana ambaye tumepewa; na utawala wa ukuu utakuwa juu ya bega lake. Naye ataitwa jina Mshauri wa Ajabu, Mungu Mwenye Nguvu, Baba wa Milele, Mkuu wa Amani. Hakutakuwa na mwisho kwa habari ya wingi wa huo utawala wa kifalme na kwa amani, juu ya kiti cha ufalme cha Daudi na juu ya ufalme wake ili kuufanya imara na kuutegemeza kwa njia ya haki na kwa njia ya uadilifu, kuanzia sasa na kuendelea mpaka wakati usio na kipimo. Bidii ya Yehova wa majeshi itafanya hayo.”—Isaya 9:6, 7.

Kwa hiyo basi, ujumbe ambao Gabrieli alimtangazia Maria haukuhusu tu kuzaliwa kimuujiza kwa mtoto wa kiume. Mwana wake angekuwa mrithi wa kifalme wa Mfalme Daudi. Angekuwa mrithi wa kudumu au wa milele wa Ufalme uliokusudiwa na Mungu. Unabii wa Gabrieli kuhusu daraka ambalo Yesu angetimiza wakati ujao ni wa maana sana kwa kila mmoja wetu.

Yosefu alipojua kwamba yule ambaye angekuwa mke wake alikuwa na mimba, aliamua kuvunja uchumba wao. Alijua kwamba mtoto huyo hakuwa wake kwa sababu yeye na mchumba wake hawakuwa wamefanya ngono. Unaweza kuwazia jinsi ilivyokuwa vigumu kwa Yosefu kuamini maelezo ya Maria kuhusu mimba aliyokuwa nayo. Masimulizi ya Injili yanasema hivi: “Malaika wa Yehova alimtokea katika ndoto, akisema: ‘Yosefu, mwana wa Daudi, usiogope kumchukua Maria mke wako na kwenda naye nyumbani, kwa maana mimba iliyo ndani yake imetokana na roho takatifu. Yeye atazaa mwana, nawe lazima umwite jina lake Yesu, kwa maana ataokoa watu wake kutoka katika dhambi zao.’”—Mathayo 1:20, 21.

Biblia haisemi ni kwa kadiri gani Yosefu alielewa jinsi ambavyo mtoto huyo ‘angeokoa watu wake kutoka katika dhambi zao.’ Hata hivyo, ujumbe huo ulitosha kumhakikishia Yosefu kwamba mama huyo mwenye mimba hakuwa na hatia yoyote. Alifanya kama malaika alivyomwagiza na kumpeleka Maria nyumbani, tendo ambalo lilikuwa sawa na arusi.

Habari inayopatikana katika Maandiko mengine inatusaidia kuelewa maana ya ujumbe wa malaika. Mapema katika historia ya wanadamu, malaika aliyeasi alitilia shaka enzi kuu ya Yehova. Maandiko ya Kiebrania yanaonyesha kwamba mwasi huyo alitoa madai mbalimbali, kutia ndani dai la kwamba, njia ya Mungu ya kutawala si ya haki na kwamba hakuna mwanadamu angeweza kubaki mtimilifu kwa Yehova chini ya jaribu. (Mwanzo 3:2-5; Ayubu 1:6-12) Adamu ni mmoja wa watu ambao hawakubaki watimilifu. Kwa sababu ya dhambi yake, wanadamu wote wamerithi dhambi, na dhambi hiyo imetokeza kifo. (Waroma 5:12; 6:23) Hata hivyo, Yesu, alizaliwa bila dhambi kwa sababu hakuzaliwa na baba wa kibinadamu. Kwa kupenda kwake, Yesu alitoa uhai wake mkamilifu wa kibinadamu uwe fidia inayolingana kabisa na kile ambacho Adamu alipoteza, na hivyo kuweza kuwaokoa wanadamu kutoka katika dhambi zao na kuwapa tumaini la uzima wa milele.—1 Timotheo 2:3-6; Tito 3:6, 7; 1 Yohana 2:25.

Wakati wa huduma yake duniani, Yesu alionyesha kimbele matokeo mazuri ya kuondolewa kwa dhambi. Aliweka watu huru kutokana na udhaifu wa kimwili na hata aliwafufua wafu. (Mathayo 4:23; Yohana 11:1-44) Miujiza hiyo ilionyesha yale ambayo atafanya wakati ujao. Yesu mwenyewe alisema hivi: “Saa inakuja ambayo wale wote waliomo ndani ya makaburi ya ukumbusho wataisikia sauti [yangu] na kutoka.”—Yohana 5:28, 29.

Ahadi hiyo ya kufufuliwa kwa watu wakati ujao inaonyesha ni kwa nini kuzaliwa na hasa kifo cha Yesu ni cha maana sana kwetu. Mungu alimtuma Mwana wake ulimwenguni “ili ulimwengu uokolewe kupitia kwake,” linasema andiko la Yohana 3:17. Habari hizo njema zinatukumbusha kuhusu tangazo lililotolewa kwa wachungaji waliokuwa wakichunga makundi yao usiku ambao Yesu alizaliwa.

“Habari Njema ya Shangwe Kubwa”

Malaika walipotangaza kuhusu kuzaliwa kwa “Mwokozi ambaye ni Kristo Bwana,” kwa kweli hiyo ilikuwa “habari njema ya shangwe kubwa” kwa wanadamu. (Luka 2:10, 11) Mtoto huyo angekuwa Masihi, Nabii na Mtawala mkuu ambaye watu wa Mungu walikuwa wakimtarajia kwa muda mrefu. (Kumbukumbu la Torati 18:18; Mika 5:2) Maisha na kifo chake akiwa duniani kingekuwa muhimu sana katika kuitetea enzi kuu ya Yehova ya ulimwengu wote, ndiyo sababu malaika walisema hivi: “Utukufu katika vilele vilivyo juu kwa Mungu.”—Luka 2:14.

Yesu, ambaye Biblia inamwita “Adamu wa mwisho,” alionyesha kwamba mwanadamu anaweza kubaki mwaminifu kwa Yehova hata chini ya jaribu kali sana. (1 Wakorintho 15:45) Kwa kufanya hivyo, alithibitisha kwamba Shetani ni mwongo mwovu. Hilo lilifanya malaika waaminifu washangilie huko mbinguni.

Hata hivyo, acheni turudi kwa lile swali, “Je, kuna tumaini hakika kwamba tangazo lililotolewa na malaika usiku ambao Yesu alizaliwa litatimia?” Jibu ni ndiyo, litatimia hakika! Amani ni sifa muhimu katika kutimizwa kwa kusudi la Mungu duniani. Kusudi hilo linatia ndani kurudishwa kwa hali za kiparadiso. Litakapotimizwa duniani pote, watu wote wataongozwa na upendo na ushikamanifu. Kwa hiyo, kutimizwa kwa kusudi la Yehova kunamaanisha pia kwamba upinzani wote kwa enzi yake kuu utakomeshwa. Hiyo si habari njema kwa mtu yeyote anayejiunga na Shetani kudai kwamba viwango vya Yehova ni vibaya. Watu hao wataharibiwa.—Zaburi 37:11; Methali 2:21, 22.

Tafadhali ona kwamba malaika hawakuwaambia wachungaji kungekuwa na amani na nia njema kwa watu wote. Badala yake, walitangaza “amani kati ya watu wa nia njema,” yaani, watu ambao wana kibali cha Mungu na nia yake njema. Wale ambao wanaonyesha kwamba wanamwamini Yehova kikweli wanakuwa wafuasi waaminifu wa Yesu nao wanamwiga. Wanaume na wanawake hao wako tayari kuwajali na kuwaonyesha wengine ukarimu, si kwa siku chache tu kila mwaka, bali kila siku.

Je, Roho ya Kikristo Inaonyeshwa Mwaka Mzima?

Nguvu za habari njema ambayo Yesu alihubiri zimebadili maisha ya watu wengi sana. Wengi wanafuata kanuni za Kikristo katika kila sehemu ya maisha yao. Watu ambao zamani walikuwa wachoyo sana wameanza kufikiria Yesu angefanya nini ikiwa angekuwa katika hali kama zao. Wengine ambao walikuwa wanatanguliza mali na raha maishani wametambua umuhimu wa viwango vya kiroho na wanawasaidia majirani wao kufuata viwango hivyo. Watu wanaofanya hivyo wanajitahidi kuonyesha ukarimu na fadhili mwaka mzima. Je, hutarajii Wakristo wa kweli wawe hivyo?

Ikiwa watu wote wanyoofu wangetua kidogo na kufikiria maana ya ujumbe wa malaika kuhusu amani na kutenda kupatana na ujumbe huo, bila shaka ulimwengu ungekuwa tofauti.

Unabii mbalimbali kuhusu kuzaliwa kwa Yesu unawahakikishia wale ambao wana nia njema ya Mungu kwamba wanaweza kufurahia amani ya kweli milele. Je, hutamani jambo hilo? Tunaweza kuwa na hakika kwamba tangazo tukufu la kinabii kuhusu amani ambalo lilitolewa na malaika wakati Yesu alizaliwa litatimia kabisa. Badala ya kuwa neno lisilo na maana wakati wa Krismasi, kwa hakika amani itakuwapo kwa umilele wote.

[Picha katika ukurasa wa 7]

Roho ya Kikristo inaweza na inapaswa kuonyeshwa mwaka mzima