Mthawabishaji wa Wote Wanaomtumikia

“ASANTE SANA.” Ni nani asiyefurahia kusikia maneno ya shukrani baada ya kufanya kazi nzuri au kumpa mtu zawadi kwa moyo wote? Sote tunapenda kuhisi kwamba jitihada zetu zinathaminiwa, hasa na watu tunaowapenda. Bila shaka, tunampenda Mungu wetu, Yehova, kuliko watu wengine wote. Je, anathamini jitihada zetu tunapomtumikia? Acheni tuone jinsi alivyoshughulika na Ebed-meleki, mwanamume aliyehatarisha uhai wake ili kumwokoa nabii wa Mungu.​—Soma Yeremia 38:7-13 na 39:16-18.

Ebed-meleki alikuwa nani? Inaelekea alikuwa ofisa katika makao ya Mfalme Sedekia wa Yuda.a Ebed-meleki aliishi kipindi kimoja na Yeremia, aliyekuwa ametumwa na Mungu awaonye wakaaji wa Yuda ambao hawakuwa waaminifu kuhusu uharibifu uliokuwa ukikaribia. Ingawa alikuwa amezungukwa na wakuu waovu, Ebed-meleki alimwogopa Mungu na alimheshimu sana Yeremia. Sifa nzuri za Ebed-meleki zilijaribiwa wakati wale wakuu waovu walipomshtaki Yeremia kwa uwongo kwamba alikuwa mchochezi na wakamtupa ndani ya tangi la maji lenye matope, na kumwacha afe. (Yeremia 38:4-6) Ebed-meleki angefanya nini?

Ebed-meleki alichukua hatua na kutenda kwa ujasiri, bila kuogopa kutendewa vibaya na wale wakuu. Alienda kuzungumza hadharani na Sedekia na akalalamikia jinsi Yeremia alivyotendewa isivyo haki. Labda akiwanyooshea kidole wale wakuu, alimwambia hivi mfalme: ‘Watu hawa wamemtendea Yeremia mabaya.’ (Yeremia 38:9) Ebed-meleki alifaulu kumshawishi mfalme Sedekia, naye akamwagiza achukue wanaume 30 ili wamwokoe Yeremia.

Sasa Ebed-meleki alionyesha sifa nyingine yenye kuvutia: fadhili. Alichukua “vitambaa vizee-vizee na vipande vizee-vizee vya nguo na kuvishusha kwa Yeremia . . . kwa kamba.” Kwa nini alimpa Yeremia vitambaa na nguo? Ili Yeremia aviweke kwenye makwapa yake, na hivyo kumsaidia asichubuke alipokuwa akivutwa kutoka ndani ya tangi refu lenye matope.​—Yeremia 38:11-13.

Yehova aliona jambo ambalo Ebed-meleki alifanya. Je, alithamini jambo hilo? Kupitia Yeremia, Mungu alimwambia Ebed-meleki kwamba uharibifu wa Yuda ulikuwa ukikaribia. Kisha Mungu akampa Ebed-meleki ahadi ambayo msomi fulani aliita “uhakikisho wa kuokolewa wenye ahadi tano.” Yehova alisema: “Nitakukomboa wewe . . . Hutatiwa mkononi mwa watu . . . Bila shaka nitakuokoa . . . Hutaanguka kwa upanga . . . Na hakika nafsi yako itakuwa kama nyara kwako.” Kwa nini Yehova aliahidi kumlinda Ebed-meleki? Yehova alimwambia: “Kwa sababu umenitegemea mimi.” (Yeremia 39:16-18) Yehova alijua kwamba Ebed-meleki alitenda si ili tu kumsaidia Yeremia bali pia kwa sababu alikuwa na imani na alimtegemea Mungu.

Somo liko wazi: Yehova anathamini yale tunayofanya ili kumtumikia. Biblia inatuhakikishia kwamba anakumbuka hata tendo dogo zaidi la ibada tunalofanya kwa kuchochewa na moyo uliojaa imani. (Marko 12:41-44) Je, unachochewa kumkaribia zaidi Mungu huyu anayethamini utumishi wako? Ikiwa ndivyo, uwe na hakika kwamba atakuwa kile ambacho Neno lake linamwita: “Mthawabishaji wa wale wanaomtafuta kwa bidii.”​—Waebrania 11:6.

Usomaji wa Biblia unaopendekezwa kwa mwezi wa Mei:

◼ Yeremia 32-50

[Maelezo ya Chini]