Sura ya Kumi na Tatu

Umati Mkubwa Mbele ya Kiti cha Ufalme cha Yehova

 1. (a) Ni lazima watumishi wa Mungu walioishi kabla ya Ukristo, na wale 144,000 wapatwe na nini kabla ya kupokea thawabu yao? (b) Ni nini kitakachowezekana kwa “umati mkubwa” ambao wanaishi wakati huu?

WATUMISHI waaminifu wa Mungu kuanzia Abeli hadi Yohana Mbatizaji walitanguliza mapenzi ya Mungu maishani mwao. Lakini wote walikufa na wanasubiri kufufuliwa ili waishi hapa duniani katika ulimwengu mpya wa Mungu. Lazima pia, wale 144,000 ambao watatawala na Kristo katika Ufalme wa mbinguni wa Mungu wafe kabla hawajapokea thawabu yao. Hata hivyo, andiko la Ufunuo 7:9 linaonyesha kwamba katika siku hizi za mwisho, kungekuwa na “umati mkubwa” kutoka katika mataifa yote, ambao hawangekufa kamwe. Umati huo una tumaini la kuishi milele duniani. Je, wewe ni mmoja wao?

Kuutambua Umati Mkubwa

 2. Umati mkubwa unaotajwa kwenye Ufunuo 7:9 ulitambulishwa kwa njia gani?

² Mnamo mwaka wa 1923, watumishi wa Yehova walifahamu kwamba wale “kondoo” waliotajwa katika mfano wa Yesu kwenye Mathayo 25:31-46 na “kondoo wengine” ambao aliwataja katika andiko la Yohana 10:16 ni watu ambao watakuwa na fursa ya kuishi milele duniani. Katika mwaka wa 1931, ilifahamika pia kwamba wale wanaotiwa alama kwenye vipaji vya nyuso kulingana na andiko la Ezekieli 9:1-11 pia ni wale walio na tumaini la kuishi duniani. Kisha mwaka wa 1935 ikafahamika kwamba umati mkubwa ni sehemu ya kundi la kondoo wengine waliotajwa na Yesu. Leo, mamilioni ya watu ni sehemu ya umati huo mkubwa wenye kibali cha Mungu.

 3. Kwa nini usemi “wamesimama mbele ya kiti cha ufalme” haumaanishi kwamba wao ni jamii ya kimbingu?

³ Andiko la Ufunuo 7:9 halisemi kwamba umati mkubwa ulionekana mbinguni. Si lazima wawe mbinguni ili ‘wasimame mbele ya kiti cha ufalme’ cha Mungu. Yamaanisha tu kwamba Mungu anaweza kuwaona. (Zaburi 11:4) Twajua kwamba umati mkubwa, “ambao hakuna mtu aliyeweza kuuhesabu,” si jamii ya kimbingu kwa sababu andiko la Ufunuo 7:4-8 na Ufunuo 14:1-4 yanataja waziwazi 144,000 kuwa idadi ya wale watakaochukuliwa kutoka duniani kwenda mbinguni.

 4. (a) “Dhiki kubwa” ambayo umati mkubwa utaokoka ni nini? (b) Kulingana na Ufunuo 7:11, 12, ni nani wanaoutazama umati mkubwa na kuabudu pamoja nao?

⁴ Andiko la Ufunuo 7:14 lasema hivi kuhusu umati mkubwa: “Hawa ndio wale watokao katika dhiki kubwa.” Wataokoka msiba mbaya zaidi katika historia yote ya wanadamu. (Mathayo 24:21) Watakapokuwa wakimshukuru Mungu na Kristo kwa sababu ya kuwaokoa, viumbe wote waaminifu mbinguni wataungana nao kusema: “Ameni! Baraka na utukufu na hekima na utoaji-shukrani na heshima na uwezo na nguvu ziwe kwa Mungu wetu milele na milele. Ameni.”—Ufunuo 7:11, 12.

Kuthibitisha Kwamba Wanastahili Kuokolewa

 5. Tunawezaje kujua mambo tunayopaswa kufanya ili kuwa sehemu ya umati mkubwa?

⁵ Kuokolewa kwa umati mkubwa wakati wa dhiki kubwa kunapatana na kanuni za Yehova za uadilifu. Biblia inataja waziwazi sifa ambazo wanapaswa kutimiza ili waokolewe. Kwa hiyo, wale wanaopenda uadilifu wanaweza kuthibitisha kwa matendo kwamba wanastahili kuokolewa. Ni lazima wafanye nini?

 6. Kwa nini umati mkubwa unalinganishwa ifaavyo na kondoo?

⁶ Kondoo ni wanyama wapole na watiifu. Kwa hiyo Yesu aliposema kwamba ana kondoo wengine ambao hawakuwa wa jamii ya kimbingu, alikuwa akizungumzia watu ambao mbali na kutaka kuishi milele duniani, wangetii mafundisho yake. Alisema hivi: “Kondoo wangu husikiliza sauti yangu, nami nawajua, nao wanifuata mimi.” (Yohana 10:16, 27) Hawa ni watu ambao humsikiliza Yesu kwa makini na kutii mambo anayosema, na hivyo wanakuwa wanafunzi wake.

 7. Wafuasi wa Yesu wanapaswa kukuza sifa zipi?

⁷ Wafuasi wa Yesu wanapaswa kukuza sifa zipi nyingine? Neno la Mungu linajibu hivi: “Mweke mbali utu wa hapo zamani unaofuatana na njia yenu ya kwanza ya mwenendo na . . . mvae utu mpya ulioumbwa kulingana na mapenzi ya Mungu katika uadilifu wa kweli na uaminifu-mshikamanifu.” (Waefeso 4:22-24) Wanakuza sifa ambazo zinadumisha umoja kati ya watumishi wa Mungu—“upendo, shangwe, amani, ustahimilivu, fadhili, wema, imani, upole, kujidhibiti.”—Wagalatia 5:22, 23.

 8. Umati mkubwa utapata nini unapowaunga mkono mabaki?

⁸ Umati mkubwa unaunga mkono kikundi kidogo cha wale wenye tumaini la kwenda mbinguni, ambao wanaongoza kazi ya kuhubiri. (Mathayo 24:14; 25:40) Kondoo wengine wanawaunga mkono ingawa wanajua kwamba watapata upinzani kwa sababu Kristo Yesu na malaika wake walimtupa Shetani na mashetani wake kutoka mbinguni, mwanzoni mwa siku hizi za mwisho. Hivyo ikawa ‘ole kwa dunia . . . kwa sababu Ibilisi ameteremka, akiwa na hasira kubwa, akijua ana kipindi kifupi cha wakati.’ (Ufunuo 12:7-12) Kwa hiyo kadiri mwisho wa mfumo huu unavyozidi kukaribia, ndivyo Shetani anavyozidi kuwapinga watumishi wa Mungu.

 9. Watumishi wa Mungu wamepata mafanikio gani katika kuhubiri habari njema, na kwa nini?

⁹ Kazi ya kuhubiri inaendelea licha ya mnyanyaso mkali. Wahubiri wa Ufalme walikuwa maelfu machache tu mwishoni mwa Vita ya Kwanza ya Ulimwengu, lakini sasa ni mamilioni, kwa sababu Yehova aliahidi hivi: “Kila silaha itakayofanyika juu yako haitafanikiwa.” (Isaya 54:17) Hata mshiriki mmoja wa mahakama kuu ya Wayahudi alitambua kwamba kazi ya Mungu haiwezi kushindwa. Aliwaambia hivi Mafarisayo wa karne ya kwanza kuhusu wanafunzi wa Yesu: “Waacheni; (kwa sababu, ikiwa mpango huu au kazi hii ni kutoka kwa wanadamu, itapinduliwa; lakini ikiwa ni kutoka kwa Mungu, hamtaweza kuwapindua;) ama sivyo, huenda mkaonwa kuwa wapiganaji dhidi ya Mungu kwa kweli.”—Matendo 5:38, 39.

10. (a) “Alama” ambayo washiriki wa umati mkubwa wanatiwa inamaanisha nini? (b) Watumishi wa Mungu wanaitiije ile ‘sauti kutoka mbinguni’?

¹⁰ Washiriki wa umati mkubwa wanaonekana wakitiwa alama ya wokovu. (Ezekieli 9:4-6) “Alama” hiyo inathibitisha kwamba wamejiweka wakfu kwa Yehova, wamebatizwa wakiwa wanafunzi wa Yesu, na wanajitahidi kuwa na utu kama wa Kristo. Wanaitii ‘sauti kutoka mbinguni’ inayosema hivi kuhusu miliki ya Shetani ya ulimwenguni pote ya dini zisizo za kweli: “Tokeni kwake, watu wangu, ikiwa hamtaki kushiriki pamoja naye dhambi zake, na ikiwa hamtaki kupokea sehemu ya tauni zake.”—Ufunuo 18:1-5.

11. Washiriki wa umati mkubwa wanaonyesha kwa njia gani muhimu kwamba wao ni watumishi wa Yehova?

¹¹ Pia, Yesu aliwaambia hivi wafuasi wake: “Kwa hilo wote watajua kwamba nyinyi ni wanafunzi wangu, mkiwa na upendo miongoni mwenu wenyewe.” (Yohana 13:35) Wao si kama waumini wa dini za ulimwengu huu ambao wanawaua waumini wenzao vitani kwa sababu tu wametoka mataifa mengine! Neno la Mungu lasema: “Watoto wa Mungu na watoto wa Ibilisi ni dhahiri kwa jambo hili: Kila mtu ambaye haendelezi uadilifu hatokani na Mungu, wala yeye ambaye hapendi ndugu yake. . . . Twapaswa tupendane; si kama Kaini, ambaye alitokana na yule mwovu akamchinja ndugu yake.”—1 Yohana 3:10-12.

12. Wakati wa dhiki kubwa, Yehova atachukua hatua gani dhidi ya dini ambazo ni kama ‘miti’ inayozaa matunda yasiyofaa?

¹² Yesu alisema: “Kila mti mwema hutokeza matunda bora, lakini kila mti uliooza hutokeza matunda yasiyofaa kitu; mti mwema hauwezi kuzaa matunda yasiyofaa kitu, wala mti uliooza hauwezi kutokeza matunda bora. Kila mti usiotokeza matunda bora hukatwa na kutupwa ndani ya moto. Basi, kwa kweli kwa matunda yao mtawatambua watu hao.” (Mathayo 7:17-20) Dini za ulimwengu huu zinazaa matunda yanayoonyesha kwamba dini hizo ni ‘miti’ iliyooza. Yehova ataziharibu hivi karibuni wakati wa dhiki kubwa.—Ufunuo 17:16.

13. Umati mkubwa wanaonyeshaje kwamba “wamesimama mbele ya kiti cha enzi” cha Yehova kwa umoja?

¹³ Andiko la Ufunuo 7:9-15 linataja mambo ambayo yanafanya umati mkubwa uokolewe. Wanaonekana wakiwa “wamesimama mbele ya kiti cha ufalme” cha Yehova kwa umoja, wakiitetea enzi yake kuu ya ulimwengu. “Wamefua kanzu zao na kuzifanya nyeupe katika damu ya Mwana-Kondoo,” hilo lamaanisha kwamba wanatambua kuwa dhabihu ya Yesu inafuta dhambi. (Yohana 1:29) Wamejiweka wakfu kwa Mungu na wameonyesha hivyo kwa kuzamishwa katika maji. Kwa hiyo, kanzu zao nyeupe zinaonyesha kwamba wana msimamo safi mbele za Mungu, nao wanamtolea “utumishi mtakatifu mchana na usiku.” Je, unaweza kukuza zaidi sifa hizo katika maisha yako?

Faida za Sasa

14. Taja baadhi ya faida za pekee ambazo watumishi wa Yehova wanapata sasa?

¹⁴ Yaelekea kwamba umeona faida za pekee ambazo wale wanaomtumikia Yehova wanapata sasa. Kwa mfano, ulipojifunza kuhusu makusudi ya Yehova yenye uadilifu, ulipata kufahamu kwamba kuna tumaini zuri sana la wakati ujao. Kwa hiyo, sasa una kusudi halisi maishani—kumtumikia Mungu wa kweli ukiwa na tumaini lenye kufurahisha la kuishi milele katika paradiso duniani. Naam, Mfalme Yesu Kristo ‘atawaongoza [umati mkubwa] kwenye mabubujiko ya maji ya uhai.’—Ufunuo 7:17.

15. Mashahidi wa Yehova wanapata faida gani kwa kutii kanuni za Biblia kuhusu maadili na kutojiingiza katika mambo ya kisiasa?

¹⁵ Umati mkubwa unafurahia upendo, umoja, na amani ambayo watumishi wa Yehova wanayo ulimwenguni pote. Sote tunapata chakula kilekile cha kiroho, kwa hiyo sote tunatii sheria na kanuni zilezile zilizo katika Neno la Mungu. Ndiyo sababu hatuna migawanyiko kati yetu kwa sababu ya mambo ya kisiasa au ya kitaifa. Isitoshe, tunaishi kulingana na kanuni bora za maadili ambazo Mungu anataka watu wake wafuate. (1 Wakorintho 6:9-11) Badala ya kukumbwa na vita, migawanyiko, na ukosefu wa maadili ambao umeenea ulimwenguni pote, watu wa Yehova wanafurahia ile inayoitwa paradiso ya kiroho. Hebu ona jinsi andiko la Isaya 65:13, 14 linavyofafanua paradiso hiyo.

16. Washiriki wa umati mkubwa wana tumaini gani licha ya matatizo ya kawaida ya maisha?

¹⁶ Kwa kweli, watumishi wa Yehova hapa duniani si wakamilifu. Na wanaathiriwa na matatizo ya kawaida ya maisha katika ulimwengu huu, kama vile magumu au vita kati ya mataifa. Wanakumbwa pia na magonjwa, mateso, na kifo. Lakini wanaamini kwamba katika ulimwengu mpya, Mungu “atafuta kabisa kila chozi kutoka katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe.”—Ufunuo 21:4.

17. Hata wapatwe na nini sasa, wale wanaomtumikia Mungu wa kweli watakuwa na maisha ya aina gani wakati ujao?

¹⁷ Hata ukifa sasa kwa sababu ya uzee, ugonjwa, msiba, au mateso, Yehova atakufufua katika Paradiso. (Matendo 24:15) Halafu utaendelea kufurahia karamu ya kiroho wakati wa Utawala wa Miaka Elfu wa Kristo. Upendo wako kwa Mungu utazidi kuongezeka unapoona makusudi yake matukufu yakitimizwa. Nawe utazidi kumpenda Yehova kwa sababu ya baraka za kimwili ambazo ataandaa wakati huo. (Isaya 25:6-9) Watu wa Mungu watafurahia maisha mazuri ajabu wakati ujao!

Mazungumzo ya Kurudia

• Biblia inahusianisha umati mkubwa na tukio gani la pekee?

• Ni lazima tufanye nini sasa ikiwa tunataka kuwa miongoni mwa umati mkubwa wenye kibali cha Mungu?

• Baraka ambazo umati mkubwa wanafurahia sasa na watakazofurahia katika ulimwengu mpya wa Mungu ni zenye thamani kadiri gani kwako?

[Picha katika ukurasa wa 123]

Umati mkubwa wenye mamilioni ya watu unamwabudu Mungu wa kweli kwa umoja