Sura ya Kumi
Ufalme “Ambao Hautaangamizwa Milele”
1. Mambo yanayotukia ulimwenguni kila siku yanathibitisha nini?
MAMBO yanayotukia ulimwenguni kila siku yanathibitisha kwamba wanadamu hawajapata furaha kwa kuukataa utawala wa Yehova na kujaribu kujitawala. Hakuna serikali ya wanadamu hata moja ambayo imewafaidi watu wote. Wanadamu wamefanya maendeleo makubwa sana ya kisayansi, lakini wameshindwa kukomesha magonjwa au kifo, hata kwa mtu mmoja tu. Utawala wa wanadamu haujakomesha vita, jeuri, uhalifu, ufisadi, au umaskini. Wakazi wa nchi nyingi wangali wanatawaliwa na serikali zenye kukandamiza. (Mhubiri 8:9) Vifaa vya kisasa, pupa, na kukosa maarifa kumesababisha kuchafuliwa kwa udongo, maji na hewa. Watu wengi wanashindwa kupata mahitaji ya maisha kwa sababu uchumi umeharibika. Baada ya maelfu ya miaka ya utawala wa wanadamu, maneno yafuatayo yamethibitika kuwa kweli: “Njia ya mwanadamu haimo katika nafsi yake; kuelekeza hatua zake si katika uwezo wa mwanadamu.”—Yeremia 10:23.
2. Suluhisho pekee la matatizo ya wanadamu ni nini?
2 Suluhisho ni nini? Ni Ufalme wa Mungu. Yesu aliwafundisha wafuasi wake wasali hivi: “Acha ufalme wako uje. Mapenzi yako na yatendeke, kama ilivyo katika mbingu, pia juu ya dunia.” (Mathayo 6:9, 10) Ufalme wa kimbingu wa Mungu ambao unaitwa “mbingu mpya” kwenye 2 Petro 3:13, utaitawala “dunia mpya,” yaani, jamii ya wanadamu waadilifu. Ufalme wa kimbingu wa Mungu ni muhimu sana hivi kwamba ulikuwa jambo kuu la mahubiri ya Yesu. (Mathayo 4:17) Alituhimiza tuutangulize maishani mwetu aliposema hivi: “Basi, fulizeni kutafuta kwanza ufalme na uadilifu wake.”—Mathayo 6:33.
3. Kwa nini ni muhimu sana kujifunza kuhusu Ufalme wa Mungu sasa?
3 Ni muhimu sana kujifunza kuhusu Ufalme wa Mungu sasa kwa sababu hivi karibuni Ufalme huo utabadili utawala wa dunia kwa umilele wote. Andiko la Danieli 2:44 latabiri hivi: “Katika siku za wafalme hao [serikali zinazotawala sasa] Mungu wa mbinguni atausimamisha ufalme [mbinguni] ambao hautaangamizwa milele, wala watu wengine hawataachiwa enzi yake [wanadamu hawataitawala tena dunia]; bali utavunja falme hizi zote [zilizopo] vipande vipande na kuziharibu, nao utasimama milele na milele.” Kwa hiyo siku hizi za mwisho zitafikia kikomo Ufalme huo utakapoharibu kabisa ulimwengu huu mwovu. Kisha, Ufalme huo wa kimbingu utaitawala dunia bila upinzani. Hatuna budi kushukuru kwa sababu Ufalme huo utaleta kitulizo hivi karibuni.
4. Ni nini kilichotukia mbinguni kuhusiana na Ufalme mwaka wa 1914, na kwa nini tukio hilo ni muhimu kwetu?
4 Mnamo mwaka wa 1914, Kristo Yesu alitawazwa kuwa Mfalme na akapewa mamlaka ya ‘kuwa na enzi kati ya adui zake.’ (Zaburi 110:1, 2) “Siku za mwisho” za ulimwengu huu mwovu zilianza mwaka huohuo. (2 Timotheo 3:1-5, 13) Isitoshe, mambo ambayo Danieli aliona katika njozi ya kiunabii yalitukia mbinguni wakati huohuo. Yule ‘Mzee wa Siku,’ Yehova Mungu, alimpa Mwana wa binadamu, Yesu Kristo, “mamlaka, na utukufu, na ufalme, ili watu wa kabila zote, na taifa zote, na lugha zote, wamtumikie.” Danieli aliandika hivi kuhusu njozi hiyo: “Mamlaka yake ni mamlaka ya milele, ambayo hayatapita kamwe, na ufalme wake ni ufalme usioweza kuangamizwa.” (Danieli 7:13, 14) Mungu atatumia Ufalme huo wa kimbingu mikononi mwa Kristo Yesu kuwapa wale wanaopenda uadilifu vitu vingi vizuri ambavyo alikusudia wazazi wetu wa kwanza wafurahie katika Paradiso.
5. Tunapendezwa sana kujua mambo gani kuhusu Ufalme huo, na kwa nini?
5 Je, ungependa kuwa raia mwaminifu wa Ufalme huo? Ikiwa ndivyo, hapana shaka kwamba utapendezwa kujua jinsi ambavyo serikali hiyo ya kimbingu imepangwa na jinsi inavyofanya kazi. Utapenda kujua inafanya nini sasa, na itafanya nini wakati ujao, na matakwa ya serikali hiyo ambayo unahitaji kutimiza. Uthamini wako unapaswa kuongezeka zaidi kadiri unavyouchunguza Ufalme huo kwa makini. Ukithamini utawala wake utachochewa kuwajulisha wengine mambo mazuri ambayo Ufalme wa Mungu utawafanyia wanadamu watiifu.—Zaburi 48:12, 13.
Watawala wa Ufalme wa Mungu
6. (a) Maandiko yanaonyeshaje kwamba Ufalme wa Kimesiya unawakilisha enzi kuu ya Yehova? (b) Mambo tunayojifunza kuhusu Ufalme yanapasa kutuchochea kufanya nini?
6 Mojawapo ya mambo ya kwanza ambayo tunajifunza ni kwamba Ufalme huo wa Kimesiya unawakilisha enzi kuu ya Yehova mwenyewe. Yehova ndiye aliyempa Mwanaye “mamlaka, na utukufu, na ufalme.” Baada ya Mwana wa Mungu kupewa mamlaka ya kuanza kutawala akiwa Mfalme, sauti zilitangaza hivi huko mbinguni: “Ufalme wa ulimwengu ulipata kuwa ufalme wa Bwana wetu [Yehova Mungu] na wa Kristo wake, naye [Yehova] atatawala akiwa mfalme milele na milele.” (Ufunuo 11:15) Kwa hiyo kila jambo tunalojifunza kuhusu Ufalme huo na mambo ambayo unatimiza yanaweza kutufanya tumkaribie Yehova zaidi. Yale tunayojifunza yanapasa kutuchochea tujitiishe kwa utawala wake milele.
7. Kwa nini tunapendezwa sana kujua kwamba Yehova amemtawaza Yesu Kristo kuwa Mtawala Msaidizi?
7 Kumbuka pia kwamba Yehova amemtawaza Yesu Kristo kuwa Mtawala Msaidizi. Yesu anajua mahitaji yetu vizuri zaidi kuliko tunavyoyajua kwa sababu akiwa Stadi wa Kazi, Mungu alimtumia kuumba dunia na wanadamu. Isitoshe, tangu wanadamu walipoumbwa, Yesu alionyesha kwamba ‘furaha yake ilikuwa pamoja na wanadamu.’ (Mithali 8:30, 31; Wakolosai 1:15-17) Anawapenda sana wanadamu hivi kwamba alikuja duniani kwa hiari na kutoa uhai wake uwe fidia kwa ajili yetu. (Yohana 3:16) Kwa hiyo alitukomboa kutoka katika dhambi na kifo na akatupatia nafasi ya kuishi milele.—Mathayo 20:28.
8. (a) Tofauti na serikali za wanadamu, kwa nini serikali ya Mungu itadumu? (b) Kuna uhusiano gani kati ya “mtumwa mwaminifu na mwenye busara” na serikali hiyo ya kimbingu?
8 Ufalme wa Mungu ni serikali thabiti yenye kudumu. Serikali hiyo itadumu kwa sababu Yehova hawezi kufa. (Zaburi 146:3-5, 10) Tofauti na wafalme wanadamu, Yesu Kristo, ambaye amekabidhiwa ufalme na Mungu, hawezi kufa. (Waroma 6:9; 1 Timotheo 6:15, 16) Kristo atatawala kutoka mbinguni pamoja na watu wengine 144,000, watumishi waaminifu wa Mungu ambao wanatoka katika “kila kabila na ulimi na watu na taifa.” Wao pia wanapewa uhai usioweza kufa. (Ufunuo 5:9, 10; 14:1-4; 1 Wakorintho 15:42-44, 53) Wengi wao tayari wako mbinguni, na wale wanaobaki duniani leo ni washiriki wa “mtumwa mwaminifu na mwenye busara,” ambaye anashughulikia kwa uaminifu masilahi ya Ufalme duniani.—Mathayo 24:45-47.
9, 10. (a) Ufalme utaondoa mambo yapi yanayoleta migawanyiko na yanayoiharibu dunia? (b) Tunapaswa kuepuka mambo yapi ikiwa hatutaki kuwa maadui wa Ufalme wa Mungu?
9 Hivi karibuni, kwa wakati wake barabara, Yehova atayatuma majeshi yake ya kimbingu ya kuangamiza ili yaisafishe dunia. Yatawaangamiza milele wanadamu ambao wanakataa kimakusudi utawala wake, na ambao wanadharau maandalizi yake ya upendo kupitia Yesu Kristo. (2 Wathesalonike 1:6-9) Hiyo itakuwa siku ya Yehova, siku ambayo imetarajiwa sana ya kutetea Enzi yake Kuu ya Ulimwengu. “Tazama, siku ya BWANA inakuja, siku kali, ya hasira na ghadhabu kuu, . . . kuwaharibu watu wake, wenye dhambi, wasikae ndani yake.” (Isaya 13:9) “Siku ile ni siku ya ghadhabu, siku ya fadhaa na dhiki, siku ya uharibifu na ukiwa, siku ya giza na utusitusi, siku ya mawingu na giza kuu.”—Sefania 1:15.
10 Dini zote za uwongo na serikali zote za wanadamu na majeshi yake zitaharibiwa milele kwa sababu zimeongozwa na mtawala mwovu asiyeonekana wa ulimwengu huu. Watu wote ambao wanajitambulisha kuwa sehemu ya ulimwengu huu kwa kuishi maisha ya ubinafsi, ya udanganyifu, yenye utovu wa maadili wataangamizwa. Shetani na mashetani wake hawataweza kuathiri wanadamu kwa sababu watafungwa kwa miaka elfu moja. Kisha Ufalme wa Mungu utaongoza mambo yote duniani. Wote wanaopenda uadilifu watapata kitulizo kilichoje!—Ufunuo 18:21, 24; 19:11-16, 19-21; 20:1, 2.
Malengo ya Ufalme Yatatimizwaje?
11. (a) Ufalme wa Kimesiya utatimizaje kusudi la Yehova kwa dunia? (b) Ufalme huo utawafaidije wakazi wa dunia?
11 Ufalme wa Kimesiya utatimiza kabisa kusudi la Mungu la awali kwa dunia. (Mwanzo 1:28; 2:8, 9, 15) Kufikia sasa, wanadamu wameshindwa kutimiza kusudi hilo. Hata hivyo, ‘dunia ijayo itakayokaliwa’ itatawaliwa na Mwana wa binadamu, Yesu Kristo. Wote watakaookoka hukumu ya Yehova dhidi ya ulimwengu huu wa kale watafanya kazi kwa umoja chini ya Kristo akiwa Mfalme. Watafurahia kutii maagizo yake na kuifanya dunia yote iwe paradiso. (Waebrania 2:5-9) Wanadamu wote watafurahia kazi ya mikono yao, watafurahia chakula tele kitakachokuwapo duniani.—Zaburi 72:1, 7, 8, 16-19; Isaya 65:21, 22.
12. Raia wa Ufalme watafanywaje wawe wakamilifu kiakili na kimwili?
12 Adamu na Hawa waliumbwa wakiwa wakamilifu, na Mungu alikusudia wazao wao wajaze dunia, wote wakiwa wakamilifu kiakili na kimwili. Kusudi hilo litatimizwa kwa utukufu hivi karibuni Ufalme utakapotawala. Ili kusudi hilo litimie ni lazima Kristo ambaye ni Mfalme na Kuhani Mkuu aondoe athari zote za dhambi. Kwa subira, atawasaidia raia wake watiifu wafaidike na dhabihu aliyotoa ili kulipia dhambi, yaani, uhai wake wa kibinadamu.
13. Ni baraka gani zitakazoletwa na utawala wa Ufalme?
13 Ufalme utawaletea wakazi wa dunia baraka nyingi sana. “Ndipo macho ya vipofu yatafumbuliwa, na masikio ya viziwi yatazibuliwa. Ndipo mtu aliye kilema ataruka-ruka kama kulungu, na ulimi wake aliye bubu utaimba.” (Isaya 35:5, 6) Mwili ambao umeumbuliwa na uzee au magonjwa utakuwa laini kuliko mwili wa mtoto, magonjwa sugu yatatoweka na watu watakuwa na afya bora kabisa. “Nyama ya mwili wake itakuwa laini kuliko ya mtoto; huzirudia siku za ujana wake.” (Ayubu 33:25) Siku itafika ambapo hakuna mtu atakuwa na sababu ya kusema, “Mimi mgonjwa.” Kwa nini? Kwa sababu wanadamu wanaomcha Mungu wataondolewa dhambi yenye kulemea na matokeo yake yenye kuhuzunisha. (Isaya 33:24; Luka 13:11-13) Naam, Mungu “atafuta kabisa kila chozi katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe. Mambo ya zamani yamepitilia mbali.”—Ufunuo 21:4.
14. Kuwa mkamilifu kwahusisha nini?
14 Hata hivyo, kuwa mkamilifu hakumaanishi kuwa tu na afya nzuri ya kimwili na ya kiakili. Kwahusisha pia kuiga sifa za Yehova kikamili, kwa sababu tuliumbwa ‘kwa mfano na sura ya Mungu.’ (Mwanzo 1:26) Tutahitaji kuelimishwa sana ili tufaulu kufanya hivyo. “Uadilifu utakaa” katika ulimwengu huo mpya. Kwa hiyo ‘watu wakaao duniani watajifunza haki,’ kama Isaya alivyotabiri. (2 Petro 3:13; Isaya 26:9) Sifa hiyo huleta amani—kati ya watu wa makabila yote, kati ya marafiki, katika familia, na zaidi ya yote, kati yetu na Mungu. (Zaburi 85:10-13; Isaya 32:17) Wale wanaojifunza uadilifu watafundishwa mapenzi ya Mungu hatua kwa hatua. Upendo wa Yehova unapoingia moyoni mwao, watafuata njia zake maishani mwao. Wataweza kusema kama Yesu alivyosema, ‘Sikuzote mimi hufanya mambo yale yanayompendeza Baba yangu.’ (Yohana 8:29) Maisha yatafurahisha sana wanadamu wote watakapofanya hivyo.
Mambo Ambayo Ufalme Umetimiza Tayari
15. Ukitumia maswali yaliyo kwenye fungu hili, kazia mambo ambayo Ufalme umetimiza na yale tunayopaswa kuwa tukifanya sasa.
15 Ufalme wa Mungu na raia wake umetimiza kazi kubwa sana. Maswali na maandiko yafuatayo yatakukumbusha baadhi ya mambo hayo, pamoja na mambo ambayo raia wa Ufalme wanaweza kufanya na wanayopaswa kuwa wakifanya sasa.
Ufalme wa Mungu ulichukua hatua dhidi ya nani kwanza, na matokeo yalikuwa nini? (Ufunuo 12:7-10, 12)
Ni washiriki wa mwisho wa kikundi gani ambao wamekuwa wakikusanywa tangu Kristo alipotawazwa? (Ufunuo 14:1-3)
Kulingana na Mathayo 25:31-33, Yesu alitabiri kwamba angefanya kazi gani baada ya dhiki kubwa kuanza?
Ni kazi gani inayofanywa leo kabla ya jambo hilo? Ni nani wanaoshiriki katika kazi hiyo? (Zaburi 110:3; Mathayo 24:14; Ufunuo 14:6, 7)
Kwa nini wapinzani wa kisiasa na wa kidini wameshindwa kukomesha kazi ya kuhubiri? (Zekaria 4:6; Matendo 5:38, 39)
Wale wanaojitiisha kwa utawala wa Ufalme wamefanya mabadiliko gani maishani mwao? (Isaya 2:4; 1 Wakorintho 6:9-11)
Ufalme wa Miaka Elfu
16. (a) Kristo atatawala kwa muda gani? (b) Ni mambo gani mazuri yatakayotimizwa wakati huo na baadaye?
16 Baada ya Shetani na mashetani wake kufungwa, Yesu Kristo na warithi wenzake 144,000 watatawala wakiwa wafalme na makuhani kwa miaka elfu. (Ufunuo 20:6) Katika kipindi hicho, wanadamu watasaidiwa kufikia ukamilifu, na dhambi na kifo kilichosababishwa na Adamu vitakomeshwa milele. Mwishoni mwa Utawala wa Miaka Elfu, baada ya kutimiza kikamili kazi yake akiwa Mfalme-Kuhani wa Kimesiya, Yesu ‘atamkabidhi Baba yake ufalme, ili Mungu apate kuwa vitu vyote kwa kila mtu.’ (1 Wakorintho 15:24-28) Wakati huo, Shetani atafunguliwa kwa muda mfupi ili awajaribu wanadamu waliokombolewa ili ijulikane kama wanaunga mkono enzi kuu ya Yehova au la. Baada ya jaribu hilo la mwisho, Yehova atamharibu Shetani na waasi waliomuunga mkono. (Ufunuo 20:7-10) Wale waliounga mkono enzi kuu ya Yehova—haki yake ya kutawala—watakuwa wamethibitisha kwamba wao ni waaminifu kabisa kwa Mungu. Kisha watakuwa na uhusiano unaofaa na Yehova, wakiwa wana na binti zake, na atawapa kibali cha kuishi milele.—Waroma 8:21.
17. (a) Baada ya miaka elfu kupita, ni nini kitakachoupata Ufalme huo? (b) Kwa nini ni kweli kwamba Ufalme huo “hautaangamizwa milele”?
17 Basi, kazi ya Yesu na ya wale 144,000 kuhusiana na dunia itabadilika. Watafanya kazi gani baadaye? Biblia haisemi. Lakini tukiunga mkono kwa uaminifu enzi kuu ya Yehova, tutakuwa hai baada ya Utawala wa Miaka Elfu kumalizika na tutajua kusudi la Yehova kwa watawala hao na ulimwengu wote. Hata hivyo, utawala wa Kristo wa miaka elfu ni wa “milele” na Ufalme wake ‘hautaangamizwa.’ (Danieli 7:14) Kwa njia gani? Kwanza, mamlaka haitaachiwa watu wengine ambao wana makusudi tofauti, kwa kuwa Yehova ndiye atakayekuwa Mtawala. Pili, Ufalme huo “hautaangamizwa milele” kwa sababu mambo ambayo utatimiza yatadumu milele. (Danieli 2:44) Na yule Mfalme-Kuhani wa Kimesiya, akiwa na wafalme-makuhani wenzake, wataheshimiwa milele kwa sababu walimtumikia Yehova kwa uaminifu.
Mazungumzo ya Kurudia
• Kwa nini Ufalme wa Mungu ndio suluhisho pekee la matatizo ya wanadamu? Mfalme wa Ufalme wa Mungu alianza kutawala lini?
• Ni nini kinachokupendeza hasa kuhusiana na Ufalme wa Mungu na mambo ambayo utatimiza?
• Ufalme umetimiza mambo gani sasa, nasi tunahusikaje?
[Picha katika ukurasa wa 93]
Watu wote watajifunza uadilifu wakati wa utawala wa Ufalme wa Mungu