Walifanya Mapenzi ya Yehova

Danieli Alimtumikia Mungu kwa Udumifu

MWENDO wa historia kubadilika kwa usiku mmoja ni jambo la nadra. Hata hivyo, hilo lilitukia katika 539 K.W.K., Milki ya Babiloni ilipopinduliwa na Wamedi na Waajemi katika muda wa saa chache tu. Kufikia mwaka huo, Danieli, nabii wa Yehova, alikuwa amekuwa akiishi akiwa mhamishwa Myahudi katika Babiloni kwa karibu miaka 80. Yamkini katika miaka yake ya 90, Danieli alikuwa anakaribia kukabili mojapo majaribu makubwa zaidi ya uaminifu-maadili wake kwa Mungu.

Baada ya anguko la Babiloni, mwanzoni mambo yalionekana yakiwa shwari kwa Danieli. Mfalme mpya alikuwa Dario Mmedi, mwanamume mwenye umri wa miaka 62 aliyempendelea Danieli. Mojapo matendo ya kwanza ya Dario akiwa mfalme lilikuwa kuweka rasmi maamiri 120 na kukweza wanaume watatu kwenye cheo cha mawaziri.a Danieli alikuwa mmoja wa hao wanaume watatu waliopendelewa. Akitambua uwezekano usio na kifani ambao Danieli alikuwa nao, Dario hata alikusudia kumpa wadhifa wa waziri mkuu! Hata hivyo, wakati uo huo jambo fulani lilitendeka ambalo lilibadili ghafula mipango ya huyo mfalme.

Njama

Mawaziri wenzake Danieli, wakiwa wameambatana na kikundi kikubwa cha maamiri, wamfikia mfalme wakiwa na wazo lenye hila. Walimsihi Dario atoe sheria wakiweka masharti haya: “Mtu ye yote atakayeomba dua kwa Mungu awaye yote, au kwa mtu awaye yote, katika muda wa siku thelathini, ila kwako, Ee mfalme atatupwa katika tundu la simba.” (Danieli 6:7) Huenda ikawa Dario aliona kwamba watu hao walikuwa wakimhakikishia uaminifu-mshikamanifu wao kwake. Labda pia alisababu kwamba sheria hiyo ingemsaidia, akiwa mtu wa kigeni, kuimarisha wadhifa wake akiwa mkuu wa hiyo milki.

Hata hivyo, mawaziri na maamiri hawakutokeza sheria hiyo ili kuimarisha wadhifa wa mfalme. Walikuwa ‘wakitafuta sana kupata sababu za kumshitaki Danieli kwa habari za mambo ya ufalme; lakini hawakuweza kuona sababu wala kosa; kwa maana alikuwa mwaminifu, wala halikuonekana kosa wala hatia ndani yake.’ Kwa hiyo watu hao wenye hila wakasababu hivi: “Hatutapata sababu ya kumshitaki Danieli huyo, tusipoipata katika mambo ya sheria ya Mungu wake.” (Danieli 6:4, 5) Wakiwa wanajua kwamba Danieli alisali kwa Yehova kila siku, walijaribu kufanya jambo hilo kuwa uhalifu ustahilio hukumu ya kifo.

Labda mawaziri na maamiri walikuwa na uhasama kumwelekea Danieli kwa sababu ‘alipata sifa kuliko wao, kwa kuwa roho bora ilikuwa ndani yake; naye mfalme akaazimu kumweka juu ya ufalme wote.’ (Danieli 6:3) Huenda ikawa ufuatiaji wa haki wa Danieli ulitokeza kizuizi kisichopendeza dhidi ya ufisadi na rushwa. Liwalo lote, watu hao walimsadikisha mfalme atie sahihi sheria hiyo, akiifanya kuwa sehemu ya “sheria ya Wamedi na Waajemi, isiyoweza kubadilika.”—Danieli 6:8, 9.

Danieli Abaki Imara

Baada ya kujua juu ya sheria mpya, je, Danieli aliacha kusali kwa Yehova? La hasha! Akiwa amepiga magoti katika kijumba cha paa la nyumba yake, alisali kwa Mungu mara tatu kwa siku, “kama alivyokuwa akifanya tokea hapo.” (Danieli 6:10) Alipokuwa akisali, maadui wake “wakakusanyika pamoja, wakamwona Danieli akiomba dua, na kusihi mbele za Mungu wake.” (Danieli 6:11) Walipomjulisha mfalme habari hiyo, Dario alitaabika kwamba sheria aliyokuwa ameitia sahihi ingetumika kwa Danieli. “Akajitaabisha kumwokoa hata jua likachwa,” simulizi latuambia. Lakini hata mfalme hangeweza kuitangua sheria ambayo alikuwa ameanzisha. Kwa hiyo Danieli akapelekwa kwenye tundu la simba, yaonekana palikuwa mahali palipokuwa pamedindia au mahali chini ya ardhi. “Mungu wako unayemtumikia daima [“kwa udumifu,” NW], yeye atakuponya,” mfalme akamhakikishia Danieli.—Danieli 6:12-16.

Baada ya kukesha usiku kucha na kufunga, Dario alienda kwa haraka mpaka penye lile tundu. Danieli alikuwa hai na mzima! Itikio la mfalme lilikuwa la mara moja. Aliamuru maadui wa Danieli na familia zao watupwe kwenye tundu la simba ikiwa adhabu. Dario pia alijulisha kotekote katika milki hiyo kwamba “katika mamlaka yote ya ufalme wangu watu watetemeke na kuogopa mbele za Mungu wa Danieli.”—Danieli 6:17-27.

Somo Kwetu Sisi

Danieli alikuwa kielelezo chema cha uaminifu. Hata mfalme, ambaye hakumwabudu Yehova, alitambua kuwa Danieli alimtumikia Mungu “kwa udumifu.” (Danieli 6:16, 20, NW) Neno la msingi la Kiaramu litafsiriwalo “udumifu” humaanisha “kusonga katika mviringo.” Hudokeza hali ya kuendelea. Jinsi hilo linavyofafanua vema uaminifu-maadili usiovunjika wa Danieli kwa Yehova!

Danieli alisitawisha kiolezo cha udumifu muda mrefu kabla ya kutupwa katika tundu la simba. Akiwa mtekwa mchanga huko Babiloni, alikataa kula chakula au kunywa kinywaji kilichokatazwa na Sheria ya Kimusa au kilichonajisiwa na desturi za kipagani. (Danieli 1:8) Baadaye, alimtangazia mfalme Mbabiloni Nebukadreza ujumbe wa Mungu kwa ujasiri. (Danieli 4:19-25) Muda wa saa chache tu kabla ya anguko la Babiloni, Danieli alipiga mbiu bila hofu juu ya hukumu ya Mungu kwa Mfalme Belshaza. (Danieli 5:22-28) Kwa hiyo Danieli alipokabili tundu la simba, aliendelea katika mwendo wa uaminifu aliokuwa amesitawisha.

Wewe pia waweza kumtumikia Yehova kwa udumifu. Je, wewe ni kijana? Basi tenda sasa ili usitawishe kiolezo cha udumifu kwa kukataa mashirika mabaya ya ulimwengu huu na mwenendo wenye kufisidi. Ikiwa umekuwa ukimtumikia Mungu kwa muda fulani, dumisha kiolezo cha uvumilivu wenye uaminifu. Usikate tamaa, kwa kuwa kila jaribu tukabililo hutupa fursa ya kumwonyesha Yehova kwamba tumeazimia kumtumikia kwa udumifu.—Wafilipi 4:11-13.

[Maelezo ya Chini]