Sura ya Kwanza
Umoja wa Ibada Katika Nyakati Zetu Unamaanisha Nini?
1, 2. (a) Ni jambo gani lenye kusisimua linalotukia nyakati zetu? (b) Watu wanyofu wana tumaini gani zuri?
JAMBO fulani lenye kusisimua sana linatukia ulimwenguni pote. Mamilioni ya watu kutoka mataifa yote, makabila yote na lugha zote wanaungana katika ibada. Idadi yao inaongezeka kila mwaka. Biblia inasema kwamba watu hao ni “mashahidi” wa Yehova na inawaita “umati mkubwa.” Wanamtolea Mungu “utumishi mtakatifu mchana na usiku.” (Isaya 43:10-12; Ufunuo 7:9-15) Kwa nini wanafanya hivyo? Ni kwa sababu wametambua kwamba Yehova ndiye Mungu wa pekee wa kweli. Hilo linawachochea kuishi kupatana na kanuni zake za uadilifu. Wamejifunza pia kwamba tunaishi katika “siku za mwisho” za ulimwengu huu mwovu, na hivi karibuni Mungu atauharibu, na kuleta ulimwengu mpya utakaokuwa paradiso.—2 Timotheo 3:1-5, 13; 2 Petro 3:10-13.
2 Neno la Mungu linaahidi hivi: “Bado kitambo kidogo asiye haki hatakuwapo . . . Bali wenye upole watairithi nchi, watajifurahisha kwa wingi wa amani.” (Zaburi 37:10, 11) “Wenye haki watairithi nchi, nao watakaa humo milele.” (Zaburi 37:29) “[Mungu] atafuta kabisa kila chozi kutoka katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe. Mambo ya zamani yamepitilia mbali.”—Ufunuo 21:4.
3. Umoja wa ibada unatimizwaje leo?
3 Wale wanaounganishwa katika ibada ya kweli sasa ndio watakaokuwa wakazi wa kwanza wa ulimwengu huo mpya. Wamejifunza mapenzi ya Mungu na wanajitahidi kuyafanya kadiri wawezavyo. Yesu alisema hivi kuhusu umuhimu wa kujifunza mapenzi ya Mungu na kuyafanya: ‘Hii yamaanisha uhai udumuo milele, wao kuendelea kutwaa ujuzi juu yako wewe, Mungu pekee wa kweli, na juu ya yule uliyemtuma, Yesu Kristo.’ (Yohana 17:3) Mtume Yohana aliandika hivi: “Ulimwengu unapitilia mbali na ndivyo na tamaa yao, lakini yeye ambaye hufanya mapenzi ya Mungu hudumu milele.”—1 Yohana 2:17.
Umoja wa Ibada Wamaanisha Nini?
4. (a) Kukusanywa kwa watu wengi sana hivyo kwenye umoja wa ibada kunaonyesha nini? (b) Biblia inaelezaje kukusanywa huko?
4 Kukusanywa kwa watu wengi sana hivyo kwenye umoja wa ibada kunaonyesha nini? Kunathibitisha waziwazi kwamba tunakaribia sana mwisho wa ulimwengu huu mwovu, na punde si punde Mungu ataleta ulimwengu mpya. Tumeona utimizo wa unabii mbalimbali wa Biblia uliotabiri tukio hilo muhimu la kukusanywa kwa watu. Mmojawapo wa unabii huo wasema hivi: “Itakuwa katika siku [hizi] za mwisho, ya kwamba mlima wa nyumba ya BWANA [ibada ya kweli iliyokwezwa] utawekwa imara juu ya milima [juu ya ibada nyingine yoyote], . . . na watu wa mataifa watauendea makundi makundi. Na mataifa mengi watakwenda na kusema, Njoni, twende juu mlimani kwa BWANA, na nyumbani kwa Mungu wa Yakobo; naye atatufundisha njia zake, nasi tutakwenda katika mapito yake.”—Mika 4:1, 2; Zaburi 37:34.
5, 6. (a) Mataifa yanamjia Yehova jinsi gani? (b) Ni maswali gani tunayopaswa kujiuliza?
5 Si mataifa mazima-mazima yanayokuja ili kuabudu katika nyumba ya Yehova ya kiroho, bali ni mamilioni ya watu kutoka katika mataifa hayo. Mioyo yao inaguswa sana wanapojifunza utu wa Yehova wenye kuvutia na kusudi lake lenye upendo. Wanajitahidi kujifunza kwa unyenyekevu matakwa ya Mungu. Wanasali hivi kama mtunga-zaburi: “Unifundishe kuyatenda mapenzi yako, kwa maana ndiwe Mungu wangu.”—Zaburi 143:10.
6 Je, u miongoni mwa umati mkubwa ambao Yehova anakusanya ili wamwabudu kwa umoja? Je, unatii maagizo ya Neno la Yehova na hivyo kuonyesha unakubali kabisa kwamba linatoka kwake? ‘Utakwenda katika mapito yake’ kwa kadiri gani?
Jinsi Umoja wa Ibada Unavyotimizwa
7. (a) Umoja wa ibada utatimizwa kwa kadiri gani hatimaye? (b) Kwa nini ni muhimu kumwabudu Yehova sasa, na tunawezaje kuwasaidia wengine wamwabudu?
7 Yehova anakusudia viumbe wote wenye akili waungane katika ibada ya kweli. Tunatamani sana wakati ambapo wote wanaoishi watamwabudu Mungu wa pekee wa kweli. (Zaburi 103:19-22) Lakini kwanza ni lazima Yehova aondoe wote wanaokataa kufanya mapenzi yake maadilifu. Kwa rehema, anatujulisha mapema hatua atakayochukua ili watu wote wapate nafasi ya kubadili mwenendo wao. (Isaya 55:6, 7) Sasa, “kila taifa na kabila na lugha na watu” wanahimizwa hivi kwa dharura: “Hofuni Mungu na kumpa utukufu, kwa sababu saa ya hukumu yake imewasili, na kwa hiyo mwabuduni Yeye aliyezifanya mbingu na dunia na bahari na mabubujiko ya maji.” (Ufunuo 14:6, 7) Je, umekubali mwaliko huo? Ikiwa ndivyo, basi una pendeleo la kuwaalika wengine pia wamjue Mungu wa kweli na kumwabudu.
8. Baada ya kujifunza mafundisho ya msingi ya Biblia, tunapaswa kujitahidi kufanya maendeleo gani?
8 Yehova hataki kuabudiwa na watu ambao wanamwamini tu kwa mdomo huku wakifuatia mambo yao wenyewe. Mungu anataka watu wawe na “ujuzi sahihi wa mapenzi yake” na kuutumia maishani mwao. (Wakolosai 1:9, 10) Kwa hiyo, watu wanaojifunza na kuthamini mafundisho ya msingi ya Biblia wanajitahidi sana kuwa Wakristo wakomavu. Wanatamani kumjua Yehova vizuri zaidi, kufahamu Neno lake kwa undani zaidi, na kulifuata kabisa maishani mwao. Wanajitahidi kuiga sifa za Baba yetu wa mbinguni na kuona mambo jinsi anavyoyaona. Hilo linawachochea wajitahidi kutumia kila fursa kufanya kazi ya kuokoa uhai ambayo Yehova amewaagiza waabudu wake wafanye duniani leo. Je, wewe pia unatamani kufanya kazi hiyo?—Marko 13:10; Waebrania 5:12–6:3.
9. Umoja wa kweli unaweza kutimizwa katika njia zipi leo?
9 Biblia inaonyesha kwamba wale wanaomtumikia Yehova ni lazima wawe na umoja. (Waefeso 4:1-3) Ni lazima wawe na umoja sasa, licha ya kwamba tunaishi katika ulimwengu uliogawanyika na vilevile tunapambana na udhaifu wetu. Yesu alisali kwa bidii ili wanafunzi wake wote wawe mmoja, wafurahie umoja wa kweli. Hilo lingemaanisha nini? Kwanza, ingewapasa kuwa na uhusiano mzuri na Yehova na Mwanaye. Pili, wangekuwa na umoja miongoni mwao. (Yohana 17:20, 21) Ili kutimiza kusudi hilo, Yehova anawafundisha watu wake kupitia kutaniko la Kikristo.
Ni Mambo Gani Yanayochangia Umoja?
10. (a) Tunasitawisha nini tunapotumia Biblia kujibu maswali yanayotuhusu? (b) Changanua mambo yanayochangia umoja wa Kikristo kwa kujibu maswali yaliyoorodheshwa kwenye fungu hili.
10 Mambo saba muhimu yanayochangia umoja wa ibada yameorodheshwa hapa chini. Unapojibu maswali yaliyoonyeshwa, fikiria jinsi kila jambo linavyoboresha uhusiano wako na Yehova na Wakristo wenzako. Kutafakari mambo haya na kusoma maandiko yaliyotajwa bila kunukuliwa kutakusaidia sana usitawishe hekima ya Mungu, busara, na ufahamu—sifa ambazo sote tunahitaji. (Mithali 5:1, 2; Wafilipi 1:9-11) Changanua jambo moja baada ya jingine.
(1) Tunakubali kwamba Yehova ndiye mwenye haki ya kuweka kanuni za mema na mabaya. “Mtumaini BWANA kwa moyo wako wote, wala usizitegemee akili zako mwenyewe. Katika njia zako zote mkiri yeye, naye atayanyosha mapito yako.”—Mithali 3:5, 6.
Kwa nini tunapaswa kutafuta ushauri na mwongozo wa Yehova tunapofanya maamuzi? (Zaburi 146:3-5; Isaya 48:17)
(2) Neno la Mungu hutuongoza. “Mlipopokea neno la Mungu, ambalo mlilisikia kutoka kwetu, mlilikubali, si kama neno la wanadamu, bali, kama vile lilivyo kwa kweli, kama neno la Mungu, ambalo pia lafanya kazi katika nyinyi waamini.”—1 Wathesalonike 2:13.
Kwa nini ni hatari kufanya tu yale “tunayoona” kuwa ni sawa? (Mithali 14:12; Yeremia 10:23, 24; 17:9)
Tufanye nini iwapo hatujui maoni ya Biblia kuhusu jambo fulani? (Mithali 2:3-5; 2 Timotheo 3:16, 17)
(3) Sote tunafaidika na programu ileile ya ulishaji wa kiroho. “Watoto wako wote watafundishwa na BWANA.” (Isaya 54:13) “Acheni tufikiriane ili kuchocheana kwenye upendo na kazi zilizo bora, si kuachilia mbali kukusanyika pamoja sisi wenyewe, kama vile wengine walivyo na desturi, bali kutiana moyo, na zaidi sana hivyo kwa kadiri mwonavyo siku [ya uharibifu] ikikaribia.”—Waebrania 10:24, 25.
Wale wanaofuata kabisa mipango ya Yehova ya ulishaji wa kiroho wanapata faida gani? (Isaya 65:13, 14)
(4) Yesu Kristo ndiye Kiongozi wetu wala si mwanadamu yeyote. “Msiitwe Rabi, kwa maana mmoja ni mwalimu wenu, lakini nyinyi nyote ni akina ndugu. Zaidi ya hayo, msiite yeyote baba yenu duniani, kwa maana mmoja ni Baba yenu, Aliye wa kimbingu. Wala msiitwe ‘viongozi,’ kwa maana Kiongozi wenu ni mmoja, Kristo.”—Mathayo 23:8-10.
Je, kuna yeyote kati yetu anayepaswa kujiona kuwa bora kuliko wengine? (Waroma 3:23, 24; 12:3)
(5) Tunatambua kwamba serikali ya Ufalme wa Mungu ndiyo tumaini pekee kwa wanadamu. “Basi, nyinyi lazima msali kwa njia hii: ‘Baba yetu uliye katika mbingu, jina lako na litakaswe. Acha ufalme wako uje. Mapenzi yako na yatendeke, kama ilivyo katika mbingu, pia juu ya dunia.’ Basi, fulizeni kutafuta kwanza ufalme na uadilifu wake.”—Mathayo 6:9, 10, 33.
‘Kutafuta kwanza ufalme’ kunadumishaje umoja wetu? (Mika 4:3; 1 Yohana 3:10-12)
(6) Roho takatifu hukuza katika waabudu wa Yehova sifa zinazochangia sana umoja wa Kikristo. “Matunda ya roho ni upendo, shangwe, amani, ustahimilivu, fadhili, wema, imani, upole, kujidhibiti.”—Wagalatia 5:22, 23.
Ni lazima tufanye nini ili roho ya Mungu ikuze matunda yake ndani yetu? (Matendo 5:32)
Roho ya Mungu inaboreshaje uhusiano wetu na Wakristo wenzetu? (Yohana 13:35; 1 Yohana 4:8, 20, 21)
(7) Waabudu wote wa kweli wa Mungu wanahubiri habari njema za Ufalme wake. “Habari njema hii ya ufalme itahubiriwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.”—Mathayo 24:14.
Ni nini kinachopaswa kutuchochea tutimize kikamili kazi hii ya kuhubiri? (Mathayo 22:37-39; Waroma 10:10)
11. Tunapata matokeo gani tunapotumia kweli za Biblia maishani mwetu?
11 Kumwabudu Yehova kwa umoja kunatusaidia kuwa na uhusiano mzuri na Yehova na kuwa na ushirika wenye kujenga na waamini wenzetu. Zaburi 133:1 yasema: “Tazama! jinsi ilivyo vema, na kupendeza, ndugu wakae pamoja, kwa umoja.” Inatia moyo sana kukutanika na wale wanaompenda Yehova kikweli na kutii sheria zake, na kuacha ulimwengu na uchoyo wake, ukosefu wake wa adili, na jeuri.
Epuka Mambo Yanayoleta Migawanyiko
12. Kwa nini tuepuke roho ya kujitegemea?
12 Ni lazima tuepuke mambo yanayoleta migawanyiko ambayo yanaweza kuharibu umoja wetu ulio muhimu. Mojawapo ya mambo hayo ni roho ya kujitegemea na kutotii sheria za Mungu. Yehova anatusaidia kuepuka roho hiyo ya kujitegemea kwa kutuambia kwamba chanzo chake ni Shetani Ibilisi. (2 Wakorintho 4:4; Ufunuo 12:9) Shetani ndiye aliyewashawishi Adamu na Hawa wapuuze maagizo ya Mungu na kufanya maamuzi ambayo ni kinyume cha mapenzi ya Mungu. Matokeo yakawa msiba kwao na kwetu sisi. (Mwanzo 3:1-6, 17-19) Watu wengi sana ulimwenguni hawamtegemei Mungu wala hawatii sheria zake. Hatuna budi kuzuia roho hiyo isisitawi ndani yetu.
13. Ni nini kitakachoonyesha kwamba tunajitayarisha kikweli kuishi katika ulimwengu mpya wa Mungu wenye uadilifu?
13 Kwa mfano, fikiria ahadi ya Yehova yenye kusisimua ya kuondoa ulimwengu huu mwovu na kuleta mbingu mpya na dunia mpya ambamo “uadilifu utakaa.” (2 Petro 3:13) Je, ahadi hiyo haipasi kutuchochea tujitayarishe kuishi katika ulimwengu huo mpya wenye uadilifu? Basi ni lazima tutii shauri hili la Biblia lililo wazi: “Msiwe mkipenda ama ulimwengu ama vitu vilivyo katika ulimwengu. Ikiwa yeyote aupenda ulimwengu, kumpenda Baba hakumo katika yeye.” (1 Yohana 2:15) Kwa hiyo, tunaepuka roho ya ulimwengu huu—mwelekeo wake wa kujitegemea, kujifikiria mno, ukosefu wake wa adili na jeuri. Tunakuwa na zoea la kumsikiliza Yehova na kumtii kutoka moyoni, licha ya mielekeo yoyote isiyofaa ya mwili wetu wenye dhambi. Maisha yetu yote yathibitishe kwamba tunafikiria na tumeazimia kufanya mapenzi ya Mungu.—Zaburi 40:8.
14. (a) Kwa nini ni muhimu kutumia nafsi iliyopo sasa kujifunza njia za Yehova na kuzifuata maishani mwetu? (b) Maandiko yaliyotajwa katika fungu hili yanatuhusuje sisi binafsi?
14 Utakapofika wakati wa Yehova wa kuharibu mfumo huu mwovu wa mambo na wote wanaoufuata, yeye hatakawia. Mungu hataahirisha wakati huo au kubadili kanuni zake ili awakubali wale wanaojaribu kushikamana na ulimwengu huku wakijifunza mapenzi yake na kuyafanya kwa moyo nusu-nusu. Huu ndio wakati wa kubadilika! (Luka 13:23, 24; 17:32; 21:34-36) Basi inachangamsha moyo sana kuona umati mkubwa wakitumia nafasi hii ya pekee kujifunza kwa bidii maagizo ambayo Yehova anatoa kupitia Neno lake na tengenezo lake, na kutembea kwa umoja katika mapito yake wakielekea ulimwengu mpya! Na kadiri tunavyojifunza kumhusu Yehova, ndivyo tutakavyompenda zaidi na kutaka kumtumikia.
Mazungumzo ya Kurudia
• Yehova ana kusudi gani kuhusu ibada?
• Baada ya kujifunza mafundisho ya msingi ya Biblia, tunapaswa kujitahidi kufanya maendeleo gani zaidi?
• Sisi binafsi tunaweza kufanya nini ili tuwe na umoja na waabudu wengine wa Yehova?
[Picha katika ukurasa wa 4]
“Wenye upole watairithi nchi, watajifurahisha kwa wingi wa amani”