“Tumikieni Kama Watumwa kwa Ajili ya Bwana-Mkubwa, Kristo”
KATIKA historia yote, mamilioni ya watu wamevumilia mzigo wenye kulemea wa utumwa. Kwa kielelezo, maelfu ya miaka iliyopita, Waisraeli waliteseka sana mikononi mwa waangalizi Wamisri. Kama Biblia isemavyo, “waliweka wasimamizi katili juu ya Waisraeli ili kuwachosha kwa mizigo mizito,” hasa katika kutengeneza matofali.—Kutoka 1:11, The Jerusalem Bible.
Katika nchi nyingi leo, watu huenda wakawa si watumwa kwa njia halisi, lakini wengi wanalazimika kufanya kazi kwa saa nyingi chini ya hali zenye kushurutisha—nyakati nyingine zenye uhasama. Wako chini ya mzigo wenye kulemea wa ule unaoweza kuitwa utumwa wa kifedha.
Hata hivyo, kuna aina moja ya utumwa ambao si wenye kulemea. Mtume Paulo aliwasihi sana waamini wenzake hivi: “Tumikieni kama watumwa kwa ajili ya Bwana-mkubwa, Kristo.” (Wakolosai 3:24) Wale ambao huchagua kuwa watumwa wa Kristo hupata kitulizo kutokana na mizigo yao mizito. Yesu mwenyewe alisema hivi: “Njoni kwangu, nyinyi nyote mnaomenyeka na kulemezwa mizigo, nami hakika nitawaburudisha nyinyi. Chukueni nira yangu juu yenu na mjifunze kutoka kwangu, kwa maana mimi ni mwenye tabia-pole na wa hali ya chini moyoni, nanyi mtapata burudisho kwa ajili ya nafsi zenu. Kwa maana nira yangu ni ya fadhili na mzigo wangu ni mwepesi.”—Mathayo 11:28-30.
Kukubali nira ya Kristo hakumweki mtu huru kutoka katika wajibu wa kuandalia kimwili familia yake. (1 Timotheo 5:8) Hata hivyo, kwatoa uhuru kutoka katika mitego ya ufuatiaji wa vitu vya kimwili. Badala ya kufanya starehe za kimwili kuwa mradi mkuu maishani mwao, Wakristo hupata uradhi wakiwa na mahitaji ya lazima ya msingi.—1 Timotheo 6:6-10; linganisha 1 Wakorintho 7:31.
Wakristo pia hupata burudisho katika kutimiza daraka lao la kuhubiri “habari njema” ya Ufalme wa Mungu. (Mathayo 24:14) Hilo huleta shangwe ya kweli na uradhi!
Twapaswa kushukuru kwamba twaweza ‘kutumikia kama watumwa kwa ajili ya Bwana-mkubwa, Kristo’!
[Picha katika ukurasa wa zimeandaliwa na]
Pictorial Archive (Near Eastern History) Est.