Kutembea Pamoja na Mungu—Hatua za Mwanzo-Mwanzo

“Mkaribieni Mungu, naye atawakaribia.”—YAKOBO 4:8.

1, 2. Kwa nini ungesema kwamba ni pendeleo kubwa kumtumikia Yehova?

MTU huyo alikuwa ameteseka gerezani kwa miaka kadhaa. Kisha akaitwa mbele ya mtawala wa nchi hiyo. Mambo yalitukia upesi sana. Kwa ghafula, mfungwa huyo alijipata akiwa mtumishi wa maliki mwenye nguvu zaidi duniani. Mtu huyo aliyekuwa mfungwa hapo awali alipewa wadhifa wenye madaraka makubwa na heshima isiyo na kifani. Yosefu—mtu ambaye miguu yake wakati mmoja ilifungwa kwa pingu—sasa alitembea pamoja na mfalme!—Mwanzo 41:14, 39-43; Zaburi 105:17, 18.

² Leo, wanadamu wana fursa ya kumtumikia mtu aliye mkuu zaidi kushinda Farao wa Misri. Yule Aliye Mkuu Kabisa katika ulimwengu hutualika sisi sote tumtumikie. Ni pendeleo lenye kutia kicho kama nini kufanya hivyo na kusitawisha uhusiano wa karibu pamoja na Yehova, Mungu mweza yote! Katika Maandiko, yeye huhusianishwa na nguvu zenye ukuu na fahari na vilevile utakatifu, uzuri, na upendezi. (Ezekieli 1:26-28; Ufunuo 4:1-3) Yeye ni mwenye upendo katika shughuli zake zote. (1 Yohana 4:8) Hasemi uwongo kamwe. (Hesabu 23:19) Naye Yehova hawatamaushi kamwe wale walio waaminifu-washikamanifu kwake. (Zaburi 18:25) Kwa kufuata matakwa yake ya uadilifu, tunaweza kuwa na maisha yenye furaha na yenye kusudi sasa, tukifikiria uhai udumuo milele. (Yohana 17:3) Hakuna mtawala yeyote wa kibinadamu ambaye huahidi chochote kiwezacho kwa vyovyote kulinganishwa na baraka na mapendeleo hayo.

3. Noa ‘alitembeaje pamoja na Mungu wa kweli’?

³ Zamani za kale, mzee wa ukoo Noa, aliazimia kuishi kupatana na mapenzi na kusudi la Mungu. Biblia husema hivi kumhusu: “Noa alikuwa mtu mwadilifu. Alijithibitisha kuwa mkamilifu miongoni mwa watu wa siku yake. Noa alitembea pamoja na Mungu.” (Mwanzo 6:9, NW) Bila shaka, Noa hakutembea na Yehova kihalisi, kwa kuwa hakuna hata mtu yeyote ambaye “amemwona Mungu wakati wowote.” (Yohana 1:18) Badala ya hivyo, Noa alitembea pamoja na Mungu kwa sababu alifanya yale aliyoambiwa na Mungu afanye. Kwa kuwa Noa alijitoa kufanya mapenzi ya Yehova, alifurahia uhusiano mchangamfu na wa karibu pamoja na Mungu Mweza Yote. Kama Noa, mamilioni ya watu leo ‘wanatembea pamoja na Mungu’ kwa kuishi kupatana na mashauri na maagizo ya Yehova. Mtu huanzaje kutembea pamoja na Mungu?

Ujuzi Sahihi Ni Muhimu

4. Yehova huwafundishaje watu wake?

⁴ Ili kutembea pamoja na Yehova, ni lazima kwanza tumjue. Nabii Isaya alitabiri hivi: “Itakuwa katika siku za mwisho, mlima wa nyumba ya BWANA utawekwa imara juu ya milima, nao utainuliwa juu ya vilima; na mataifa yote watauendea makundi makundi. Na mataifa mengi watakwenda na kusema, Njoni, twende juu mlimani kwa BWANA, nyumbani kwa Mungu wa Yakobo, naye atatufundisha njia zake, nasi tutakwenda katika mapito yake [“tutatembea katika njia zake,” NW] maana katika Sayuni itatoka sheria, na neno la BWANA katika Yerusalemu.” (Isaya 2:2, 3) Naam, twaweza kuwa na uhakika kwamba Yehova atawafundisha wote wanaojaribu kutembea katika njia zake. Yehova ametupa Neno lake, Biblia, naye hutusaidia tulielewe. Njia moja ambayo yeye hufanya hivyo ni kupitia “mtumwa mwaminifu na mwenye busara.” (Mathayo 24:45-47) Yehova humtumia ‘mtumwa huyo mwaminifu’ kutoa mafundisho ya kiroho kupitia vichapo vyenye kutegemea Biblia, mikutano ya Kikristo, na mpango wa funzo la Biblia la nyumbani bila malipo. Mungu pia husaidia watu wake kuelewa Neno lake kupitia roho yake takatifu.—1 Wakorintho 2:10-16.

5. Kwa nini kweli ya Kimaandiko ni yenye thamani sana?

⁵ Kweli ya Biblia ni yenye thamani ingawa hatulipi fedha ili tuipate. Tujifunzapo Neno la Mungu, sisi humjua Mungu mwenyewe—jina lake, utu wake, kusudi lake, na jinsi ashughulikavyo na wanadamu. Sisi pia hupata majibu yenye kuweka huru ya maswali ya msingi ya maisha: Kwa nini tupo hapa? Kwa nini Mungu huruhusu kuteseka? Wakati ujao una nini? Kwa nini tunazeeka na kufa? Je, kuna uhai baada ya kifo? Isitoshe, sisi hujifunza yale yaliyo mapenzi ya Mungu kwetu, yaani, jinsi itupasavyo kujiendesha ili kumpendeza kikamili. Twajifunza kwamba matakwa yake yanafaa na hutunufaisha ajabu tunapoishi kulingana nayo. Hatungeweza kuyaelewa mambo hayo bila kufundishwa na Mungu.

6. Ni mwendo gani ambao ujuzi sahihi wa Biblia hutuwezesha kufuatia?

⁶ Kweli ya Biblia ni yenye nguvu nayo hutuchochea tufanye mabadiliko katika maisha zetu. (Waebrania 4:12) Kabla ya kutwaa ujuzi juu ya Maandiko, sisi tungeweza tu kutembea “kulingana na mfumo wa mambo wa ulimwengu huu.” (Waefeso 2:2) Lakini ujuzi sahihi wa Neno la Mungu hutuonyesha kinaganaga njia tofauti tuwezayo kufuata ili tuweze “[kutembea] kwa kumstahili Yehova kwa madhumuni ya kumpendeza yeye kikamili.” (Wakolosai 1:10) Ni furaha iliyoje kuchukua hatua za mwanzo-mwanzo katika kutembea pamoja na Yehova, Mtu aliye mtukufu zaidi katika ulimwengu wote!—Luka 11:28.

Wakfu na Ubatizo Ni Hatua Mbili Muhimu

7. Tujifunzapo Neno la Mungu, ni kweli gani hudhihirika kuhusu uongozi wa kibinadamu?

⁷ Tuzidipo kuielewa Biblia, sisi huanza kuchunguza mambo ya kibinadamu na maisha yetu wenyewe kwa kuyalinganisha na nuru ya kiroho ya Neno la Mungu. Hivyo, kweli fulani muhimu hudhihirika. Kweli iliyoonyeshwa zamani sana na nabii Yeremia, aliyeandika hivi: “Ee BWANA, najua ya kuwa njia ya mwanadamu haimo katika nafsi yake; kuelekeza hatua zake si katika uwezo wa mwanadamu.” (Yeremia 10:23) Wanadamu—sisi sote—tunahitaji mwelekezo wa Mungu.

8. (a) Ni nini ambacho husukuma watu wajiweke wakfu kwa Mungu? (b) Wakfu wa Kikristo ni nini?

⁸ Kuelewa jambo hilo la muhimu hutuchochea kutafuta mwongozo kutoka kwa Yehova. Nao upendo wetu kwa Mungu hutusukuma tuweke maisha yetu wakfu kwake. Kujiweka wakfu kwa Mungu humaanisha kumwendea kwa sala na kuahidi kirasmi kutumia maisha yetu kumtumikia na kutembea katika njia zake kwa uaminifu. Kwa kufanya hivyo, twafuata kielelezo cha Yesu, aliyejitoa mwenyewe kwa Yehova akiazimia kwa uthabiti kutimiza mapenzi ya Mungu.—Waebrania 10:7.

9. Kwa nini watu mmoja-mmoja huweka maisha yao wakfu kwa Yehova?

⁹ Yehova Mungu hashurutishi kamwe wala kulazimisha yeyote ajiweke wakfu kwake. (Linganisha 2 Wakorintho 9:7.) Isitoshe, Mungu hatarajii yeyote aweke maisha yake wakfu Kwake kwa sababu ya msisimko wa muda tu. Kabla ya kubatizwa, ni lazima mtu awe mwanafunzi tayari, na hilo hutaka ajitahidi sana kutwaa ujuzi. (Mathayo 28:19, 20) Paulo aliwasihi sana wale waliokuwa tayari wamebatizwa ‘watoe miili yao iwe dhabihu iliyo hai, takatifu, yenye kukubalika kwa Mungu, utumishi mtakatifu pamoja na nguvu zao za kufikiri kuzuri.’ (Waroma 12:1) Ni kwa kutumia uwezo huohuo wa kufikiri kuzuri kwamba, tunaweza kujiweka wakfu kwa Yehova Mungu. Baada ya kujifunza yanayohusika na kufikiria jambo hilo kwa makini, sisi huweka maisha yetu wakfu kwa Mungu kwa kupenda na kwa shangwe.—Zaburi 110:3.

10. Wakfu huhusianaje na ubatizo?

¹⁰ Baada ya kumwendea Mungu faraghani kwa sala ya kueleza azimio letu la kutembea katika njia zake, sisi huchukua hatua ya pili. Hujulisha wakfu wetu hadharani kwa kubatizwa katika maji. Hilo ni tangazo la hadharani kwamba, tumeweka nadhiri ya kufanya mapenzi ya Mungu. Mwanzoni mwa huduma yake ya kidunia, Yesu alibatizwa na Yohana, hivyo akatuwekea kielelezo. (Mathayo 3:13-17) Baadaye, Yesu aliwaagiza wafuasi wake wafanye wanafunzi na kuwabatiza. Kwa hiyo, wakfu na ubatizo ni hatua muhimu kwa wowote watakao kutembea pamoja na Yehova.

11, 12. (a) Ubatizo unaweza kulinganishwaje na arusi? (b) Uhusiano wetu na Yehova wafananaje na ule uliopo kati ya mume na mke?

¹¹ Kupata kuwa mwanafunzi wa Yesu Kristo aliyejiweka wakfu na kubatizwa, kwafanana kwa njia fulani na kufunga ndoa. Katika nchi nyingi, siku ya arusi hutanguliwa na hatua kadhaa. Mwanamume na mwanamke hukutana, wakajuana, na kupendana. Kisha uchumba. Arusi huweka hadharani kile kilichoamuliwa faraghani—kuoana, kisha kuishi pamoja wakiwa mume na mke. Arusi ndiyo huashiria hadharani mwanzo wa uhusiano huo wa pekee. Tarehe hiyo huashiria mwanzo wa ndoa. Vivyo hivyo, ubatizo huashiria mwanzo wa maisha ya kujitoa kutembea katika uhusiano ulio wakfu pamoja na Yehova.

¹² Fikiria ufanani mwingine. Baada ya siku yao ya arusi, upendo kati ya mume na mke wapaswa kukua na kukomaa. Ili waendelee kuwa na uhusiano wa karibu zaidi, ni lazima wenzi wote wawili wa ndoa wajitahidi bila ubinafsi kudumisha na kuimarisha uhusiano wao wa ndoa. Ingawa sisi hatufungi ndoa na Mungu, ni lazima tujitahidi kudumisha uhusiano wa karibu pamoja na Yehova baada ya kubatizwa. Yeye huona na kuthamini jitihada zetu za kufanya mapenzi yake, naye hutukaribia. “Mkaribieni Mungu,” akaandika mwanafunzi Yakobo, “naye atawakaribia.”—Yakobo 4:8.

Kutembea Katika Hatua za Yesu

13. Twapaswa kufuata kielelezo cha nani katika kutembea pamoja na Mungu?

¹³ Ili kutembea pamoja na Yehova, ni lazima tufuate kielelezo kilichowekwa na Yesu Kristo. Mtume Petro aliandika hivi: “Kwenye mwendo huu mliitwa, kwa sababu hata Kristo aliteseka kwa ajili yenu, akiwaachia kigezo ili nyinyi mfuate hatua zake kwa ukaribu.” (1 Petro 2:21) Kwa kuwa Yesu alikuwa mkamilifu nasi si wakamilifu, hatuwezi kufuata bila dosari kielelezo alichoweka. Hata hivyo, Yehova hututarajia tufanye yote tuwezayo. Acheni tuchunguze sehemu tano za maisha na huduma ya Yesu ambazo Wakristo waliojiweka wakfu wapaswa kujitahidi kuiga.

14. Ni nini kinachohusika katika kujua Neno la Mungu?

¹⁴ Yesu alikuwa na ujuzi sahihi na kamili wa Neno la Mungu. Wakati wa huduma yake, Yesu alinukuu Maandiko ya Kiebrania mara nyingi. (Luka 4:4, 8) Bila shaka, viongozi waovu wa kidini wa siku hizo pia walinukuu Maandiko. (Mathayo 22:23, 24) Tofauti ilikuwa kwamba Yesu alielewa maana ya Maandiko, naye aliyatumia maishani mwake. Alijua maneno halisi ya Sheria na pia maana yake. Tufuatapo kielelezo cha Kristo, sisi pia twapaswa kujitahidi kuelewa Neno la Mungu na kupata maana yake. Kwa kufanya hivyo, tunaweza kuwa wafanyakazi waliokubaliwa na Mungu, ambao wanaweza ‘kutumia sawasawa neno la ile kweli.’—2 Timotheo 2:15.

15. Yesu aliwekaje kielelezo katika kuzungumza juu ya Mungu?

¹⁵ Kristo Yesu alizungumza na wengine kuhusu Baba yake wa kimbingu. Yesu alishiriki na wengine ujuzi wake wa Neno la Mungu. Hata adui zake walimwita “Mwalimu,” kwa sababu popote alipoenda alizungumza na wengine juu ya Yehova na makusudi Yake. (Mathayo 12:38) Yesu alihubiri hadharani katika eneo la hekalu, katika masinagogi, majijini, na mashambani. (Marko 1:39; Luka 8:1; Yohana 18:20) Alifundisha kwa huruma na fadhili, akiwaonyesha upendo watu aliosaidia. (Mathayo 4:23) Wale ambao hufuata kielelezo cha Yesu hupata pia mahali na njia nyingi za kufundisha wengine juu ya Yehova Mungu na makusudi yake ya kustaajabisha.

16. Yesu alikuwa na uhusiano wa karibu kadiri gani na wale waliomwabudu Yehova pamoja naye?

¹⁶ Yesu alikuwa na uhusiano wa karibu na wengine ambao walimwabudu Yehova. Yesu alipokuwa akizungumza na umati wakati mmoja, mama yake na ndugu zake wasioamini walikuja kuzungumza naye. Simulizi la Biblia lasema: “Mtu fulani akamwambia: ‘Tazama! Mama yako na ndugu zako wamesimama nje, wakitafuta sana kusema nawe.’ Akimjibu huyo mwenye kumwambia akasema: ‘Ni nani mama yangu, na ni nani ndugu zangu?’ Naye akinyoosha mkono wake kuelekea wanafunzi wake, akasema: ‘Tazama! Mama yangu na ndugu zangu! Kwa maana yeyote yule afanyaye mapenzi ya Baba yangu aliye mbinguni, yeye huyo ni ndugu yangu, na dada, na mama.’” (Mathayo 12:47-50) Hilo halimaanishi kwamba Yesu aliikataa familia yake, kwa maana yale yaliyotukia baadaye yathibitisha kwamba hakufanya hivyo. (Yohana 19:25-27) Hata hivyo, simulizi hilo lakazia upendo ambao Yesu alikuwa nao kwa waamini wenzake. Vivyo hivyo leo, wale wanaotembea pamoja na Mungu hujaribu kushirikiana na watumishi wengine wa Yehova, nao huja kuwapenda sana.—1 Petro 4:8.

17. Yesu alihisije juu ya kufanya mapenzi ya Baba yake wa kimbingu, na hilo lapaswa kutuathirije?

¹⁷ Yesu alionyesha upendo kwa Baba yake wa kimbingu kwa kufanya mapenzi ya Mungu. Yesu alimtii Yehova katika mambo yote. Alisema hivi: “Chakula changu ni kwamba mimi nifanye mapenzi yake aliyenituma na kumaliza kazi yake.” (Yohana 4:34) Kristo pia alisema: “Mimi hufanya mambo yale yanayompendeza [Mungu].” (Yohana 8:29) Yesu alimpenda sana Baba yake wa kimbingu hivi kwamba “alijinyenyekeza mwenyewe akawa mtiifu hadi kifo, ndiyo, kifo juu ya mti wa mateso.” (Wafilipi 2:8) Naye Yehova alimbariki Yesu, akimkweza kwenye cheo chenye mamlaka na heshima, cha pili tu kwa Yehova mwenyewe. (Wafilipi 2:9-11) Kama Yesu, sisi huonyesha upendo wetu kwa Mungu kwa kushika amri zake na kwa kufanya mapenzi yake.—1 Yohana 5:3.

18. Yesu aliwekaje kielelezo kwa habari ya sala?

¹⁸ Yesu alikuwa mtu wa sala. Alisali wakati wa ubatizo wake. (Luka 3:21) Kabla ya kuchagua mitume wake 12, alisali usiku kucha. (Luka 6:12, 13) Yesu aliwafundisha wanafunzi wake jinsi ya kusali. (Luka 11:1-4) Usiku uliotangulia kifo chake, Yesu hakusali tu kwa ajili ya wanafunzi wake, bali pia alisali pamoja nao. (Yohana 17:1-26) Sala ilikuwa sehemu muhimu ya maisha ya Yesu, kama vile ipaswavyo kuwa katika maisha zetu, kwa maana sisi tu wafuasi wake. Ni heshima iliyoje kuzungumza na Mwenye Enzi Kuu ya Ulimwengu katika sala! Isitoshe, Yehova hujibu sala, kwa maana Yohana aliandika hivi: “Huu ndio uhakika ambao tunao kumwelekea yeye, kwamba, hata iwe ni nini ambacho twaomba kulingana na mapenzi yake, yeye hutusikia. Zaidi, ikiwa twajua yeye hutusikia kwa habari ya chochote kile tunachoomba, twajua tutakuwa na mambo yaliyoombwa kwa kuwa tumeyaomba kwake.”—1 Yohana 5:14, 15.

19. (a) Twapaswa kuiga sifa zipi za Yesu? (b) Sisi hunufaika katika njia zipi kutokana na kujifunza juu ya maisha na huduma ya Yesu?

¹⁹ Tunaweza kujifunza mengi sana kwa kuchunguza kwa makini maisha na huduma ya kidunia ya Yesu Kristo! Fikiria sifa alizoonyesha: upendo, huruma, fadhili, nguvu, usawaziko, kukubali sababu, unyenyekevu, moyo mkuu, na kutokuwa na ubinafsi. Kadiri tujifunzavyo zaidi juu ya Yesu, ndivyo tamaa yetu ya kuwa wafuasi wake waaminifu izidivyo kuwa kubwa. Ujuzi juu ya Yesu pia hutuvuta karibu zaidi na Yehova. Kwa kuwa, Yesu alikuwa mfano kamili wa Baba yake wa kimbingu. Alikuwa karibu sana na Yehova hivi kwamba angeweza kusema: “Yeye ambaye ameniona mimi amemwona Baba pia.”—Yohana 14:9.

Tumaini Kutegemezwa na Mungu

20. Tunaweza kupataje uhakika katika kutembea pamoja na Yehova?

²⁰ Watoto wanapojifunza kutembea, hatua zao huwa si imara. Wao hujifunzaje kutembea kwa uhakika? Kwa kujizoeza tu na kwa ustahimilivu. Wale wanaotembea pamoja na Yehova hujitahidi kutembea kwa hatua hakika na imara. Hilo pia huhitaji wakati na ustahimilivu. Paulo alionyesha umuhimu wa ustahimilivu katika kutembea pamoja na Mungu alipoandika: “Mwishowe, akina ndugu, twawaomba nyinyi na kuwahimiza kwa bidii kwa njia ya Bwana Yesu, kama vile mlivyopokea agizo kutoka kwetu juu ya jinsi mpaswavyo kutembea na kumpendeza Mungu, kama vile kwa kweli mnavyotembea, kwamba mngefuliza kufanya hilo kwa ukamili zaidi.”—1 Wathesalonike 4:1.

21. Tunaweza kufurahia baraka zipi tutembeapo na Yehova?

²¹ Ikiwa tumejitoa kabisa kwa Mungu, atatusaidia kuendelea kutembea pamoja naye. (Isaya 40:29-31) Hakuna chochote ambacho ulimwengu huu hutoa kiwezacho kulinganishwa na baraka ambazo Mungu huwatolea wale wanaotembea katika njia zake. Yeye ‘ndiye atufundishaye ili tupate faida, atuongozaye kwa njia itupasayo kuifuata. Nasi tukisikiliza amri zake amani yetu itakuwa kama mto wa maji, na haki yetu kama mawimbi ya bahari.’ (Isaya 48:17, 18) Kwa kukubali mwaliko wa kutembea pamoja na Mungu na kwa kufanya hivyo kwa uaminifu, twaweza kufurahia amani pamoja naye milele.

[Ungejibuje]

◻ Kwa nini ni heshima kutembea pamoja na Mungu wa kweli?

◻ Kwa nini funzo, wakfu, na ubatizo ni hatua za mwanzo-mwanzo katika kutembea pamoja na Mungu?

◻ Tunaweza kufuataje hatua za Yesu?

◻ Tunajuaje kwamba Yehova atatutegemeza tunapotembea naye?

[Picha katika ukurasa wa 13]

Funzo, wakfu, na ubatizo ni hatua za lazima katika kutembea pamoja na Mungu