Dini

Kwa nini kuna dini nyingi sana?

Kadirio lililofanywa karibuni lilionyesha kwamba kuna dini kubwa 10 na madhehebu 10,000. Kati ya hizo, 6,000 ziko Afrika, 1,200 ziko Marekani, na mamia katika nchi nyingine.

Mambo mengi yamesababisha kuongezeka kwa vikundi vipya vya kidini. Wengine wamesema kwamba dini hizo zote ni njia mbalimbali za kutoa kweli ya kidini. Lakini unapolinganisha mafundisho na mazoea yake pamoja na Biblia utaona kwamba kuna dini nyingi kwa sababu watu wanawafuata wanadamu badala ya kumsikiliza Mungu. Inafaa kuangaliwa kwamba, kwa kadiri kubwa, mafundisho ambayo wote wanashikilia, lakini yanayotofautiana na Biblia, yalianzia Babiloni la kale. (Ona ukurasa wa 28-30, chini ya kichwa “Babiloni Mkubwa.”)

Ni nani aliyeanzisha mvurugo huo wa kidini? Biblia inamtambulisha Shetani Ibilisi kuwa “mungu wa mfumo huu wa mambo.” (2 Kor. 4:4) Inatuonya kwamba “vitu ambavyo mataifa huvitoa dhabihu wao huvitoa dhabihu kwa roho waovu, na si kwa Mungu.” (1 Kor. 10:20) Basi ni jambo muhimu kama nini kuhakikisha kwamba tunamwabudu Mungu wa kweli, yule Muumba wa dunia na mbingu, na kwamba ibada yetu inampendeza!

Je, dini zote zinakubalika kwa Mungu?

Amu. 10:6, 7: “Wana wa Israeli wakaanza tena kufanya yaliyokuwa mabaya machoni pa Yehova, nao wakaanza kutumikia Mabaali na sanamu za Ashtorethi na miungu ya Siria na miungu ya Sidoni na miungu ya Moabu na miungu ya wana wa Amoni na miungu ya Wafilisti. Basi wakamwacha Yehova wala hawakumtumikia yeye. Hivyo hasira ya Yehova ikawaka juu ya Israeli.” (Ikiwa mtu anaabudu kitu chochote au mtu yeyote badala ya Mungu wa kweli, Muumba wa mbingu na dunia, ni wazi kwamba ibada yake haikubaliki kwa Yehova.)

Marko 7:6, 7: “[Yesu] akawaambia [Mafarisayo na waandishi Wayahudi]: ‘Isaya kwa kufaa alitoa unabii juu yenu wanafiki, kama ilivyoandikwa, “Watu hawa huniheshimu mimi kwa midomo yao, bali mioyo yao iko mbali nami. Wao huniabudu bure, kwa sababu wao hufundisha amri za wanadamu kuwa mafundisho.”’” (Hata kikundi fulani kikidai kwamba kinamwabudu Mungu, ikiwa kinashikilia mafundisho ya wanadamu badala ya Neno la Mungu lililoongozwa na roho, ibada yake ni bure.)

Rom. 10:2, 3: “Nawatolea ushahidi kwamba wana bidii kwa ajili ya Mungu; lakini si kulingana na ujuzi sahihi; kwa maana, kwa sababu ya kukosa kujua uadilifu wa Mungu bali wakitafuta kujiwekea uadilifu wao wenyewe, hawakujitiisha kwa uadilifu wa Mungu.” (Huenda watu wakawa na Neno la Mungu lililoandikwa lakini wakakosa ujuzi sahihi wa mambo yaliyomo, kwa sababu hawakufundishwa sawasawa. Huenda wakaona kwamba wana bidii kwa ajili ya Mungu, lakini huenda hawafanyi yale anayotaka. Je, ibada yao itampendeza Mungu?)

Je, ni kweli kwamba kuna wema katika dini zote?

Dini nyingi hufundisha kwamba mtu hapaswi kusema uwongo wala kuiba, na kadhalika. Lakini hilo linatosha? Je, wewe utakubali kunywa kikombe cha maji yenye sumu kwa sababu mtu fulani amekuhakikishia kwamba katika kikombe hicho sehemu kubwa ni maji?

2 Kor. 11:14, 15: “Shetani mwenyewe huendelea kujigeuza mwenyewe kuwa malaika wa nuru. Kwa hiyo si jambo kubwa kama wahudumu wake wakiendelea pia kujigeuza wenyewe kuwa wahudumu wa uadilifu.” (Hapa tunatahadharishwa kwamba si kila kitu kinachotoka kwa Shetani kitakachoonekana kuwa kibaya sana. Moja ya njia zake kuu za kuwadanganya wanadamu ni dini za uwongo, naye huzifanya baadhi ya dini hizo zionekane kuwa zenye uadilifu.)

2 Tim. 3:2, 5: “Watu watakuwa . . . na namna ya ujitoaji-kimungu lakini wakizikana nguvu zake; nawe geukia mbali kutoka kwa hao.” (Hata watu unaoshirikiana nao katika ibada wakidai jinsi gani kwamba wanampenda Mungu lakini hawafuati kwa unyoofu Neno lake katika maisha yao, Biblia inakusihi uvunjilie mbali ushirika huo.)

Je, inafaa mtu kuiacha dini ya wazazi wake?

Ikiwa kwa kweli mambo ambayo wazazi wetu walitufundisha yanatoka katika Biblia, tunapaswa kuyashikilia. Tunastahili kuwaheshimu wazazi wetu, hata kama tunajua kwamba matendo na imani zao za kidini hazipatani na Neno la Mungu. Lakini namna gani ukijua kwamba zoea fulani la wazazi wako ni hatari kwa afya na linaweza kufupisha uhai wa mtu? Je, utawaiga na kuwatia moyo watoto wako wafanye hivyo, au je, utawaeleza kwa heshima yale uliyojifunza? Vivyo hivyo, kujua kweli ya Biblia huleta daraka. Ikiwezekana, tunapaswa kuwaeleza watu wa familia zetu mambo tunayojifunza. Ni lazima tufanye uamuzi: Je, kweli tunampenda Mungu? Je, kweli tunataka kumtii Mwana wa Mungu? Basi, huenda tukahitaji kuiacha dini ya wazazi wetu ili tufuate ibada ya kweli. Kwa hakika haingefaa kuruhusu uaminifu wetu kwa wazazi wetu uwe mkubwa kuliko upendo wetu kwa Mungu na Kristo, sivyo? Yesu alisema hivi: “Anayempenda baba au mama kuliko mimi hanistahili; naye anayempenda mwana au binti kuliko mimi hanistahili.” (Mt. 10:37).

Yos. 24:14: “Sasa mwogopeni Yehova na kumtumikia kwa njia isiyo na kosa na katika kweli, nanyi ondoeni miungu ambayo mababu zenu waliitumikia ng’ambo ile nyingine ya Mto na katika Misri, mkamtumikie Yehova.” (Hilo lilimaanisha waiache dini ya mababu zao, sivyo? Ili kumtumikia Yehova kwa njia inayokubalika, walipaswa kuondolea mbali sanamu zozote walizotumia katika dini hiyo na kusafisha mioyo yao ili kuondoa tamaa yoyote ya vitu hivyo.)

1 Pet. 1:18, 19: “Mnajua kuwa si kwa vitu vyenye kuharibika, kwa fedha au dhahabu, kwamba mlikombolewa kutoka kwenye namna ya mwenendo wenu usiozaa matunda ambao ulipokewa kwa njia ya mapokeo kutoka kwa mababu zenu. Bali ilikuwa kwa damu yenye thamani, kama ile ya mwana-kondoo asiye na dosari na asiye na doa, ile ya Kristo.” (Wakristo wa kwanza waliacha desturi hizo za mababu zao, ambazo hazingeweza kuwapa uzima wa milele. Shukrani kwa dhabihu ya Kristo iliwafanya watamani kuondoa chochote kilichofanya maisha yao yasiwe na kusudi kwa sababu desturi hizo hazikumheshimu Mungu. Je, sisi hatupaswi kuwa na mtazamo huohuo?)

Maoni ya Biblia ni nini kuhusu kuchanganya imani mbalimbali?

Yesu aliwaonaje viongozi wa kidini waliodai kuwa waadilifu lakini walimvunjia Mungu heshima? “Yesu akawaambia: ‘Kama Mungu angekuwa ndiye Baba yenu, mngenipenda, kwa maana nilitoka kwa Mungu nami nipo hapa. Wala sikuja kwa uamuzi wangu mwenyewe hata kidogo, lakini Huyo alinituma. . . . Ninyi mmetoka kwa baba yenu Ibilisi, nanyi mnataka kufanya tamaa za baba yenu. Huyo alikuwa muuaji alipoanza, naye hakusimama imara katika kweli, kwa sababu kweli haimo ndani yake. Anaposema uwongo, yeye husema kulingana na mwelekeo wake mwenyewe, kwa sababu yeye ni mwongo na ndiye baba ya uwongo. Kwa sababu mimi, kwa upande mwingine, ninawaambia ile kweli, hamniamini. . . . Ndiyo sababu hamsikilizi, kwa sababu hamtoki kwa Mungu.’”—Yoh. 8:42-47.

Je, ingekuwa ni kuonyesha ushikamanifu kwa Mungu na kwa viwango vyake vya uadilifu ikiwa watumishi wake wangeshirikiana kidini na wale ambao hutenda yale ambayo Mungu anashutumu au wanaoachilia mambo hayo yaendelee kufanywa? “Mwache kuchangamana katika ushirika pamoja na mtu yeyote anayeitwa ndugu ambaye ni mwasherati au mtu mwenye pupa au mwabudu-sanamu au mtukanaji au mlevi au mnyang’anyi, hata msile chakula pamoja na mtu wa namna hiyo. . . . Wala waasherati, wala waabudu-sanamu, wala wazinzi, wala wanaume wanaowekwa kwa ajili ya makusudi yasiyo ya asili, wala wanaume wanaolala na wanaume, wala wezi, wala watu wenye pupa, wala walevi, wala watukanaji, wala wanyang’anyi hawataurithi ufalme wa Mungu.” (1 Kor. 5:11; 6:9, 10) “Yeyote anayetaka kuwa rafiki ya ulimwengu anajifanya kuwa adui ya Mungu.” (Yak. 4:4) “Enyi mnaompenda Yehova, chukieni yaliyo mabaya. Yeye anazilinda nafsi za washikamanifu wake.”—Zab. 97:10.

2 Kor. 6:14-17: “Msifungwe nira isivyo sawa pamoja na wasio waamini. Kwa maana kuna ushirika gani kati ya uadilifu na uasi-sheria? Au nuru ina ushirika gani na giza? Na zaidi, kuna upatano gani kati ya Kristo na Beliali? Au mtu mwaminifu ana fungu gani na asiye mwamini? Na hekalu la Mungu lina upatano gani na sanamu? . . . ‘“Kwa hiyo tokeni katikati yao, na mjitenge,” asema Yehova, “na mwache kugusa kitu kilicho najisi”’; ‘“nami nitawakaribisha ndani.”’”

Ufu. 18:4, 5: “Nikasikia sauti nyingine kutoka mbinguni ikisema: ‘Tokeni kwake, watu wangu, ikiwa hamtaki kushiriki pamoja naye dhambi zake, na ikiwa hamtaki kupokea sehemu ya mapigo yake. Kwa maana dhambi zake zimekusanyika pamoja mpaka mbinguni, naye Mungu amekumbuka matendo yake yasiyo ya haki.’” (Kwa maelezo zaidi, ona kichwa, “Babiloni Mkubwa.”)

Je, ni lazima kuwa mshiriki wa dini iliyopangwa kitengenezo?

Mashirika mengi ya kidini yamezaa matunda mabaya. Ubaya si kwamba vikundi hivyo vimepangwa kitengenezo. Lakini vingi vimeendeleza namna ya ibada inayotegemea mafundisho ya uwongo na kwa ujumla vinafuata desturi tu badala ya kutoa mwongozo wa kweli wa kiroho; vimetumiwa vibaya ili kutawala maisha ya watu kwa ajili ya makusudi ya kibinafsi; vimehangaikia mno ukusanyaji wa pesa na nyumba za kifahari za ibada badala ya mambo ya kiroho; mara nyingi wafuasi wake ni wanafiki. Kwa wazi hakuna mtu anayependa uadilifu ambaye angetaka kuwa mfuasi wa dini kama hiyo. Lakini dini ya kweli ni tofauti kabisa na vikundi hivyo. Hata hivyo, ili kutimiza matakwa ya Biblia, ni lazima ipangwe kitengenezo.

Ebr. 10:24, 25: “Acheni tufikiriane ili kuchocheana katika upendo na matendo mazuri, bila kuacha kukusanyika pamoja sisi wenyewe, kama vile wengine walivyo na desturi, bali tutiane moyo, na kufanya hivyo zaidi kwa kadiri mnavyoona siku ile kuwa inakaribia.” (Ili kutimiza amri hiyo ya Kimaandiko, ni lazima kuwe na mikutano ya Kikristo ambayo tunaweza kuhudhuria kwa ukawaida. Mpango kama huo unatutia moyo tuonyeshe wengine upendo, si kujihangaikia sisi wenyewe tu.)

1 Kor. 1:10: “Sasa nawahimiza ninyi, akina ndugu, kupitia jina la Bwana wetu Yesu Kristo kwamba nyote mseme kwa upatano, na kwamba kusiwe na migawanyiko katikati yenu, bali kwamba muunganishwe vema katika akili ileile na katika njia ileile ya kufikiri.” (Umoja huo haungepatikana kamwe ikiwa watu hawangekutana pamoja ili kufaidika na programu moja ya ulishaji wa kiroho na kuheshimu chombo kinachotumiwa kutoa maagizo. Ona pia Yohana 17:20, 21.)

1 Pet. 2:17: “Upendeni ushirika mzima wa akina ndugu.” (Je, hiyo inatia ndani tu wale ambao wanakutana pamoja kwa ibada katika nyumba moja ya mtu binafsi? Sivyo hata kidogo; huo ni undugu wa kimataifa, kama inavyoonyeshwa na Wagalatia 2:8, 9 na 1 Wakorintho 16:19.)

Mt. 24:14: “Hii habari njema ya ufalme itahubiriwa katika dunia yote inayokaliwa ili kuwa ushahidi kwa mataifa yote; na ndipo ule mwisho utakapokuja.” (Ili mataifa yote yapewe nafasi ya kusikia hiyo habari njema, ni lazima kazi ya kuhubiri ifanywe kwa utaratibu, kukiwa na usimamizi mzuri. Kumpenda Mungu na jirani kumewafanya watu duniani kote waunganishe jitihada zao ili kufanya kazi hiyo.)

Ona pia kichwa, “Tengenezo.”

Je, kumpenda jirani ndilo jambo la maana?

Bila shaka upendo huo ni muhimu. (Rom. 13:8-10) Lakini kuwa Mkristo kunatia ndani mengi zaidi kuliko tu kuwaonyesha jirani zetu fadhili. Yesu alisema kwamba wanafunzi wake wa kweli wangetambuliwa waziwazi kwa upendo kati yao wenyewe, kwa waamini wenzao. (Yoh. 13:35) Umuhimu wa jambo hilo unakaziwa tena na tena katika Biblia. (Gal. 6:10; 1 Pet. 4:8; 1 Yoh. 3:14, 16, 17) Hata hivyo, Yesu alionyesha kwamba jambo muhimu hata zaidi ni upendo wetu kwa Mungu mwenyewe, unaoonyeshwa kwa kutii amri zake. (Mt. 22:35-38; 1 Yoh. 5:3) Ili tuonyeshe upendo huo, tunahitaji kujifunza na kufuata Neno la Mungu na kukusanyika ili kumwabudu Mungu tukiwa pamoja na watumishi wenzetu.

Je, kuwa na uhusiano wa kibinafsi pamoja na Mungu ndilo jambo muhimu?

Kwa hakika, hilo ni jambo muhimu. Kuhudhuria tu ibada za kidini kwa njia ya kidesturi hakuwezi kuchukua mahali pake. Lakini tunahitaji kuwa waangalifu. Kwa nini? Katika karne ya kwanza, kulikuwa na watu waliodhani wana uhusiano mzuri pamoja na Mungu, lakini Yesu alionyesha kwamba walikuwa wamekosea sana. (Yoh. 8:41-44) Mtume Paulo aliandika kuhusu watu fulani ambao kwa wazi walikuwa na bidii katika imani yao na walifikiri walikuwa na uhusiano mzuri pamoja na Mungu, lakini hawakufahamu yaliyotakiwa kwelikweli ili wakubaliwe na Mungu.—Rom. 10:2-4.

Je, tunaweza kuwa na uhusiano mzuri pamoja na Mungu ikiwa tunaziona amri zake kuwa si za maana? Moja ya hizo ni ya kwamba tukusanyike kwa ukawaida pamoja na waamini wenzetu.—Ebr. 10:24, 25.

Tukiisoma Biblia sisi wenyewe, je, hilo linatosha?

Ni kweli kwamba watu wengi wanaweza kujifunza mengi kwa kuisoma Biblia wao wenyewe. Ikiwa kusudi lao ni kujifunza kweli kumhusu Mungu na makusudi yake, jambo wanalofanya ni la kusifika sana. (Mdo. 17:11) Lakini, je, kwa kweli tutaifahamu maana kamili ya mambo yote tunayosoma bila kupata msaada wowote? Biblia inataja mtu fulani aliyekuwa na cheo kikubwa lakini alijinyenyekeza na kukubali kwamba anahitaji msaada ili aelewe unabii wa Biblia. Msaada huo ulitolewa na mshiriki wa kutaniko la Kikristo.—Mdo. 8:26-38; linganisha na mistari mingine inayomtaja Filipo katika Matendo 6:1-6; 8:5-17.

Bila shaka, mtu akiisoma Biblia lakini asiifuate maishani mwake, haitamfaidi sana. Akiiamini na kuifuata, lazima ashirikiane na watumishi wa Mungu katika mikutano ya kawaida ya kutaniko. (Ebr. 10:24, 25) Pia atajiunga nao katika kuwahubiria wengine “habari njema.”—1 Kor. 9:16; Marko 13:10; Mt. 28:19, 20.

Mtu anaweza kujuaje dini ya kweli?

(1) Mafundisho yake yanategemea nini? Je, yanatoka kwa Mungu, au kwa ujumla yanatoka kwa wanadamu? (2 Tim. 3:16; Marko 7:7) Kwa mfano, hebu jiulize: Ni wapi ambapo Biblia inafundisha kwamba Mungu ni Utatu? Ni wapi ambapo inasema kwamba nafsi ya mwanadamu haiwezi kufa?

(2) Je, inawajulisha watu jina la Mungu? Yesu alimwambia Mungu hivi katika sala: “Nimelifunua jina lako kwa watu ulionipa kutoka ulimwenguni.” (Yoh. 17:6) Alitangaza hivi: “Yehova Mungu wako ndiye unayepaswa kumwabudu, na yeye peke yake ndiye unayepaswa kumtolea utumishi mtakatifu.” (Mt. 4:10) Je, dini yako imekufundisha kwamba ‘unapaswa kumwabudu Yehova’? Je, sasa unamjua vizuri Mtu anayetambulishwa na jina hilo—makusudi yake, matendo, sifa zake—hivi kwamba unahisi unaweza kumkaribia ukiwa na uhakika?

(3) Je, imani ya kweli katika Yesu Kristo inaonyeshwa? Hilo linatia ndani kuthamini dhabihu ya uhai wa kibinadamu ya Yesu na cheo alicho nacho leo akiwa Mfalme mbinguni. (Yoh. 3:36; Zab. 2:6-8) Uthamini huo unaonyeshwa kwa kumtii Yesu—kushiriki kibinafsi na kwa bidii katika kazi aliyowapa wafuasi wake. Dini ya kweli ina imani hiyo inayofuatana na matendo.—Yak. 2:26.

(4) Kwa ujumla je, dini hiyo ni ya kidesturi, au ni njia ya maisha? Mungu anakataa kabisa dini ambayo ni ya kidesturi tu. (Isa. 1:15-17) Dini ya kweli inaunga mkono viwango vya Biblia kuhusu maadili na maneno safi badala ya kufuata desturi tu zinazopendwa na wengi. (1 Kor. 5:9-13; Efe. 5:3-5) Wafuasi wake wanaonyesha matunda ya roho ya Mungu katika maisha yao. (Gal. 5:22, 23) Kwa hiyo, wale wanaoshikamana na ibada ya kweli wanaweza kutambuliwa kwa sababu wanajitahidi kwa unyoofu kufuata viwango vya Biblia katika maisha yao, si katika mikutano yao tu bali pia katika maisha yao ya familia, kazini, shuleni, na katika tafrija.

(5) Je, wafuasi wake wanapendana kwelikweli? Yesu alisema: “Kwa jambo hili wote watajua kwamba ninyi ni wanafunzi wangu, mkiwa na upendo kati yenu wenyewe.” (Yoh. 13:35) Upendo huo unavuka mipaka ya kikabila, ya kijamii, na ya kitaifa, ukiwavuta watu pamoja katika undugu wa kweli. Upendo huo ni wenye nguvu sana hivi kwamba unawaonyesha kuwa tofauti kwelikweli na watu wengine. Mataifa yanapopigana vita, ni nani walio na upendo wa kutosha kwa ajili ya ndugu zao wa Kikristo katika nchi nyingine hata wanakataa kuchukua silaha na kuwaua? Hivyo ndivyo Wakristo wa kwanza walivyofanya.

(6) Je, kweli dini hiyo inajitenga na ulimwengu? Yesu alisema kwamba wafuasi wake wa kweli hawangekuwa “sehemu ya ulimwengu.” (Yoh. 15:19) Ili tumwabudu Mungu kwa njia anayokubali, tunahitaji kubaki “bila doa kutokana na ulimwengu.” (Yak. 1:27) Je, ndivyo ilivyo kwa dini ambazo makasisi na wafuasi wake wengine wanajiingiza katika siasa, au wale ambao maisha yao hasa yanategemea tamaa za mali na za kimwili?—1 Yoh. 2:15-17.

(7) Je, wafuasi wake ni mashahidi watendaji kuhusu Ufalme wa Mungu? Yesu alitabiri hivi: “Hii habari njema ya ufalme itahubiriwa katika dunia yote inayokaliwa ili kuwa ushahidi kwa mataifa yote; na ndipo ule mwisho utakapokuja.” (Mt. 24:14) Ni dini gani inayotangaza kwelikweli Ufalme wa Mungu kuwa ndilo tumaini la wanadamu badala ya kuwatia moyo watu watumainie utawala wa wanadamu utatue matatizo yao? Je, dini yako imekutayarisha ushiriki katika kazi hiyo, na kuifanya nyumba kwa nyumba kama Yesu alivyowafundisha mitume wake kufanya?—Mt. 10:7, 11-13, Mdo. 5:42; 20:20.

Je, Mashahidi wa Yehova wanaamini kwamba dini yao tu ndiyo ya kweli?

Ona ukurasa wa 192, 193, chini ya kichwa, “Mashahidi wa Yehova.”

Kwa nini watu fulani wana imani na wengine hawana?

Ona kichwa, “Imani.”

‘Mimi sipendezwi na dini’

Unaweza kujibu hivi: ‘Hilo halinishangazi. Watu wengi wana maoni kama yako. Hebu nikuulize, Je, umekuwa na maoni hayo sikuzote?’ Kisha unaweza kuongezea: ‘Jambo moja lililonipendeza ni kujua kwamba karibu kila fundisho kubwa linalofundishwa na makanisa leo halipatikani katika Biblia. (Unaweza kutumia habari zinazopatikana katika ukurasa wa 192, 193, chini ya kichwa, “Mashahidi wa Yehova,” na ukazie hasa Ufalme. Ili kuonyesha tofauti iliyopo, kazia mambo ambayo Mashahidi wa Yehova wanaamini, yaliyo katika ukurasa wa 188, 189.)’

Ona pia ukurasa wa 16, 17.

‘Kuna unafiki mwingi mno katika dini’

Unaweza kujibu hivi: ‘Ndiyo, nakubaliana nawe. Wengi huhubiri jambo moja na kutenda vingine. Lakini hebu niambie, Wewe unaionaje Biblia? (Zab. 19:7-10)’

‘Mimi naishi maisha mema. Ninawatendea jirani zangu vema. Hiyo kwangu ni dini ya kutosha’

Unaweza kujibu hivi: ‘Kwa kuwa unasema kwamba unaishi maisha mema, kwa wazi unafurahia maisha, sivyo? . . . Je, ungependa kuishi katika hali zinazosimuliwa katika andiko la Ufunuo 21:4? . . . Ona jambo ambalo andiko la Yohana 17:3 linasema ni lazima mtu afanye ili apate kuishi katika hali hizo.’

Ona pia ukurasa wa 63, 64.

‘Mimi sipendezwi na dini. Ninaamini kwamba jambo la maana ni uhusiano wa kibinafsi pamoja na Mungu’

Unaweza kujibu hivi: ‘Je, umekuwa na maoni hayo sikuzote? . . . Je, ulipata kushirikiana na kikundi fulani cha kidini zamani? . . . (Kisha unaweza kutumia habari katika ukurasa wa 62-65.)’

‘Sikubaliani na kila jambo ambalo kanisa langu linafundisha, lakini sioni haja ya kwenda katika dini nyingine. Ni afadhali nifanye bidii kuiboresha dini yangu mwenyewe’

Unaweza kujibu hivi: ‘Nashukuru kwa kuniambia hivyo. Nina hakika utakubali kwamba jambo muhimu kwelikweli kwetu sote ni kupata kibali cha Mungu, sivyo?’ Kisha unaweza kuongezea: (1) ‘Mungu anatupa sote jambo zito la kufikiria hapa katika andiko la Ufunuo 18:4, 5. . . . Hata ikiwa sisi binafsi hatutendi mambo mabaya, Biblia inaonyesha kwamba tuna lawama ikiwa tunaunga mkono dini hizo. (Ona pia kichwa “Babiloni Mkubwa.”)’ (2) (Unaweza pia kutumia habari kwenye ukurasa wa 65, 66.) (3) ‘Mungu anawatafuta watu wanaoipenda kweli, naye anawakusanya pamoja ili wamwabudu kwa umoja. (Yoh. 4:23, 24)’

‘Dini zote ni nzuri; wewe una yako, nami nina yangu’

Unaweza kujibu hivi: ‘Inaonekana unaheshimu mawazo ya wengine. Lakini unatambua pia kwamba sote tunahitaji mwongozo ambao Neno la Mungu linatoa, na ndiyo sababu una dini, sivyo?’ Kisha unaweza kuongezea: ‘Hapa katika andiko la Mathayo 7:13, 14 Biblia inatupa mwongozo muhimu sana katika maneno ya Yesu. (Soma.) . . . Kwa nini huenda ikawa hivyo?’

Ona pia ukurasa wa 59, 60.

‘Maadamu unamwamini Yesu, haidhuru unashirikiana na kanisa gani’

Unaweza kujibu hivi: ‘Bila shaka, ni muhimu kumwamini Yesu. Nadhani unamaanisha kwamba unakubali kila jambo alilofundisha. Bila shaka wewe umeona, kama mimi, kwamba wengi wanaosema ni Wakristo kwa kweli hawaishi maisha ya Kikristo.’ Kisha unaweza kuongezea: (1) ‘Ona jambo ambalo Yesu alisema katika Mathayo 7:21-23.’ (2) ‘Kuna wakati ujao ulio mzuri ajabu kwa wale wanaotaka kujua mapenzi ya Mungu kisha kuyafanya. (Zab. 37:10, 11; Ufu. 21:4)’

‘Kwa nini unafikiri kwamba kuna dini moja tu ya kweli?’

Unaweza kujibu hivi: ‘Bila shaka, kuna watu wanyoofu katika karibu kila dini. Lakini jambo la maana kwelikweli ni lile ambalo Neno la Mungu linasema. Linasema kuna dini ngapi za kweli? Ona yaliyoandikwa hapa katika Waefeso 4:4, 5.’ Kisha unaweza kuongezea: (1) ‘Hilo linapatana na maandiko mengine. (Mt. 7:13, 14, 21; Yoh. 10:16; 17:20, 21)’ (2) ‘Basi, tatizo tulilo nalo ni kuitambua dini hiyo. Tunaweza kuitambuaje? (Unaweza kutumia habari katika ukurasa wa 65, 66.)’ (3) (Ona pia habari katika ukurasa wa 188, 189, chini ya kichwa, “Mashahidi wa Yehova.”)

‘Mimi husoma tu Biblia nyumbani na kusali kwa Mungu nipate kuielewa’

Unaweza kujibu hivi: ‘Je, umefaulu kuisoma Biblia nzima?’ Kisha unaweza kuongezea: ‘Unapojitahidi kufanya hivyo, utaona jambo lenye kupendeza sana katika Mathayo 28:19, 20. . . . Jambo hilo ni muhimu kwa sababu linaonyesha kwamba Kristo anawatumia wanadamu wengine watusaidie kuelewa yanayohusika katika kuwa Mkristo wa kweli. Kupatana na hilo, Mashahidi wa Yehova wanajitolea kuwatembelea watu katika nyumba zao kwa muda wa saa moja hivi kila juma, bila malipo, ili kuzungumzia Biblia. Je, ninaweza kutumia dakika chache tu nikuonyeshe jinsi tunavyofanya?’

Ona pia ukurasa wa 64.

‘Mimi naamini kwamba dini ni jambo la kibinafsi’

Unaweza kujibu hivi: ‘Siku hizi watu wengi wana maoni hayo, na ikiwa watu hawapendezwi kikweli na ujumbe wa Biblia, sisi huwaacha na kwenda katika nyumba nyingine. Lakini je, unajua kwamba nimekuja kukuona kwa sababu Yesu aliwaagiza wafuasi wake wafanye hivyo? . . . (Mt. 24:14; 28:19, 20; 10:40)’