Je, Wakumbuka?

Je, umeona matoleo ya juzijuzi ya Mnara wa Mlinzi kuwa yenye msaada kwako? Basi mbona usitahini kumbukumbu lako kwa maswali yafuatayo:

◻ Ni maswali gani mawili ambayo yamesaidia Wakristo wengi wanaokabiliana na uamuzi wa kazi ya kuajiriwa wafikie uamuzi wa kibinafsi?

Swali la kwanza muhimu ni hili: Je, kazi hiyo ya kimwili inalaumiwa katika Biblia? Swali la pili ni: Je, kufanya kazi hiyo kungemfanya mtu ashiriki katika zoea lenye kulaumiwa?—4/15, ukurasa wa 28.

◻ ‘Viumbe wa kibinadamu walitiishwaje chini ya ubatili’? (Waroma 8:20)

“[Tu]litiishwa chini ya ubatili” kwa sababu ya matendo ya wazazi wetu wa kwanza, Adamu na Hawa. Si “kwa mapenzi [yetu] wenyewe” au kutokana na uchaguzi wa kibinafsi kwamba jambo hilo lilitukia. Hali yetu ni ya kurithi. Kwa rehema, Yehova bado aliwaruhusu wazazi wetu wa kwanza wazae watoto ingawa sasa wangeweza tu kuwapitishia kutokamilika, dhambi, na kifo. Kifo kikasambaa kwa watu wote, kwa maana hiyo, Mungu “alitiisha [viumbe] chini ya ubatili.”—5/1, ukurasa wa 5.

◻ Kwa nini ni jambo lenye akili kusema kwamba “kitu chenye kuchukiza sana” ‘kitasimama mahali patakatifu’ wakati ujao? (Mathayo 24:15)

Katika kiolezo cha kale, ‘kitu chenye kuchukiza sana kikiwa kimesimama katika mahali patakatifu’ kilihusishwa na shambulio la Waroma wakiongozwa na Jenerali Galo mwaka wa 66 W.K. Mlinganisho wa sasa wa shambulio hilo—kufyatuka kwa “dhiki kubwa”—ungali mbele. (Mathayo 24:21) Kwa hiyo, “kitu chenye kuchukiza sana ambacho husababisha ukiwa” bado hakijasimama katika mahali patakatifu.—5/1, ukurasa wa 16, 17.

◻ Baba na mama wafanyao kazi wanaweza kupataje wakati wa kuwa pamoja na watoto?

Mama anayejisikia amechoka baada ya kazi ya siku anaweza kuwaomba watoto wake wapike mlo pamoja naye. Baba aliye na mambo mengi sana ya kufanya siku za mwisho-juma anaweza kufanya baadhi ya kazi hizo na watoto wake.—5/15, ukurasa wa 6.

◻ Ni lazima wale ‘wanaotembea na Yehova’ wafanye nini? (Yeremia 7:23)

Yahitaji uaminifu-mshikamanifu ili kutembea katika njia ya Yehova—azimio la kumtumikia yeye pekee. Inahitaji tumaini—imani kamili kwamba ahadi za Yehova zinategemeka na zitatimia. Yahitaji utii ili kutembea katika njia ya Yehova—tukifuata sheria zake bila kukengeuka na kushika viwango vyake vya juu. (Zaburi 11:7)—5/15, ukurasa wa 14.

◻ Ni madaraka gani manne ya maana ambayo “zawadi zikiwa wanadamu” wanaweza kutimiza? (Waefeso 4:8)

Wanaweza kuturekebisha kwa wororo, kutujenga kwa upendo, kuchangia umoja wetu kutanikoni, na kutulinda kwa ujasiri. (Waefeso 4:12-14)—6/1, ukurasa wa 14.

◻ Twaweza kujifunza nini kutokana na Paulo kushirikiana na watu mia moja hivi wanaotajwa katika Matendo na katika barua zake?

Yatupasa sikuzote kufanya kazi pamoja na tengenezo la Mungu, kutaniko la kwetu, na waamini wenzetu. Tunahitaji msaada wao, utegemezo, na faraja nyakati zifaazo na nyakati zenye taabu.—6/1, ukurasa wa 31.

◻ Ni mambo yapi matatu ambayo unaweza kutumia kuwasaidia wengine wafikirie Muumba?

Vipimo sahihi vinavyoonekana katika ulimwengu mkubwa, chanzo cha uhai duniani, na hali isiyotilika shaka ya upekee wa ubongo wa binadamu pamoja na uwezo wake mbalimbali.—6/15, ukurasa wa 18.

◻ Kwa nini ni muhimu sana kuelewa maana ya jina la kibinafsi la Muumba?

Jina la Mungu lamaanisha “Yeye Husababisha Iwe” nalo lakazia kwamba yeye hukusudia na kuchukua hatua. Kwa kujua jina hilo na kulitumia, tunaweza kufahamu vema zaidi kwamba yeye hutimiza ahadi zake na kutekeleza makusudi yake.—6/15, ukurasa wa 21.

◻ Watoto wanaweza kuhusishwaje katika funzo la Biblia la familia?

Inapowezekana, panga kila mtoto awe na Biblia yake mwenyewe na kichapo mnachojifunza. Huenda kijana akaombwa aeleze picha fulani zilizo kwenye habari ya funzo, na mtoto mchanga anaweza kupewa mgawo mapema asome andiko. Mtoto mwenye umri mkubwa zaidi aweza kupewa mgawo wa kutaja fursa mbalimbali za kutumia habari wanayojifunza.—7/1, ukurasa wa 15.

◻ Ni miradi gani ambayo huenda familia ikatia katika utayarishaji wa mikutano ya kutaniko?

(1) Kila mmoja katika familia kuwa tayari kutoa maelezo kwenye mikutano ya kutaniko; (2) kila mmoja kujitahidi kutoa maelezo katika maneno yake mwenyewe; (3) kutia ndani maandiko katika maelezo; na (4) kuchanganua habari kwa lengo la kuitumia kibinafsi.—7/1, ukurasa wa 20.

◻ Ufunguo wa ndoa nzuri ni nini?

Mawasiliano mazuri ni muhimu ili kufungua na kupata shangwe yenye thamani ya ndoa nzuri. Hayo huhusisha kubadilishana mawazo na maoni. Nayo mawasiliano yenye kujenga huhusisha mambo yenye kujenga, kuburudisha, yenye wema wa adili, yenye kusifika, na yenye kuliwaza. (Waefeso 4:29-32; Wafilipi 4:8)—7/15, ukurasa wa 21.

◻ ‘Njia ya Yehova’ ni nini? (Zaburi 25:8, 9, 12)

Njia hiyo ni njia ya upendo. Inategemea kufanya yaliyo sawa kulingana na viwango vya Mungu. Biblia huita matumizi ya upendo huu wa kanuni “njia izidiyo.” (1 Wakorintho 12:31)—8/1, ukurasa wa 12.