Uwe na Jicho Rahisi

¹ Katika Mahubiri yake ya Mlimani, Yesu alionyesha jinsi jicho la mfano au la kiroho linavyoweza kuathiri sana maisha yetu yote. Alisema hivi: “Basi, ikiwa jicho lako ni rahisi, mwili wako wote utakuwa mwangavu; lakini ikiwa jicho lako ni bovu, mwili wako wote utakuwa wenye giza.” (Mt. 6:22, 23) Mtu mwenye jicho rahisi ni yule ambaye anakazia fikira kusudi moja tu—kufanya mapenzi ya Mungu. Hakengeushwi na mahangaiko yasiyofaa ya vitu vya kimwili. (Mt. 6:19-21, 24-33) Ni nini kinachoweza kutusaidia kuendelea kuwa na jicho rahisi?

² Kusitawisha Hali ya Kuridhika: Kuwaandalia mahitaji washiriki wa nyumbani mwetu ni wajibu wa Kimaandiko. (1 Tim. 5:8) Lakini hilo halimaanishi tuendelee daima kutafuta vitu bora na vya kisasa. (Met. 27:20; 30:8, 9) Badala yake, Maandiko yanatuhimiza turidhike na “chakula na kitu cha kujifunika,” mahitaji ya lazima ya maisha. (1 Tim. 6:8; Ebr. 13:5, 6) Kutii shauri hilo kunaweza kutusaidia kuwa na jicho linalokazia mambo yanayofaa.

³ Ni jambo la hekima kuepuka kujitwika mizigo kwa kuwa na madeni yasiyo ya lazima, kuwa na vitu au shughuli ambazo zinahitaji uangalifu na wakati mwingi. (1 Tim. 6:9, 10) Tunawezaje kufanya hivyo? Unapotaka kufanya uamuzi fulani, sali kuhusu jambo hilo na ufikirie kwa unyofu kama litavuruga mambo ya kiroho. Azimia kutanguliza mambo ya kiroho maishani mwako.—Flp. 1:10; 4:6, 7.

⁴ Yafanye Maisha Yako Yawe Sahili: Jambo jingine linaloweza kukusaidia kuepuka kuvutiwa na vitu vya kimwili ni kutafuta njia za kufanya maisha yako yawe sahili. Ndugu mmoja ambaye familia yake ilifaulu kuishi vizuri bila vitu vingi vya kimwili alisema hivi: “Sasa ninaweza kuwatumikia ndugu zangu kwa kufanya mengi zaidi kutanikoni. Ninasadiki kwamba Yehova huwabariki watumishi wake wote wanapotanguliza ibada ya kweli badala ya mapendezi yao.” Je, unaweza kupata baraka nyingi zaidi kwa kufanya maisha yako yawe sahili?

⁵ Jitihada inahitajiwa daima ili tuushinde uvutano wa Shetani, ulimwengu wake unaokazia vitu vya kimwili, na hali yetu ya kutokamilika. Badala ya kuruhusu macho yetu yatangetange, tukazie fikira kufanya mapenzi ya Mungu na tumaini letu lenye thamani sana la uzima wa milele.—Met. 4:25; 2 Kor. 4:18.

[Maswali ya Funzo]

 1. Kuwa na jicho rahisi kwamaanisha nini, na kwa nini ni muhimu?

 2. Neno la Mungu linatutia moyo tuoneje vitu vya kimwili?

 3. Ni nini kinachoweza kutusaidia kuepuka kujitwika mizigo isiyo ya lazima?

 4. Kwa nini tunapaswa kutafuta njia za kufanya maisha yetu yawe sahili?

 5. Kwa nini jitihada inahitajiwa daima ili kuwa na jicho rahisi?