Maswali Kutoka kwa Wasomaji
Yesu alihimiza hivi: “Jikakamueni wenyewe kisulubu ili mwingie ndani kupitia mlango mwembamba, kwa sababu wengi, mimi nawaambia nyinyi, watatafuta sana kuingia ndani lakini hawataweza.” (Luka 13:24) Alimaanisha nini, na maneno hayo yatumikaje leo?
Twaweza kuelewa vizuri zaidi kifungu hicho chenye kupendeza kwa kuchunguza kikao ambacho maneno hayo yalisemwa. Miezi ipatayo sita kabla ya kifo chake, Yesu alikuwa Yerusalemu wakati wa ukumbusho wa kila mwaka wa kuwekwa wakfu upya kwa hekalu. Alisema yeye alikuwa mchungaji wa kondoo wa Mungu lakini akaonyesha kwamba, Wayahudi kwa ujumla hawakuwa miongoni mwa kondoo hao kwa sababu walikataa kusikiliza. Aliposema kwamba yeye na Baba yake walikuwa “mmoja,” Wayahudi waliokota mawe ili wampige kwa hayo. Aliponyoka akaenda Perea ng’ambo ya Yordani.—Yohana 10:1-40.
Huko mwanamume mmoja alimwuliza hivi: “Bwana, je, wale wanaookolewa ni wachache?” (Luka 13:23) Ilifaa mwanamume huyo kuuliza swali hilo, kwa kuwa Wayahudi wa wakati huo waliamini kwamba ni idadi ndogo tu ambayo ingestahili wokovu. Kwa mtazamo walioonyesha, si jambo gumu kuwazia ni akina nani waliofikiriwa kuwa wangefanyiza hiyo idadi ndogo. Walikosea kama nini, kama ambavyo matukio ya baadaye yangeonyesha!
Kwa miaka ipatayo miwili, Yesu alikuwa pamoja nao, akifundisha, akifanya miujiza, na kuwatolea fursa ya kuwa warithi wa Ufalme wa kimbingu. Kukiwa na matokeo gani? Wao, na hasa viongozi wao, walijivunia kuwa wazao wa Abrahamu na kuwa walikabidhiwa Sheria ya Mungu. (Mathayo 23:2; Yohana 8:31-44) Lakini hawangeweza kutambua na kuitikia sauti ya Mchungaji Mwema. Ilikuwa kana kwamba kulikuwa na fursa mbele yao, kukiwa na thawabu kuu ya kushiriki katika Ufalme, ikiwa wangeitumia fursa hiyo, lakini walikataa. Ni watu wachache tu kwa kulinganishwa, hasa kutoka katika tabaka la chini, waliosikiliza ujumbe wa kweli wa Yesu, wakaitikia, na kushikamana naye.—Luka 22:28-30; Yohana 7:47-49.
Siku ya Pentekoste 33 W.K., wale watu wa tabaka la chini ndio ambao walikuwa katika hali ya kuweza kutiwa mafuta kwa roho. (Matendo 2:1-38) Hawakuwa miongoni mwa wafanyakazi wa ukosefu wa uadilifu waliotajwa na Yesu, ambao wangetoa machozi na kusaga meno yao kwa sababu ya kushindwa kutumia fursa iliyotolewa kwao.—Luka 13:27, 28.
Kwa sababu hiyo, katika karne ya kwanza hao “wengi” walikuwa Wayahudi kwa ujumla, na hasa viongozi wa kidini. Hao walidai kutaka upendeleo wa Mungu—bali kulingana tu na viwango na njia zao wenyewe, lakini si kulingana na viwango vya Mungu. Kinyume cha hilo, wale “wachache” kwa kulinganishwa, walioitikia kutokana na upendezi wa moyo mweupe wa kutaka kuwa sehemu ya Ufalme, walitiwa mafuta kuwa washiriki wa kutaniko la Kikristo.
Sasa fikiria namna maneno hayo yatumikavyo kwa kadiri kubwa zaidi katika siku yetu. Watu walio wengi ambao huhudhuria makanisa ya Jumuiya ya Wakristo, wamefundishwa kwamba wataenda mbinguni. Hata hivyo, tamaa hiyo ya kutaka makubwa, haitegemei mafundisho sahihi ya Maandiko. Kama ilivyokuwa kwa Wayahudi waliotajwa mapema, hawa wanataka upendeleo wa Mungu kwa kupatana tu na matakwa yao.
Ingawa hivyo, katika wakati wetu kumekuwako watu wachache kwa kulinganishwa ambao kwa unyenyekevu wameitikia ujumbe wa Ufalme, wakajiweka wenyewe wakfu kwa Yehova, na kuja kuwa katika hali ya kuweza kupata upendeleo wake. Hilo limewafanya kuwa “wana wa ufalme.” (Mathayo 13:38) “Wana” hao ambao wametiwa mafuta walianza kualikwa katika Pentekoste mwaka wa 33 W.K. Mashahidi wa Yehova wameamini kwa muda mrefu kwamba uthibitisho wa kushughulika kwa Mungu na watu wake hudokeza kwamba, kimsingi washiriki wa jamii ya kimbingu wamekwisha kuitwa. Kwa sababu hiyo, wale ambao wamejifunza Biblia miaka ya karibuni wameelewa kwamba, tumaini la uhai udumuo milele katika dunia iliyo paradiso linatolewa kwa watu sasa. Hawa wamekuwa wengi kuliko mabaki ya Wakristo watiwa-mafuta wanaozidi kupungua, ambao kwa kweli wana matazamio ya kwenda mbinguni. Andiko la Luka 13:24 halitumiki sana kwa wale wasio na taraja la kwenda mbinguni, lakini kwa kweli lina shauri lenye hekima kwao.
Kwa kutuhimiza tujikakamue kisulubu, Yesu hakuwa akisema kwamba ama yeye ama Baba yake hutuwekea vizuizi. Lakini twaelewa kutokana na andiko la Luka 13:24 kwamba, matakwa ya Mungu ni kama vile kuwaondoa wasiostahili. “Jikakamueni wenyewe kisulubu” humaanisha kung’ang’ana, kujitahidi sana. Hivyo, twaweza kujiuliza, ‘Je, mimi ninajitahidi sana?’ Andiko la Luka 13:24 laweza kufafanuliwa kwa maneno mengine na kusomeka, ‘Nahitaji kujikakamua kisulubu ili niingie kupitia mlango mwembamba kwa sababu wengi watatafuta sana kuingia ndani lakini hawataweza. Hivyo, je, ninajikakamua kisulubu? Je, mimi ni kama mwanariadha katika stediamu ya kale aliyejitoa kabisa ili kushinda tuzo? Hakuna mwanariadha kama huyo ambaye angekuwa na moyo nusu, akipunguza kasi. Je, mimi napunguza kasi?’
Maneno ya Yesu yadokeza kwamba watu fulani waweza kutafuta sana ‘kupitia mlango mwembamba’ wakati wao ufaao na kwa mwendo wa kustarehe wanaopendelea. Mtazamo kama huo ungeweza kuathiri Mashahidi mmoja mmoja. Wengine huenda wakasababu, ‘Najua Wakristo wenye kujitoa waliojitahidi sana kwa miaka mingi, wakijidhabihu sana; hata hivyo, kufikia wakati wa kifo chao, mwisho wa mfumo huu mwovu ulikuwa bado haujafika. Hivyo labda ingekuwa vyema nipunguze mwendo, niishi maisha ya kawaida zaidi.’
Ni rahisi kufikiri kwa njia hiyo, lakini je, kufikiri huko ni kwa hekima? Kwa mfano, je, mitume walifikiri kwa njia hiyo? Kwa wazi la. Walijitahidi kabisa kwa ajili ya ibada ya kweli—hadi kifo chao. Kwa mfano, Paulo angeweza kusema hivi: “[Kristo] ndiye sisi tunatangaza . . . Kwa madhumuni haya kwa kweli ninafanya kazi kwa bidii, nikijikakamua mwenyewe kwa kupatana na utendaji wake na unaofanya kazi ndani yangu kwa nguvu.” Baadaye aliandika hivi: “Kwa madhumuni haya tunafanya kazi kwa bidii na kujikakamua wenyewe, kwa sababu tumeweka tumaini letu juu ya Mungu aliye hai, ambaye ni Mwokozi wa namna zote za watu, hasa wa walio waaminifu.”—Wakolosai 1:28, 29; 1 Timotheo 4:10.
Twajua kwamba Paulo alifanya jambo zuri kabisa kwa kujikakamua. Tungekuwa wenye kuridhika kama nini kuweza kusema kama vile Paulo alivyosema: “Nimepigana pigano bora, nimekimbia mwendo hadi mwisho, nimeshika imani.” (2 Timotheo 4:7) Hivyo kupatana na maneno ya Yesu yaliyorekodiwa kwenye Luka 13:24, kila mmoja wetu aweza kuuliza, ‘Je, mimi najikaza kwa bidii yenye kuendelea? Naam, je, mimi hutoa uthibitisho wa kutosha, na wa kawaida kwamba ninayasikiza maneno ya Yesu: “Jikakamueni wenyewe kisulubu ili mwingie ndani kupitia mlango mwembamba”?’