Sababu Inayofanya Miujiza Peke Yayo Isijenge Imani
KUONA ni kuamini. Hayo ndiyo maoni ya watu wengi. Watu fulani husema kwamba wangeamini katika Mungu ikiwa angejifunua mwenyewe katika njia ya kimuujiza. Labda hivyo ndivyo ilivyo, lakini je, itikadi kama hiyo ingeongoza kwenye imani ya kweli?
Wafikirie Waisraeli Kora, Dathani, na Abiramu. Biblia huonyesha kwamba walijionea kwa macho miujiza hii yenye kutia kicho kutoka kwa Mungu: mapigo kumi dhidi ya Misri, kusalimika kwa taifa la Israeli kupitia Bahari Nyekundu, na maangamizi ya Farao wa Misri na jeshi lake la kivita. (Kutoka 7:19–11:10; 12:29-32; Zaburi 136:15) Kora, Dathani, na Abiramu pia walimsikia Yehova akisema toka mbinguni kwenye Mlima Sinai. (Kumbukumbu la Torati 4:11, 12) Hata hivyo, punde si punde baada ya miujiza hiyo kutukia, wanaume hao watatu walichochea uasi dhidi ya Yehova na watumishi wake waliowekwa rasmi.—Hesabu 16:1-35; Zaburi 106:16-18.
Miaka ipatayo 40 baadaye, nabii aliyeitwa Balaamu alijionea muujiza pia. Hata kujiingiza kwa kimalaika hakukumzuia asiunge mkono upande wa maadui wa Mungu, Wamoabi. Ujapokuwa muujiza huo, Balaamu alichukua msimamo dhidi ya Yehova Mungu na watu Wake. (Hesabu 22:1-35; 2 Petro 2:15, 16) Hata hivyo, kukosa imani kwa Balaamu si kitu kulinganishwapo na kule kwa Yudasi Iskariote. Ijapokuwa alikuwa amekuwa mwandamani wa karibu wa Yesu na mtu aliyejionea kwa macho miujiza mingi isivyo kawaida, Yudasi alimsaliti Kristo kwa vipande thelathini vya fedha.—Mathayo 26:14-16, 47-50; 27:3-5.
Viongozi wa kidini Wayahudi pia walikuwa na habari juu ya miujiza mingi ya Yesu. Baada ya Yesu kumfufua Lazaro, hata walikiri hivi: “Mtu huyu hufanya ishara nyingi.” Lakini je, kule kumwona Lazaro aliyekuwa hai sasa kuliilainisha mioyo yao na kuwapa imani? La, hasha. Badala ya hivyo, walipanga njama ya kumwua Yesu na pia Lazaro!—Yohana 11:47-53; 12:10.
Hata kujiingiza kwa Mungu hakukufaulu kutokeza imani katika watu hao waovu. Pindi moja Yesu alipokuwa kwenye nyua za hekalu, alisali hivi kwa sauti kuu: “Baba, tukuza jina lako.” Yehova alijibu hivi katika sauti kutoka mbinguni: “Mimi nimelitukuza na pia hakika nitalitukuza tena.” Hata hivyo, tukio hilo la kimuujiza halikutokeza imani mioyoni mwa waliokuwapo. Biblia yasema hivi: “Ijapokuwa alikuwa amefanya ishara nyingi sana mbele yao, hawakuwa wakiweka imani katika yeye.”—Yohana 12:28-30, 37; linganisha Waefeso 3:17.
Sababu Iliyofanya Miujiza Isijenge Imani
Kukosa imani huko kungeweza kuwako jinsi gani kukiwa na miujiza mingi hivyo? Kumkataa Yesu kwa viongozi wa kidini Wayahudi kwaonekana kuwa kwenye kukoroweza hasa ufikiriapo kwamba wakati uleule alipoanza huduma yake, Wayahudi kwa ujumla walikuwa ‘wakitarajia Kristo,’ au Mesiya. (Luka 3:15) Hata hivyo, tatizo lilikuwa katika mataraja yao. Mhariri wa kamusi W. E. Vine amnukuu msomi wa Biblia ajulikanaye sana kuwa akisema kwamba Wayahudi walikuwa wakishikilia sana lile wazo la Mesiya ambaye angewapa “ushindi wa muda” na “ufanisi wa vitu vya kimwili.” Kwa sababu hiyo, hawakuwa tayari kwa ajili ya Yesu Mnazareti, aliyekuwa mnyenyekevu, asiyejiingiza katika siasa, aliyetokea miongoni mwao akiwa Mesiya wa kweli katika 29 W.K. Hao viongozi wa kidini pia walihofu kwamba mafundisho ya Yesu yangeharibu hali za kijamii zilizokuwapo na kuhatarisha nyadhifa zao maarufu. (Yohana 11:48) Madhanio yao ya kimbele na ubinafsi wao uliwapofusha wasione maana ya miujiza ya Yesu.
Baadaye viongozi wa kidini Wayahudi na wengineo walikataa ithibati ya kimuujiza ya kwamba wafuasi wa Yesu walikuwa na upendeleo wa kimungu. Kwa kielelezo, mitume wake walipomponya mtu aliyekuwa kilema tangu kuzaliwa, washiriki waliochukizwa wa mahakama ya juu ya Kiyahudi waliuliza hivi: “Tutafanya nini na watu hawa? Kwa sababu, kwa kweli, ishara mashuhuri imetukia kupitia wao, moja iliyo dhahiri kwa wakaaji wote wa Yerusalemu; nasi hatuwezi kuikana. Hata hivyo, ili isipate kusambazwa zaidi kotekote miongoni mwa watu, acheni tuwaambie kwa matisho wasiseme tena kamwe juu ya msingi wa jina hili kwa mtu yeyote hata kidogo.” (Matendo 3:1-8; 4:13-17) Kwa wazi, muujiza huu wa ajabu haukuwa umejenga au kutokeza imani mioyoni mwa wanaume hao.
Tamaa ya makubwa, kiburi, na pupa ni mambo ambayo yamewafanya watu wengi waifanye mioyo yao kuwa migumu. Yaonekana ndivyo ilivyokuwa katika kisa cha Kora, Dathani, na Abiramu, waliotajwa mwanzoni. Wivu, hofu, na mielekeo mibaya mingine mingi imewazuia wengi. Twakumbushwa pia juu ya malaika wasiotii, wale roho waovu, ambao wakati mmoja walikuwa na pendeleo la kuuona uso wenyewe wa Mungu. (Mathayo 18:10) Hawashuku kuwapo kwa Mungu. Kwa kweli, “roho waovu waamini na kutetemeka sana.” (Yakobo 2:19) Hata hivyo, hawana imani katika Mungu.
Maana ya Imani ya Kweli
Imani ni zaidi ya itikadi tu. Pia ni zaidi ya itikio la kihisia-moyo lililo la muda tu kwa muujiza fulani. Andiko la Waebrania 11:1 lasema hivi: “Imani ni taraja lililohakikishwa la mambo yatumainiwayo, wonyesho dhahiri wa mambo halisi ingawa hayaonwi.” Mtu mwenye imani anasadikishwa moyoni mwake kwamba kila jambo ambalo Yehova Mungu aahidi ni kana kwamba limetimizwa. Isitoshe, uthibitisho usiokanika wa mambo halisi yasiyoonekana ni wenye nguvu sana hivi kwamba imani yenyewe inasemwa kuwa sawa na uthibitisho huo. Ndiyo, imani hutegemea uthibitisho. Na katika nyakati zilizopita, miujiza ilikuwa na sehemu katika ukuzi wa imani au katika kuijenga. Miujiza iliyofanywa na Yesu ilitumika kuwasadikisha wengine kwamba alikuwa Mesiya aliyeahidiwa. (Mathayo 8:16, 17; Waebrania 2:2-4) Vivyo hivyo, zawadi za roho takatifu ya Mungu, au kani ya utendaji, kama vile kuponya kimuujiza au kusema kwa lugha kulithibitisha kwamba Wayahudi hawakuwa na upendeleo wa Yehova tena bali kwamba kibali chake sasa kilikuwa juu ya kutaniko la Kikristo, lililoanzishwa na Mwanaye, Yesu Kristo.—1 Wakorintho 12:7-11.
Uwezo wa kutoa unabii ulikuwa miongoni mwa zawadi za roho za kimuujiza. Wasioamini walipoona muujiza huo, baadhi yao walisukumwa kumwabudu Yehova, wakijulisha wazi hivi: “Mungu kwa kweli yumo miongoni mwenu.” (1 Wakorintho 14:22-25) Hata hivyo, Yehova Mungu hakukusudia kwamba miujiza iwe sehemu ya kudumu ya ibada ya Kikristo. Kulingana na hayo, mtume Paulo aliandika hivi: “Kama kuna zawadi za kutoa unabii, zitaondolewa mbali; kama kuna lugha, zitaacha kuwako.” (1 Wakorintho 13:8) Kwa wazi zawadi hizo zilikoma mitume na wale waliokuwa wamepokea zawadi hizo kupitia wao walipokufa.
Basi je, watu wangeachwa bila msingi wa imani? La, kwa kuwa Paulo alisema hivi: “[Mungu] hakujiacha mwenyewe bila ushahidi kwa kuwa alitenda mema, akiwapa nyinyi mvua kutoka mbinguni na majira yenye kuzaa matunda, akijaza mioyo yenu kikamili kwa chakula na uchangamfu.” (Matendo 14:17) Kwa kweli, watu wenye moyo wa haki walio tayari kufungua akili na mioyo yao waone uthibitisho unaotuzingira, “sifa za [Yehova Mungu] zisizoonekana zaonwa waziwazi tangu uumbaji wa ulimwengu na kuendelea, kwa sababu zafahamiwa kwa vitu vilivyofanywa, hata nguvu zake za milele na Uungu, hivi kwamba [wale wanaomkana Mungu] hawana sababu ya kujitetea.”—Waroma 1:20.
Mengi zaidi ya kuwa na itikadi katika kuwako kwa Mungu yanahitajiwa. Paulo alihimiza hivi: “Komeni kufanyizwa kulingana na mtindo wa mfumo huu wa mambo, bali mgeuzwe umbo kwa kufanya upya akili yenu, ili mpate kujithibitishia wenyewe mapenzi ya Mungu yaliyo mema na yenye kukubalika na makamilifu.” (Waroma 12:2) Hilo laweza kufanywa kwa kujifunza Maandiko kwa bidii kwa msaada wa vichapo vya Kikristo, kama vile gazeti hili. Imani inayotegemea ujuzi sahihi wa Neno la Mungu, Biblia, si dhaifu wala ya kijuujuu. Wale ambao wamefahamu mapenzi ya Mungu na wanayafanya katika imani wanatoa utumishi mtakatifu kwa Mungu.—Waroma 12:1.
Kuamini Bila Kuona
Ilikuwa vigumu kwa mtume Tomaso kudhihirisha imani katika kufufuliwa kwa Yesu kutoka kwa wafu. “Isipokuwa nione katika mikono yake chapa ya misumari na nitie kidole changu ndani ya chapa ya misumari na kutia mkono wangu ndani ya ubavu wake, hakika kabisa mimi sitaamini,” Tomaso akajulisha wazi. Baadaye Yesu alipochukua mwili wa kibinadamu ulioonyesha vidonda vya kutundikwa kwake mtini, Tomaso aliitikia vizuri muujiza huo. Hata hivyo, Yesu alisema hivi: “Wenye furaha ni wale ambao hawaoni na bado waamini.”—Yohana 20:25-29.
Leo, mamilioni ya Mashahidi wa Yehova “[Wa]natembea kwa imani, si kwa kuona.” (2 Wakorintho 5:7) Ingawa hawakuona miujiza iliyorekodiwa katika Biblia, wao waamini kwa dhati kwamba miujiza hiyo ilitukia. Hao Mashahidi hudhihirisha imani katika Mungu na Neno lake. Kwa msaada wa roho yake, wanaweza kuelewa mafundisho ya Biblia na kichwa chayo kikuu—utetezi wa enzi kuu ya Yehova Mungu kupitia Ufalme wake wa kimbingu. (Mathayo 6:9, 10; 2 Timotheo 3:16, 17) Kwa manufaa yao kubwa, Wakristo hao wa kweli hutumia shauri lenye hekima la Biblia maishani. (Zaburi 119:105; Isaya 48:17, 18) Wanakubali ile ithibati isiyokanika kwamba unabii mbalimbali wa Biblia watia alama wakati wetu kuwa “siku za mwisho,” nao wanaamini kwamba ulimwengu mpya wa Mungu ulioahidiwa u karibu. (2 Timotheo 3:1-5; Mathayo 24:3-14; 2 Petro 3:13) Ni shangwe kwao kushiriki na wengine ujuzi juu ya Mungu. (Mithali 2:1-5) Wanajua kwamba wale wanaomtafuta Mungu wanaweza kumpata kikweli kupitia kujifunza Maandiko tu.—Matendo 17:26, 27.
Je, wamkumbuka Albert, aliyetajwa katika makala iliyotangulia? Siku chache baada ya sala yake ya kuomba muujiza kutojibiwa, alitembelewa na mmoja wa Mashahidi wa Yehova, mwanamke mzee-mzee aliyemwachia baadhi ya fasihi za Biblia. Baada ya hapo Albert alikubali funzo la Biblia nyumbani bila malipo. Alipopata kujua ujumbe wa Biblia vema zaidi, mtamauko wake uligeuka kuwa msisimko. Alianza kutambua kwamba alikuwa amempata Mungu hata hivyo.
Maandiko huhimiza hivi: “Mtafuteni BWANA, maadamu anapatikana, mwiteni, maadamu yu karibu.” (Isaya 55:6) Waweza kufanya hilo, si kwa kungojea muujiza wa siku ya kisasa kutoka kwa Mungu, bali kwa kupata ujuzi sahihi wa Neno lake. Hilo ni jambo la lazima, kwa kuwa miujiza peke yayo haijengi imani.
[Picha katika ukurasa wa5]
Hata kufufuliwa kimuujiza kwa Lazaro hakukuwasukuma maadui wa Yesu wadhihirishe imani
[Picha katika ukurasa wa 7]
Imani ni lazima itegemee ujuzi sahihi wa Biblia