Wakristo wa Kweli Ni Nani?
“UKRISTO unapatikana tu mahali ambapo ujuzi kumhusu Yesu Kristo una uvutano juu ya mambo ambayo watu wanafundisha na kufanya.” (On Being a Christian) Kwa maneno hayo, mwanatheolojia Mswisi Hans Küng, anasema jambo hili la kweli linaloonekana wazi: Ukristo wa kweli unapatikana tu mahali ambapo watu wanyoofu wanafuata mafundisho ya Yesu.
Hivyo basi, itakuwaje kwa watu au mashirika ambayo yanadai kumfuata Kristo lakini kwa kweli hayafuati mafundisho Yake? Yesu mwenyewe alisema kwamba wengi wangedai kuwa Wakristo. Wangetaja mambo mbalimbali ili kuthibitisha kwamba walikuwa wamemtumikia, wakisema: “Hatukutoa unabii katika jina lako, na kufukuza roho waovu katika jina lako, na kufanya matendo mengi yenye nguvu katika jina lako?” Lakini, Yesu atatendaje? Maneno haya yaliyo wazi yanaonyesha hukumu yake: “Sikuwajua ninyi kamwe! Ondokeni kwangu, ninyi wenye matendo ya uasi-sheria.”—Mathayo 7:22, 23.
Hilo ni onyo kali kama nini kwa watu “wenye matendo ya uasi-sheria” ambao wanadai kumfuata Yesu! Ona matakwa mawili ya msingi ambayo watu wanapaswa kutimiza ili Yesu awatambue kuwa Wakristo wa kweli badala ya kuwakataa kwa sababu ya matendo yao ya uasi-sheria.
“Mkiwa na Upendo Kati Yenu Wenyewe”
Takwa moja ambalo Yesu anaweka ni hili: “Ninawapa ninyi amri mpya, kwamba mpendane; kama vile ambavyo nimewapenda ninyi, ninyi nanyi mpendane vivyo hivyo. Kwa jambo hili wote watajua kwamba ninyi ni wanafunzi wangu, mkiwa na upendo kati yenu wenyewe.”—Yohana 13:34, 35.
Yesu anataka wafuasi wake wapendane kikweli na wawapende wanadamu wengine. Tangu Yesu alipokuwa duniani, Wakristo wengi wamekuwa wakitimiza takwa hilo. Lakini namna gani mashirika mengi ya kidini ambayo yamedai kumwakilisha Kristo? Je, yamekuwa na upendo? Bila shaka la. Badala yake, yamekuwa katika mstari wa mbele katika vita vingi na mapambano ambayo yamesababisha umwagaji wa damu ya watu wasio na hatia.—Ufunuo 18:24.
Hali imekuwa hivyo hata kufikia wakati huu. Mataifa yanayodai kuwa ya Kikristo yalikuwa mstari wa mbele katika mauaji ya vile vita viwili vya ulimwengu vya karne ya 20. Katika miaka ya karibuni, washiriki wa makanisa yanayodai kuwa ya Kikristo wamekuwa mstari wa mbele katika jitihada za kuangamiza jamii nzima-nzima na matendo ya kikatili yaliyotokea nchini Rwanda mwaka wa 1994. Aliyekuwa askofu mkuu wa Kanisa Anglikana, Desmond Tutu, aliandika hivi: “Wale waliowageukia wenzao kikatili katika mauaji hayo, walikuwa na imani moja. Wengi wao walikuwa Wakristo.”
“Mkikaa Katika Neno Langu”
Takwa la pili la msingi la Ukristo wa kweli lilitajwa na Yesu aliposema hivi: “Mkikaa katika neno langu, ninyi kwa kweli ni wanafunzi wangu, nanyi mtaijua kweli, nayo kweli itawaweka ninyi huru.”—Yohana 8:31, 32.
Yesu anatazamia wafuasi wake wakae katika neno lake, yaani, washikamane na mafundisho yake. Lakini, walimu wa dini wanaodai kumfuata Kristo ‘wamefuata sana dhana za Kigiriki,’ asema mwanatheolojia Küng. Badala ya kufundisha mafundisho ya Yesu, wanaamini kwamba nafsi haifi, kwamba kuna purgatori, wanamwabudu Maria, na wana kikundi cha makasisi—na mambo hayo yalitokana na dini za kipagani na wanafalsafa.—1 Wakorintho 1:19-21; 3:18-20.
Pia, viongozi wa dini walianzisha fundisho lisiloeleweka la Utatu, ambalo limemwinua Yesu kwenye cheo ambacho hakudai kuwa nacho. Kwa kufanya hivyo, wamewakengeusha watu waache kumwabudu yule ambaye Yesu alimwelekezea fikira, yaani, Baba yake, Yehova. (Mathayo 5:16; 6:9; Yohana 14:28; 20:17) Hans Küng anaandika hivi: “Yesu anapozungumza kumhusu Mungu, anamaanisha yule Mungu wa kale wa Abrahamu, Isaka, na Yakobo, yaani, Yahweh . . . Kwake yeye huyo ndiye Mungu wa pekee.” Ni watu wangapi leo wanaomtambua Mungu wa Yesu ambaye ndiye Baba ya Yesu kuwa Yahweh au Yehova, kama jina lake linavyoandikwa katika Kiswahili?
Viongozi wa kidini wamepuuza kabisa amri ya Yesu ya kutojihusisha na siasa. Katika siku za Yesu, Galilaya “lilikuwa kituo cha uzalendo wa kijamii,” asema mwandikaji Trevor Morrow. Wazalendo wengi wa Kiyahudi walishiriki mapambano ili wapate uhuru wa kisiasa na wa kidini. Je, Yesu aliwaambia wanafunzi wake wajihusishe katika mapambano kama hayo? La. Tofauti na hivyo, aliwaambia hivi: “Ninyi si sehemu ya ulimwengu.” (Yohana 15:19; 17:14) Hata hivyo, badala ya kutohusika katika siasa, viongozi wa kidini wamebuni yale ambayo mwandikaji wa Ireland Hubert Butler anafafanua kuwa “mafundisho ya makanisa ya kivita na kisiasa.” Anaandika hivi: “Makanisa ya Ukristo yanapojihusisha katika siasa, mara nyingi hayo huunga mkono vita, na wakati wanasiasa na viongozi wa dini wanapofanya makubaliano, mara nyingi makanisa hubariki majeshi ya serikali ili yapate faida fulani.”
Walimu wa Uwongo Humkana Yesu
Mtume Paulo alisema kwamba wengine wangeanguka kutoka katika Ukristo wa kweli. Alisema kwamba baada ya kifo chake, “mbwa-mwitu wenye kukandamiza” kutoka miongoni mwa wale wanaodai kuwa Wakristo ‘wangesema mambo yaliyopotoka ili kuwavuta wanafunzi wawafuate wao wenyewe.’ (Matendo 20:29, 30) ‘Wangetangaza hadharani kwamba wanamjua Mungu,’ lakini kwa kweli ‘wanamkana kwa matendo yao.’ (Tito 1:16) Vilevile mtume Petro alionya kwamba walimu wa uwongo ‘wangeingiza ndani kimya-kimya madhehebu yenye kuharibu nao wangemkana hata yule bwana aliyewanunua.’ Alisema kwamba mwenendo wao mbaya ungewafanya watu ‘waitukane ile njia ya kweli.’ (2 Petro 2:1, 2) Kulingana na msomi Mgiriki W. E. Vine, kumkana Kristo kwa njia hiyo kunamaanisha “kumkataa Baba na Mwana, kwa kuasi imani na kueneza mafundisho yenye kudhuru.”
Yesu atatendaje iwapo wale wanaodai kuwa wanafunzi wake wanakataa kimakusudi ‘kukaa katika neno lake’ na kufuata matakwa mengine aliyowapa? Alionya hivi: “Yeyote yule anayenikana mimi mbele ya watu, mimi pia nitamkana mbele za Baba yangu aliye mbinguni.” (Mathayo 10:33) Bila shaka, Yesu hamkani mtu anayefanya makosa licha ya kujitahidi sana kuwa mwaminifu. Kwa mfano, ingawa mtume Petro alimkana Yesu mara tatu, Petro alitubu naye akasamehewa. (Mathayo 26:69-75) Hata hivyo, Yesu huwakana watu au mashirika ambayo kwa kweli ni mbwa-mwitu ambao wamevalia mavazi ya kondoo—wanaojifanya wanamfuata Kristo lakini ambao wanaendelea kukataa mafundisho yake kimakusudi. Yesu alisema hivi kuhusu walimu hao wa uwongo: “Kwa matunda yao mtawatambua.”—Mathayo 7:15-20.
Mitume Wafa, Uasi-Imani Wasitawi
Wakristo wa uwongo walianza kumkana Kristo wakati gani? Muda mfupi sana baada ya kifo cha Yesu. Yeye mwenyewe alisema kwamba Shetani Ibilisi angepanda “magugu” au Wakristo wa uwongo upesi, miongoni mwa “mbegu nzuri,” au Wakristo wa kweli, mbegu ambazo Yesu alipanda wakati wa huduma yake. (Mathayo 13:24, 25, 37-39) Mtume Paulo alionya kwamba walimu wa uwongo tayari walikuwapo katika siku zake. Alisema kwamba waliacha kufuata mafundisho ya Yesu Kristo hasa kwa sababu ‘hawakuipenda ile kweli.’—2 Wathesalonike 2:10.
Mitume wa Yesu Kristo walizuia uasi-imani huo kwa muda wote ambao walikuwa hai. Hata hivyo, baada ya kifo cha mitume, viongozi wa dini walitumia “kila tendo lenye nguvu na ishara za uwongo na mambo ya ajabu na . . . kila udanganyifu usio wa uadilifu” ili kuwapotosha wengi, na kuwageuza watu wengi zaidi kutoka katika kweli ambazo Yesu na mitume wake walifundisha. (2 Wathesalonike 2:3, 6-12) Mwanafalsafa Mwingereza, Bertrand Russell, aliandika kwamba, baadaye kile kikundi cha kwanza cha Kikristo kilibadilishwa kuwa shirika la kidini ambalo “linaweza kumfanya Yesu na hata Paulo ashtuke.”
Ukristo wa Kweli Warudishwa
Uthibitisho uko wazi. Tangu kufa kwa mitume, mafundisho ya Kristo hayajawa yakifuatwa katika mambo mengi ambayo yamefanywa kwa jina la Ukristo. Hata hivyo, hiyo haimaanishi kwamba Yesu hajakosa kutimiza ahadi yake ya kuwa pamoja na wafuasi wake “siku zote mpaka umalizio wa mfumo wa mambo.” (Mathayo 28:20) Tunaweza kuwa na uhakika kwamba tangu aliposema maneno hayo, kumekuwa na watu waaminifu ambao “ujuzi kumhusu Yesu Kristo [umekuwa] na uvutano juu ya mambo ambayo . . . wanafundisha na kufanya.” Yesu Kristo ametimiza ahadi yake ya kuwasaidia watu hao kwa kuwa wamejitahidi kuonyesha upendo unaowatambulisha Wakristo wa kweli na kuwa washikamanifu kwa kweli ambazo alifundisha.
Pia, Yesu aliahidi kwamba katika siku hizi za mwisho, angewakusanya wanafunzi wake waaminifu katika kutaniko moja la Kikristo linalotambuliwa wazi, ambalo angelitumia kutimiza mapenzi yake. (Mathayo 24:14, 45-47) Anatumia kutaniko hilo wakati huu kukusanya “umati mkubwa” wa wanaume, wanawake, na watoto “kutoka mataifa yote na makabila na vikundi vya watu na lugha,” na kuwaunganisha chini ya uongozi wake wakiwa “kundi moja” chini ya “mchungaji mmoja.”—Ufunuo 7:9, 14-17; Yohana 10:16; Waefeso 4:11-16.
Hivyo basi, acha kushirikiana na mashirika yoyote ambayo yameliharibu jina la Kristo na kuuchafua Ukristo kwa zaidi ya miaka 2,000 iliyopita. La sivyo, kama Yesu Kristo alivyomwambia mtume Yohana, unaweza kupokea “sehemu ya mapigo yake” wakati Mungu atakapotekeleza hukumu yake karibuni dhidi ya mashirika hayo. (Ufunuo 1:1; 18:4, 5) Azimia kuwa kati ya wale ambao nabii Mika alizungumzia aliposema kwamba “katika siku za mwisho,” waabudu wa kweli, yaani, wale wanaofuata Ukristo wa kweli, watasikiliza maagizo ya Mungu na ‘kutembea katika mapito yake’ ya ibada safi iliyorudishwa. (Mika 4:1-4) Wachapishaji wa gazeti hili watafurahi kukusaidia uwatambue waabudu hao wa kweli.
[Picha katika ukurasa wa 5]
Kwa nini Wakristo wa kweli hawashiriki vita?
[Picha Zimeandaliwa na]
Soldiers, left: U.S. National Archives photo; flamethrower, right: U.S. Army Photo
[Picha katika ukurasa wa 7]
Yesu aliwawekea Wakristo wa kweli matakwa haya: ‘Iweni na upendo miongoni mwenu’ na ‘kaeni katika neno langu’