Walifanya Mapenzi ya Yehova

Petro Ahubiri Wakati wa Pentekoste

ILIKUWA asubuhi ya masika yenye halijoto ya kiasi mwaka wa 33 W.K. Kulikuwako na msisimuko mwingi! Umati wenye shughuli nyingi wa Wayahudi na wageuzwa-imani ulijaa katika barabara za Yerusalemu. Ulikuwa umetoka mahali kama Elami, Mesopotamia, Kapadokia, Misri, na Roma. Ilivutia kama nini kuuona katika mavazi yao ya kitamaduni na kusikia lugha zao tofauti-tofauti! Sehemu fulani ya umati huo ilikuwa imesafiri karibu kilometa elfu mbili ili kuwepo kwa ajili ya pindi hii ya pekee. Ilikuwa ipi? Pentekoste—msherehekeo wa Kiyahudi wenye shangwe uliotia alama mwisho wa mavuno ya shayiri.—Mambo ya Walawi 23:15-21.

Moshi kama mawimbi ulitoka kwenye matoleo juu ya madhabahu ya hekalu, na Walawi waliimba Haleli (Zaburi 113 hadi 118). Kabla tu ya saa 3:00 asubuhi, jambo la ajabu lilitendeka. Kutoka mbinguni, kulitukia “uvumi kama uvumi wa upepo wa nguvu ukienda kasi.” Uliijaza nyumba yote ambamo wanafunzi 120 wa Yesu Kristo walikuwa wamekusanyika. Simulizi la Kimaandiko lasema hivi: “Kukawatokea ndimi zilizogawanyikana, kama ndimi za moto uliowakalia kila mmoja wao. Wote wakajazwa Roho Mtakatifu, wakaanza kusema kwa lugha nyingine, kama Roho alivyowajalia kutamka.”—Matendo 2:1-4.

Kila Mmoja Asikia Lugha Yake Mwenyewe

Upesi, wanafunzi wengi walikuwa wakimiminika kutoka katika hiyo nyumba. Kwa kushangaza, waliweza kusema lugha tofauti-tofauti za ule umati! Ebu wazia jinsi lilivyokuwa jambo lenye kushangaza wakati mgeni kutoka Uajemi na mwenyeji wa Misri waliposikia lugha zao wenyewe zikisemwa na Wagalilaya. Kwa kueleweka, umati ulikuwa na msisimuko wenye kicho. “Maana yake nini mambo haya?” wakauliza. Baadhi yao wakaanza kuwadhihaki wanafunzi, wakisema: “Wamelewa kwa mvinyo mpya.”—Matendo 2:12, 13.

Kisha mtume Petro akasimama na kusema na umati. Alieleza kwamba zawadi hiyo ya lugha ya kimuujiza ilikuwa utimizo wa ahadi ya Mungu kupitia nabii Yoeli: “Nitawamwagia watu wote Roho yangu.” (Matendo 2:14-21; Yoeli 2:28-32) Ndiyo, Mungu alikuwa ametoka tu kuimwaga roho yake takatifu juu ya wanafunzi wa Yesu. Huo ulikuwa uthitibisho wa wazi kwamba Yesu alikuwa amefufuliwa kutoka kwa wafu na sasa alikuwa mbinguni kwenye mkono wa kuume wa Mungu. “Basi,” Petro akasema, “nyumba yote ya Israeli na wajue yakini ya kwamba Mungu amemfanya Yesu huyo mliyemsulibisha kuwa Bwana na Kristo.”—Matendo 2:22-36.

Wasikilizaji waliitikiaje? “[Walichomwa] mioyo yao,” simulizi lasema, “wakamwambia Petro na mitume wengine, Tutendeje, ndugu zetu?” Petro akajibu: “Tubuni, mkabatizwe kila mmoja wenu.” Karibu 3,000 wakafanya hivyo! Baadaye, “wakawa wakidumu katika fundisho la mitume.”—Matendo 2:37-42.

Kwa kuongoza katika pindi hiyo yenye kutokeza, Petro alitumia ufunguo wa kwanza wa zile “funguo za ufalme wa mbinguni” ambazo Yesu alikuwa ameahidi kumpa. (Mathayo 16:19) Funguo hizo zilifungulia vikundi vya watu tofauti-tofauti mapendeleo ya pekee. Ufunguo huo wa kwanza uliwawezesha Wayahudi kuwa Wakristo watiwa-mafuta kwa roho. Baadaye, funguo za pili na tatu zilifanya fursa iyo hiyo ipatikane kwa Wasamaria na Wasio Wayahudi kwa utaratibu huo.—Matendo 8:14-17; 10:44-48.

Somo Kwetu Sisi

Ingawa umati huo wa Wayahudi na wageuzwa-imani ulishiriki daraka la kijumuiya kwa ajili ya kifo cha Mwana wa Mungu, Petro alisema nao kwa staha, akiuita “ndugu.” (Matendo 2:29) Lengo lake lilikuwa kuuchochea kwenye toba, si kuulaumu. Kwa hiyo, mfikio wake ulikuwa chanya. Alitokeza mambo ya hakika, akazitegemeza hoja zake kwa kutumia manukuu ya Andiko.

Wale wanaohubiri habari njema leo hufanya vizuri kufuata kielelezo cha Petro. Wanapaswa kujaribu kuanzisha mazungumzo kwa kutumia mambo yanayokubaliwa na wasikilizaji wao kisha wasababu nao kwa busara kwa kutumia Maandiko. Kweli ya Biblia inapotolewa kwa njia chanya, wale wenye mioyo yenye haki wataitikia—Matendo 13:48.

Bidii na ujasiri wa Petro siku ya Pentekoste unatofautiana sana na kule kumkana kwake Yesu kulikotokea majuma saba hivi mapema. Pindi hiyo Petro alifadhaishwa na hali ya kumhofu mwanadamu. (Mathayo 26:69-75) Lakini Yesu alikuwa ameomba kwa niaba ya Petro. (Luka 22:31, 32) Bila shaka, kule kutokea kwa Yesu mbele ya Petro baada ya ufufuo, kulimwimarisha huyo mtume. (1 Wakorintho 15:5) Likiwa tokeo, imani ya Petro haikukoma. Punde si punde alikuwa akihubiri kwa ujasiri. Kwa hiyo, hakuhubiri wakati wa Pentekoste tu bali pia kwa muda uliobaki wa maisha yake.

Namna gani ikiwa tumekosea kwa njia fulani, sawa na vile Petro alivyofanya? Acheni tudhihirishe toba, tusali ili kupata msamaha, na kuchukua hatua za kupata msaada wa kiroho. (Yakobo 5:14-16) Kisha twaweza kusonga mbele tukiwa na uhakika kwamba utumishi wetu mtakatifu unakubalika kwa Baba yetu wa kimbingu, mwenye rehema, Yehova.—Kutoka 34:6.