Filipo—Mweneza-Evanjeli Mwenye Bidii
MAANDIKO yana masimulizi mengi juu ya wanaume na wanawake ambao imani yao yastahili kuigwa. Mfikirie Filipo, mishonari Mkristo wa karne ya kwanza. Hakuwa mtume, lakini alitumiwa sana katika kueneza ujumbe wa Ufalme. Kwa hakika, Filipo alikuja kujulikana kuwa “mweneza-evanjeli.” (Matendo 21:8) Kwa nini Filipo aliitwa hivyo? Nasi twaweza kujifunza nini kutokana naye?
Filipo aanza kutajwa katika Biblia punde baada ya Pentekoste ya mwaka wa 33 W.K. Wakati huo Wayahudi wenye kusema Kigiriki, walianza kunung’unika dhidi ya Wayahudi wenye kusema Kiebrania, wakidai kwamba wajane wao hawakuwa wakigawiwa chakula chao cha kila siku. Ili kutatua jambo hilo, mitume waliweka rasmi “wanaume saba wenye kuthibitishwa.” Filipo alikuwa miongoni mwa waliochaguliwa.—Matendo 6:1-6.
Wanaume hao saba walikuwa ‘wamethibitishwa.’ Biblia Habari Njema husema kwamba walikuwa “wenye sifa njema.” Naam, walipochaguliwa, tayari walijulikana kuwa wanaume wa kiroho walio na uwezo wa kufikiri wenye kutumika. Ndivyo na wale ambao hutumikia wakiwa waangalizi Wakristo leo. Wanaume hao hawawekwi rasmi haraka-haraka. (1 Timotheo 5:22) Lazima wawe na “ushuhuda bora kutoka kwa watu walio nje,” na Wakristo wenzao wapaswa kujua kwamba ni wenye kiasi na wenye akili timamu.—1 Timotheo 3:2, 3, 7; Wafilipi 4:5.
Yaonekana kwamba Filipo aliutimiza vema mgawo wake huko Yerusalemu. Hata hivyo, muda si muda mnyanyaso mkali ukazuka na kuwatawanya wafuasi wa Kristo. Kama wengine, Filipo aliondoka jijini humo, lakini huduma yake haikuwa imeisha. Muda mfupi baadaye alikuwa na shughuli ya kuhubiri katika eneo jipya—Samaria.—Matendo 8:1-5.
Kuanza Kuhubiri Maeneo Mapya
Yesu alikuwa ametabiri kwamba wanafunzi wake wangehubiri “Yerusalemu na pia katika Yudea yote na Samaria na hadi sehemu ya mbali zaidi sana ya dunia.” (Matendo 1:8) Kwa kuhubiri Samaria, Filipo alikuwa akishiriki utimizo wa maneno hayo. Kwa ujumla, Wayahudi hawakuwastahi sana Wasamaria. Lakini Filipo hakuwahukumu kimbele watu hao, na kutopendelea kwake kulibarikiwa. Kwa kweli, Wasamaria wengi walibatizwa, kutia ndani fundi wa kimzungu aliyeitwa Simoni.—Matendo 8:6-13.
Hatimaye, malaika wa Yehova alimwelekeza Filipo kwenye barabara ya jangwani iliyotoka Yerusalemu hadi Gaza. Huko Filipo aliona gari lililokuwa limembeba ofisa Mwethiopia ambaye alikuwa akisoma kwa sauti kutoka katika unabii wa Isaya. Filipo alikimbia kandokando ya gari hilo na kuanzisha mazungumzo. Ingawa Mwethiopia huyo alikuwa mgeuzwa-imani aliyemjua Mungu na kuyajua Maandiko kwa kiasi fulani, alikubali kwa unyenyekevu kwamba alihitaji msaada ili aweze kuelewa mambo aliyokuwa akisoma. Kwa hiyo, alimkaribisha Filipo apande gari hilo na kuketi naye. Baada ya ushuhuda kutolewa, walifika mahali palipokuwa na maji. “Ni nini chenye kunizuia nisibatizwe?” Mwethiopia huyo akauliza. Papo hapo Filipo akambatiza, naye Mwethiopia huyo akaenda zake akishangilia. Yamkini, mwanafunzi huyo mpya alieneza habari njema nyumbani kwao.—Matendo 8:26-39.
Twaweza kujifunza nini kutokana na huduma ya Filipo iliyohusisha Wasamaria na yule ofisa Mwethiopia? Hatupaswi kamwe kukata kauli kwamba watu wa taifa fulani, jamii fulani, au tabaka fulani hawatapendezwa na habari njema. Badala yake, twapaswa kutangaza ujumbe wa Ufalme kwa “watu wa namna zote.” (1 Wakorintho 9:19-23) Tukijitoa ili kuhubiria watu wa namna zote, Yehova anaweza kututumia katika kazi ya ‘kufanya wanafunzi kutoka kwa watu wa mataifa yote’ kabla ya mwisho wa mfumo huu wa mambo kufika.—Mathayo 28:19, 20.
Mapendeleo Zaidi ya Filipo
Baada ya kumhubiria ofisa Mwethiopia, Filipo alitoa ushuhuda jijini Ashdodi, “naye akaenda akipita katika hilo eneo na kufuliza kuitangaza habari njema kwa majiji yote mpaka alipofika Kaisaria.” (Matendo 8:40) Katika karne ya kwanza, majiji hayo mawili yalikuwa na wakazi wengi Wasio Wayahudi. Aliposhika njia kuelekea kaskazini huko Kaisaria, haikosi Filipo alihubiri katika vituo maarufu vya Wayahudi, kama vile Lida na Yopa. Huenda hiyo ndiyo sababu wanafunzi walipatikana sehemu hizo baadaye.—Matendo 9:32-43.
Filipo atajwa mara ya mwisho yapata miaka 20 baadaye. Mwishoni mwa safari yake ya tatu ya umishonari, Paulo alishukia Tolemai. “Siku iliyofuata,” asema Luka, msafiri aliyeandamana na Paulo, “tukaondoka tukawasili Kaisaria, nasi tukaingia katika nyumba ya Filipo mweneza-evanjeli.” Kufikia wakati huo, Filipo alikuwa na “mabinti wanne, mabikira, waliotoa unabii.”—Matendo 21:8, 9.
Yaonekana Filipo alikuwa amefanya makazi huko Kaisaria. Lakini hakuwa amepoteza roho yake ya mishonari, kwa kuwa Luka amwita “mweneza-evanjeli.” Mara nyingi usemi huo hurejezea mtu anayeondoka nyumbani kwake ili kuhubiri habari njema katika maeneo ambayo hayajahubiriwa. Uhakika wa kwamba Filipo alikuwa na mabinti wanne waliotoa unabii wadokeza kwamba walifuata kielelezo cha baba yao mwenye bidii.
Wazazi Wakristo wa leo wapaswa kukumbuka kwamba watoto wao ndio wanafunzi wao wa maana sana. Hata ikiwa wazazi hao wamelazimika kuacha mapendeleo fulani ya kitheokrasi kwa sababu ya madaraka ya familia, kama Filipo wanaweza kuendelea kumtumikia Mungu kwa moyo wote wakiwa wazazi wenye kuweka kielelezo kizuri.—Waefeso 6:4.
Ziara ya Paulo na waandamani wake iliipa familia ya Filipo fursa nzuri ya kuonyesha ukaribishaji-wageni. Wazia jinsi walivyotiana moyo! Huenda pindi hiyo ndipo Luka alipokusanya habari juu ya utendaji wa Filipo, habari ambazo baadaye zilitiwa katika Matendo sura ya 6 na ya 8.
Yehova Mungu alimtumia Filipo sana ili kuendeleza masilahi ya Ufalme. Bidii ya Filipo ilimwezesha kueneza habari njema katika maeneo mapya na kuendeleza hali nzuri ya kiroho nyumbani kwake. Je, ungependa kuwa na mapendeleo na baraka kama hizo? Basi ziige sifa zilizoonyeshwa na Filipo mweneza-evanjeli.