Imani

Kwa nini watu wengi hawana imani?

Imani ni tunda la roho ya Mungu, na kwa upendo Mungu huwapa roho yake wale wanaoitafuta. (Gal. 5:22; Luka 11:13) Basi watu wasio na imani hawaitafuti roho hiyo, au wanafanya hivyo kwa kusudi baya au wanapinga utendaji wa roho hiyo maishani mwao. Mambo mengi husababisha hali hiyo:

Kutokuwa na ujuzi sahihi wa Biblia: Biblia imeandikwa kwa uongozi wa roho ya Mungu. (2 Tim. 3:16, 17; 2 Sam. 23:2) Mtu asipojifunza Biblia, hawezi kusitawisha imani ya kweli. Ijapokuwa huenda wanadini wakawa na Biblia, ikiwa wamefundishwa mafundisho ya wanadamu badala ya Neno la Mungu, watakosa imani ya kweli katika Mungu na kusudi lake. Ili kutatua matatizo ya maisha, inaelekea watayategemea mawazo yao wenyewe na yale ya wanadamu wengine.—Linganisha na Mathayo 15:3-9.

Kukatishwa tamaa na dini: Watu wengi wamekatishwa tamaa na unafiki wa wafuasi wa makanisa yanayodai kuwa ya Kikristo ambao hudai kufundisha Neno la Mungu, lakini hawaishi kulingana na yale ambayo linasema. Wengine walikuwa wafuasi wa dini zisizo za Kikristo, lakini wakaona matunda mabaya ya matendo yake au wakaona kwamba imani zao hazikuwasaidia wakabiliane na matatizo ya maisha. Kwa kuwa hawana ujuzi sahihi wa Mungu wa kweli, watu hao hujitenga na kila jambo linalohusiana na dini.—Linganisha na Waroma 3:3, 4; Mathayo 7:21-23.

Hawaelewi kwa nini Mungu anaruhusu uovu: Watu wengi hawaelewi kwa nini Mungu anaruhusu uovu na kwa hiyo wanamlaumu kwa mambo yote mabaya yanayotukia. Hawajui kwamba mwelekeo wa mwanadamu wa kufanya mabaya si mapenzi ya Mungu, bali unatokana na dhambi ya Adamu. (Rom. 5:12) Huenda wasijue kuhusu kuwapo kwa Shetani Ibilisi na uvutano wake juu ya mambo ya ulimwengu, hivyo wanamlaumu Mungu kwa mambo maovu yanayoendelezwa na Shetani. (1 Yoh. 5:19; Ufu. 12:12) Ikiwa kwa kadiri fulani wanajua mambo hayo, huenda wakaona kwamba Mungu anakawia kuchukua hatua, kwa sababu hawaelewi waziwazi lile suala la enzi kuu ya ulimwengu wote, nao hawafahamu kwamba subira ya Mungu mpaka wakati huu inawatolea nafasi isiyostahiliwa ya kupata wokovu. (Rom. 2:4; 2 Pet. 3:9) Pia, hawajui kikamili kwamba Mungu ameweka wakati wa kuwaharibu milele wote wanaotenda maovu.—Ufu. 22:10-12; 11:18; Hab. 2:3.

Mambo muhimu maishani ni tamaa na maoni ya kimwili: Kwa ujumla, watu wasio na imani thabiti wamejitoa kufuatia mambo mengine. Wengine huenda wakasema kwamba wanaiamini Biblia lakini huenda hawajajifunza Biblia kwa ukamili au huenda wameshindwa kutafakari kwa uthamini mambo wanayosoma, sababu zinazotolewa, na jinsi inavyohusu maisha ya kila siku. (Linganisha na 1 Nyakati 28:9.) Watu wengine nao wameshindwa kujenga imani waliyokuwa nayo na, badala yake, wakaruhusu tamaa ya vitu visivyo vya uadilifu itawale moyo wao hata wakamwacha Mungu na njia zake.—Ebr. 3:12.

Mtu anaweza kupataje imani?

Rom. 10:17: “Imani hufuata jambo lililosikiwa.” (Linganisha na Matendo 17:11, 12; Yohana 4:39-42; 2 Nyakati 9:5-8. Ni lazima kwanza mtu achunguze aone yale ambayo Biblia inasema, naye ataimarisha usadikisho wake akiichunguza kwa uangalifu ili asadikishwe kwamba yanategemeka.)

Rom. 10:10: “Kwa moyo mtu huonyesha imani.” (Kwa kutafakari juu ya mambo ya Mungu ili kuyathamini, mtu anayakaza katika moyo wake wa mfano.)

Imani huimarishwa mtu anapotenda kupatana na ahadi za Mungu kisha anaona uthibitisho wa baraka za Mungu kwa mambo ambayo amefanya.—Ona Zaburi 106:9-12.

Mfano: Labda una rafiki ambaye unaweza kusema hivi kumhusu: ‘Ninamwamini mtu yule. Ninaweza kuwa na hakika kwamba atatimiza ahadi yake; nami najua kwamba nikiwa na tatizo, atanisaidia.’ Je, unaweza kusema hivyo kumhusu mtu ambaye umekutana naye jana kwa mara ya kwanza? Hapana. Ili umtumaini, lazima awe mtu ambaye umeshirikiana naye kwa muda mrefu, mtu ambaye amekuwa mwenye kutegemeka tena na tena. Ndivyo ilivyo na imani ya kidini. Ili uwe na imani, unahitaji kutenga wakati ili umjue Yehova na jinsi anavyotenda mambo.

Kuamini kwamba kuna Mungu

Ona ukurasa wa 215-221, chini ya kichwa, “Mungu.”

Kuamini kwamba kutakuwa na ulimwengu mpya wenye uadilifu

Mtu anapojua sana jinsi Yehova alivyowatendea watumishi wake, atakuwa na maoni kama Yoshua, aliyesema hivi: “Mnajua vema kwa mioyo yenu yote na kwa nafsi zenu zote kwamba halikukosa kutimia hata neno moja kati ya maneno yote mema ambayo Yehova Mungu wenu amewaambia ninyi. Yote yametimia kwenu. Halikukosa kutimia hata neno moja kati ya hayo.”—Yos. 23:14.

Ahadi za Biblia kuhusu afya bora, ufufuo wa wafu, na kadhalika, zinatiwa nguvu na habari kuhusu miujiza ambayo Yesu alifanya. Hizo si hadithi za kubuniwa tu. Soma masimulizi ya Injili ukaone uthibitisho unaoonyesha kwamba mambo hayo kwa kweli yalitukia. Majina ya maeneo mbalimbali pamoja na majina ya watawala walioishi wakati huo, yanatajwa; masimulizi ya watu kadhaa waliojionea mambo hayo yamehifadhiwa. Kutafakari uthibitisho huo kwaweza kuimarisha imani yako katika ahadi za Biblia.

Nenda kwenye Majumba ya Ufalme ya Mashahidi wa Yehova na makusanyiko yao makubwa, ndipo utakapojionea mwenyewe kwamba kutumia shauri la Biblia hubadili maisha ya mtu, yaani huwafanya watu wawe wanyoofu na waadilifu, na huwafanya watu wa jamii zote na mataifa yote waishi na kufanya kazi pamoja katika roho ya undugu wa kweli.

Je, kweli matendo ni ya lazima ikiwa mtu ana imani?

Yak. 2:17, 18, 21, 22, 26: “Imani, ikiwa haina matendo, imekufa yenyewe. Hata hivyo, mtu fulani atasema: ‘Wewe una imani, nami nina matendo. Nionyeshe imani yako bila matendo, nami nitakuonyesha imani yangu kwa matendo yangu.’ Je, Abrahamu baba yetu hakutangazwa kuwa mwadilifu kwa matendo baada ya kumtoa Isaka mwana wake juu ya madhabahu? Mnaona kwamba imani yake ilitenda pamoja na matendo yake na kwa matendo yake imani yake ilikamilishwa. Kwa kweli, kama vile ambavyo mwili bila roho umekufa, vivyo hivyo pia imani bila matendo imekufa.”

Mfano: Huenda mvulana ana urafiki na msichana, na kumwambia kwamba anampenda. Lakini ikiwa hajamuuliza msichana huyo aolewe naye, je, mvulana huyo kweli anaonyesha kwamba upendo wake ni wa kweli? Vivyo hivyo, matendo huonyesha ukweli wa imani yetu na upendo wetu. Ikiwa hatumtii Mungu, basi hatumpendi kikweli wala hatuamini kwamba njia zake ni za uadilifu. (1 Yoh. 5:3, 4) Lakini hatuwezi kudai wokovu hata tuwe na matendo gani. Uzima wa milele ni zawadi kutoka kwa Mungu kupitia Yesu Kristo, si malipo kwa ajili ya matendo yetu.—Efe. 2:8, 9.