Nanga Yao Ni Tumaini, Nao Huchochewa na Upendo

“Kwabaki imani, tumaini, upendo, matatu haya; lakini lililo kubwa zaidi sana kati ya haya ni upendo.”—1 WAKORINTHO 13:13.

1. Mtume Paulo anatupa onyo gani?

MTUME Paulo atuonya kuwa imani yetu yaweza kuvunjika kama meli. Yeye asema juu ya “[kushika] imani na dhamiri njema, ambayo wengine wameisukuma kando na wamevunjikiwa imani kama vile kuvunjikiwa meli.” (1 Timotheo 1:19) Katika karne ya kwanza W.K., vyombo vya baharini vilijengwa kwa mbao. Kufaa kwa vyombo hivyo kusafiri baharini kulitegemea ubora wa mbao na ustadi wa kujenga meli.

2. Kwa nini ni lazima meli yetu ya imani ijengwe vema, na jambo hilo latutaka tufanye nini?

² Kile kiwezacho kuitwa meli yetu ya imani lazima kidumu kikiwa kimeelea katikati ya bahari ya binadamu iliyochafuka. (Isaya 57:20; Ufunuo 17:15) Kwa hiyo ni lazima kijengwe vema, na ujenzi huo hututegemea. “Bahari” za ulimwengu wa Wayahudi na Waroma zilipokuwa zikizidi kuchafukia Wakristo wa mapema, Yuda aliandika hivi: “Wapendwa, kwa kujijenga wenyewe juu ya imani yenu takatifu zaidi sana, na kusali mkiwa na roho takatifu, jitunzeni wenyewe katika upendo wa Mungu, huku mkingojea rehema ya Bwana wetu Yesu Kristo kwa tazamio la uhai udumuo milele.” (Yuda 20, 21) Kwa kuwa Yuda alisema pia kuhusu kuipigania ‘imani iliyokabidhiwa watakatifu,’ usemi ‘imani takatifu zaidi sana’ waweza kurejezea mafundisho yote ya Kikristo, kutia ndani habari njema ya wokovu. (Yuda 3) Kristo ndiye msingi wa imani hiyo. Twahitaji kuwa na imani yenye nguvu ili kushikamana na imani ya kweli ya Kikristo.

Kustahimili Dhoruba ya “Tisho la Mafarakano”

3. Watu fulani wanatumiaje lile “tisho la mafarakano”?

³ Katika miaka ya majuzi, kumekuwepo visa vingi vyenye kutisha vya watu kujiua kwa wingi, uuaji kimakusudi, na mashambulio ya kigaidi vinavyohusu mafarakano ya kisiri. Basi yaeleweka ni kwa nini watu wengi, kutia ndani viongozi wa kisiasa wenye mioyo minyofu, wamehangaikia kulinda watu wasio na hatia, hasa vijana, kutokana na mafarakano hayo hatari. Kwa njia hiyo, “mungu wa huu mfumo wa mambo,” ambaye bila shaka ndiye husababisha uhalifu huo wenye kutisha, amesababisha hali ambayo watu fulani huiita tisho la mafarakano, naye hutumia hali hiyo dhidi ya watu wa Yehova. (2 Wakorintho 4:4; Ufunuo 12:12) Wengine wametumia hali hiyo kwa njia mbaya ili kuanzisha upinzani dhidi ya kazi yetu. Katika nchi fulani, wao wameanzisha kampeni inayokusudiwa hasa kuwalinda watu dhidi ya “mafarakano hatari” lakini wakitia ndani kimakosa Mashahidi wa Yehova, hivyo wakitushtaki kichinichini. Hali hiyo imefanya iwe vigumu kutoa ushahidi nyumba hadi nyumba katika nchi fulani za Ulaya, nayo imewafanya watu kadha wa kadha waliokuwa wakijifunza Biblia nasi waache funzo lao. Hali hiyo nayo imewaathiri vibaya baadhi ya ndugu zetu.

4. Kwa nini upinzani haupaswi kutuvunja moyo?

⁴ Hata hivyo, badala ya kutuvunja moyo, upinzani wapasa kuimarisha usadikisho wetu kwamba sisi ni Wakristo wa kweli. (Mathayo 5:11, 12) Wakristo wa mapema walishtakiwa kuwa farakano lenye uchochezi, nao ‘walisemwa vibaya’ kila mahali. (Matendo 24:5; 28:22) Lakini mtume Petro aliwatia moyo waamini wenzake, akiandika hivi: “Wapendwa, msitatanishwe juu ya kuwaka miongoni mwenu, ambako kunatukia kwenu kuwa jaribu, kama kwamba jambo geni linawapata. Kinyume cha hivyo, endeleeni kushangilia kwa maana nyinyi ni washiriki katika mateso ya Kristo, ili mpate kushangilia na kuwa na shangwe mno pia wakati wa ufunuo wa utukufu wake.” (1 Petro 4:12, 13) Vivyo hivyo, mshiriki wa baraza linaloongoza la karne ya kwanza aliandika hivi: “Fikirieni yote kuwa shangwe, ndugu zangu, mkutanapo na majaribu ya namna mbalimbali, kama mjuavyo kwamba ubora huu uliojaribiwa wa imani yenu hutokeza uvumilivu. Lakini acheni uvumilivu uwe na kazi yao ikiwa kamili, ili nyinyi mpate kuwa kamili na timamu katika mambo yote, bila ukosefu katika kitu chochote.” (Yakobo 1:2-4) Kama vile pepo kali huujaribu ubora wa chombo kinachosafiri baharini, vivyo hivyo dhoruba za upinzani zitafichua udhaifu wowote ulio katika meli yetu ya imani.

Dhiki Hutokeza Uvumilivu

5. Twaweza kuwaje na uhakika kwamba imani yetu ni thabiti tukiwa katika dhiki?

⁵ Wakristo wanaweza kutumaini uvumilivu wao na uthabiti wa imani yao baada tu ya kustahimili dhoruba za dhiki. Uvumilivu wetu ‘utakuwa na kazi yao ikiwa kamili’ katika bahari zilizochafuka ikiwa tu tuko “kamili na timamu katika mambo yote, bila ukosefu katika kitu chochote,” kutia ndani imani yenye nguvu. Paulo aliandika hivi: “Katika kila njia twajipendekeza wenyewe kuwa wahudumu wa Mungu, kwa uvumilivu wa mengi, kwa dhiki nyingi, kwa visa vya uhitaji, kwa magumu.”—2 Wakorintho 6:4.

6. Kwa nini “tuchachawe tuwapo katika dhiki,” na kufanya hivyo huimarishaje tumaini letu?

⁶ Nyakati nyingine, pepo kali za dhiki tunazoweza kukabili zapasa kuonwa kuwa fursa za kuthibitisha kuwa meli yetu ya imani ni timamu na thabiti. Paulo aliwaandikia Wakristo wa Roma hivi: “Acheni tuchachawe tuwapo katika dhiki, kwa kuwa twajua kwamba dhiki hutokeza uvumilivu; nao uvumilivu, hali yenye kukubaliwa; nayo hali yenye kukubaliwa, tumaini, nalo tumaini haliongozi kwenye kukata tamaa.” (Waroma 5:3-5) Kusimama imara chini ya majaribu hufanya tukubaliwe na Yehova. Na kufanya hivyo huimarisha tumaini letu.

Sababu Inayofanya Wengine Wavunjikiwe Meli

7. (a) Kama maneno ya Paulo yaonyeshavyo, watu fulani walikujaje kuvunjikiwa meli kiroho? (b) Wengine leo wamekengeukaje kutoka katika kweli?

⁷ Paulo alipoonya kuhusu “kuvunjikiwa meli,” alikuwa akifikiria wengine waliokuwa “wameisukuma kando” dhamiri yao njema, nao walikuwa wamepoteza imani yao. (1 Timotheo 1:19) Baadhi yao walikuwa Himenayo na Aleksanda walioasi imani, wakikengeuka kutoka katika kweli na kusema maneno yenye kuudhi. (1 Timotheo 1:20, NW, kielezi-chini; 2 Timotheo 2:17, 18) Leo, waasi-imani wanaokengeuka kutoka katika kweli humshambulia kwa maneno “mtumwa mwaminifu na mwenye busara,” hatua hiyo ikiwa hasa ni kuuma mkono uliokuwa ukiwalisha kiroho. Wengine wanafanana na yule “mtumwa mwovu,” wakisema waziwazi kwamba “Bwana-mkubwa wangu anakawia.” (Mathayo 24:44-49; 2 Timotheo 4:14, 15) Wao hukana kuwa mwisho wa huu mfumo mwovu wa mambo u karibu nao huichambua jamii ya mtumwa iliyo macho kiroho kwa sababu inadumisha hisi ya uharaka miongoni mwa watu wa Yehova. (Isaya 1:3) Waasi-imani hao hufanikiwa “[kui]pindua imani ya wengine,” wakichochea kuvunjikiwa meli kiroho.—2 Timotheo 2:18.

8. Ni nini kimewafanya wengine waivunje au waizamishe meli yao ya imani?

⁸ Wakristo wengine waliojiweka wakfu wameivunja meli yao ya imani kwa kuisukuma kando dhamiri yao na kujiingiza mno katika utafutaji wa anasa usiodhibitiwa wa ulimwengu huu na ukosefu wake wa adili katika ngono. (2 Petro 2:20-22) Wengine nao huizamisha meli yao ya imani kwa sababu, kulingana na maoni yao, mahali salama pa mfumo mpya wa mambo hapaonekani pakikaribia. Kwa kuwa hawawezi kupiga hesabu ya wakati uhusuo utimizo wa unabii fulani mbalimbali, na kuiondolea mbali “siku ya Yehova” katika akili zao, wao huiacha ibada ya kweli. (2 Petro 3:10-13; 1 Petro 1:9) Mara wanajikuta ndani ya maji yaliyochafuka ya mfumo wa mambo uliopo. (Isaya 17:12, 13; 57:20) Wengine ambao wameacha kushirikiana na kutaniko la Kikristo bado huamini kwamba hilo ni dini ya kweli. Ingawa hivyo, yamkini hawana subira na uvumilivu unaohitajika ili kuusubiri ulimwengu mpya ambao Yehova Mungu ameahidi. Wao huona kwamba uhai katika Paradiso haujaja haraka kama wanavyotarajia.

9. Wakristo fulani wachache waliojiweka wakfu wanafanya nini, na mambo hayo yapaswa kutufanya tufikirie nini?

⁹ Yaonekana kwamba Wakristo fulani wachache waliojiweka wakfu katika sehemu kadhaa za ulimwengu wamekunja matanga ya meli yao ya imani. Meli ingali yaelea, lakini badala ya kusonga mbele katika imani kamili, wao wameamua kwenda polepole. Wengine waliovutiwa na tumaini la “Paradiso ya hivi karibuni” walikuwa tayari kujitahidi ili kuifikia—walikuwa na bidii katika kazi ya kuhubiri nao walihudhuria kwa ukawaida mikutano, makusanyiko na mikusanyiko yote. Lakini sasa wanafikiri kwamba utimizo wa matumaini yao uko mbali kuliko walivyotazamia, nao wamepunguza bidii yao. Jambo hilo laonekana waziwazi kupitia utendaji wa kuhubiri uliopunguka, kutohudhuria mikutano kwa ukawaida, na kuwa tayari kukosa sehemu kadhaa za programu ya makusanyiko au ya mikusanyiko. Wengine wanatumia wakati mwingi zaidi katika tafrija na kutafuta starehe za mali. Mambo hayo hutufanya tufikirie kile kipasacho kuwa kichocheo maishani mwetu kupatana na wakfu wetu kwa Yehova. Je, bidii yetu katika utumishi wake yapasa itegemee lile tumaini la “Paradiso ya hivi karibuni”?

Tumaini Linalolinganishwa na Nanga

10, 11. Paulo alilinganisha tumaini letu na nini, na kwa nini ulinganisho huo ulifaa?

¹⁰ Paulo alionyesha kwamba Yehova alitoa ahadi ya baraka ambazo zingekuja kupitia Abrahamu. Kisha mtume huyo akaeleza hivi: “Mungu . . . aliingia kwa kiapo, ili, kupitia mambo mawili yasiyobadilika [neno lake na kiapo chake] ambayo katika hayo haiwezekani Mungu kusema uwongo, sisi ambao tumekimbia hadi kwenye kimbilio tupate kuwa na kitia-moyo chenye nguvu tukishikilia tumaini lililowekwa mbele yetu. Tumaini hili tunalo kama nanga ya nafsi, likiwa hakika na imara.” (Waebrania 6:17-19; Mwanzo 22:16-18) Tumaini lililowekwa mbele ya Wakristo watiwa-mafuta ni la kupata uhai usioweza kufa huko mbinguni. Leo, watumishi wa Yehova walio wengi wana tumaini zuri ajabu la kupata uhai udumuo milele katika dunia paradiso. (Luka 23:43) Pasipo tumaini hilo, mtu hawezi kuwa na imani.

¹¹ Nanga ni kifaa cha usalama chenye nguvu, ambacho ni lazima kitumiwe ili kuzuia meli isijongeejongee wala kuchukuliwa na maji. Hakuna baharia yeyote awezaye kuondoka bandarini bila nanga. Kwa kuwa Paulo alivunjikiwa na meli mara kadhaa, mwenyewe alijionea kuwa mara nyingi maisha ya mabaharia yalitegemea nanga za meli zao. (Matendo 27:29, 39, 40; 2 Wakorintho 11:25) Meli za karne ya kwanza hazikuwa na mtambo wa injini wa kumsaidia nahodha aziendeshe atakavyo. Isipokuwa meli za kivita zilizoendeshwa kwa makasia, mwendo wa vyombo ulitegemea upepo hasa. Ikiwa meli ya nahodha ingekabili hatari ya kugonga miamba, uchaguzi pekee aliokuwa nao ni kutia nanga na kungojea dhoruba ikwishe, huku akitumaini kuwa nanga haingechomoka kwenye sakafu ya bahari. Kwa hiyo Paulo alilinganisha tumaini la Mkristo na “nanga ya nafsi, likiwa hakika na imara.” (Waebrania 6:19) Tushambuliwapo na dhoruba za upinzani au tupatapo majaribu mengine, tumaini letu zuri ajabu ni kama nanga inayotuweka imara tukiwa nafsi hai, ili meli yetu ya imani isichukuliwe hadi kwenye sehemu hatari, ya kina kifupi, yenye shaka au ya miamba hatari ya uasi-imani.—Waebrania 2:1; Yuda 8-13.

12. Twaweza kuepukaje kujiondoa kwa Yehova?

¹² Paulo aliwaonya Wakristo Waebrania hivi: “Jihadharini, akina ndugu, kwa kuhofu kusije kamwe kukasitawi katika yeyote kati yenu moyo mwovu unaokosa imani kwa kujiondoa kwa Mungu aliye hai.” (Waebrania 3:12) Katika maandishi ya Kigiriki, neno “kujiondoa” lamaanisha kihalisi “kusonga kando,” yaani kuasi imani. Walakini twaweza kuepuka huko kuvunjikiwa meli kubaya. Imani na tumaini vitatusaidia kushikamana na Yehova hata kunapokuwa na dhoruba kali sana ya majaribu. (Kumbukumbu la Torati 4:4; 30:19, 20) Imani yetu haitakuwa kama meli inayopeperushwa huku na huku kwa pepo za mafundisho ya uasi-imani. (Waefeso 4:13, 14) Nasi tukiwa na tumaini likiwa kama nanga yetu, tutaweza kustahimili dhoruba za maisha tukiwa watumishi wa Yehova.

Kuchochewa na Upendo na Roho Takatifu

13, 14. (a) Kwa nini nanga ya tumaini letu pekee haitoshi? (b) Ni kani gani ipasayo kutuchochea tumtolee Yehova utumishi mtakatifu, na kwa nini?

¹³ Mkristo hatasonga mbele kuelekea mfumo mpya ikiwa nia pekee inayomfanya amtumikie Yehova ni lile tumaini la kuishi milele katika dunia paradiso. Huku akihifadhi nanga yake ya tumaini ikiwa jambo la kuyaweka thabiti maisha yake, yeye ahitaji kuiongezea imani yake kani inayochochea ya upendo. Paulo alikazia jambo hilo alipoandika hivi: “Kwabaki imani, tumaini, upendo, matatu haya; lakini lililo kubwa zaidi sana kati ya haya ni upendo.”—1 Wakorintho 13:13.

¹⁴ Kani inayotuchochea kumtolea Yehova utumishi mtakatifu yapasa kuwa upendo wenye kuhisiwa moyoni kwa Yehova, kwa kuitikia upendo wake usio na kipimo kwetu. Mtume Yohana aliandika hivi: “Yeye ambaye hapendi hajaja kujua Mungu, kwa sababu Mungu ni upendo. Kwa hili upendo wa Mungu ulifanywa dhahiri katika kisa chetu, kwa sababu Mungu alituma Mwana wake mzaliwa-pekee kuingia katika ulimwengu ili tuweze kupata uhai kupitia kwake. Kwa habari yetu, twapenda, kwa sababu yeye alitupenda sisi kwanza.” (1 Yohana 4:8, 9, 19) Kwa sababu ya shukrani zetu kwa Yehova, hangaiko letu kuu lapaswa kuwa kushuhudia utakaso wa jina lake takatifu na utetezi wa enzi kuu yake yenye uadilifu, wala si kupata wokovu wa kibinafsi.

15. Upendo wetu kwa Yehova unahusianaje na suala la enzi kuu yake?

¹⁵ Yehova ataka tumtumikie kwa sababu twampenda yeye, wala si Paradiso tu. Ensaiklopedia ya Biblia Insight on the Scriptures,a yataarifu hivi: “Yehova hufurahia jambo la kwamba enzi kuu yake na jinsi viumbe wake waitegemezavyo hutegemea upendo hasa. Yeye huwapenda tu wale wanaoipenda enzi kuu yake kwa sababu ya sifa zake bora na kwa sababu hiyo ni adilifu, wanaoipendelea enzi kuu yake kuliko nyingine yoyote. (1 Ko 2:9) Wao huchagua kutumikia chini ya enzi kuu yake badala ya kujaribu kujitegemea—hiyo ni kwa sababu ya ujuzi wao kumhusu yeye na upendo wake, haki yake, na hekima yake, ambazo wao hutambua zinazidi sana zao. (Zab 84:10, 11)”—Buku la 2, ukurasa wa 275.

16. Kani ya upendo kwa Kristo huchocheaje maisha yetu?

¹⁶ Tukiwa Wakristo, twaonyesha pia upendo kwa Yesu kwa sababu atupenda. Paulo alisababu hivi: “Upendo alio nao Kristo hutushurutisha, kwa sababu hili ndilo tumehukumu, kwamba mtu mmoja alikufa kwa ajili ya wote; kwa hiyo, basi, wote walikuwa wamekufa; naye alikufa kwa ajili ya wote ili wale waishio wapate kuishi si kwa ajili yao wenyewe tena, bali kwa ajili ya yeye aliyekufa kwa ajili yao na alifufuliwa.” (2 Wakorintho 5:14, 15) Kristo ndiye msingi hasa ambao juu yake uhai wetu wa kiroho, imani yetu, na tumaini letu vimejengwa. Kumpenda kwetu Kristo Yesu hutegemeza tumaini letu na kuimarisha imani yetu, hasa katika nyakati za dhoruba ya majaribu.—1 Wakorintho 3:11; Wakolosai 1:23; 2:6, 7.

17. Yehova hutupatia kani gani yenye nguvu, na umuhimu wa nguvu hiyo huonyeshwaje katika Matendo 1:8 na Waefeso 3:16?

¹⁷ Ingawa upendo wetu kwa Mungu na kwa Mwana wake ndiyo kani kuu inayotuchochea maishani mwetu tukiwa Wakristo, Yehova huandaa kitu kingine ambacho hutuchochea, hututia nguvu, na hutupa nguvu ya kusonga mbele katika utumishi wake. Hiyo ni kani yake ya utendaji, au roho takatifu. Neno la Kiebrania na la Kigiriki, yatafsiriwayo “roho” hasa hurejezea mwendo wa hewa wenye nguvu, kama vile upepo. Meli zenye kusafiri baharini kama zile ambazo Paulo alipanda zilitegemea kani isiyoonekana ya upepo ili kufika ziendako. Vivyo hivyo, twahitaji upendo na kani ya utendaji ya Mungu isiyoonekana ili meli yetu ya imani itusukume mbele katika utumishi wa Yehova.—Matendo 1:8; Waefeso 3:16.

Kusonga Mbele Kuelekea Shabaha Yetu!

18. Ni nini kitakachotusaidia kuvumilia mitihani yoyote ya wakati ujao ya imani yetu?

¹⁸ Imani yetu na upendo wetu vyaweza kutahiniwa vikali kabla ya kufika mfumo mpya wa mambo. Hata hivyo, Yehova ametuandalia nanga iliyo “hakika na imara”—tumaini letu zuri ajabu. (Waebrania 6:19; Waroma 15:4, 13) Upinzani na majaribu mengine vitupigapo kwa kurudiarudia, twaweza kuvumilia ikiwa tumelindwa na nanga ya tumaini letu. Baada ya wimbi moja la dhoruba kutulia na kabla jingine halijaanza, na tuazimie kutia nguvu tumaini letu na kuimarisha imani yetu.

19. Twaweza kudumishaje meli yetu ya imani ikiwa kwenye njia na kufika mahali salama pa ulimwengu mpya wa Mungu?

¹⁹ Kabla ya kutaja “nanga ya nafsi,” Paulo alisema hivi: “Twatamani kila mmoja wenu aonyeshe bidii ileile ya kazi [‘kuharakisha,’ NW, kielezi-chini] ili kuwa na uhakikisho kamili wa tumaini hadi mwisho, ili nyinyi msipate kuwa goigoi, bali mwe waigaji wa wale ambao kupitia imani na subira huzirithi ahadi.” (Waebrania 6:11, 12) Huku tukichochewa na upendo kwa Yehova na kwa Mwana wake na kutiwa nguvu na roho takatifu, acheni tudumishe meli yetu ya imani ikiwa kwenye njia hadi tufikie mahali salama pa ulimwengu mpya ambao Mungu ameahidi.

[Maelezo ya Chini]

Kwa Kupitia

◻ Paulo alitupa onyo gani kuhusu imani yetu?

◻ Wengine wamevunjikiwaje meli kiroho, na wengine wanapunguzaje mwendo?

◻ Ni sifa gani ya kimungu inayohitaji kuambatana na imani yetu?

◻ Ni nini kitakachotusaidia kufikia mahali salama pa ulimwengu mpya ambao Mungu ameahidi?

[Picha katika ukurasa wa 16]

Meli yetu ya imani lazima ijengwe vema ili kustahimili dhoruba za maisha

[Picha katika ukurasa wa 17]

Imani yetu yaweza kuvunjika kama vile kuvunjika kwa meli

[Picha katika ukurasa wa 18]

Tumaini ni nanga ya maisha yetu tukiwa Wakristo