“Jinsi Wema Wake Ulivyo Mwingi!”

1, 2. Wema wa Mungu ni mwingi kadiri gani, na Biblia inakaziaje sifa hiyo?

JUA linapozama, rangi maridadi zinaonekana angani, marafiki kadhaa wanafurahia kula chakula pamoja katika bustani, wanacheka na kuzungumza huku wakifurahia mandhari. Katika sehemu nyingine, mkulima anatazama mashamba yake na kutabasamu kwa sababu mawingu meusi yametanda angani na mvua imeanza kunyesha. Na sehemu nyingine, mume na mke wanafurahi sana kumwona mtoto wao akitembea kwa mara ya kwanza.

² Iwe wanajua au hawajui, watu hao wote wananufaika na jambo moja—wema wa Yehova Mungu. Baadhi ya watu wa dini hurudia-rudia maneno haya, “Mungu ni mwema.” Biblia inakazia sifa hiyo hata zaidi. Inasema: “Jinsi wema wake ulivyo mwingi kwelikweli!” (Zekaria 9:17) Lakini inaonekana kwamba ni watu wachache sana leo wanaojua maana ya maneno hayo. Wema wa Yehova Mungu unahusisha nini, na sifa hiyo inamnufaishaje kila mmoja wetu?

Njia Muhimu Ambayo Yehova Anaonyesha Upendo Wake

3, 4. Wema ni nini, na kwa nini inaweza kusemwa kwamba wema wa Yehova ni wonyesho wa upendo wake?

³ Katika lugha nyingi leo, neno “wema” halina maana hususa. Hata hivyo, Biblia inaonyesha kwamba wema ni sifa ya pekee sana. Sifa hiyo inamaanisha hasa wema wa adili. Hivyo, tunaweza kusema kwamba Yehova ni mwema kabisa. Sifa zake zote, kutia ndani nguvu zake, haki yake, na hekima yake ni nzuri sana. Ingawa hivyo, kwa kufaa wema unaweza kutajwa kuwa wonyesho wa upendo wa Yehova. Kwa nini?

⁴ Wema ni sifa inayoonyeshwa kwa matendo. Mtume Paulo alisema kwamba mtu mwema huwavutia wengine zaidi kuliko mtu mwadilifu. (Waroma 5:7) Mtu mwadilifu hutii matakwa ya sheria kwa uaminifu, lakini mtu mwema hufanya mengi zaidi. Anachukua hatua ya kwanza na kutafuta fursa za kuwasaidia wengine. Katika sura hii tutajifunza jinsi Yehova alivyo mwema. Ni wazi kwamba upendo wa Yehova usio na mipaka ndio chanzo cha wema wake.

5-7. Kwa nini Yesu alikataa kuitwa “Mwalimu Mwema,” na hivyo alithibitisha ukweli gani muhimu?

⁵ Yehova ni mwema kwa njia ya pekee. Muda mfupi kabla ya Yesu kufa, mtu fulani alimfikia ili kumuuliza swali na akamwita “Mwalimu Mwema.” Yesu akamwambia: “Kwa nini unaniita mwema? Hakuna aliye mwema, isipokuwa mmoja, Mungu.” (Marko 10:17, 18) Huenda ukashangazwa na jibu hilo. Kwa nini Yesu alimkosoa mtu huyo? Je, Yesu hakuwa “Mwalimu Mwema”?

⁶ Ni wazi kwamba mtu huyo alikuwa akimsifu Yesu kwa kutumia maneno “Mwalimu Mwema” kama cheo. Kwa unyenyekevu, Yesu alielekeza utukufu huo kwa Baba yake wa mbinguni, ambaye ni mwema kwa njia ya pekee. (Methali 11:2) Wakati huohuo, Yesu alikuwa akifundisha ukweli huu muhimu: Akiwa Mwenye Enzi Kuu, ni Yehova pekee aliye na haki ya kuamua mambo yaliyo mema na yaliyo mabaya. Adamu na Hawa walipokataa kumtii Yehova walionyesha kwamba walitaka kujiamulia wenyewe kuhusu lililo jema na lililo baya. Lakini kwa unyenyekevu Yesu alikubali kwamba Baba yake ndiye mwenye haki ya kuamua yaliyo mema na yaliyo mabaya.

⁷ Isitoshe, Yesu alijua kwamba Yehova ndiye Chanzo cha vitu vyote vyema. Yeye ni Mtoaji wa “kila zawadi njema na kila tuzo kamilifu.” (Yakobo 1:17) Tuone jinsi ambavyo ukarimu wa Yehova unathibitisha wema wake.

Mambo Yanayothibitisha Wema Mwingi wa Yehova

8. Yehova amewaonyeshaje wanadamu wote wema?

⁸ Kila mtu aliyewahi kuishi amenufaishwa na wema wa Yehova. Zaburi 145:9 inasema: “Yehova ni mwema kwa wote.” Ni mambo gani yanayoonyesha kwamba wema wake unamnufaisha kila mtu? Biblia inasema hivi: “Hakujiacha bila ushahidi kwa kuwa alitenda mema, akiwapa ninyi mvua kutoka mbinguni na majira ya mavuno, akiwashibisha kwa chakula na kuijaza mioyo yenu furaha.” (Matendo 14:17) Je, umewahi kufurahia chakula kitamu? Tunafurahia mlo mtamu kwa kuwa Yehova ameiumba dunia kwa njia ya pekee. Pia, amebuni mzunguko wa maji ambao unatokeza mvua na “majira ya mavuno.” Yehova amewatendea mema watu wote, hata wale wasiompenda. Yesu alisema hivi: “Huwaangazia jua lake waovu na wema, na hunyesha mvua juu ya waadilifu na wasio waadilifu.”​—Mathayo 5:45.

9. Tofaa linaonyeshaje wema wa Yehova?

⁹ Watu wengi hawathamini ukarimu mkubwa ambao Yehova anawaonyesha wanadamu kupitia jua, mvua, na majira ya matunda. Kwa mfano, fikiria tofaa. Tunda hilo husitawi sana katika maeneo mengi yenye joto duniani. Ni tunda tamu sana linalovutia, lina madini muhimu na maji ya kutosha. Je, unajua kwamba ulimwenguni pote kuna aina 7,500 hivi za matofaa yenye rangi mbalimbali kama vile nyekundu, rangi ya dhahabu, manjano, na rangi ya kijani-kibichi, na yana ukubwa mbalimbali, mengine ni makubwa kidogo kuliko zabibu na mengine ni kama chungwa? Tofaa lina mbegu ndogo. Lakini mbegu hiyo ndogo inatokeza mojawapo ya miti maridadi zaidi. (Wimbo wa Sulemani 2:3) Kila mwaka, mtofaa huchanua maua mengi yenye kuvutia na kuzaa matunda. Kwa muda wa miaka 75 hivi, mtofaa wa wastani huzaa katoni 20 za matunda kila mwaka, kila katoni ikiwa na uzito wa kilogramu 19!

10, 11. Hisi zetu zinathibitishaje wema wa Mungu?

¹⁰ Kwa kuwa Yehova ni mwema sana ametuumba kwa njia yenye “kustaajabisha.” Mwili wetu una uwezo wa kujifunza mengi zaidi kuhusu uumbaji wa Yehova na kuufurahia. (Zaburi 139:14) Fikiria mifano iliyotajwa mwanzoni mwa sura hii. Tunafurahia kuona mambo gani? Uso mwangavu wa mtoto anayetabasamu. Mvua kubwa inaponyesha. Jua linapozama na kufanya anga liwe na rangi nyekundu, dhahabu, na rangi ya zambarau. Jicho la mwanadamu linaweza kuona zaidi ya rangi 300,000! Na tunaweza kusikia na kutofautisha sauti mbalimbali zinazovutia, kama vile sauti ya mtu tunayempenda, mvumo wa upepo katika miti, na mtoto mchanga anapocheka. Ni nini kinachotuwezesha kufurahia mambo hayo? Biblia inasema: “Sikio linalosikia na jicho linaloona—Yehova ameviumba vyote viwili.” (Methali 20:12) Yehova ametupatia hisi gani nyingine zinazotuwezesha kufurahia maisha?

¹¹ Uwezo wetu wa kunusa ni uthibitisho mwingine wa wema wa Yehova. Pua ya mwanadamu inaweza kutofautisha harufu mbalimbali—inakadiriwa ina uwezo wa kunusa kati ya harufu elfu moja hivi hadi trilioni moja. Baadhi ya harufu hizo ni: harufu nzuri ya chakula upendacho kinapopikwa, harufu nzuri ya maua, ya majani makavu, na harufu ya moshi. Na hisi yako ya kugusa inakuwezesha kuhisi upepo unapovuma taratibu usoni mwako, kuhisi utulivu unapokumbatiwa na mpendwa wako, kuhisi tunda lenye ganda laini mkononi mwako. Unapong’ata tunda hilo, hisi yako ya kuonja inaanza kufanya kazi. Mdomo wako unafurahia ladha mbalimbali maji ya tunda hilo yanapogusa ulimi wako. Naam, tuna kila sababu ya kutangaza hivi kumhusu Yehova: “Jinsi wema wako ulivyo mwingi sana! Umewahifadhia wale wanaokuogopa!” (Zaburi 31:19) Lakini Yehova amewahifadhia wema jinsi gani wale wenye woga wa kimungu?

Wema Unaoleta Faida za Milele

12. Ni maandalizi gani kutoka kwa Yehova ambayo ni muhimu zaidi, na kwa nini?

¹² Yesu alisema: “Imeandikwa: ‘Mwanadamu hataishi kwa mkate tu, bali kwa kila neno linalotoka katika kinywa cha Yehova.’” (Mathayo 4:4) Kwa kweli, maandalizi ya kiroho kutoka kwa Yehova yanaweza kutufaidi kuliko maandalizi ya kimwili, kwa kuwa yatatuwezesha kuishi milele. Katika Sura ya 8 ya kitabu hiki, tuliona kwamba katika siku hizi za mwisho, Yehova ametumia uwezo wake wa kurudisha, kuleta paradiso ya kiroho. Jambo muhimu zaidi ni kwamba paradiso hiyo ina chakula tele cha kiroho.

13, 14. (a) Nabii Ezekieli aliona nini katika maono, nayo yanamaanisha nini kwetu leo? (b) Yehova amewapa watumishi wake waaminifu maandalizi gani ya kiroho ili waishi milele?

¹³ Katika mojawapo ya unabii mbalimbali muhimu wa kurudishwa, nabii Ezekieli alipata maono ya hekalu jipya lenye utukufu. Kijito kilichotiririka kutoka hekaluni humo, kilizidi kupanuka na kina chake kuongezeka hatua kwa hatua. Mto huo ulikuwa na matokeo mazuri popote ulipopita. Miti mingi ilisitawi kwenye kingo za mto huo, matunda yake yangetumika kama chakula, na majani yake yangeweza kuponya. Pia, mto huo uliyaponya maji ya Bahari ya Chumvi na kukawa na samaki wengi! (Ezekieli 47:1-12) Lakini maono hayo yalimaanisha nini?

¹⁴ Maono hayo ya hekalu yalimaanisha kwamba Yehova angerudisha ibada safi. Na ingefikia tena viwango vyake vya uadilifu. Kama tu maono hayo ya mto, Mungu atawapa watu wake maandalizi mengi yatakayowasaidia kuishi milele na kuongezeka zaidi na zaidi. Tangu kurudishwa kwa ibada safi mwaka wa 1919, Yehova amekuwa akiwaandalia watu wake. Jinsi gani? Kupitia Biblia, machapisho yanayotegemea Biblia, mikutano, na makusanyiko, mamilioni ya watu wamesaidiwa kujifunza kweli muhimu. Kupitia njia hizo, Yehova amewafundisha watu kuhusu uandalizi muhimu kwa ajili ya uhai, yaani, dhabihu ya fidia ya Kristo, ambayo inatusaidia kuwa na dhamiri safi mbele za Yehova na tumaini la uzima wa milele kwa wale wote wanaompenda Mungu kikweli na kumwogopa.a Kwa hiyo, watu wa Yehova wamekuwa wakifurahia karamu ya kiroho katika siku hizi za mwisho, huku ulimwengu ukiteseka kwa sababu ya njaa ya kiroho.​—Isaya 65:13.

15. Wema wa Yehova utawanufaishaje wanadamu waaminifu wakati wa Utawala wa Kristo wa Miaka Elfu Moja?

¹⁵ Lakini mto ambao Ezekieli aliona katika maono hautaacha kutiririka baada ya mfumo huu mwovu wa mambo kuharibiwa. Badala yake, utaendelea kutiririka hata zaidi wakati wa Utawala wa Kristo wa Miaka Elfu Moja. Kisha, kupitia Ufalme wa Kimasihi, Yehova atatumia thamani ya dhabihu ya Yesu kikamili ili wanadamu waaminifu wafikie ukamilifu hatua kwa hatua. Wakati huo tutashangilia sana kuona matokeo ya wema wa Yehova.

Njia Nyingine Ambazo Yehova Anatuonyesha Wema Wake

16. Biblia inaonyeshaje kwamba wema wa Yehova unatia ndani sifa nyingine? Taja baadhi ya sifa hizo.

¹⁶ Wema wa Yehova unatia ndani sifa nyingine mbali na ukarimu. Mungu alimwambia Musa hivi: “Nitaufanya wema wangu wote upite mbele ya uso wako, nami nitatangaza jina langu Yehova mbele yako.” Simulizi hilo linasema kwamba baadaye “Yehova alipita mbele yake akitangaza: ‘Mimi Yehova, Yehova, ni Mungu mwenye rehema na neema, si mwepesi wa hasira, nina upendo mwingi mshikamanifu na kweli.’” (Kutoka 33:19; 34:6, maelezo ya chini) Kwa hiyo, wema wa Yehova unatia ndani sifa kadhaa zenye kuvutia. Tuchunguze sifa mbili tu kati ya sifa hizo.

17. Neema ni nini, na Yehova amewaonyeshaje neema wanadamu duni wasio wakamilifu?

¹⁷ “Neema.” Sifa hii inatokana na neno ambalo pia linatafsiriwa kuwa “huruma” na inatueleza zaidi jinsi Yehova anavyowatendea viumbe wake. Watu wengi wenye mamlaka ni wakali au wakatili lakini Yehova ni mwenye fadhili. Kwa mfano, Yehova alimwambia hivi Abramu: “Tafadhali, inua macho yako, na kutoka mahali ulipo tazama kaskazini na kusini, mashariki na magharibi.” (Mwanzo 13:14) Tafsiri nyingi hazitaji neno “tafadhali.” Lakini wasomi wa Biblia wanasema kwamba maandishi ya awali ya Kiebrania yanatia ndani neno linalobadili sentensi hiyo kutoka kuwa amri na kuwa ombi la heshima. Kuna mifano mingine. (Mwanzo 31:12; Ezekieli 8:5) Fikiria hili, Mwenye Enzi Kuu ya ulimwengu anasema “tafadhali” anapoongea na wanadamu duni. Katika ulimwengu ambao watu wengi ni wakali, wachokozi, na wasio na adabu, je, haitii moyo kutafakari kuhusu neema za Mungu wetu Yehova?

18. Yehova ni ‘mwingi wa . . . kweli’ katika maana gani, na kwa nini maneno hayo yanatia moyo?

¹⁸ ‘Mwingi wa . . . kweli.’ Kusema uwongo ni zoea la kawaida ulimwenguni leo. Lakini Biblia inatukumbusha hivi: “Mungu si mwanadamu anayesema uwongo.” (Hesabu 23:19) Isitoshe, andiko la Tito 1:2 linasema kwamba ‘Mungu hawezi kusema uwongo.’ Hawezi kusema uwongo kwa sababu yeye ni mwema sana. Kwa hiyo, ahadi za Yehova zinategemeka kabisa; maneno yake hayawezi kamwe kukosa kutimia. Pia, Yehova anaitwa “Mungu wa ukweli.” (Zaburi 31:5) Mbali na kutosema uwongo, anaeneza ukweli kwa kiwango kikubwa sana. Yeye hafanyi mambo kwa kujificha au kwa siri, bali yeye huwafundisha watumishi wake waaminifu hekima yake isiyo na mipaka.b Hata anawafundisha jinsi ya kuishi kupatana na kweli hizo ili ‘waendelee kutembea katika kweli.’ (3 Yohana 3) Kuelewa kwamba Yehova ni mwema, kunamfanya kila mmoja wetu ahisije?

‘Ng’aa kwa Sababu ya Wema wa Yehova’

19, 20. (a) Ni katika njia gani Shetani alimfanya Hawa atilie shaka wema wa Yehova, na matokeo yalikuwa nini? (b) Wema wa Yehova unapaswa kutuchochea tufanye nini, na kwa nini?

¹⁹ Shetani alipomshawishi Hawa katika bustani ya Edeni, alianza kwa kumfanya atilie shaka wema wa Yehova. Yehova alikuwa amemwambia Adamu hivi: “Unaweza kula matunda ya kila mti katika bustani mpaka ushibe.” Yehova alimkataza kula matunda ya mti mmoja tu kati ya maelfu ya miti yenye kuvutia iliyokuwa bustanini. Hata hivyo, angalia swali ambalo Shetani alimwuliza Hawa: “Je, ni kweli kwamba Mungu alisema msile matunda ya kila mti wa bustani?” (Mwanzo 2:9, 16; 3:1) Shetani alipotosha maneno ya Yehova ili amsadikishe Hawa kwamba Yehova alikuwa akimnyima kitu fulani kizuri. Kwa kusikitisha, Hawa alidanganyika. Hawa alianza kutilia shaka wema wa Mungu ambaye alikuwa amempa kila kitu alichokuwa nacho. Wanaume na wanawake wengi walioishi baadaye walifuata mfano wake.

²⁰ Tunajua kwamba wanadamu wote wanakabili maumivu na huzuni kwa sababu Hawa na watu wengine walitilia shaka kwamba Yehova ni mwema. Basi na tujifunze kutokana na maneno ya Yeremia 31:12: “Watakuja . . . kung’aa kwa sababu ya wema wa Yehova.” Bila shaka, tunapaswa kung’aa kwa shangwe kwa sababu ya wema wa Yehova. Hatupaswi kamwe kutilia shaka kusudi la Mungu wetu ambaye ni mwema sana. Tunaweza kumtumaini kabisa kwa sababu anataka wale wanaompenda wawe na maisha bora.

21, 22. (a) Ungependa kuonyesha katika njia zipi kwamba unathamini wema wa Yehova? (b) Tutazungumzia sifa gani katika sura inayofuata, na sifa hiyo inatofautianaje na wema?

²¹ Tunafurahi sana tunapopata nafasi ya kuwaambia wengine kuhusu wema wa Mungu. Zaburi 145:7 inasema hivi kuhusu watu wa Yehova: “Watabubujikwa na maneno wanapokumbuka wema wako mwingi.” Kila siku tunafaidika kwa njia fulani na wema wa Yehova. Kwa nini usiwe na zoea la kumshukuru Yehova kila siku kwa sababu ya jambo hususa linaloonyesha wema wake? Kutafakari na kumshukuru Yehova kila siku kwa sababu ya wema wake, na kuwaambia wengine kuhusu sifa hiyo kutatusaidia kumwiga Mungu wetu mwema. Tunapotafuta njia za kuiga wema wa Yehova tutamkaribia zaidi. Mtume Yohana aliandika hivi alipokuwa amezeeka: “Mpendwa, usiige yaliyo mabaya, bali iga yaliyo mema. Mtu anayetenda mema anatokana na Mungu.”​—3 Yohana 11.

²² Wema wa Yehova unahusiana pia na sifa nyingine. Kwa mfano, Mungu ana “upendo mwingi mshikamanifu.” (Kutoka 34:6) Tofauti na wema, Yehova hawaonyeshi watu wote sifa hiyo bali anawaonyesha hasa watumishi wake waaminifu. Katika sura inayofuata, tutajifunza jinsi anavyofanya hivyo.